#LocalNews
Published - 30 March 2022

စစ်ကိုင်းတိုင်းအတွင်းက ပရဟိတအသင်းများအနေနဲ့ မြို့တွင်းလမ်းကြောင်းများကိုသာ အများဆုံးကူညီပို့ဆောင်ပေးနေပြီး နယ်ဝေးလမ်းကြောင်းပို့ဆောင်မှုများကိုတော့ အခြေအနေအရပ်ရပ် ကြောင့် လက်ရှိကာလမှာ ခေတ္တရပ်နားထားတယ်လို့ သိရပါတယ်။

အဆိုပါ နယ်ဝေးလမ်းကြောင်းပို့ဆောင်မှုများကို စက်သုံးဆီစျေးနှုန်းကြီးမြင့်လာမှုနှင့် နယ်မြေ ဒေသအခြေအနေများကြောင့် ရပ်နားထားရတာဖြစ်တယ်လို့ စစ်ကိုင်းတိုင်းအတွင်းရှိ ပရဟိတလူမှုကူညီရေးအသင်းများထံမှ သိရပါတယ်။

"အခက်အခဲတွေကြားက လုပ်နေရတာပေါ့။ ပရဟိတလုပ်ရတဲ့ အခြေအနေက မြို့တွင်းလောက်ပဲ
ပို့ဆောင်ပေးနိုင်တယ်။ အဝေးတွေကျ မသွားနိုင်သလိုအဲ့ဒီနယ်ဝေးလမ်းကြောင်းတွေကျ မသွားရဲဘူးလေ။

တစ်ခါတစ် လေ အ ရေး ပေါ်လူနာ တွေ ဘာ တွေရှိလာရင် တော့ အသည်းအသန်ဆိုရင် တော့ လှည့်ပတ်လုပ်ရတာ ပေါ့။ အဆင် ပြေ အောင် တော့လုပ် ပေးရတာ ပေါ့။
ပြောရရင် နယ် မြေ ဒေသ အ ခြေအ နေက လုံခြုံမှုမရှိဘူး ပေါ့။"လို တမူးမြို ဒေသခံ ပရဟိတသမားတစ်ဦးက ပြောပါတယ်။

လက်ရှိကာလမှာလည်း အလှူရှင်ရှားပါးမှုနဲ့ စက်သုံးဆီစျေးနှုန်း ကြီးမြင့်လာမှုတွေကြောင့် ပရဟိတလူမှုကူညီရေးအသင်းတွေအနေနဲ့ ရပ်တည်ရန်ခက်ခဲလာကြပြီး အချို့လူမှုကူညီရေးအသင်းများအနေနဲ့ ကူညီလုပ်ဆောင်ပေးမှုတွေကို ရပ်နားထားရတယ်လို့လည်း သိရပါတယ်။

"နယ်မြေအခြေအနေ ဒေသအခြေအနေကိုပဲကြည့်ပြီး ပို့ဆောင်ပေးနေရတာပေါ့။ကျွန်တော်တို့က တော့ ကူညီပေးနိုင်သလောက် ဆက်လက်ကူညီပေးသွားမှာဖြစ်ပါတယ်။ ဒီကာလမှာ ပရဟိတအသင်းတွေအနေနဲ့ ရပ်တည်ဖို့ခက်ခဲတာအမှန်ပါပဲ ဒါပေမယ့် ပြည်သူတွေက အကူအညီ တောင်းခံလာတော့လည်း ကူညီပို့ပေးရမှာ ကျွန်တော်တို့တာဝန်ပါ။ ဘယ်လမ်းကြောင်းမဆို ပို့နိုင် အောင်ပဲ ကျွန်တော်တို့ အစွမ်းကုန်ကြိုးစားဆောင်ရွက်နေပါတယ်။"လို့ မုံရွာမြို့အခြေစိုက်ပရဟိတသမားတစ်ဦးက ပြောပြခဲ့ပါတယ်။

ymg/kg
#Yangon_Media_Group

#DailyNews
Published -30 Mar 2022

၁။ တမူးမြို့တွင် မိုဘိုင်းအင်တာနက်လိုင်းများ ပြတ်တောက်နေသည်မှာ တစ်လခန့်ရှိလာပြီဖြစ်

၂။ တရုတ်နိုင်ငံကို ပြောင်းတင်ပို့လိုသူများ မတ်လ ၃၁ ရက်နေ့ နောက်ဆုံးထားလျှောက်ထားရန်လို

၃။ မိုးလေဝသ သတင်း

၄။ ဗီယက်နမ်ဖခင်က သားဖြစ်သူအတွက် ဒေါ်လာထောင်ပေါင်းများစွာအကုန်အကျခံပြီး ဗင်ကားကို သစ်သားတင့်ကားပြောင်းလဲဖန်တီးပေး...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published_30 March 2022

လက်ရှိဖြစ်ပေါ်နေသောပြဿနာများကို အာဃာ၊အမုန်း၊လူသတ်ပွဲများဖြင့်ဖြေရှင်း၍မရ ၊ စားပွဲပေါ်တွင် လမ်းရှာရင်းဖြေရှင်းသွားကြရန် ကရင်အမျိုးသားအစည်းအရုံး(KNU)ဥက္ကဋ္ဌ ဗိုလ်ချုပ်ကြီး စောမူတူးစေးဖိုး က ပြောကြားလိုက်သည်။

ထိုင်းနိုင်ငံ၊ ချင်းမိုင်မြို့တွင် မတ်လ ၂၉ ရက်မှ ဧပြီလ ၂ ရက်ထိ ကျင်းပနေသော NCA ထိုးထားသည့် တိုင်းရင်းသားလက်နက်ကိုင် ၁၀ ဖွဲ့၏ စတုတ္ထအကြိမ် ဒုတိယပိုင်း ထိပ်သီး ညီလာခံအတွင်း ၎င်းက အထက်ပါအတိုင်း ပြောကြားလိုက်ခြင်းလည်း ဖြစ်သည်။

"ကျွန်တော့်ကိုအထူးဖိတ်ကြားသူအနေနဲ့ ဖိတ်ကြားမှုအပေါ်ကျွန်တော်လာခဲ့တယ်။အခမ်းအနားမှာ မိန့်ခွန်းမဟုတ်ဘဲ စကားပြောခွင့်ပေးတဲ့အတွက် အားလုံးကိုကျေးဇူးတင်ပါတယ်။ အထူးဖိတ်ကြားသူအဖြစ်လာခဲ့တာ ဘယ်သူ့ကိုမှ ကိုယ်စားပြုပြီးလာခဲ့တာမဟုတ်ပါဘူး။ ကျွန်တော့်ကိုယ်ကျွန်တော် ကိုယ်စားပြုပြီးလာခဲ့တာဖြစ်တယ်။ခပ်တိုတိုပဲပြောချင်တယ်။ဒီကနေ့ တိုင်းပြည်မှာဖြစ်နေတဲ့ပဋိပက္ခတွေဟာ အခုလိုပွဲမျိုးနဲ့ ကျွန်တော်တို့ အခုလိုပွဲမျိုးနဲ့ ဆက်ပြီးလှုပ်ရှားသွားဖို့မဖြစ်နိုင်ပါဘူး။ ဒီအတိုင်းပဲသွားကြမယ်ဆိုရင် ကျွန်တော်ပြောရဲတယ်။

ကျွန်တော်တို့ရည်မှန်းထားတဲ့ ငြိမ်းချမ်းရေး လူမျိုးချင်းမတူသော်လည်း ကျွန်တော်တို့ရည်မှန်းထားတဲ့ ငြိမ်းချမ်းစွာအတူတကွယှဉ်တွဲနေထိုင်ရေးက ဖြစ်လာမှာမဟုတ်ပါဘူး။ဒါကြောင့်မို့လို အခုလူမျိုးချင်းမတူသော်လည်း ငြိမ်းချမ်းစွာ အတူနေထိုင်သွားနိုင်ရေးက တစ်ပြည်လုံးမှာကြားနေရတဲ့အသံ ၊ အခုလောလောဆယ်အားလုံးက သိနေကြပါတယ်။တစ်ပြည်လုံးမှာ အားလုံးကအပြန်အလှန်သတ်နေကြတယ်။ Facebook မှာ ပြန်ကြည့်မယ်ဆိုလည်း အားလုံးဟာရှုပ်ထွေးနေတဲ့ အချိန်ကာလဖြစ်တယ်။အဲ့တော့ အခုစကားပြောခွင့်ရတဲ့အတွက် ကျွန်တော့်အနေနဲ့လာပြီး ညွှန်ကြားတာမိန့်ခွန်းပြောတာမျိုးမဟုတ်ဘဲနဲ့ ကျွန်တော့်သဘောထားနဲ့ ခံယူချက် ၊ အခုဖြစ်နေတဲ့ပြဿနာက အပြန်အလှန်သတ်ချင်နေကြတဲ့ လုပ်ရပ်ဖြစ်တယ်။

ကျွန်တော်တို့ရပ်တန်းကမရပ်ဘဲ ဒီအတိုင်းသာသွားနေမယ်ဆိုရင် ကျွန်တော်ပြောရဲပါတယ်။ကျွန်တော်တို့တိုင်းပြည်ငြိမ်းချမ်းရေးက ကျွန်တော် တို့သက်တမ်းမှာ မမှီတော့ပါဘူး။ ကျွန်တော်တို့ ကွဲကွဲပြားပြားနဲ့ပဲ နိဂုံးချုပ်သွားရမှာ အဲဒီတော့ NCA လက်မှတ်ထိုးတုန်းက ကျွန်တော်ပြောခဲ့သလိုပဲ။ ကျွန်တော်တို့ အားမနာတမ်းရဲရဲတောက်သတ်ဖြတ်ခဲ့သလို အခုငြိမ်းချမ်းရေးယူတဲ့နေရာမှာလည်းပဲ ကျွန်တော်တို့ သတ္တိရှိရှိနဲ့ သွားရမှာဖြစ်ပါတယ်။အခုအခြေအနေက ကျွန်တော့်ခံယူချက်အနေနဲ့က ကျွန်တော်တို့တိုင်းပြည်ပြဿနာက ကျွန်တော်တို့စားပွဲပေါ်မှာပဲ သွားရမှာဖြစ်တယ်။အားမနာတမ်း ကျွန်တော်တို့ သတ္တိရှိရှိသတ်ဖြတ်နေကြမယ်ဆိုရင် ကျွန်တော်တို့ပန်းတိုင်ကို ရောက်မှာမဟုတ်ပါဘူး။

ကျွန်တော်တို့ဆန္ဒရှိမယ်ဆိုရင် ကျွန်တော်တို့မျက်နှာချင်းဆိုင်အပြန်အလှန် စားပွဲပေါ်မှာဆွေးနွေးရမှာပဲဖြစ်တယ်။ဆက်လက်ပြီး နိဂုံးချုပ်အနေနဲ့ ဒီပြဿနာကို ကျွန်တော့်ကိုလာမေးတိုင်း အဘိုးကြီးအိုခါးကုန်းကုန်း ကျောင်းနေတုန်းကအတိုင်း ကျွန်တော်ရွတ်ပြတယ်။နောက်ဧပြီလကျရင် ၈၉ နှစ်ပြည့်ပြီ။ကျွန်တော် မသေသေးပါဘူး။ဒါကြောင့်မို့ နောက်နှစ်အခါ ဒီအဘိုးကြီးကြည့်ချင်တဲ့ပွဲဟာ ငြိမ်းချမ်းရေးပွဲဖြစ်ပါတယ်။ အခုလိုပွဲမျိုး မဟုတ်ပါဘူး။အခုလိုပြောနေတာတွေက တစ်ဖက်က ခေါင်းဆောင်တွေကြားမှာပဲလို့ ယုံကြည်ပါတယ်။ဒါကြောင့်မို့ အခုလိုဖြစ်တဲ့ပြဿနာတွေကို စားပွဲပေါ်မှာတွေ့ဆုံဆွေးနွေးပြီး ဖြေရှင်းကြဖို့ပဲဖြစ်ပါတယ်။အာဃာတရားအမုန်းတရားတွေအခြေခံနဲ့ ဖြေရှင်းသွားလို့မရဘူး။ဒီလိုလူသတ်ပွဲတွေနဲ့ ဖြေရှင်းသွားလို့မရဘူး။စားပွဲပေါ်မှာ လမ်းရှာရင်း ဖြေရှင်းသွားကြဖို့ပြောကြားရင်း နိဂုံးချုပ်ပါတယ်"ဟု ဗိုလ်ချုပ်ကြီး စောမူတူးစေးဖိုးက ပြောကြားခဲ့သည်။

အဆိုပါ ညီလာခံသို့ KNU ဥက္ကဋ္ဌ ဗိုလ်ချုပ်ကြီးစောမူတူးစေးဖိုး၊ မွန်ပြည်သစ်ပါတီ(NMSP)ဥက္ကဋ္ဌ နိုင်ဟံသာ၊ ရှမ်းပြည် ပြန်လည်ထူထောင်ရေးကောင်စီ(RCSS)ဥက္ကဋ္ဌ ဗိုလ်ချုပ်ကြီး ယွက်စစ်တို့က သဘာပတိများအဖြစ် တာဝန်ယူခဲ့ကြကြောင်းသိရသည်။

ymg/mt
#Yangon_Media_Group

#LocalNews
Published-30 Mar 2022

ကချင်ပြည်နယ် မိုးညှင်းခရိုင် မိုးညှင်းမြို့၌ မတ်လ(၃၀)ရက် ယနေ့ နံနက်ပိုင်းက နန့်ပုတ်တံတားကျိုးကျ၍ ယာဉ်မောင်းနှင့် ယာဉ်နောက်လိုက်တစ်ဦး သေဆုံးသွားခဲ့ကြောင်း မိုးညှင်းမြို့နယ်ရဲတပ်ဖွဲ့ကနေ သိရပါတယ်။

ဖြစ်စဉ်မှာ ယနေ့နံနက် ၆ နာရီကျော်ခန့်က မိုးညှင်းမြို့မှ ကာဒူကျေးရွာသို့ ဆက်သွယ်ထားသည့် ကားလမ်းမပေါ်တွင် နန့်ပုတ်ကျေးရွာကုန်ထုတ်လမ်းအတိုင်း ယာဉ်မောင်ဦးအောင်မြင့်ထွန်းမောင်းနှင်သော သစ်ခွဲသားများ တင်ဆောင်လာသည့် ယမ်းဖောင်(၆)ဘီးယာဉ်သည် နန့်ပုတ်ကျေးရွာအဝင် ပေါ်တော်မူဘုရားအနီးရှိ နန့်ရင်းချောင်းကူးတံတား အကျယ်(၁၂)ပေနှင့် အရှည်(၁၅၀)ပေရှိသော သစ်သားတံတားပေါ်သို့ ဖြတ်သန်းမောင်းနှင်စဉ် အဆိုပါတံတားကျိုးကျသွားခဲ့ပြီး ၎င်းယာဉ်ပါပြုတ်ကျမှုဖြစ်ပွားခဲ့တာဖြစ်တယ်လို့ သိရပါတယ်။

အဆိုပါဖြစ်ပွားမှုကြောင့် ယာဉ်မောင်းနှင့် ယာဉ်နောက်လိုက် သုံးဦးအနက် မိုးညှင်းမြို့၊ မြို့မရပ်ကွက်၊ သိမ်အင်းရပ်တွင်နေထိုင်သူ ယာဉ်မောင်း ဦးအောင်မြင့်ထွန်းသည် အခင်းဖြစ်ပွားရာနေရာတွင် သေဆုံးသွားခဲ့ပြီး ယာဉ်နောက်လိုက် မောင်အောင်မြင့်မှာ နေအိမ်၌ဆေးကုသမှုခံယူနေစဥ် သေဆုံးသွားခဲ့တယ်လို့ သိရပါတယ်။

ymg/hm
#Yangon_Media_Group

#WorldMilitary
Published - 30 March 2022
ယူကရိန်း-ရုရှားအရေးကိစ္စအကြောင်းညှိနှိုင်းဆွေးနွေးကြရာမှာ ယူကရိန်းမြို့တော်ကိဗ်နဲ့ နောက်ထပ်မြို့ ကြီးတစ်မြို့ မှာ စစ်ရေးတိုက်ခိုက်မှုများကို လျှော့ချသွားဖို့ ရုရှားတို့ ကတိပေးချက်ကို ယူကရိန်းကယုံစားနေမှာမဟုတ်ဘူးလို့ တုန့်ပြန်လိုက်ပါတယ်။

ရုရှားတို့ က ယူကရိန်းနိုင်ငံရဲ့အခြားအစိတ်အပိုင်းနေရာတွေမှာ အင်အားတိုးချဲ့လာနိုင်တယ်လို့ အနောက်နိုင်ငံတွေက ခန့်မှန်းထားကြပါတယ်။

ယူကရိန်းကို ရုရှားတို့ ကျူးကျော်တိုက်ခိုက်ပြီး တစ်လကျော်ကြာတဲ့အချိန်မှာ အစ္စတန်ဘူလ်နန်းတော်၌ တွေ့ဆုံညှိနှိုင်းခဲ့ကြတာဖြစ်ပါတယ်။

ဒုတိယကမ္ဘာစစ်နောက်ပိုင်း ဥရောပနိုင်ငံတစ်နိုင်ငံအပေါ် အကြီးမားဆုံးတိုက်ခိုက်မှုကြီးပြုလုပ်ခဲ့တာဖြစ်ပြီး ဒဏ်ရာရ/သေဆုံးသူ ထောင်ဂဏန်းအထိရှိလာကာ လူပေါင်း ၄ သန်းနီးပါး နေရပ်စွန့်ခွာထွက်ပြေးနေကြရပါတယ်။

အနောက်နိုင်ငံတွေက ရုရှားစီးပွားရေးကိုဒဏ်ခတ်ပိတ်ဆို့မှုတွေပြုလုပ်ပြီး အထိနာအောင်ပြုလုပ်ခဲ့ပါတယ်။ စစ်မြေပြင်တွေမှာ ယူကရိန်းတပ်ဖွဲ့ တွေကြံ့ကြံ့ခံခုခံထားတာကြောင့် ရုရှားတို့ ဆက်လက်မကျူးကျော်နိုင်ဘဲဖြစ်နေပါတယ်။

အဝိုင်းခံထားရတဲ့မြို့တွေထဲမှာ ပိတ်မိနေတဲ့အရပ်သားတွေရှိနေတဲ့ကြားထဲက ယူကရိန်းတပ်ဖွဲ့တွေဟာ အချို့ နယ်မြေတွေကို ပြန်လည်သိမ်းယူနိုင်ခဲ့ပါတယ်။

"သဘောတူညှိနှိုင်းရေးပြုလုပ်ဖို့ လိုအပ်ချက်တွေဖြည့်ဆည်းပြီး အပြန်အလှန်ယုံကြည်မှုရယူဖို့ အတွက် ကိဗ်နဲ့ချာနိုင်ဟစ်ဗ်မြို့ တွေမှာ စစ်ရေးတိုက်ခိုက်မှုတွေလျှော့ချဖို့ အဓိကဆုံးဖြတ်ခဲ့ကြပါတယ်" လို့ ရုရှားဒုကာကွယ်ရေးဝန်ကြီး'အလက်ဇန်ဒါဖိုမင်'က သတင်းထောက်တွေကို ပြောကြားခဲ့ပါတယ်။

အပစ်အခတ်အများဆုံးဖြစ်နေကြတဲ့ အရှေ့တောင်ဘက်ရှိ မာရီယူပိုလ်၊ အရှေ့ဘက်ရှိ ဆူမီနဲ့ ခါကစ်ဗ်၊ တောင်ဘက်ရှိ ခါဆန်နဲ့ မစ်ကိုလေ့ဗ်မြို့ များကိုတော့ ထည့်သွင်းဖော်ပြသွားခြင်းမရှိပါဘူး။

ယူကရိန်းသမ္မတ'ဗိုလိုဒီမီယာဇယ်လန်စကီ'က အင်္ဂါနေ့ကတုန့်ပြန်ပြောကြားရာမှာ "ယူကရိန်းလူမျိုးတွေက တုံးအတဲ့သူတွေမဟုတ်ပါဘူး။ လွန်ခဲ့တဲ့ ၈ နှစ်အတွင်း ဒွန်ဘတ်စ်ဒေသမှာဖြစ်ပွားနေတဲ့တိုက်ပွဲတွေနဲ့ အခု ၃၄ ရက်တာကျူးကျော်ခံရတဲ့ဖြစ်စဉ်တွေကနေ အတွေ့အကြုံရလိုက်ပါပြီ။ လက်တွေ့အခိုင်အမာပြနိုင်တဲ့ရလာဒ်တွေကိုပဲ ယုံကြည်သွားကြမှာပါ" လို့ ဆိုပါတယ်။

ကိဗ်မြို့တော်နားတဝိုက်မှာ ရုရှားတပ်ဖွဲ့ အနည်းငယ်မျှ ရွှေ့ပြောင်းသွားကြပေမယ့် ဒါဟာ တပ်ဆုတ်တာမျိုးမဟုတ်ဘဲ တပ်ဖွဲ့ နေရာပြန်ချခြင်းသဘောဖြစ်ကြောင်း ပန်တဂွန်ကပြောကြားခဲ့ပါတယ်။

ယူကရိန်းရဲ့အခြားနေရာဒေသတွေကို အဓိကတိုက်ခိုက်လာနိုင်တာကြောင့် ကြိုတင်ပြင်ဆင်ထားဖို့ လိုအပ်ကြောင်း၊ ယူကရိန်းကအန္တရာယ်ကြားက မလွတ်မြောက်သေးကြောင်း ပန်တဂွန်မှပြောရေးဆိုခွင့်ရှိသူ'ဂျွန်ကာဘီ'က စာနယ်ဇင်းရှင်းလင်းပွဲမှာပြောကြားခဲ့ပါတယ်။

ဗြိတိန်ကာကွယ်ရေးဝန်ကြီးဌာနက ရရှိလာတဲ့ထောက်လှမ်းရေးအချက်အလက်များကို သုံးသပ်ကာ ရုရှားတို့ က ယူကရိန်းမြောက်ဘက်ကနေ အရှေ့ဘက်ရှိ ဒိုနက်စ်နဲ့လူဟန့်စ်ဒေသတွေကို စစ်အင်အားရွှေ့ပြောင်းလာနိုင်ကြောင်း အသိပေးခဲ့ပါတယ်။

ရုရှားတို့ စစ်ရေးတိုက်ခိုက်မှုလျှော့ချဖို့ ကတိပေးခဲ့တဲ့နယ်မြေအများစုက သူတို့ စစ်ရှုံးနေတဲ့နေရာတွေသာဖြစ်ကြောင်း သုံးသပ်လေ့လာထားကြပါတယ်။ ပိုလန်နိုင်ငံရှိ အမေရိကန်တပ်ဖွဲ့ တွေက ယူကရိန်းတပ်တွေနဲ့ချိတ်ဆက်လျက်ရှိပြီး စစ်လက်နက်များနဲ့ F-18 လေယာဉ် ၁၀ စင်း ပေးအပ်ခဲ့တဲ့အပြင် ရုရှားနိုင်ငံနားရှိ နေတိုး(NATO)အဖွဲ့ ဝင်နိုင်ငံလစ်သူရေးနီးယားကို တပ်အင်အား ၂၀၀ ကျော်နေရာချထားခဲ့ကြောင်း 'ကာဘီ'က ပြောပြသွားပါတယ်။
Source: Reuters

#LocalNews
Published_30 March 2022

ရွှေသံလွင်ကုမ္ပဏီ ဥက္ကဌလည်းဖြစ်၊ Sky Net ရုပ်သံလိုင်း ပိုင်ရှင်လည်းဖြစ်သော ဦးကျော်ဝင်းအား ဖမ်းဆီးထားသည်ဆိုသောသတင်းမှာ မဟုတ်မှန်ကြောင်း ပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်းက YMG ကို ပြောသည်။

"ဦးကျော်ဝင်းကို ဖမ်းတာမဟုတ်ပါဘူး။အဲဒီသတင်းမဟုတ်ဘူးဗျ"ဟု ယင်းကဆိုသည်။

သို့သော်လည်း မီဒီယာတစ်ခုတွင် ဦးကျော်ဝင်းအား လွန်ခဲ့သော ၄ ရက်ခန့်ကပင် ဖမ်းဆီးသွားကြောင်း ရေးသားထုတ်ပြန်သည့်အတွက် အဆိုပါ သတင်းကို ပြန်လည်ဝေမျှသူများကြောင့် လူမှုကွန်ရက်တွင် ပျံ့နှံသွားခြင်းဖြစ်ကြောင်းလည်း သိရသည်။

ymg/mt
#Yangon_Media_Group

#WorldHealth
Published - 30 March 2022
ကိုဗစ်ရောဂါကြောင့် ဆေးရုံတက်ကုသခံယူနေရတဲ့လူနာများ ဖြင့် ဖိုင်ဇာမှထုတ်လုပ်တဲ့ ကိုဗစ်ကုသရေးသောက်ဆေးရဲ့ထိရောက်မှုကို ဗြိတိန်မှာလေ့လာဆန်းစစ်သွားမှာဖြစ်ကြောင်း သိပ္ပံပညာရှင်တွေကတနင်္လာနေ့က ပြောကြားခဲ့ပါတယ်။

ဗြိတိန်နိုင်ငံမှာ ဖိုင်ဇာရဲ့ကိုဗစ်ကုသဆေးပက်ဇ်လိုဗစ်(Paxlovid)ကို အသိအမှတ်ပြုထားပြီဖြစ်ပြီး နိုင်ငံတဝန်းရှိဆေးရုံတွေမှာ စမ်းသပ်လေ့လာသွားမှာဖြစ်ပါတယ်။

"ပက်ဇ်လိုဗစ်ဆေးက ဗိုင်းရပ်စ်ချေဖျက်နိုင်တဲ့သောက်ဆေးကောင်းတစ်လက်ပါ။ ဒါပေမဲ့ ကိုဗစ်ရောဂါပြင်းထန်တဲ့သူတွေမှာ အသက်ရှင်သန်နိုင်ချေများအောင်လုပ်ပေးနိုင်မလားဆိုတာကိုတော့ မသိရသေးပါဘူး" လို့ အောက်စ်ဖိုဒ်တက္ကသိုလ်မှ ပရော်ဖက်ဆာ'ပီတာဟော်ဘီ'က ပြောကြားလိုက်ပါတယ်။

စမ်းသပ်ခြင်းရည်ရွယ်ချက်က ဖိုင်ဇာပက်ဇ်လိုဗစ်ဆေးဟာ ဆေးရုံတက်ကုသခံယူနေရတဲ့ ကိုဗစ်လူနာတွေမှာ အသက်သေဆုံးမှုနှုန်းကို လျှော့ချပေးနိုင်လားဆိုတာကို အဓိကထားရည်ရွယ်ထားပါတယ်။

ယခုနှစ်အစောပိုင်းကလည်း Merck ကုမ္ပဏီရဲ့ ကိုဗစ်ကုသရေးသောက်ဆေးကိုလည်း ဆေးရုံတက်ရောက်ကုသခံနေရတဲ့လူနာတွေမှာ စမ်းသပ်ခဲ့ပါတယ်။

အောက်စ်ဖို့ဒ်တက္ကသိုလ်မှပြုလုပ်မယ့် ဒီစမ်းသပ်မှုဟာ ပက်ဇ်လိုဗစ်ဆေးဝါးအနေနဲ့ ဆေးရုံတက်ရောက်ရတဲ့အချိန်ကာလကို လျှော့ချနိုင်မလားဆိုတဲ့အချက်နဲ့ အသက်ရှူကိရိယာလိုအပ်မှုကို လျှော့ချနိုင်မလားဆိုတဲ့အချက်တွေကိုလည်း လေ့လာသုံးသပ်သွားမှာဖြစ်ပါတယ်။

ပက်ဇ်လိုဗစ်ဆေးဟာ protease inhibitors အမျိုးအစားဖြစ်ပြီး HIV ၊ အသည်းရောင်အသားဝါ-စီနဲ့ အခြားဗိုင်းရပ်စ်ရောဂါတွေကို ကုသရာမှာအသုံးပြုတဲ့အမျိုးအစားဖြစ်ကာ ဗိုင်းရပ်စ်တွေထပ်မံပျံ့ပွားမလာအောင် တားဆီးပေးတာဖြစ်ပါတယ်။

ယခုနှစ်အတွင်း ပက်ဇ်လိုဗစ်ဆေးဝါးကနေ ဒေါ်လာ ၂၀ ဘီလီယံကျော်ရောင်းချရနိုင်ဖို့ ဖိုင်ဇာကမျှော်လင့်ထားပါတယ်။

၂၀၂၀ ခုနှစ်တုန်းက စတီးရွိုက်တစ်မျိုးဖြစ်တဲ့ ဒက်ဆာမက်သဇုန်း(dexamethasone)က ကပ်ရောဂါကာလအတွင်း လူနာတွေကိုကယ်တင်ခဲ့နိုင်ကြောင်း၊ အဆစ်အမြစ်ရောင်ကုသဆေး tocilizumab နဲ့ ပဋိပစ္စည်းရောစပ်ဆေး Ronapreve တိုဟာလည်း ရောဂါကုသရာမှာ ထိရောက်မှုရှိခဲ့ကြောင်း သိပ္ပံပညာရှင်များက ဖော်ပြခဲ့ပါတယ်။
Source: Reuters

#LocalNews
Published- 30 Mar 2022

တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်ကို လက်မှတ်ရေးထိုးထားသော တိုင်းရင်းသားလက်နက်ကိုင်အဖွဲ့အစည်းများ၏ စတုတ္ထအကြိမ် ထိပ်သီးခေါင်းဆောင်များညီလာခံ (ဒုတိယပိုင်း) ကို ထိုင်းနိုင်ငံ၊ ချင်းမိုင်မြို့တွင် ၂၀၂၂ ခုနှစ်၊ မတ်လ ၂၉ ရက်နေ့မှ စတင်ပြီးမျက်နှာချင်းဆိုင်နှင့် Video Conferencing နည်းနာနှစ်မျိုးဖြင့် ကျင်းပလျက်ရှိကာ ညီလာခံကို လာမည့် ဧပြီလ (၂) ရက်နေ့အထိ ဆက်လက်ကျင်းပသွားမယ်လို့ သိရပါတယ်။

ညီလာခံဖွင့်ပွဲအခမ်းအနား ဦးဆောင်သဘာပတိများအဖြစ် ဗိုလ်ချုပ်ကြီး စောမူတူးစေးဖိုး၊ သျှမ်းပြည်ပြန်လည်ထူထောင် ရေးကောင်စီ ဥက္ကဌ ဗိုလ်ချုပ်ကြီး ယွက်စစ်နှင့် မွန်ပြည်သစ်ပါတီဥက္ကဌ နိုင်ဟံသာ တို့က ဆောင်ရွက်ခဲ့ကြပြီး ဗိုလ်ချုပ်ကြီး စောမူတူးစေးဖိုးနှင့် ဗိုလ်ချုပ်ကြီး ယွက်စစ်တို့က ညီလာခံဖွင့်ပွဲအခမ်းအနား အဖွင့်အမှာစကားများအား အသီးသီး ပြောကြားခဲ့ကြပါတယ်။

နိုင်ငံတကာသံတမန်များ အပါအဝင် နိုင်ငံတကာအဖွဲ့အစည်းများမှ တာဝန်ရှိသူများက တက်ရောက်ခဲ့ကြပြီး ညီလာခံဖွင့်ပွဲအခမ်းအနားနှုတ်ခွန်းဆက်အမှာစကားများပြောရာ မြန်မာနိုင်ငံဆိုင်ရာ ကနေဒါနိုင်ငံသံအမတ်ကြီး Mr. Francois Lafreniere ၊ မြန်မာနိုင်ငံဆိုင်ရာ ဖင်လန်နိုင်ငံသံအမတ်ကြီး Mr. Pekka Shemeikka ၊ မြန်မာနိုင်ငံဆိုင်ရာ နော်ဝေနိုင်ငံသံအမတ်ကြီး Ms. Hilde Solbakken ၊ဩစတြေးလျနိုင်ငံမှ သံတမန်ဖြစ်သူ Mr. Bryan Bong၊အီတလီနိုင်ငံမှ Deputy Head of Mission ဖြစ်သူ Mr. Andrea Ferrara ၊ဆွစ်ဇာလန်နိုင်ငံမှ လူသားလုံခြုံရေးဆိုင်ရာ အကြံပေးပုဂ္ဂိုလ် Mr. Thomas Meier Nidecker၊ USAID မှ ယာယီဌာနေကိုယ်စားလှယ်ဖြစ်သူ Ms. Pamela Fessenden တို့ကပြောကြားအပြီးတွင် မွန် ပြည်သစ်ပါတီဥက္ကဌ နိုင်ဟံသာက ညီလာခံဖွင့်ပွဲအခမ်းအနားရဲ့ နိဂုံးချုပ်အမှာစကား ပြောကြားခဲ့တယ်လို့ သိရပါတယ်။

စတုတ္ထအကြိမ် NCA-S EAO ထိပ်သီးခေါင်းဆောင်များညီလာခံဖွင့်ပွဲအခမ်းအနားသို့ ညီလာခံဖွင့်ပွဲဦးဆောင် သဘာပတိများ၊ ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) အဖွဲ့ဝင်ခေါင်းဆောင်များ၊ ငြိမ်းချမ်းရေးလုပ်ငန်းစဉ် ဦးဆောင်အဖွဲ့၏ ဦးဆောင်မှုအလုပ်အဖွဲ့ အဖွဲ့ဝင်များ၊ PPST ၏ အကြံပေးပုဂ္ဂိုလ်၊ NCA-S EAO မှ ခေါင်းဆောင်ကိုယ်စားလှယ်များ၊ NCA-S EAO ၏ ငြိမ်းချမ်းရေးလုပ်ငန်းစဉ်တွင် အမျိုးသမီးများ၏ ဦးဆောင်မှုမြှင့်တင်ရေးအစီအစဉ် (WLPP)မှ ညှိနှိုင်းရေးမှူး၊ နိုင်ငံတကာ သံတမန်များ၊ နိုင်ငံတကာအဖွဲ့အစည်းများမှ ကိုယ်စားလှယ်များနှင့် လေ့လာသူများတက်ရောက်ခဲ့ကြပါတယ်။

ymg/hm
#Yangon_Media_Group

#WorldHealth
Published- 30 March 2022

ကိုရိုနာဗိုင်းရပ်စ်ကာကွယ်ဆေးစတုတ္ထအကြိမ်ထိုးနှံခြင်းဖြင့် အသက် ၆၀ မှ ၁၀၀ ကြားလူကြီးတွေမှာ ကိုဗစ်ရောဂါကြောင့်အသက်သေဆုံးနိုင်ချေကို ၇၈ ရာခိုင်နှုန်းလျှော့ချပေးနိုင်ကြောင်း ကလဲလစ်ကျန်းမာရေးအဖွဲ့အစည်းက လေ့လာဖော်ပြခဲ့ပါတယ်။

အဆိုပါလေ့လာမှုကို ကလဲလစ်၊ ဆေပီယာကောလိပ်၊ ဘန်ဂူရီယန်တက္ကသိုလ်တို့က ပြုလုပ်ခဲ့ကြကာ အစ္စရေးလ်နိုင်ငံအတွင်း ဒုတိယအကြိမ်အားမြှင့်ကာကွယ်ဆေး(booster)ထိုးနှံခြင်းက အသက်သေဆုံးမှုနှုန်းကိုဘယ်လောက်အထိလျှော့ချနိုင်လဲဆိုတာကို လေ့လာခဲ့ကြတာဖြစ်ပါတယ်။

စတုတ္ထအကြိမ်ကာကွယ်ဆေးထုတ်လုပ်ဖြန့်ဖြူးချိန်မှာ လက်တွေ့စမ်းသပ်ထိရောက်မှုအထောက်အထားနည်းပါးခဲ့တာကြောင့် အငြင်းပွားစရာတွေဖြစ်ခဲ့ပါသေးတယ်။
ဒါကြောင့် ပထမအကြိမ်အားမြှင့်ကာကွယ်ဆေးထိုးနှံသူတွေလောက်မများခဲ့ဘဲ ဒုတိယအကြိမ်အားမြှင့်ကာကွယ်ဆေးထိုးနှံသူတွေကတော့ အလွန်နည်းပါးနေခဲ့ပါတယ်။

ဒါပေမဲ့အခုဆိုရင် စမ်းသပ်မှုအချက်အလက်တွေအရ စတုတ္ထအကြိမ်ကာကွယ်ဆေးက အသက်သေဆုံးမှုကို သိသိသာသာလျှော့ချပေးနိုင်တာကြောင့် ထိုးနှံဖို့ တွန့်ဆုတ်နေတဲ့သူတွေအနေနဲ့ ကာကွယ်ဆေးဆက်လက်ထိုးနှံသွားဖို့ ဆုံးဖြတ်သွားရန်မျှော်လင့်ထားကြောင်း စာတမ်းပြုစုသူများက ဖော်ပြခဲ့ပါတယ်။

ကလဲလစ်ကျန်းမာရေးအဖွဲ့ အစည်းက စတုတ္ထအကြိမ်ကာကွယ်ဆေးထိရောက်မှုလေ့လာရေးအတွက် လူပေါင်း ၅၆၃,၄၆၅ ဦးကို လေ့လာမှုပြုလုပ်ခဲ့ကာ ပျမ်းမျှအသက် ၇၃ နှစ်ရှိပြီး လူဦးရေ ၅၃ ရာခိုင်နှုန်းက အမျိုးသမီးကြီးတွေဖြစ်ပါတယ်။

ထိုနောက် အားမြှင့်ကာကွယ်ဆေး booster ဒုတိယအကြိမ်ထိုးနှံပြီးသူတွေက တစ်ဖွဲ့ နဲ့ booster ပထမအကြိမ်ထိုးနှံပြီးသူတွေကတစ်ဖွဲ့ဆိုပြီး နှစ်ဖွဲ့ခွဲလိုက်ပါတယ်။
ဒုတိယအကြိမ် booster ကို ၂၀၂၂ ဇန်နဝါရီ ၁၀ ရက်နေ့မှ ဖေဖော်ဝါရီ ၂၀ ရက်နေ့အတွင်း ထိုးနှံထားတဲ့သူတွေကို လေ့လာခဲ့ကြတာဖြစ်ပါတယ်။

အားမြှင့်ကာကွယ်ဆေး booster တစ်ကြိမ်ထိုးနှံထားတဲ့အဖွဲ့ မှ ကိုဗစ်ရောဂါကြောင့်သေဆုံးသူ ၂၃၂ ဦးရှိခဲ့ပြီး ဒုတိယအကြိမ် booster ထိုးနှံထားတဲ့အဖွဲ့ မှ သေဆုံးသူ ၉၂ ဦးရှိခဲ့ပါတယ်။
ထိုသေဆုံးသူ ၉၂ ဦးထဲက ၅ ဦးက အသက် ၆၀ မှ ၆၉ နှစ်ကြား၊ ၂၂ ဦးက အသက် ၇၀ မှ ၇၉ နှစ်ကြား၊ ၆၅ ဦးက အသက် ၈၀ မှ ၁၀၀ နှစ်ကြား အသီးသီးတွေ့ရှိခဲ့ပါတယ်။

အားမြှင့်ကာကွယ်ဆေး booster တစ်ကြိမ်ထိုးနှံပြီးသေဆုံးသူတွေထဲမှာတော့ ၃၂ ဦးက အသက် ၆၀ မှ ၆၉ နှစ်ကြား၊ ၅၁ ဦးက အသက် ၇၀ မှ ၇၉ နှစ်ကြား၊ ၁၄၉ ဦးက အသက် ၈၀ မှ ၁၀၀ နှစ်ကြားရှိခဲ့ပါတယ်။

ဒယ်လ်တာမျိုးဗီဇကွဲကူးစက်မှုကာလအတွင်း တတိယအကြိမ်ကာကွယ်ဆေးထိုးနှံစဉ်က သက်ကြီးရွယ်အိုတွေမှာ အသက်သေဆုံးနိုင်ချေကို ၉၀ ရာခိုင်နှုန်းလျှော့ချပေးနိုင်ခဲ့ပေမယ့် စတုတ္ထအကြိမ်ကာကွယ်ဆေးထိုးနှံစဉ်မှာတော့ အသက်သေဆုံးနိုင်ချေကို ၇၈ ရာခိုင်နှုန်းသာလျှော့ချပေးနိုင်ပါတယ်။

ဒီစမ်းသပ်မှုရဲ့ရည်ရွယ်ချက်က အသက် ၆၀ အထက်လူကြီးတွေမှာ အားမြှင့်ကာကွယ်ဆေးဒုတိယအကြိမ်ထိုးနှံကြဖိုဖြစ်တဲ့အပြင် အခြားနိုင်ငံတွေမှာလည်း ရောဂါကူးစက်ပြင်းထန်နိုင်တဲ့လူတွေမှာ ကာကွယ်ဆေးထပ်မံထိုးနှံဖို့ တိုက်တွန်းချင်ကြောင်း ဖော်ပြထားပါတယ်။

အခုအခါစမ်းသပ်မှုအထောက်အထားတွေရှိလာပြီဖြစ်တဲ့အတွက် ဒုတိယအကြိမ်အားမြှင့်ကာကွယ်ဆေး booster ထိုးနှံချင်တဲ့သူတွေများလာပြီဖြစ်ပါတယ်။
Source: The Jerusalem Post

#Local_News
Published_ 30 March 2022

မြန်မာနိုင်ငံသားများအား (၁၀၂) ကြိမ်မြောက် ကယ်ဆယ်ရေးလေယာဉ်ဖြင့် ဆိုးလ်မြို့မှ ရန်ကုန်သို့ မတ် (၂၉) ရက်တွင် ပြန်လည်ပို့ဆောင်ပေးခဲ့ကြောင်း သိရပါတယ်။

အဆိုပါလေယာဉ်ဟာ အင်ချွန်း အပြည်ပြည်ဆိုင်ရာလေဆိပ်မှ ရန်ကုန် အပြည်ပြည်ဆိုင်ရာလေဆိပ်သို့ ညနေ ၄ နာရီခွဲတွင် ထွက်ခွာခဲ့ပြီး၊ ကနေဒါမှ ၂ ဦး၊ အီတလီမှ ၂ ဦး၊ အမေရိကန်ပြည်ထောင်စုမှ ၁၂ ဦး၊ ကမ္ဘောဒီးယားမှ ၁ ဦး၊ ကိုရီးယား သမ္မတနိုင်ငံမှ မြန်မာနိုင်ငံသား ၅၅ ဦးဖြင့် စုစုပေါင်း ၇၂ ဦး လိုက်ပါသွားခဲ့ကြောင်း သိရပါတယ်။

ကိုဗစ်-၁၉ ကူးစက်ရောဂါ ဖြစ်ပွားနေသည့်ကာလအတွင်း မြန်မာနိုင်ငံသို့ ပြန်လည် ထွက်ခွာ/ သွားရောက်နိုင်ရေးအတွက် မြန်မာသံရုံး၊ ဆိုးလ်မြို့မှ တစ်ပတ်လျှင် တစ်ကြိမ် ကယ်ဆယ်ရေးလေယာဉ် ပျံသန်းပြေးဆွဲနိုင်ရေး စီစဉ်ပေးလျက်ရှိရာ မတ် ၂၉ ရက် အင်္ဂါနေ့တွင် မြန်မာအပြည်ပြည်ဆိုင်ရာ လေကြောင်းလိုင်းဖြင့် (၁၀၂) ကြိမ်မြောက် ကယ်ဆယ်ရေးလေယာဉ် ပျံသန်းပြေးဆွဲရန် စီစဉ်ပေးခဲ့တာဖြစ်ပါတယ်။

လိုက်ပါသည့်ခရီးသည်များ လေဆိပ်၌ အခက်အခဲတစ်စုံတစ်ရာ မရှိစေရေးအတွက် မြန်မာသံရုံး၊ ဆိုးလ်မြိုမှ သံရုံးဝန်ထမ်းများက လေဆိပ်သို့သွားရောက်၍ လိုအပ်သည်များ ကူညီဆောင်ရွက်ပေးခဲ့ကြကြောင်း သတင်းရရှိပါတယ်။

ymg-mnn
#Yangon_Media_Group.

Published 29 March 2022

ဂျပန်နိုင်ငံ မြိုတော်တိုကျိုတွင် ချယ်ရီပွင့်ချိန်ပြန်လည်ရောက်ရှိလာခဲ့ပါတယ်။ မြို့သူမြို့သားတွေဟာ နွေဦးနေ့ကလေးတွင် မြို့တော်တစ်လျောက် ချယ်ရီပန်းများအပြည့်အဝဖူးပွင့်နေသည်ကို ကြည့်ရှုခံစားကြပါတယ်။ ဂျပန်နိုင်ငံဟာ ကိုဗစ်-၁၉ အရေးပေါ်စည်းကမ်းတွေကို ဖျက်သိမ်းပေးလိုက်ပါတယ်။ ဒါပေမယ့် ပန်းတွေဖူးပွင့်နေတဲ့အောက်မှာ နာမည်ကျော် ဟာနာမီ ပျော်ပွဲစားပါတီတွေ မလုပ်ကြဖို့ကိုတော့ တိုကျိုသားတွေကို သတိပေးထားပါတယ်။

Source AFP