#World_News
Published 20 January 2025

▪️ အမေရိကန်မှာ TikTok ၁၄ နာရီလောက် ပြတ်တောက်သွားပြီးနောက် ပြန်ပွင့်လာခဲ့ပါပြီ။

▪️ တရုတ်အခြေစိုက် မူရင်းကုမ္ပဏီ ByteDance ကနေ မခွဲထွက်ပါက နိုင်ငံတဝှမ်းမှာ TikTokအက်ပ်ကို ပိတ်ပင်သွားမယ်ဆိုတဲ့ ဥပဒေနဲ့အညီ စနေနေ့ညမှာ အော့ဖ်လိုင်းဖြစ်ခဲ့ပါတယ်။

▪️ ဒီဥပဒေကို ပြီးခဲ့တဲ့ သီတင်းပတ်က တရားရုံးချုပ်ကနေ အတည်ပြုခဲ့တာ ဖြစ်ပါတယ်။

▪️ ပိတ်ပင်တားမြစ်ချက်အတိုင်း စနေနေ့မှာ Google နဲ့ Apple တို့က ယင်းတို့စတိုးနေရာတွေကနေ TikTokကို ဖယ်ရှားခဲ့သလို web-hostingကုမ္ပဏီများအနေဖြင့်လည်း TikTokကို back-end ဝန်ဆောင်မှုပေးခြင်းမှ တားမြစ်ထားပါတယ်။
ဥပဒေအရ ချိုးဖောက်တဲ့ကုမ္ပဏီတွေဟာ ဒေါ်လာဘီလီယံနဲ့ချီ ဒဏ်ကြေးပေးဆောင်ရမယ်လို့ ဖော်ပြထားပါတယ်။

▪️ တနင်္ဂနွေနံနက်က ဒေါ်နယ်ထရမ့်ဟာ TikTok ပြတ်တောက်သွားခြင်းကို Truth Social မှာ ပို့စ်တင်ပြီး ပြန်ပြောင်းပေးခဲ့ပါတယ်။

▪️ အသစ်ပြောင်းလာမယ့် အစိုးရအဖွဲ့က TikTokအနာဂတ်ကို လုပ်ဆောင်နေပြီး TikTokကို ဝန်ဆောင်ပေးနေတဲ့ နည်းပညာကုမ္ပဏီများကို တာဝန်ယူကာကွယ်မှု သက်တမ်းတိုးချဲ့သွားမှာဖြစ်ကာ ဥပဒေကို ရပ်ဆိုင်းသွားဖို့ ကတိပြုကြောင်း ဖော်ပြထားပါတယ်။

▪️ အဲဒီနောက်မှာပဲ Oracle နဲ့ Akamai အပါအဝင် web support ပေးနေတဲ့ ကုမ္ပဏီတွေဟာ အမေရိကန်က သန်းနဲ့ချီရှိနေတဲ့ TikTok အသုံးပြုသူတွေထံ ပြန်ဖွင့်ပေးခဲ့ပါတယ်။

▪️ မိုဘိုင်းလောကမှာ အင်အားကြီးအက်ပ်စတိုးတွေ ဆောင်ရွက်ပေးနေတဲ့ Apple နဲ့ Google တို့ကတော့ TikTok ကို ပြန်လည်ခွင့်ပြုဖို့ လက်မခံသေးပါဘူး။

▪️ ထိုကုမ္ပဏီနှစ်ခုမှ ဆောင်ရွက်ခွင့်မပေးပါက သုံးစွဲသူအသစ်တွေ TikTokကို ဒေါင်းလုဒ်မဆွဲနိုင်သလို ဆော့ဖ်ဝဲပြဿနာကို ဖြေရှင်းဖို့ အပ်ဒိတ်များ မရနိုင်ဘဲ အက်ပ်အတွင်းဝယ်ယူမှုတွေ ရပ်တန့်သွားနိုင်ပါတယ်။

▪️ ပိတ်ပင်ခြင်းဥပဒေအရ TikTok ရောင်းချခြင်းမပြုမီ ဝန်ဆောင်မှုပေးခြင်းဟာ အသုံးပြုသူတစ်ဦးရှိလျှင် ဒဏ်ကြေးဒေါ်လာ ၅ ထောင်ကျနိုင်တာကြောင့် ဘီလီယံနဲ့ချီ ပေးဆောင်ရနိုင်ပါတယ်။

▪️ စတင်သက်ရောက်နေပြီဖြစ်တဲ့ ဥပဒေတစ်ခုရဲ့ ရက်စွဲကို ထရမ့်အနေနဲ့ ရွှေ့ဆိုင်းခွင့်မရှိဘူးလို့ အထက်လွှတ်တော် ထောက်လှမ်းရေးကော်မတီ ဥက္ကဌ တွမ်ကော့တန်က ပြောလိုက်ပါတယ်။

▪️ ByteDanceထံကနေ TikTok မခွဲထွက်ရသေးခင် ဝန်ဆောင်မှုပေးနေတဲ့ ကုမ္ပဏီတွေဟာလည်း နောက်ဆက်တွဲတွေ ရင်ဆိုင်ရနိုင်တယ်လို့ မှတ်ချက်ပြုသွားပါတယ်။

#Source: NPR

#Local_News
Published_ 20 January 2025

▪️ မလေးရှားနိုင်ငံ၊ လန်ကာဝီမြို့၌ ဇန်နဝါရီ ၁၉ ရက်တွင် ပြုလုပ်ခဲ့သည့် အာဆီယံ နိုင်ငံခြားရေးဝန်ကြီးများ သီးသန့်အစည်းအဝေးသို့ နိုင်ငံခြားရေးဝန်ကြီးဌာန၊ အမြဲတမ်းအတွင်းဝန် ဦးဆောင်သော မြန်မာကိုယ်စားလှယ်အဖွဲ့ ပါဝင်တက်ရောက်ခဲ့ပါတယ်။

▪️ အဆိုပါအစည်းအဝေးသို့ အာဆီယံအဖွဲ့ဝင်နိုင်ငံများမှ နိုင်ငံခြားရေးဝန်ကြီးများနှင့် အာဆီယံ အတွင်း‌ရေးမှူးချုပ်တို့ တက်ရောက်ခဲ့တယ်။

▪️ အစည်းအဝေးတွင် ၂၀၂၅ ခုနှစ်အတွင်း အာဆီယံအလှည့်ကျဥက္ကဋ္ဌ မလေးရှားနိုင်ငံ၏ ဦးစားပေး လုပ်ငန်းစဉ်များ အကောင်အထည်ဖော်မည့်အစီအစဉ်များ ဆွေးနွေးပြောကြားခဲ့ပြီး၊ အာဆီယံ နိုင်ငံခြားရေးဝန်ကြီးများက အာဆီယံမိတ်ဖက်နိုင်ငံများနှင့် ဆက်ဆံရေး၊ အာဆီယံ၏ ပြင်ပ ဆက်ဆံရေးနှင့် ဒေသတွင်းနှင့် နိုင်ငံတကာအရေးကိစ္စများနှင့် အာဆီယံ၏ တူညီဆန္ဒ(၅) ချက် အကောင်ထည်ဖော်မှုအခြေအနေများအပေါ် အမြင်ချင်းဖလှယ် ဆွေးနွေးခဲ့ကြပါတယ်။

▪️ မြန်မာကိုယ်စားလှယ်အဖွဲ့ခေါင်းဆောင်က အာဆီယံ၏ တူညီဆန္ဒ (၅)ချက်အပေါ် မြန်မာနိုင်ငံမှ ပူးပေါင်းဆောင်ရွက်မှုများ၊ နိုင်ငံတော်တည်ငြိမ်အေးချမ်းရေးနှင့် ရွေးကောက်ပွဲ ကျင်းပနိုင်ရေး အတွက် အစိုးရ၏ ကြိုးပမ်းဆောင်ရွက်နေမှုများအကြောင်း ဆွေးနွေးခဲ့ပါတယ်။

▪️ ဇန်နဝါရီ ၁၈ ရက်တွင် ပြုလုပ်ခဲ့တဲ့ အာဆီယံအဆင့်မြင့်အရာရှိကြီးများအစည်းအဝေးသို့ အာဆီယံရေးရာဦးစီးဌာန ညွှန်ကြားရေးမှူးချုပ် ဦးဆောင်သော မြန်မာကိုယ်စားလှယ်အဖွဲ့ တက်ရောက်ခဲ့ပြီး၊ အာဆီယံအသိုက်အဝန်းမျှော်မှန်းချက်-၂၀၄၅ ရေးဆွဲမှုအခြေအနေ၊ အာဆီယံ ချစ်ကြည်ရေးနှင့် ပူးပေါင်းဆောင်ရွက်ရေး စာချုပ်အဖွဲ့ဝင်အဖြစ် လျှောက်ထားမှုအခြေအနေနှင့် အာဆီယံဆွေးနွေးဖက်နိုင်ငံများနှင့် ဆက်ဆံရေးအခြေအနေတို့ကို ဆွေးနွေးခဲ့ကြပြီး၊ မြန်မာနိုင်ငံမှ အာဆီယံ-ရုရှား ဆက်ဆံရေး ညှိနှိုင်းမှုတာဝန်များ ဆောင်ရွက်ကာ နှစ်ဖက်ဆက်ဆံရေး မြှင့်တင်နိုင်မည့် နည်းလမ်းများရှာဖွေသွားမှာဖြစ်ကြောင်း သတင်းရရှိပါတယ်။

#Ymg_mnn
#Yangon_Media_Group

#World_Health
Published 20 January 2025

▪️ အသက် ၅၀ ကျော်လာတဲ့အခါ စားလိုက်တဲ့ အစားအစာတွေက ငယ်စဉ်ကနဲ့ ကွဲပြားစွာ သက်ရောက်လာတာ သတိထားမိမှာပါ။

▪️ အသက်ကြီးလာတဲ့အခါ အာဟာရဓာတ် လိုအပ်ချက် ပြောင်းလဲလာနိုင်ပါတယ်။
အရိုးထုထည် လျော့နည်းလာသလို ဇီဝကမ္မဖြစ်စဉ် နှေးကွေးလာပြီး နှလုံးအခြေအနေလည်း ထိခိုက်လာပါတယ်။

▪️ အသက် ၅၀ ကျော်သူများ စားသုံးသင့်တဲ့ အစားအစာတွေကို အသိအမှတ်ပြု အာဟာရပညာရှင်က မျှဝေသွားပါတယ်။

(၁) ဟင်းခတ်အမွှေးပင်များ
▪️ အနံ့အရသာအတွက် ဆားအသုံးပြုမယ့်အစား နံနံပင်၊ ကုံကုမံ၊ ရို့စ်မယ်ရီတို့လို ဟင်းခတ်ပင်တွေက ကျန်းမာရေးအတွက် သင့်လျော်စေတယ်လို့ NYU လန်ဂုန်ဆေးရုံမှ ဒေါက်တာ နီနာဘလက်ချ်မန်းက ပြောပါတယ်။

(၂) ပဲအမျိုးမျိုး
▪️ ကုလားပဲ၊ ပဲကြီးတို့က အမျှင်ဓာတ်ကြွယ်ဝစွာ ပါဝင်ပြီး နှလုံးကျန်းမာရေး၊ သွေးတွင်းသကြားဓာတ် ထိန်းသိမ်းခြင်း၊ ကိုယ်အလေးချိန် ထိန်းခြင်းတို့အတွက် အရေးကြီးပါတယ်။

(၃) အဆီနည်းသောဒိန်ခဲပျော့
▪️ ပရိုတိန်းကြွယ်ဝသလို လတ်ဆတ်တဲ့ အသီးအနှံနဲ့ တွဲစားနိုင်ပြီး သွေးပေါင်ချိန်တက်မှာ စိုးရိမ်ရင် ဆားနည်းပါးတဲ့ ဒိန်ခဲပျော့ ရွေးချယ်သင့်ပါတယ်။

(၄) အစိမ်းရင့်ရောင်ဟင်းရွက်
▪️ ဟင်းနုနွယ်၊ ကိုက်လံ၊ ဂေါ်ဖီထုပ်၊ ပန်းဂေါ်ဖီစိမ်းတို့က အမျှင်ဓာတ်၊ သံဓာတ်၊ မဂ္ဂနီဆီယံ၊ ပိုတက်ဆီယံ၊ ကယ်လ်စီယံတို့ ကြွယ်ဝပြီး နှလုံးကျန်းမာရေးကို ထောက်ပံ့ပေးပါတယ်။

(၅) ဆော်လ်မွန်
▪️ အိုမီဂါ-၃ ဖက်တီးအက်ဆစ်ကြွယ်ဝတဲ့ ဆော်လ်မွန်က နှလုံးကျန်းမာရေး၊ ဦးနှောက်ကျန်းမာရေးတို့အတွက် အကျိုးရှိစေပြီး ပြည့်ဝဆီနည်းပါးပါတယ်။

(၆) အစေ့အဆန်များနှင့် အခွံမာသီးများ
▪️ ဗာဒံသီး၊ သစ်ကြားသီး၊ လျှော်စေ့၊ ချီယာစေ့တို့က အကျိုးပြုဆီ၊ အမျှင်ဓာတ်၊ မရှိမဖြစ် အာဟာရဓာတ်များ ကြွယ်ဝပြီး ကိုလက်စ်ထရောလ်ပမာဏ ထိန်းသိမ်းပေးပါတယ်။

(၇) အဆီနည်းသောပရိုတိန်း
▪️ သားကြီးငါးကြီးမှ ပရိုတိန်းတွေထက် ကြက်ဘဲ၊ ကြက်ဥ၊ အပင်အခြေပြု ပရိုတိန်းတို့က ကြွက်သား ထိန်းသိမ်းခြင်း၊ ကိုယ်ခံအားစနစ်၊ ဒဏ်ရာသက်သာခြင်းတို့အတွက် အရေးပါပါတယ်။

(၈) ဘယ်ရီသီးများ
▪️ စတော်ဘယ်ရီ၊ ဘလူးဘယ်ရီ၊ ဘလက်ခ်ဘယ်ရီတို့က ဓာတ်တိုးဆန့်ကျင်ပစ္စည်းများ ကြွယ်ဝသဖြင့် ကင်ဆာဆန့်ကျင်ပေးပြီး အသက် ၅၀ ကျော်သူတွေမှာ ကျန်းမာရေးအကျိုးကျေးဇူး ပေးစွမ်းနိုင်ပါတယ်။

(၉) ဂျုံ၊ပြောင်း၊ဆန်
▪️ ဆန်ညို၊ ဂျုံ၊ အုတ်ဂျုံတို့က အမျှင်ဓာတ်နဲ့ ကာဗိုဟိုက်ဒရိတ်အုပ်စု ကြွယ်ဝပြီး စွမ်းအင်ထောက်ပံ့ပေးပါတယ်။

#Source: BuzzFeed

၁၉ ဇန်နဝါရီ ၂၀၂၅
▪️စနေနေ့ညနှောင်းပိုင်းက စပြီး TikTok တစ်တော့ခ်ဟာ အမေရိကန်ပြည်ထောင်စုမှာ စတင်အသုံးပြုလို့မရတော့ပါဘူး။
▪️အက်ပ်ပဲလ်နှင့် ဂူဂယ်လ် အက်ပလီကေးရှင်းစတိုးတွေကနေလည်း တစ်တော့ကိုဖယ်ရှားလိုက်ပါပြီ။ ▪️အမေရိကန်မှာ အသုံးပြုသူ သန်း၁၇၀ကျော်ရှိနေတဲ့ တစ်တော့ခ်ဟာ ဥပဒေအရ ပိတ်ပစ်ခံလိုက်ရပြီဖြစ်ပါတယ်။
▪️အဲဒီအတွက် အမေရိကန်မှာ တစ်တော့ခ်အသုံးပြုသူတွေက ဝေဖန်နေကြပါတယ်။
▪️ထရမ့်ကတော့ သူသမ္မတဖြစ်ဖြစ်ချင်း တစ်တော့ကို နောက်ထပ်သုံးလအသုံးပြုခွင့်တိုးသွားဖို့ရှိနေတယ်လို့ ပြောထားပါတယ်။
Source : Reuters/ CCTV+

#World_Health
Published 19 January 2025

▪️ တစ်နေ့တာ ပင်ပန်းနွမ်းနယ်မှုတွေကို ဖြေလျှော့ဖို့က လွယ်ကူပေမယ့် အာဟာရဓာတ်ချို့တဲ့ပြီး အားအင်နည်းပါးတာကိုတော့ အရေးတကြီး ဖြေရှင်းသင့်ပါတယ်။

▪️ လုံလောက်စွာ အနားယူပြီးသည့်တိုင်အောင် ကိုက်ခဲနာကျင်တာမျိုးတွေ ရှိနေသေးရင်တော့ ဘယ်လိုအာဟာရဓာတ် လိုအပ်နေလဲဆိုတာ စဉ်းစားကြည့်သင့်ပါပြီ။

▪️ ခန္ဓာကိုယ်က လိုအပ်တဲ့ အာဟာရဓာတ်များ ရရှိဖို့ မျှတစွာ စားသုံးဖို့က အရေးကြီးပါတယ်။

▪️ အားအင်ယုတ်လျော့စေတဲ့အထိ ဖြစ်စေတဲ့ ဗိုက်တာမင်ချို့တဲ့မှုတွေထဲမှာ ဗိုက်တာမင်-ဘီ၁၂က အရေးကြီးပါတယ်။

▪️ သူက သွေးနီဥဆဲလ်များ ထုတ်လုပ်ရာမှာ ပါဝင်ပြီး ချို့တဲ့ပါက သွေးအားနည်းရောဂါ ဖြစ်တတ်ပါတယ်။

▪️ ဗိုက်တာမင်-ဘီ၁၂ ကြွယ်ဝတဲ့ အစားအစာတွေက အသား၊ ငါး၊ ကြက်၊ ဘဲ၊ ကြက်ဥ၊ နို့ထွက်ပစ္စည်းများ၊ ဒိန်ချဉ်နဲ့ အားဆေးများ ဖြစ်ပါတယ်။

▪️ ကမ္ဘာတဝှမ်းမှာ ဗိုက်တာမင်-ဒီ ချို့တဲ့လာကြပြီး နေထိုင်မှုပုံစံများနဲ့ ပတ်သက်နေပါတယ်။

▪️ နေရောင်ခြည်နဲ့ ထိတွေ့ခြင်းမှ အဓိကရရှိသလို အချို့သောငါး၊ နို့တို့မှာလည်း ပါဝင်ပါတယ်။

▪️ ဗိုက်တာမင်-ဒီ ချို့တဲ့ပါက ခေါင်းကိုက်ခြင်း၊ အရိုးငြမ်းကိုက်ခဲခြင်း၊ အားနည်းခြင်း၊ စိတ်ဓာတ်ကျခြင်း၊ ဦးနှောက်စွမ်းရည် ချို့ယွင်းခြင်းတို့ ဖြစ်လာနိုင်ပါတယ်။

▪️ သံဓာတ်စုပ်ယူမှုနဲ့ စွမ်းအင်ဇီဝဖြစ်စဉ်ကို ထောက်ပံ့တဲ့ ဗိုက်တာမင်-စီ ချို့တဲ့ပါက ခန္ဓာကိုယ်မှာ ရောဂါဝင်တတ်ပြီး ဒဏ်ရာသက်သာမှု နှောင့်နှေးစေပါတယ်။

▪️ သံဓာတ်မလုံလောက်ပါက သွေးနီဥဆဲလ် နည်းပါးသွားပြီး ပင်ပန်းနွမ်းနယ်စေပါတယ်။

▪️ အသားကြီး၊ ကြက်ဥ၊ ထမင်း၊ ပဲကြီးနဲ့ သံဓာတ်အားဖြည့်ဆေးတို့က ခန္ဓာကိုယ်တွင်း သံဓာတ်ပြန်ဖြည့်ပေးနိုင်ပါတယ်။

▪️ အိုမီဂါ-၃ ဖက်တီးအက်ဆစ် ချို့တဲ့ပါက ဦးနှောက်ကျန်းမာရေးကို ထိခိုက်စေသလို ပင်ပန်းနွမ်းနယ်ခြင်း၊ ပူပန်မှုမြင့်မားခြင်း၊ စိတ်ဓာတ်ကျခြင်းတို့ ဖြစ်စေနိုင်ပါတယ်။

▪️ အဆီပါသောငါး၊ လျှော်စေ့၊ ချီယာစေ့၊ သစ်ကြားသီးတို့စားခြင်းဖြင့် အိုမီဂါ-၃ ဖက်တီးအက်ဆစ်ရရှိနိုင်ပါတယ်။

▪️ ဗိုက်တာမင်နဲ့ သတ္တုဓာတ် ချို့တဲ့မှု ဖြေရှင်းဖို့အတွက် အာဟာရမျှတစွာ စားသုံးခြင်း၊ အာဟာရဖြည့်တင်း အစားအစာစားသုံးခြင်း၊ ဖြည့်စွက်ဆေးသုံးစွဲခြင်း၊ အာဟာရဓာတ်ပေါများတဲ့ ပစ္စည်းများဖြင့် ချက်ပြုတ်ခြင်း၊ ရေဓာတ်ပြည့်ဝအောင် နေထိုင်ခြင်းတို့ ပြုလုပ်နိုင်ပါတယ်။

#Source: Times of India

#World_Health
Published 19 January 2025

▪️ အမျိုးသားတွေရဲ့ အဓိကဟော်မုန်း တက်စ်တိုစတီရုန်းက ကြွက်သားထုထည်၊ အရိုးသိပ်သည်းဆ၊ ကြံ့ခိုင်သန်စွမ်းမှုတို့ ထိန်းသိမ်းရာမှာ အရေးပါပါတယ်။

▪️ အသက်အရွယ်အရ တက်စ်တိုစတီရုန်းပမာဏ ကျဆင်းလာတတ်ပေမယ့် စားသောက်နေထိုင်မှုပုံစံတွေနဲ့ မြှင့်တင်ပေးနိုင်ပါတယ်။

▪️ တက်စ်တိုစတီရုန်း လျော့နည်းပါက အမျိုးသားတွေရဲ့ ကျန်းမာရေး ထိခိုက်နိုင်ပြီး လိင်စိတ်ဆန္ဒ ကျဆင်းခြင်း၊ နွမ်းနယ်ခြင်း၊ ကြွက်သားဆုံးရှုံးခြင်း၊ စိတ်အပြောင်းအလဲဖြစ်ခြင်းတို့ ဖြစ်နိုင်ပါတယ်။

▪️ တက်စ်တိုစတီရုန်းပမာဏ မြင့်မားလာအောင် လုပ်နိုင်မယ့် သဘာဝနည်းလမ်းများ ဖော်ပြလိုက်ပါတယ်။

(၁) ပုံမှန်လေ့ကျင့်ခန်းပြုလုပ်ခြင်း
▪️ လေ့ကျင့်ခန်းတွေကို ပုံမှန်ပြုလုပ်ဖို့က အရေးကြီးပြီး ပြင်းထန်မှုမြင့်မားတဲ့ လေ့ကျင့်ခန်းတွေက တက်စ်တိုစတီရုန်းပမာဏကို သိသာစွာ မြှင့်တင်ပေးကာ ကြွက်သားထုထည်၊ ခွန်အား၊ ဇီဝဖြစ်စဉ်ကျန်းမာရေးတို့ တိုးတက်စေပါတယ်။

(၂) မျှတစွာစားသုံးခြင်း
▪️ အာဟာရမျှတတဲ့ အစားအစာတွေက ဟော်မုန်းတွေကို ထိန်းညှိပေးပြီး ဇင့်၊ မဂ္ဂနီဆီယံ၊ ဗိုက်တာမင်-ဒီတို့က တက်စ်တိုစတီရုန်း ထုတ်လုပ်မှုအတွက် အရေးကြီးကာ ဟော်မုန်းထုတ်လုပ်မှု၊ ခွန်အား၊ ကျန်းမာရေးတို့ကို ထောက်ပံ့ပေးပါတယ်။

(၃) လုံလောက်စွာအိပ်စက်ခြင်း
▪️ အိပ်စက်မှုမလုံလောက်ပါက တက်စ်တိုစတီရုန်း လျော့ကျလာနိုင်ပြီး တစ်နေ့ကို ၇-၉ နာရီလောက် ကောင်းမွန်စွာ အိပ်စက်သင့်ပါတယ်။

(၄) ဖိစီးမှုလျှော့ချခြင်း
▪️ ဖိစီးမှုရေရှည်ခံစားရပါက တက်စ်တိုစတီရုန်း ထိခိုက်နိုင်ပြီး တရားထိုင်ခြင်း၊ ယောဂကျင့်ခြင်း၊ အသက်ပြင်းပြင်းရှူခြင်းတို့ဖြင့် ထိန်းသိမ်းနိုင်ပါတယ်။

(၅) ပိုလျှံသောကိုယ်အလေးချိန်လျှော့ချခြင်း
▪️ အဝလွန်ခြင်းကြောင့် တက်စ်တိုစတီရုန်းပမာဏ လျော့ကျတာနဲ့ ဆက်စပ်နေပြီး အစားအစာ၊ လေ့ကျင့်ခန်းတို့ ပြုလုပ်ပြီး ကိုယ်အလေးချိန်လျှော့ချကာ တက်စ်တိုစတီရုန်း ပြန်မြှင့်တင်ပေးနိုင်ပါတယ်။

(၆) အယ်လ်ကိုဟောကန့်သတ်ခြင်း
▪️ အယ်လ်ကိုဟော အလွန်အကျွံ သောက်သုံးပါက တက်စ်တိုစတီရုန်း လျော့ကျနိုင်ပြီး တော်သင့်ရုံသာ သောက်သုံးသင့်ပါတယ်။

(၇) ဗိုက်တာမင်-ဒီ လုံလောက်အောင်နေခြင်း
▪️ တက်စ်တိုစတီရုန်း ထုတ်လုပ်ဖို့အတွက် ဗိုက်တာမင်-ဒီ မရှိမဖြစ်လိုအပ်ပြီး နေရောင်ခြည်ထိတွေ့ခြင်းကနေ အများဆုံးရရှိနိုင်ကာ ကိုယ်ခံအားလုပ်ဆောင်ချက်၊ အရိုးကျန်းမာရေး၊ ဟော်မုန်းမျှခြေတို့ မြှင့်တင်ပေးပါတယ်။

(၈) ကျန်းမာရေးညီညွတ်အဆီစားသုံးခြင်း
▪️ အိုမီဂါ-၃ ဖက်တီးအက်ဆစ်လိုမျိုး အဆီတွေက ဟော်မုန်းထုတ်လုပ်ဖို့ အရေးပါပြီး ထောပတ်သီး၊ အဆီပါသောငါး၊ သံလွင်ဆီတို့က တက်စ်တိုစတီရုန်းကို ထောက်ပံ့ပေးပါတယ်။

(၉) ဟော်မုန်းထိခိုက်စရာများရှောင်ရှားခြင်း
▪️ ပလတ်စတစ်၊ ပိုးသတ်ဆေး၊ တစ်ကိုယ်ရည်သုံးပစ္စည်းအချို့မှာ တွေ့ရတဲ့ ဓာတုပစ္စည်းတွေက ဟော်မုန်းညီမျှမှုကို နှောင့်ယှက်တာကြောင့် သတိထားရှောင်ရှားရပါမယ်။

#Source: DoctorNDTV

အမေရိကန်မှ TikTokဒုက္ခသည်နှစ်ဦးက အက်ပလီကေးရှင်း ပိတ်ပင်ခံရနိုင်တဲ့ အခြေအနေအပေါ် အမြင်များပြောပြသွားပြီး ဘာလို့တရုတ်ဆိုရှယ်မီဒီယာ RedNoteကို ပြောင်းသုံးလာလဲဆိုတာ ရှင်းပြသွားပါတယ်။
#World_News
Published 18 January 2025
#TikTok #RedNoteအက်ပလီကေးရှင်း
#YMG #Yangon_Times #Yangon_Media_Group

#Daily_News
Published 18 January 2025

၁။ ဒိန်းမတ်အကူအညီဖြင့် ကလေးပျော်စင်တာများ ဆက်လက်ဖွင့်လှစ်မည်

၂။ ရွှေလုပ်ငန်းလိုင်စင်သစ်ကြောင့် ရွှေဆိုင်တစ်ချို့လုပ်ငန်းပိတ်သိမ်းသည်မှာ မဟုတ်မှန်

၃။ သီလဝါဘက်စုံသုံး ကုန်သေတ္တာဆိပ်ကမ်းတံတားအတွက်နှစ်ရှည်လုပ်ပိုင်ခွင့် တင်ဒါခေါ်ယူ

၄။ အမေရိကန်မှ TikTok သုံးစွဲသူများ တရုတ်ပြည်ထုတ် RedNote အက်ပလီကေးရှင်း ပြောင်းလဲအသုံးပြုလာကြ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#Local_News
Published 18 January 2025

▪️ ပြည်တွင်းသို့ ရေထွက်ကုန်တင်သွင်းလိုသည့် လုပ်ငန်းရှင်များအတွက် အီလက်ထရောနစ်အခြေပြု မြန်မာအလိုအလျောက်ကုန်စည်ရှင်းလင်းရေးစနစ် (Myanmar Automated Cargo Clearance System – MACCS) စနစ်ကို ဖေဖော်ဝါရီလတွင် စတင်သွားမည်ဖြစ်ကြောင်း အကောက်ခွန်ဦးစီးဌာနမှ သိရသည်။

▪️ ထို့ကြောင့် သွင်းကုန်လုပ်ငန်းရှင်များအနေဖြင့် ဇန်နဝါရီလ ၁၅ ရက်နေ့မှ စတင်ကာ အကောက်ခွန်ဦးစီးဌာနတွင် MACCS User Code ဖြင့် E-Token များကို Company Letter Head ကတိခံဝန်ချက်လျှောက်လွှာ၊ လျှောက်ထားသူ၏ မှတ်ပုံတင်၊ IE Code၊ Application Form (UR-1)၊ ကုမ္ပဏီမှတ်ပုံတင်လက်မှတ်၊ ပို့ကုန်/သွင်းကုန်လုပ်ငန်းရှင်လက်မှတ်များကို ပူးတွဲတင်ပြရမည်ဖြစ်ကြောင်း၊ ထို့အပြင်လုပ်ငန်းရှင်များအနေဖြင့် ပြည်ပမှ ရေထွက်ကုန်ပစ္စည်းများတင်သွင်းခြင်းမပြုမီ ကုမ္ပဏီမှတ်ပုံတင်လက်မှတ်၊ ထုတ်ကုန်/သွင်းကုန်လုပ်ငန်းမှတ်ပုံတင်၊ အရောင်းအဝယ်စာချုပ်၊ ကုန်ထုတ်ပိုးမှု၊ ပင်ရင်းဒေသသက်သေခံလက်မှတ်၊ Health / Sanitary Certificate ၊ မြန်မာနိုင်ငံငါးလုပ်ငန်းအဖွဲ့ချုပ်၏ ထောက်ခံချက်များကို MACCS စနစ်တွင် ပူးတွဲလျှောက်ထားရန် လိုအပ်ကြောင်း သိရသည်။

▪️ အဆိုပါစနစ်ကိုကုန်သွယ်မှုလွယ်ကူချောမွေ့စေရေး သဘောတူညီချက် (Trade Facilitation Agreement) လုပ်ငန်းစဉ်ပါအတိုင်း ကုန်သွယ်မှုလုပ်ငန်း၌ လိုအပ်သည့် အချက်အလက်များကို အီလက်ထရောနစ်စနစ်ဖြင့် ပေးပို့နိုင်ရေး စီစဉ်ဆောင်ရွက်ခြင်းဖြစ်ကြောင်း သိရသည်။

#YMG/SW #Yangon_Times

#Local_News
Published 18 January 2025

▪️ ၂၀၂၅ ခုနှစ်၊ မာဃမင်းဖလား တင်းနစ်ပြိုင်ပွဲကို ရန်ကုန်မြို့၊ မင်္ဂလာတောင်ညွန့်မြို့နယ်ရှိ သိမ်ဖြူတင်းနစ်အားကစားကွင်း တွင် ယခုလကုန်၌  ကျင်းပပြုလုပ်သွားမည်ဖြစ်ကြောင်း သိရသည်။

▪️ အဆိုပါ မာဃမင်းဖလားတင်းနစ်ပြိုင်ပွဲကို မြန်မာနိုင်ငံ တင်းနစ်အဖွဲ့ချုပ်မှ ကြီးမှူး၍ ဇန်နဝါရီလ ၃၁ ရက်မှ ဖေဖော်ဝါရီလ ၃ ရက်အထိ ကျင်းပသွားမည်ဖြစ်ကြောင်း သိရသည်။

▪️ ယင်းပြိုင်ပွဲကို ပြည်ပကစားသမားများအား ဝင်ရောက်ယှဉ်ပြိုင်ခွင့်ပေးမည်မဟုတ်ဘဲ ပြည်တွင်းကစားသမားများကို သာ ဝင်ရောက်ယှဉ်ပြိုင်ခွင့်ပေးမည် ဖြစ်ကြောင်း သိရသည်။

▪️ ထို့သို့ယှဉ်ပြိုင်ရာတွင် အမျိုးသားအသင်းလိုက် တင်းနစ်ပြိုင်ပွဲ၊ အမျိုးသ
မီးအသင်းလိုက် တင်းနစ်ပြိုင်ပွဲ၊ ပထမတန်းအမျိုးသားတစ်ဦးချင်းပြိုင်ပွဲ၊ ပထမတန်း အမျိုးသမီးတစ်ဦးချင်းပြိုင်ပွဲ၊ ပထမတန်း အမျိုးသားနှစ်ယောက်တွဲပြိုင်ပွဲ၊ ဒုတိယတန်း အမျိုးသားနှစ်ယောက်တွဲပြိုင်ပွဲ၊ ဒုတိယတန်း အမျိုးသမီးနှစ်ယောက်တွဲပြိုင်ပွဲ များပါဝင်မည်ဖြစ်ကြောင်း သိရသည်။

▪️ ထို့အပြင် အသက် ၅ဝ နှစ်နှင့်အထက် အမျိုးသားနှစ်ယောက်တွဲပြိုင်ပွဲ၊ အသက် ၆၀ နှစ်နှင့်အထက် အမျိုးသား နှစ်ယောက်တွဲပြိုင်ပွဲ၊ အသက် ၁၂ နှစ်အောက် အမျိုးသား/အမျိုးသမီး တစ်ဦးချင်းပြိုင်ပွဲ၊ အသက် ၁၆ နှစ်အောက် အမျိုးသား/အမျိုးသမီး တစ်ဦးချင်းပြိုင်ပွဲများ ထည့်သွင်းကျင်းပသွားမည်ဖြစ်ကြောင်း သိရသည်။

#YMG/NN #Yangon_Times

#Local_News
Published 18 January 2025

▪️ နေရောင်ခြည်စွမ်းအင်ဖြင့် လျှပ်စစ်ဓာတ်အားထုတ်ယူမှုလုပ်ငန်းများအတွက် အရင်းအနှီးလိုအပ်ချက်များကို နိုင်ငံတော်အနေဖြင့် ဆောင်ရွက်ပေးသွားမည် ဖြစ်ကြောင်း နစကဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်က ပြောကြားသည်။

▪️ ဇန်နဝါရီ ၁၇ ရက်က ပြုလုပ်သည့် ပြည်ထောင်စုအစိုးရအဖွဲ့အစည်းအဝေးတွင်  ဗိုလ်ချုပ်မှူးကြီးမင်းအောင်လှိုင်က အထက်ပါအတိုင်းပြောကြားခဲ့ခြင်းဖြစ်သည်။

▪️ ထိုသို့ပြောကြားရာတွင် စိုက်ပျိုးရေးနှင့်ပတ်သက်၍ လိုအပ်သည့်ရေရရှိရေးတွင် မိုးကောင်းသောက်ရေ၊ ဆည်ရေ၊ မြေအောက်ရေ၊ မြစ်ရေဟူ၍ နည်းလမ်းများရှိကြောင်း၊ မြစ်ကြီးများအနီးတွင်ရှိသည့် ဒေသများအနေဖြင့် မိမိတို့လုပ်ငန်းရပ်အလိုက် မြစ်ရေတင်စီမံကိန်းများ ဆောင်ရွက်၍ စိုက်ပျိုးရေးလုပ်ငန်းများ ဖွံ့ဖြိုးတိုးတက်အောင် ဆောင်ရွက်နိုင်ကြောင်း၊ မြစ်ရေတင်စီမံကိန်းများအတွက် လိုအပ်သည့် လျှပ်စစ်ဓာတ်အားကို နေရောင်ခြည်စွမ်းအင်ဖြင့် လျှပ်စစ်ဓာတ်အား ထုတ်ယူဆောင်ရွက်နိုင်ကြောင်း ဆိုသည်။

▪️ ထို့အပြင် နိုင်ငံတော်မှ ဆောင်ရွက်သည့် ဆိုလာစီမံကိန်းများရှိသကဲ့သို့ လုပ်ငန်းရှင်များအနေဖြင့်လည်း မိမိတို့လုပ်ငန်းလိုအပ်ချက်များအလိုက် ဆိုလာစီမံကိန်းများကို ဆောင်ရွက်နိုင်ကြောင်း၊ နေရောင်ခြည်စွမ်းအင်ဖြင့် လျှပ်စစ်ဓာတ်အားထုတ်ယူမှုလုပ်ငန်းများအတွက် အရင်းအနှီးလိုအပ်ချက်များကိုလည်း နိုင်ငံတော်အနေဖြင့် ဆောင်ရွက်ပေးသွားမည်ဖြစ်ကြောင်း ပြောကြားခဲ့သည်။

#YMG/NN #Yangon_Times

အခု ၂၀၂၅ခုနှစ်အတွင်းပေးချေရမယ့် ကိုဗစ်ချေးငွေတွေမှာဖျော်ဖြေရေးနဲ့ မီဒီယာကဏ္ဍတွေ ပါဝင်တယ်လို့ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာနကနေ သိရပါတယ်။
#Local_News
Published 18 January 2025
#ကိုဗစ်ချေးငွေ #ဖျော်ဖြေရေးနှင့်မီဒီယာကဏ္ဍ
#YMG/NN #Yangon_Times