#WorldRecycle
Published 16 May 2022

ပြင်သစ်နိုင်ငံ အိုလေရွန်ကျွန်းမှာ ရူလ်မာဖရစ်-၁၇ ဆိုတဲ့ စွန့်ပစ်ပစ္စည်းဝန်ဆောင်မှုအဖွဲ့အစည်းက နေရာအနှံမှ အသုံးပြုပြီးသား ဟင်းချက်ဆီများကို ၁၅ နှစ်တိုင်အောင် စုဆောင်းလာခဲ့ပါတယ်။

#Yangon_Media_Group

Published 16 May 2022

နိုင်ငံမှာ ကိုဗစ်လှိုင်းနှင့်ရင်ဆိုင်နေရတဲ့ အလျောက်  မြောက်ကိုးရီးယားခေါင်းဆောင် ကင်မ်ဂျုန်အန်ဟာ အခြားအရာရှိတွေနှင့် အတူ မေလ(၁၆)ရက်က ဆေးဆိုင်တွေကို သွားရောက်ကြည့်ရှုခဲ့ပါတယ်။

ပြည်သူတွေကြားထဲ ရောဂါကူးစက်မှု အရှိန်ကိုလျှော့ချဖို့အတွက် ခေါင်းဆောင်ကင်မ်က နိုင်ငံတစ်ဝှမ်း လော့ခ်ဒေါင်းလုပ်ဖို့ အမိန့်ပေးထားပေမယ့် မြောက်ကိုးရီးယားနိုင်ငံမှာ လူပေါင်းတစ်သန်းကျော်ဟာ အစိုးရကပြောတဲ့ “အဖျား”ရောဂါနှင့်နေမကောင်းဖြစ်နေကြပါတယ်။

ကပ်ရောဂါတားဆီးကာကွယ်ရေးမှာ ဖြစ်ကတတ်ဆန်း တုန့်ပြန်တယ်ဆိုပြီး ကင်မ်က ကျန်းမာရေးအရာရှိတွေကို ပြင်းထန်စွာ ဝေဖန်ထားပါတယ်။ အထူးသဖြင့်ဆေးဆိုင်တွေဟာ ၂၄နာရီဖွင့်ပြီးဆေးတွေရောင်းချဖို့ပျက်ကွက်ခဲ့တာကိုဖြစ်ပါတယ်။

မြောက်ကိုးရီးယားမှာ ယခုအထိလူ(၅၀)အထိသေဆုံးခဲ့ရပြီးနောက် သူဟာ မြို့တော်ပြုံယမ်းမှာ ဆေးဝါးတွေဖြန့်ချိမှု တည်ငြိမ်ရေးဆောင်ရွက်ဖို့ စစ်တပ်ကိုအမိန့်ပေးလိုက်ပါတယ်။

Source AFP

Published 16 May 2022

ဒါဇင်ကျော်ရှိတဲ့ နိုင်ငံတွေက လာကြတဲ့ အာရှအမေရိကန်တွေရဲ့ အမေရိကန်နိုင်ငံ အတွေ့အကြုံတွေဟာ  သူတို့ရဲ့ ဇာတိ နိုင်ငံ   တွေပေါ်မူတည်ပြီး ပြက်ပြက်ထင်ထင် ကွဲပြားခြားနားကြတယ်လို့ အမေရိကန်ရဲ့  Axios မီဒီယာက  ရေးသား  လိုက်ပါတယ်။

အများအားဖြင့်တော့ အာရှအမေရိကန်တွေဟာ ပညာကောင်းကောင်းတတ်ကြပြီး ချမ်းသာအောင်မြင်ကြတယ်လို့ ပြည်တွင်း စစ်တမ်းတစ်ခုကိုအခြေခံရေးထားတဲ့ အဆိုပါသတင်းအရသိရပါတယ်။

ပျှမ်းမျှအားဖြင့် အာရှအမေရိကန်တွေဟာ သာမာန်အမေရိကန်တွေထက် ပိုပြီးချမ်းသာပြီး ပညာတတ်ကြပုံရပါတယ်။ ဒါပေမယ့် သူတို့ဟာ လူမျိုးရေးခွဲခြားမှု၊ရန်လိုမှုနှင့် အကြမ်းဖက်မှုတွေကို အဖန်တလဲလဲခံစားနေကြရတယ်လို့ အင်ဒီရာနာ တက္ကသိုလ်ရဲ့ သမိုင်းပါမောက္ခ အယ်လင်ဝူက ပြောပါတယ်။

အမေရိကန်နိုင်ငံမှာ အာရှအမေရိကန်တွေရဲ့ လူဦးရေဟာ ၂၀၀၀ပြည့်နှစ်ကနေ ၂၀၁၉ခုနှစ်အတွင်း နှစ်ဆတိုးလာပြီး စုစုပေါင်း ၂၂သန်းအထိရှိလာပါတယ်။ အမေရိကန်မှာ အာရှအမေရိကန်လူဦးရေဟာ တိုးပွားမှုအများဆုံးအုပ်စုဖြစ်ပါတယ်။ သူတို့ရဲ့ တိုးပွားနှုန်းဟာ လူဖြူ၊လူမည်းနှင့် လက်တင်အမေရိကန်တွေထက်ပိုများနေပါတယ်။ ၂၀၆၀ပြည့်နှစ်မှာ ၄၆သန်းအထိရှိလာ လိမ့်မယ်လို့ ပျူးသုတေသနစင်တာ Pew Research Center ရဲ့ စစ်တမ်းအရသိရပါတယ်။

သူတို့အားလုံးဟာ မတူညီတဲ့ ဘဝတွေနှင့်စခဲ့ကြတယ်လို့ အဲဒီစင်တာရဲ့ တွဲဖက်ညွှန်ကြားရေးမှူး နေးလ်ရုစ်ကပြောပါတယ်။ ဥပမာအားဖြင့် အိန္ဒိယလူမျိုးတွေဟာ အမေရိကန်ကို H-1Bဗီဇာနှင့် နည်းပညာကုမ္ပဏီတွေမှာ လစာကောင်းကောင်းအလုပ် ရလို့ ရောက်လာကြတယ်။သူတို့ဟာ မြန်မာနိုင်ငံက လာတဲ့ ဒုက္ခသည်တွေထက် ဆွေစဉ်မျိုးဆက်ချမ်းသာကြွယ်ဝတဲ့ဘဝ တည်ထောင်ရာမှာ အများကြီးလွယ်ကူကြတာတွေ့ရတယ်လို့သူကပြောပါတယ်။ အမေရိကန်နိုင်ငံမှာ  အာရှအမေရိကန် ပျှမ်းမျှမိသားစုတစ်စုရဲ့တစ်နှစ်ဝင်ငွေဟာ ဒေါ်လာ ၈၅၈၀၀ရှိပြီး ကောလိပ်ဒီဂရီရသူဟာ ၅၄ ရာခိုင်နှုန်းရှိပါတယ်။ ဒါပေမယ့် အိန္ဒိယ၊ဖိလစ်ပိုင်နှင့် သီရိလင်္ကာလူမျိုးတွေပဲ အဲဒီပျှမ်းမျှရဲ့အထက်မှာရှိကြပါတယ်။ အများစုဟာ ပျှမ်းမျှအားဖြင့် ကောလိပ်ဘွဲ့ရနှုန်းရဲ့ အောက်မှာရှိနေကြတယ်။

မြန်မာလူမျိုးတွေဟာ လူဦးရေစုစုပေါင်း ၁.၈၉သိန်းရှိပါတယ်။ မြန်မာအိမ်ထောင်စုတစ်စုရဲ့ ပျှမ်မျှဝင်ငွေဟာ ဒေါ်လာလေးသောင်းလေးထောင့်လေးရာရှိပြီး ကောလိပ်ဒီဂရီဘွဲ့ရသူဟာ ၂၃ ရာခိုင်နှုန်းရှိတယ်လို့ စစ်တမ်းအရသိရပါတယ်။

(အာရှနိုင်ငံအလိုက် နှိုင်းယှဉ်ချက်ဇယားများပူးတွဲဖော်ပြထားပါတယ်)

အုပ်စုတော်တော်များများဟာ လျစ်လျူရှုခံနေကြရ ပစ်ပယ်ခံနေကြရပါတယ်လို့ အရှေ့တောင်အာရှအရင်းအမြစ်လှုပ်ရှားမှု စင်တာရဲ့ အမှုဆောင်ညွှန်ကြားရေးမှူး ကုယင်ဒင်းက ပြောပါတယ်။

အာရှအမေရိကန်တွေဟာ တရားဝင်လူနည်းစုအုပ်စုတွေဖြစ်ပြီး သူတို့ဟာ လူမျိုးရေးဘာသာရေးအနှိမ်ခံရတာကို ကျော်လွှားရေးကျင့်စဉ်တွေနှင့် မတူကွဲပြားမှုဦးစီးဦးရွက်ကိစ္စတွေမှာ ပါဝင်ဖို့ထိုက်တန်သူတွေဖြစ်တယ်ဆိုတာကို  လူတွေက သိပ်ပြီး လက်မခံ ချင်ကြဖြစ်နေပါတယ်။ဥပမာအားဖြင့် အရှေ့တောင်အာရှရဲ့ ၃၀ရာခိုင်နှုန်းဖြစ်တဲ့ ကမ္ဘောဒီးယား၊ဗီယက်နမ် နှင့် လာအိုလိုနိုင်ငံတွေပါဝင်တဲ့ ဒေသကလာသူတွေဟာ အထက်တန်းကျောင်းဒီဂရီဘွဲ့မရကြပါဘူး။

ကျွမ်းကျင်သူတွေဟာ လတ်တလောအဖြစ်များလာတဲ့ အာရှသားဆန့်ကျင်ရေးအကြမ်းဖက်မှုတွေကြားထဲမှာ မျှော်လင့်ချက် တစ်စွန်းတစ်စကို တွေ့ကြပါတယ်။အာရှအမေရိကန်အသိုက်အဝန်းအပေါ် အာရုံစိုက်မှုအသစ်တွေရှိလာတာဖြစ်ပါတယ်လို့ ဒင်းကပြောပါတယ်။

ကြောက်ရွံစရာကိစ္စတွေက အမြဲဖြစ်နေတယ်လို့ ဝူက ပြောပါတယ်။ ဒါပေမယ့် အာရှသားတွေဟာ အချက်အလက်တွေစုပြီး ဘာဖြစ်နေတယ်ဆိုတာတွေကို မှတ်တမ်းတင်နေကြတယ်။ အာရှဂျာနယ်လစ်တွေကလည်း ဒီဇာတ်လမ်းတွေကိုပုံကြီးချဲ့နေကြ တယ်လို့ သူကဆက်ပြောပါတယ်။

အမေရိကန်နိုင်ငံရှိ အာရှသား လူဦးရေ

တရုတ်/တိုင်ဝမ် ၅.၄ သန်း

အိန္ဒိယ-၄.၆သန်း

ဖိလစ်ပိုင် ၄.၂ သန်း

ဗီယက်နမ်-၂.၂သန်း

ကိုရီးယား-၁.၉သန်း

ဂျပန်-၁.၅သန်း

ပါကစ္စတန်-၅.၅၄သိန်း

ထိုင်း-၃.၄၃သိန်း

ကမ္ဘောဒီးယား- ၃.၃၉သိန်း

Hmong- ၃.၂၇သိန်း

ဘင်္ဂလားဒေ့ရှ် -၂.၀၈ သိန်း

နီပေါ- ၁.၉၈သိန်း

#မြန်မာ-၁.၈၉သိန်း

အင်ဒိုနီးရှား -၁.၂၉သိန်း

သီရိလင်္ကာ- ငါးသောင်းခြောက်ထောင်

မလေးရှား-သုံးသောင်းရှစ်ထောင်

မွန်ဂိုလီးယား-နှစ်သောင်းခုနှစ်ထောင်

ဘူတန်-နှစ်သောင်းလေးထောင်

အာရှသားတို့၏ အိမ်ထောင်စုဝင်ငွေနှင့် ပညာရေးအဆင့်(ကောလိပ်ဒီဂရီရ)

အိန္ဒိယ- ဒေါ်လာ ၁.၁၉သိန်း -၇၅ %

ဖိလစ်ပိုင်- ဒေါ်လာကိုးသောင်းလေးရာ-၄၈%

သီရိလင်္ကာ- ဒေါလာ ရှစ်သောင်းငါးထောင်-၆၀%

ဂျပန်-ဒေါ်လာရှစ်သောင်းသုံးထောင်-၅၂%

တရုတ်-ဒေါ်လာ ရှစ်သောင်းတစ်ထောင့်ခြောက်ရာ-၅၇%

အင်ဒိုနီးရှား-ဒေါ်လာရှစ်သောင်း-၅၃%

ပါကစ္စတန်-ဒေါ်လာ ခုနှစ်သောင်းရှစ်ထောင်-၅၇%

ကိုရီးယား-ဒေါ်လာ ခုနှစ်သောင်းနှစ်ထောင့်နှစ်ရာ-၅၇%

ဗီယက်နမ်-ဒေါ်လာခြောက်သောင်းကိုးထောင်ရှစ်ရာ ၃၂%

Hmong-ဒေါ်လာခြောက်သောင်းရှစ်ထောင်-၂၃%

ကမ္ဘောဒီးယား-ဒေါ်လာခြောက်သောင်းခုနှစ်ထောင်-၂၁%

ထိုင်း-ဒေါ်လာခြောက်သောင်းသုံးထောင်-၄၅%

လာအို-ဒေါ်လာခြောက်သောင်းတစ်ထောင်-၁၇%

ဘင်္ဂလားဒေ့ရှ်-ဒေါ်လာငါးသောင်းကိုးထောင်ငါးရာ-၄၉%

နီပေါ-ဒေါ်လာငါးသောင်းငါးထောင်-၄၅%

#မြန်မာ-ဒေါ်လာ လေးသောင်းလေးထောင်လေးရာ-၂၃%

ဘူတန်-ဝင်ငွေမသိ- ၁၅%

မလေးရှား-ဝင်ငွေမသိ-၆၅%

မွန်ဂိုလီးယား-ဝင်ငွေမသိ-၆၀%

 Source axios.com

#LocalNews
Published - 16 May 2022

ကချင်ပြည်နယ်၊ ခါကာဘိုရာဇီဒေသရှိ ဝေးလံခေါင်ဖျား ကျေးရွာများသို့ ဆက်သွယ်ထားသည့် ဟောင်းနွမ်းကြိုးတံတား (၆)စင်းအားပြုပြင်ဖို့ လိုအပ်လျက်ရှိနေတယ်လို့ သိရပါတယ်။

#Yangon_Media_Group

#LocalNews
Published - 16 May 2022

မွန်ပြည်နယ်၊ဘီလင်းမြို့မှာရှိတဲ့ ဘုန်းတော်ကြီးသင် ပညာရေးကျောင်း(၁၆)ကျောင်းရှိတဲ့အနက်(၂) ကျောင်းပိတ်လိုက်ရပြီး(၁၄)ကျောင်းသာကျန်ရှိတော့တယ်လို့ မြို့ဦးပရဟိတဘုန်းတော်ကြီးသင်ပညာရေး ကျောင်းဆရာတော်ထံမှ သိရပါတယ်၊၊

#Yangon_Media_Group

#LocalNews
Published_16 May 2022

မန္တလေးတိုင်းအတွင်းမှာ အမေရိကန်နိုင်ငံက ရင်းနှီးမြှုပ်နှံထားတဲ့ ဆိုလာစီမံကိန်း နှစ်ခုကို လာမယ့် ၂၀၂၃ ခုနှစ်အတွင်းမှာ ပြီးစီးနိုင်အောင် လုပ်ဆောင်နေပါတယ်။

#Yangon_Media_Group

#LocalNews
Published - 16 May 2022

တရုတ်-မြန်မာ နှစ်နိုင်ငံက အာဆီယံ ပေါင်းစည်းမှုအဖြစ် (မြန်မာနိုင်ငံ)၌ တည်ဆောက်မည့် တိရစ္ဆာန်ရောဂါဓာတ်ခွဲခန်း စီမံကိန်းအတွက် Exchange Letter လက်မှတ်ရေးထိုးလိုက်ပြီ ဖြစ်တယ်လို့ သိရပါတယ်။

အဆိုပါ လက်မှတ်ရေးထိုးပွဲကို မေလ ၁၁ ရက်နေ့က တရုတ်-မြန်မာ နှစ်ဦးနှစ်ဖက်သည် အဆိုပါစီမံကိန်း၏ မြန်မာနိုင်ငံဆိုင်ရာ စီမံကိန်းဖော်ဆောင်ခြင်းအဖြစ် Exchange Letter ကို လက်မှတ်ရေးထိုးခဲ့ကြခြင်း ဖြစ်ပါတယ်။

ဒါ့အပြင် အာဆီယံပေါင်းစည်းမှု တည်ဆောက်ရေးကို ပံ့ပိုးကူညီရန်အတွက် တရုတ်နိုင်ငံအစိုးရသည် Initiative for ASEAN Integration (IAI) အရ အာဆီယံအား အကူအညီပေးသည့် တိရစ္ဆာန်ရောဂါဓာတ်ခွဲခန်း စီမံကိန်းဖော်ဆောင်၍ မြန်မာနိုင်ငံ နေပြည်တော်နှင့် ကမ္ဘောဒီးယားနိုင်ငံ ဖနွမ်းပင်တို့တွင် တိရစ္ဆာန်ရောဂါဓာတ်ခွဲခန်း တစ်ခုစီ ကူညီတည်ဆောက်ပေးပြီးသက်ဆိုင်ရာ ဓာတ်ခွဲခန်းသုံးစက်ကိရိယာများ ပံ့ပိုးပေးကာ လူပုဂ္ဂိုလ်များအား လေ့ကျင့်သင်တန်းပေးခြင်းတို့ စီစဉ်ဆောင်ရွက်သွားမှာဖြစ်တယ်လို့လည်း သိရပါတယ်။

ထိုသို့ဆောင်ရွက်ခြင်းဖြင့် နှစ်နိုင်ငံအား တိရစ္ဆာန်ရောဂါ ကာကွယ်ထိန်းချုပ်ရေး၊ ရောဂါရှာဖွေရေးနှင့် စောင့်ကြည့်စစ်ဆေးရေး စွမ်းရည်တိုးမြင့်မားလာစေရန်အတွက် အကူအညီပေးနိုင်ရန် ရည်ရွယ်ကြောင်း မြန်မာနိုင်ငံဆိုင်ရာ တရုတ်သံရုံးက ဆိုပါတယ်။

ယခုလက်မှတ် ရေးထိုးခြင်းသည် ၂၀၂၁ ခုနှစ်တွင် အဆိုပါ စီမံကိန်း၏ ကမ္ဘောဒီးယားနိုင်ငံဆိုင်ရာ စီမံကိန်းဖော်ဆောင်ခြင်း Exchange Letter လက်မှတ်ရေးထိုးပြီးနောက် နောက်ထပ်အရေးကြီးသော တိုးတက်မှုတစ်ခုဖြစ်ပြီး အဆိုပါ စီမံကိန်းသည်အကောင်အထည်ဖော်ဆောင်မှုအဆင့်သို့ အပြည့်အဝ ဝင်ရောက်မှာ ဖြစ်တယ်လို့ သိရပါတယ်။

ဒါ့အပြင် တရုတ်သံရုံး၏ ဒီကနေ့ သတင်းထုတ်ပြန်ချက်တွင် တရုတ်နိုင်ငံသည် မြန်မာနိုင်ငံကောင်းမွန်ရေး၊ မြန်မာပြည်သူများ ကောင်းမွန်ရေး သဘောတရားကို အမြဲလက်ကိုင်စွဲပြီး မြန်မာပြည်သူများအတွက် မြန်မာနိုင်ငံသို့ ကူညီပံ့ပိုးမှုများ ဆောင်ရွက်လျက်ရှိကြောင်းနှင့် လက်ရှိဆောင်ရွက်နေဆဲ ကူညီပံ့ပိုးမှုစီမံကိန်းများသည် စိုက်ပျိုးရေး၊ ဆင်းရဲနွမ်းပါးမှုလျှော့ချရေး၊ ယဉ်ကျေးမှု၊ အနုပညာ၊ ပညာရေး စသည့်နယ်ပယ်များစွာကို လွှမ်းခြုံနေပြီး မြန်မာပြည်သူများ၏ အကျိုးစီးပွားကို လက်တွေ့ကျကျ မြှင့်တင်ပေးနိုင်ရန် ရည်ရွယ်ကြောင်း ဖော်ပြပါရှိပါတယ်။

ymg/kg
#Yangon_Media_Group

#Local News
Published-16 May 2022

အခုအပတ်အတွင်း ကမ္ဘာ့စားအုန်းဆီထုတ်လုပ်တင်ပိုတဲ့ နိုင်ငံတွေမှာ စားအုန်းဆီဈေးအနည်းငယ် ကျဆင်းလာသည့်အတွက် ရန်ကုန်အထိုင်အခြေခံလက်ကားရည်ညွှန်းဈေးနှုန်း (၅၆၈၅)ကျပ်နဲ့ ရောင်းချသွားမှာ ဖြစ်တယ်လို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီတင်သွင်း သိုလှောင်ဖြန့်ဖြူးရေးကြီးကြပ်ရေးကော်မတီက ထုတ်ပြန်ထားပါတယ်၊၊

တစ်ပတ်အတွင်းဖြစ်ပေါ်ခဲ့တဲ့ FOB ဈေးနှုန်းတွေကို အခြေခံ၍တွက်ချက်မှုတွေအရ ၂၀၂၂ ခုနှစ် မေလ (၁၆)ရက်မှ (၂၂)ရက်အထိ စားအုန်းဆီတစ်ပိဿာကို ရန်ကုန်အထိုင် အခြေခံလက်ကားရည်ညွှန်းဈေးနှုန်း (၅၆၈၅)ကျပ်နဲ့ ရောင်းချသွားမှာ ဖြစ်ပါတယ်၊၊

၂၀၂၂ခုနှစ် မေလ (၂)ရက်မှ(၈)ရက်အထိ စားအုန်းဆီတစ်ပိဿာကို ရန်ကုန်အထိုင်အခြေခံလက်ကားရည်ညွှန်းဈေးနှုန်း (၆၀၂၅)ကျပ်နဲ့ ရောင်းချခဲ့ရာမှ အခုမေလ (၁၆)ရက်မှ (၂၂)ရက်မှာတော့ ကျပ်(၅၆၈၅)နဲ့ ရောင်းချသွားမှာ ဖြစ်တယ်လို့ ဆိုပါတယ်၊၊

စားအုန်းဆီနဲ့ပတ်သက်လို့ ဈေးနှုန်းမြင့်တင်ရောင်းချခြင်း၊ ဈေးကစားခြင်းနဲ့ ဈေးကစားရန်သိုလှောင်ထားခြင်းများ ပြုလုပ်ပါက အရေးကြီးကုန်စည်နှင့်ဝန်ဆောင်မှု ဥပဒေအရအရေးယူသွားမှာဖြစ်တယ်လို့လည်း ထုတ်ပြန်ချက်မှာ ဖော်ပြပါရှိပါတယ်၊၊

ymg/tthl
#Yangon_Media_Group

#LocalNews
Published_16 May 2022

လျှပ်စစ်စွမ်းအားဝန်ကြီးဌာနက နေရောင်ခြည်စွမ်းအင်သုံးဓာတ်အားပေးစက်ရုံများကို သပြေဝဆိုလာ ဓာတ်အားပေးစက်ရုံအနီးရှိ မြေလွတ်မြေရိုင်းများပေါ်တွင် ထပ်မံတိုးချဲ့တည်ဆောက်သွားမည်ဖြစ်ကြောင်း လျှပ်စစ်စွမ်းအားဝန်ကြီးဌာနနှင့် စွမ်းအင်ဝန်ကြီးဌာန ပြည်ထောင်စုဝန်ကြီး ဦးသောင်းဟန်က ပြောသည်။

မေလ ၁၅ ရက်က မန္တလေးတိုင်းဒေသကြီး၊ သာစည်မြို့နယ်၊ သပြေဝကျေးရွာအနီးရှိ Clean Power Energy Co.,Ltd မှ တည်ဆောက်ထားသော ၃၀ မဂ္ဂါဝပ် သပြေဝနေရောင်ခြည်စွမ်းအင်သုံး ဓာတ်အားပေးစက်ရုံ၏ ဓာတ်အားထုတ်လုပ်နေမှုနှင့် ၂၃၀ ကေဗွီ သပြေဝပင်မဓာတ်အားခွဲရုံတို့မှ ဓာတ်အားဖြန့်ဖြူးနေမှုတို့ကို သွားရောက်ကြည့်ရှုစစ်ဆေးစဉ် ယင်းက အထက်ပါအတိုင်း ပြောခြင်း ဖြစ်သည်။

သပြေဝနေရောင်ခြည် စွမ်းအင်သုံးဓာတ်အားပေးစက်ရုံတွင် ဆိုလာ Tracking System တပ်ဆင်ထားခြင်းကြောင့် လျှပ်စစ်ဓာတ်အား ပိုမိုထုတ်လုပ်နိုင်သည်ကို တွေ့ရှိရသဖြင့် နောင်ပြုလုပ်မည့် ဆိုလာစီမံကိန်းများတွင်လည်း ဆိုလာ Tracking System နည်းပညာကို အသုံးပြုသွားရန် လိုကြောင်းလည်း ယင်းကပြောသည်။

သပြေဝနေရောင်ခြည်စွမ်းအင်သုံး ဓာတ်အားပေးစက်ရုံသည် မန္တလေးတိုင်းဒေသကြီး၊ သာစည်မြိုနယ်၊ သပြေဝကျေးရွာအနီးရှိ မြေဧရိယာ(၁၃၃ ဒသမ ၄၄)ဧကပေါ်တွင် တည်ရှိပြီး စက်တပ်ဆင်အင်အားမှာ (၃၀)မဂ္ဂါဝပ်ဖြစ်ကာ အမြင့်ဆုံးလျှပ်စစ်စွမ်းအားနှုန်း (၄၅၅)ဝပ် ရှိသည့် Bifacial Monocrystalline Silicon Module ပေါင်း (၈၃၇၅၂)ခု Single Axis Solar Tracker (၉၆၆)စုံ တပ်ဆင်ထားပြီး မြန်မာနိုင်ငံတွင် ဒုတိယမြောက် အကောင်အထည်ဖော်တည်ဆောက်ပြီးစီးခဲ့သည့် နေရောင်ခြည်စွမ်းအင်သုံး ဓာတ်အားပေးစက်ရုံတစ်ရုံဖြစ်ကာ အဆိုပါ ဓာတ်အားပေးစက်ရုံမှ တစ်ရက်လျှင် လျှပ်စစ်ဓာတ်အား ကီလိုဝပ်နာရီ (၂)သိန်းကျော်ခန့် ထုတ်လုပ်ကာ တစ်နှစ်လျှင် ပျမ်းမျှလျှပ်စစ်ဓာတ်အား ကီလိုဝပ်နာရီသန်းပေါင်း (၆၆) သန်း ထုတ်လုပ်ပေးလျက်ရှိပြီး ထွက်ရှိလာသည့်လျှပ်စစ်ဓာတ်အားများကို (၄)မိုင်ခန့်ရှိသည့် ၃၃ ကေဗွီ နှစ်ထပ်ကောင်းကင်ဓာတ်အားလိုင်းဖြင့် ၂၃၀ ကေဗွီ သပြေဝပင်မ ဓာတ်အားခွဲရုံမှတဆင့် နိုင်ငံတော်ဓာတ်အားစနစ်သို့ ချိတ်ဆက် ပို့လွှတ်ဖြန့်ဖြူးပေးလျက်ရှိကြောင်း သိရသည်။

ymg/mt
#Yangon_Media_Group

#DailyNews
Published - 16 May 2022

၁။ မန္တလေးတိုင်းအတွင်း အမေရိကန်ရင်းနှီးမြှုပ်နှံထားသည့် ဆိုလာစီမံကိန်းများ ၂၀၂၃ ခုနှစ်အတွင်း ပြီးစီးနိုင်မည်ဟုခန့်မှန်း

၂။အလှူရှင်နည်းပါး၍ ဘီလင်းမြို့ရှိဘုန်းတော်ကြီးသင် ပညာရေးကျောင်းအချို့ပိတ်လိုက်ရ

၃။ နေ့စဉ်မိုးလေဝသသတင်း။

၄။ ပြင်သစ်ကျွန်းတွင် အသုံးပြုပြီးသားဟင်းချက်ဆီများကို ဇီဝလောင်စာအတွက် ဈေးကောင်းပေးဝယ်နေ... အစရှိတဲ့ သတင်းတွေကို တင်ဆက်ပေးသွားမှာဖြစ်ပါတယ်။

#Yangon_Media_Group

#Local_News 
Published_ 16 May 2022

ဆီးဂိမ်းပြိုင်ပွဲတွင် ဆီမီးဖိုင်နယ်ရောက် မြန်မာအမျိုးသမီး ဘောလုံးအသင်းအား နိုင်ငံတော်က အမေရိကန်ဒေါ်လာ ၁ သိန်း ချီးမြှင့်ခဲ့ကြောင်း သိရပါတယ်။

အကြိုဗိုလ်လုပွဲသို့ တက်ရောက်သွားခဲ့သည့် မြန်မာ့လက်ရွေးစင်အမျိုးသမီးအသင်းအား မြန်မာနိုင်ငံ အိုလံပစ်ကော်မတီ ဥက္ကဋ္ဌ အားကစားနှင့်လူငယ်ရေးရာဝန်ကြီးဌာန ပြည်ထောင်စု ဝန်ကြီး ဦးမင်းသိန်းဇံနှင့် တာဝန်ရှိသူများက အသင်းတည်းခိုရာ ဟိုတယ်သို့လာရောက်တွေ့ဆုံ အားပေးခဲ့ပြီး နိုင်ငံတော်ကထပ်ဆောင်းချီးမြှင့်သည့် အမေရိကန် ဒေါ်လာ (၁) သိန်းကို မြန်မာ့လက်ရွေးစင် အမျိုးသမီးအသင်းအား ပေးအပ်ချီးမြှင့်ခဲ့တာ ဖြစ်ပါတယ်။

မြန်မာ အမျိုးသမီးအသင်းသည် အုပ်စု(ခ)တွင် ထိုင်း၊ လာအို၊ စင်ကာပူ အသင်းတို့နှင့် ရင်ဆိုင်ခဲ့ရကာ ၂ ပွဲနိုင်၊ ၁ ပွဲ သရေ ရမှတ် ၇ မှတ်ဖြင့် အကြိုဗိုလ်လုပွဲ (ဆီမီးဖိုင်နယ်)သို့ တက်ရောက်နိုင်ခဲ့ခြင်း ဖြစ်ပါတယ်။

မြန်မာ အမျိုးသမီးအသင်းသည် အကြိုဗိုလ်လုပွဲစဉ်အဖြစ် လာမည့် မေ ၁၈ ရက် မြန်မာစံတော်ချိန် ညနေ ၆ နာရီခွဲတွင် အိမ်ရှင် ဗီယက်နမ် အမျိုးသမီးအသင်းနှင့် ယှဉ်ပြိုင်ရမှာ ဖြစ်ပါတယ်။

ယခုနှစ် ဆီးဂိမ်းစ်ပြိုင်ပွဲသို့ မြန်မာ့လက်ရွေးစင် ယူ ၂၃ အသင်း၊ အမျိုးသမီး လက်ရွေးစင်အသင်း၊ အမျိုးသမီး ဖူဆယ်လက်ရွေးစင် အသင်း၊ အမျိုးသား ဖူဆယ် လက်ရွေးစင်အသင်း စုစုပေါင်း အသင်း (၄) သင်း ပါဝင်ယှဉ်ပြိုင်နေပြီး အသင်းများ အောင်နိုင်ရေးနှင့် စီမံခန့်ခွဲရေးလုပ်ငန်းများ အတွက် မြန်မာနိုင်ငံ ဘောလုံးအဖွဲ့ချုပ် အထွေထွေအတွင်းရေးမှူး ဦးကိုကိုသိန်းနှင့်အဖွဲ့က ပြိုင်ပွဲကျင်းပရာ နေရာများတွင် သက်ဆိုင်ရာ ဝန်ကြီးဌာန တာဝန်ရှိသူများနှင့် ပူးပေါင်းဆောင်ရွက်လျက်ရှိပါတယ်။

ymg-mnn
#Yangon_Media_Group

#LocalNews
Published - 16 May 2022

ဧပြီလ(၁)ရက်မှ မေလဒုတိယအပတ်အထိ အချိန်ကာလတစ်လကျော်အတွင်း တစ်နိုင်ငံလုံးအတိုင်း အတာလေဘေးသင့်ပြည်သူ (၄၀၀၀၀)ကျော်ရှိပြီး ဆန်ရိက္ခာ၊ ငွေကြေးနဲ့ ကယ်ဆယ်ရေးပစ္စည်းများ ထောက်ပံ့ပေးခဲ့တယ်လို့ ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာန၊ ညွှန်ကြားရေးမှူးဒေါ်ဖြူလဲ့လဲ့ထွန်းက YMG ကို ပြောပါတယ်၊၊

လူမှုဝန်ထမ်း၊ ကယ်ဆယ်ရေးနဲ့ ပြန်လည်နေရာချထားရေးဝန်ကြီးဌာနအနေနဲ့ လေဘေးသင့်ပြည်သူ(၄၀၀၀၀)ကျော်ကို ဆန်ရိက္ခာ၊ ငွေကြေးထောက်ပံ့မှုနဲ့ ကယ်ဆယ်ရေးပစ္စည်းတွေထောက်ပံ့ပေးခဲ့ပြီး တန်ဖိုးအားဖြင့် ကျပ်သိန်းငါးထောင်နဲ့ ကိုးဆယ့်သုံးသိန်းကျော် ထောက်ပံ့ပေးခဲ့တယ်လို့ဆိုပါတယ်၊၊

"တစ်လကျော်ကာလအတွင်း လေဘေးသင့်ပြည်သူ (၄၀၀၀၀)ကျော်ရှိပါတယ်၊၊ ဧပြီလ(၁)ရက်ကနေ မေလ(၁၃)ရက်အထိစာရင်းတွေအရ လေပြင်းတိုက်ခတ်မှုကြောင့် အိမ်လုံးဝပြိုကျ ပျက်စီးသွားတာ (၂၁၀၀)ကျော်၊ တစ်စိတ်တစ်ပိုင်းပျက်စီးတာ (၁၀၀၀၀)ကျော်၊ သေဆုံးသူ(၆)ဦး၊ ဒဏ်ရာရသူ (၁၃)ဦးရှိပါတယ်၊၊ အစ်မတို့ဝန်ကြီးဌာနအနေနဲ့ ဆန်ရိက္ခာ(၇)ရက်စာပေးအပ်ထောက်ပံ့တာ၊ပျက်စီးသွားတဲ့အိမ်တွေရဲ့ နှုန်းထားအတိုင်းသတ်မှတ်ငွေကြေးထောက်ပံ့ပေးတာတွေဆောင်ရွက်ပါတယ်၊၊သေဆုံးသူတစ်ဦးကို ကျပ်သုံးသိန်း၊ ထိခိုက်ဒဏ်ရာရသူတစ်ဦး(ဆေးရုံတက်ကုသရသူ)ကို ကျပ်ငါးသောင်းပေးအပ်ပါတယ်၊၊ အဲဒီလိုကူညီထောက်ပံ့မှုတွေအနေနဲ့ တန်ဖိုးကျပ်သိန်းငါးထောင်ကျော် ထောက်ပံ့ပေးခဲ့ပါတယ်၊၊ ကယ်ဆယ်ရေးပစ္စည်းတွေလည်းပေးအပ်ခဲ့ပါတယ်"လို့ ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန၊ ညွှန်ကြားရေးမှူးဒေါ်ဖြူလဲ့လဲ့ထွန်းက ပြောပါတယ်၊၊

တိုင်းဒေသကြီးပြည်နယ်(၁၅)ခုမှာ (၁၄)ခုမှာ လေပြင်းတိုက်ခတ်မှုတွေဖြစ်ခဲ့တာဖြစ်ပြီး မန္တလေး၊ပဲခူး၊ မကွေးနဲ့နေပြည်တော်တို့မှာ လေပြင်းတိုက်ခတ်မှုတွေများပြားခဲ့တယ်လို့ ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာနမှ သိရပါတယ်၊၊

ymg/tthl
#Yangon_Media_Group