#LocalNews
Pulished _ 7 June 2022

၂၀၂၁-၂၀၂၂ ပြောင်းစိုက်ရာသီမှာ ပင်လယ်ရေကြောင်းနဲ့ နယ်စပ်ကုန်သွယ်ရေးလမ်းကြောင်းတွေကနေ တန်ချိန် ၁၆ သိန်းနီးပါး တင်ပို့ ထားတယ်လို့ မြန်မာနိုင်ငံ ပဲမျိုးစုံ၊ ပြောင်းနှင့်နှမ်းကုန်သည်များအသင်းက သိရပါတယ်။

#Yangon_Media_Group

#LocalNews
Published _ 7 June 2022

ပြည်တွင်း၌ ဘိလပ်မြေစက်ရုံများ ဆက်လက်တည်ဆောက်နိုင်ရေးအတွက် ရင်းနှီးမြှုပ်နှံမည့် လုပ်ငန်းရှင်များကို စက်မှုဝန်ကြီးဌာနမှ ဖိတ်ခေါ်လျက်ရှိကြောင်း သိရသည်။

တည်ဆောက်ရေးလုပ်ငန်းများ ဆောင်ရွက်ရာတွင် ဘိလပ်မြေမှာ မရှိမဖြစ် လိုအပ်သောကြောင့် ဘိလပ်မြေထုတ်လုပ်သည့် နည်းပညာများ ပိုမိုဖွံ့ဖြိုးပြန့်ပွားအောင် ကြိုးစားဆောင်ရွက်ရန်နှင့် လူ့စွမ်းအားအရင်းအမြစ်များ ပိုမိုဖွံ့ဖြိုးတိုးတက်စေရေးအတွက် ပုဂ္ဂလိကလုပ်ငန်းရှင်များနှင့် အစိုးရဌာနမှ တာဝန်ရှိသူများ ပူးပေါင်းဆောင်ရွက်ရန် လိုကြောင်း စက်မှုဝန်ကြီးဌာန ပြည်ထောင်စုဝန်ကြီး ဒေါက်တာ ချာလီသန်းက နေပြည်တော်ကောင်စီနယ်မြေ လယ်ဝေးမြို့နယ်ရှိ Max ဘိလပ်မြေစက်ရုံသို့ သွားရောက်စဉ် ပြောကြားခဲ့ခြင်းဖြစ်သည်။

"ဘိလပ်မြေစက်ရုံတွေအနေနဲ့ လူ့စွမ်းအားအရင်းအမြစ် ဖွံ့ဖြိုးတိုးတက်ရေးလုပ်ငန်းစဉ်တွေကို အစီအမံတွေ ချမှတ်ပြီး အစဉ်အဆက်မပြတ် လေ့ကျင့်ပြုစုပျိုးထောင်ပေးဖို့လိုအပ်ပါတယ်။ မိမိနိုင်ငံမှာရှိတဲ့ ပညာရှင်တွေကို ကုန်ထုတ်လုပ်မှုလုပ်ငန်းတွေ ဆောင်ရွက်ဖို့အတွက် စက်ရုံတွေကို ကိုယ်ပိုင်ဒီဇိုင်းဆွဲပြီး တည်ဆောက်နိုင်တဲ့အထိ လေ့ကျင့်ပြုစုပျိုးထောင်နိုင်ဖို့တွေ စီမံထားရမှာဖြစ်ပြီး စက်ရုံမှာရှိတဲ့ အင်ဂျင်နီယာ ပညာရှင်တွေကို အတိုင်ပင်ခံအင်ဂျင်နီယာတွေအဖြစ် ပြုစုပျိုးထောင်ဖို့လိုအပ်ပါတယ်။ စက်မှုလုပ်ငန်းတွေ ဖွံ့ဖြိုးတိုးတက်မှသာ ပြည်သူလူထုအတွက် အလုပ်အကိုင်အခွင့်အလမ်းများစွာ ဖန်တီးပေးနိုင်မှာ ဖြစ်ပါတယ်။ ဒါကြောင့် စက်မှုလုပ်ငန်းတွေ ဖွံ့ဖြိုးတိုးတက်လာဖို့အတွက် အစိုးရနဲ့ ပုဂ္ဂလိကလုပ်ငန်းရှင်တွေ ပူးပေါင်းဆောင်ရွက်ရမှာဖြစ်ပြီး စက်ရုံများအနေနဲ့ သွင်းကုန်အစားထိုး ကုန်ထုတ်လုပ်မှု လုပ်ငန်းတွေ ဆောင်ရွက်ကာ အခုထက် ပိုမိုထုတ်လုပ်နိုင်ရေးကို ကြိုးစားဆောင်ရွက်ကြဖို့နဲ့ သဘာဝပတ်ဝန်းကျင်ပျက်စီးမှု မရှိစေရေးတွေကို အလေးထားဆောင်ရွက်ကြပါ" ဟု ပြည်ထောင်စုဝန်ကြီးက ပြောကြားခဲ့သည်။

ymg/NN
#Yangon_Media_Group

#LocalNews
Published - 7 June 2022

ထိုင်းနိုင်ငံ၌ ၂၀၂၁ ခုနှစ် နိုဝင်ဘာလအတွင်းက အဓမ္မပြုကျင့်၍ မီးရှို့အသတ်ခံခဲ့ရသည့် မြန်မာအမျိုးသမီး မမြင့်မြင့်ခိုင်၏အမှုကို ထိုင်းတရားရုံးက စက်တင်ဘာတွင် အမိန့်ချမည်ဖြစ်ကြောင်း သိရသည်။

ထိုင်းနိုင်ငံ ကဘင်ဘူရီတရားရုံး၌ သက်သေသုံးဦး၏ ထွက်ဆိုချက်များကို ဇွန်လ ၆ ရက်တွင် ကြားနာခဲ့ပြီး အထောက်အထား ၁၈ ခုရရှိခဲ့ကြောင်း၊ တရားခံမှ ပြစ်မှု ခြောက်မှုကို ဝန်ခံခဲ့သည့်အတွက် လာမည့်စက်တင်ဘာလတွင် ပြစ်ဒဏ်အတွက် အမိန့်ချမှတ်မည်ဖြစ်ကြောင်း မြန်မာနိုင်ငံဆိုင်ရာ အလုပ်သမားသံအရာရှိရုံးမှသိရသည်။

ယင်းအပြင်သေဆုံးသူ မမြင့်မြင့်ခိုင်အတွက် နစ်နာကြေးတစ်လလျှင် ထိုင်းဘတ် ၅၀၀၀ ဖြင့် နှစ်ပေါင်း ၄၀ စာတောင်းခံသွားရန် အလုပ်သမားသံအရာရှိ ရုံးမှစီစဉ်နေပြီး မြန်မာသံရုံးတာဝန်ရှိသူများနှင့် သံအရာရှိ၊ မြန်မာရှေ့နေတို့မှ ကဘင်ဘူရီမြို့ရှိ သေဆုံးသူ၏ အမဖြစ်သူ မမြင့်မြင့်အေး၊ မညိုညိုစိန်တို့အား သွားရောက်တွေ့ဆုံခြင်း၊ ရဲစခန်း၌ အမှုအခြေအနေစုံစမ်းခြင်း၊ DNA ရလဒ်ရရှိရေးနှင့် အလောင်းသင်္ဂြိုဟ်နိုင်ရေးကိစ္စရပ်များ မေးမြန်းခဲ့ကာ လိုအပ်သော အထောက် အထားများ စုဆောင်းခြင်း၊ အလောင်းထုတ်ယူနိုင်ရေး၊ သင်္ဂြိုဟ်နိုင်ရေးကိစ္စရပ်များကို ကူညီဆောင်ရွက်ပေးခဲ့ကြောင်းလည်း ထုတ်ပြန်ချက်တွင် ဖော်ပြထားသည်။

မမြင့်မြင့်ခိုင်ကို စေလွှတ်ခဲ့သည့် Top Chance Services ကုမ္ပဏီမှ လိုအပ်သည်များ ပံ့ပိုးကူညီရေးနှင့် သံရုံးတာဝန်ရှိသူများ၊ သံအရာရှိအဖွဲ့တို့မှ သေဆုံးသူ၏ အမဖြစ်သူတို့နှင့်အတူ အစိုးရရှေ့နေများထံ သွားရောက်ပြီး အမှုအခြေအနေ ဆက်လက်ဆောင်ရွက်မည့် အခြေအနေနှင့် နစ်နာကြေးရရှိနိုင်ရေး အခြေအနေတို့ဆွေးနွေးခဲ့ကြောင်းလည်း မြန်မာနိုင်ငံဆိုင်ရာ အလုပ်သမားသံအရာရှိရုံးက ထုတ်ပြန်ထားသည်။

မြန်မာအမျိုးသမီး မမြင့်မြင့်ခိုင်ကို မည်သည့်ဇာတိမှဖြစ်သည်ကို သံအရာရှိရုံးက ဖော်ပြထားခြင်းမရှိဘဲ သေဆုံးသူအား ၂၀၂၁ ခုနှစ် နိုဝင်ဘာ ၁၈ ရက်၌ ထိုင်းနိုင်ငံသား Boonlai Buaman က အဓမ္မပြုကျင့် မီးရှို့သတ်ဖြတ်ခဲ့ပြီးနောက် ယင်းနေ့တွင် ကဘင်ဘူရီခရိုင် ရဲတပ်ဖွဲ့က ဖမ်းဆီးရမိခဲ့ခြင်းဖြစ်ကြောင်း သိရသည်။

ymg/sth
#Yangon_Media_Group

#LocalNews
Published _ 7 June 2022

မွန်ပြည်နယ်၊ မော်လမြိုင်မြို့၊ ကမ်းနားလမ်းပေါ်ရှိ မြို့မတံတားအနီးတွင် ဇွန်လ ၇ ရက် နံနက် ၇ နာရီ ၄၅ မိနစ်ခန့်က ကားနှင့်ဆိုင်ကယ်တိုက်မိသည့်ဖြစ်စဉ်တစ်ခုဖြစ်ပွားခဲ့ကြောင်း ရာမညအရေးပေါ် လူမှုကယ်ဆယ်ရေးအဖွဲ့ထံမှ သိရသည်။

အဆိုပါဖြစ်စဉ်ကြောင့် ဆိုင်ကယ်မှာ (၂) ပိုင်းပြတ်ထွက်သွားခဲ့ပြီး ဆိုင်ကယ်မောင်းနှင်လာသော အမျိုးသား (၂) ဦးမှာလည်း ထိခိုက်ဒဏ်ရာများရရှိခဲ့ကြောင်း သိရသည်။

ဖြစ်စဉ်တွင် ထိခိုက်ဒဏ်ရာရရှိခဲ့သည့် အမျိုးသား (၂) ဦးအား ရာမညအရေးပေါ်လူမှုကယ်ဆယ်ရေးအဖွဲနှင့် ရွှေတောင်အရေးပေါ်လူမှုကယ်ဆယ်ရေးအဖွဲ့တို့မှ မော်လမြိုင်ပြည်သူ့ဆေးရုံကြီးသို့ ဆေးကုသမှုခံယူရန် ပို့ဆောင်ပေးခဲ့ကြကြောင်း သိရသည်။

ymg/NN
#Yangon_Media_Group

#LocalNews
Published _ 7 June 2022

မိန်းကလေးတစ်ဦးအား တရုတ်နိုင်ငံသို့ ပို့ဆောင်ရောင်းစားပြီး ငွေကြေးအကျိုးအမြတ်ရယူခဲ့သူကို လူကုန်ကူးမှုဖြင့် ထောင်ဒဏ် ၁၀ နှစ် ကျခံစေရန် အမိန့်ချမှတ်ခဲ့ကြောင်း သိရသည်။

ရန်ကုန်တိုင်းဒေသကြီး၊ မှော်ဘီမြို့နယ် ရိုးကြီးကျေးရွာတွင်နေထိုင်သည့် ဇော်သက်ထွေး (ခ)ချစ်ထွေး (ခ)နိုင်လင်းသည် မင်းဒဿ အကောင့်ဖြင့် လူမှုကွန်ရက်စာမျက်နှာ အသုံးပြုပြီး ရန်ကုန်တိုင်းဒေသကြီး၊ ဒဂုံမြို့သစ်(တောင်ပိုင်း)မြို့နယ်နေ မ --- (၁၈ နှစ်)အား တရုတ်နိုင်ငံ ရွှေလီမြို့ရှိ ဟောပေါ့ဆိုင်တွင် အလုပ်လုပ်ကိုင်လိုပါက တစ်လလျှင် ငွေကျပ် ၃၅၀၀၀၀ ရရှိမည်ဟု ပြောဆိုစည်းရုံး၍ တရုတ်နိုင်ငံသို့ ပို့ဆောင်ခဲ့သည်။

ထို့နောက် တရုတ်အမျိုးသား ဖန်ကွေ့ဆိုသူထံ ရောင်းစား၍ ငွေကြေးအကျိုးအမြတ်ရယူခဲ့သဖြင့် ရွှေပြည်သာမြို့မရဲစခန်း (ပ) ၁၉၁၈ / ၂၀၁၉၊ လူကုန်ကူးမှုတားဆီးကာကွယ်ရေး ဥပဒေပုဒ်မ ၂၄ ဖြင့် အမှုဖွင့်၍ မြောက်ပိုင်းခရိုင်တရားရုံးသို့ တရားစွဲတင်ပိုခဲ့ကြောင်း သိရသည်။

ဆက်လက်၍ တရားခံ ဇော်သက်ထွေး (ခ)ချစ်ထွေး (ခ)နိုင်လင်းကို လူကုန်ကူးမှုတားဆီးကာကွယ်ရေးဥပဒေပုဒ်မ ၂၄ အရ အလုပ်နှင့် ထောင်ဒဏ် ၁၀ နှစ် ကျခံစေရန်ဇွန်လ ၃ ရက်က အမိန့်ချမှတ်ခဲ့ကြောင်း သိရသည်။

ymg/NN
#Yangon_Media_Group

Published 7 June 2022

ဗီယက်နမ်က ကျန်းမာရေးဝန်ကြီး ငုယင်သန်လောင်ကို ကွန်မြူနစ်ပါတီရဲ့ စည်းမျည်းတွေကို ချိုးဖောက်ပြီး နိုင်ငံတော်ရဲ့ ဘတ်ဂျက်ကို ဆုံးရှုံးမှုဖြစ်စေတယ်လို့ စွပ်စွဲပြီးအင်္ဂါနေ့က ထုတ်ပယ်ပစ်လိုက်တဲ့အကြောင်း နိုင်ငံပိုင်မီဒီယာက သတင်းထုတ်ပြန်ပါတယ်။

၂၀၁၆ခုနှစ်မှာ ဗီယက်နမ်မှာ စတင်ခဲ့တဲ့ အဂတိလိုက်စားမှုတိုက်ဖျက်ရေး အရှိန်မြှင့်ဆောင်ရွက်နေတဲ့အချိန်မှာ ဝန်ကြီးတစ်ဦး အထုတ်ပယ်ခံလိုက်ရတာဖြစ်ပါတယ်။

ပြီးခဲ့တဲ့ ရက်သတ္တပတ်များက ကျန်းမာရေးဝန်ကြီးဌာန အကြီးတန်းအရာရှိဒါဇင်ကျော်လည်း ဖမ်းဆီးခံရပါတယ်။ သူတို့ကို ကိုဗစ်-၁၉ စစ်ဆေးရေးကိရိယာတွေအပါအဝင် ဆေးဝါးပစ္စည်းတွေ ဝယ်ယူရာမှာ မလျော်မကန်ဆောင်ရွက်ခဲ့ကြတယ်လို့ စွပ်စွဲပြီး ဖမ်းဆီးထိန်းသိမ်းခဲ့တာပါ။ အကြီးတန်း ဘဏ္ဍာရေးနှင့် သံတမန်ရေးရာ အရာရှိကြီးတွေဟာ ပစ်မှတ်ထားအရေး ယူခံကြရပြီး တော်တော်များများဟာ တရားစွဲဆိုခံကြရပြီး ထောင်ချခံကြရပါတယ်။

အင်္ဂါနေ့ကကျင်းပတဲ့ ဗီယက်နမ်အမျိုးသားလွှတ်တော်က ၂၀၂၀ပြည့်နှစ်မှာ ကျန်းမာရေးဝန်ကြီးဖြစ်လာခဲ့တဲ့ အသက်၅၅နှစ်အရွယ်ရှိ ကျန်းမာရေးဝန်ကြီးကို မဲပေးထုတ်ပယ်လိုက်ကြတာဖြစ်ပါတယ်။

မစ္စတောလောင်းကို ကွန်မြူနစ်ပါတီကပါ ထုတ်ပယ်ဖို့ ဆုံးဖြတ်ခဲ့ကြတယ်လို့ အစိုးရက သတင်းထုတ်ပြန်ပါတယ်။

“လောင်းဟာ နိုင်ငံရေးအတွေးအခေါ်နိမ့်ကျတယ်၊ ပါတီစည်းမျည်းတွေချိုးဖောက်တယ်။ပြီးတော့ ဘတ်ဂျက်ကို ဆုံးရှုံးမှုဖြစ်စေတယ်” လို့ အစိုးရက ကြေညာပါတယ်။

ကျန်းမာရေးဝန်ကြီးဌာန ဒုတိယဝန်ကြီး ရွှမ်းတူယင်ကို ခေတ္တဝန်ကြီးအဖြစ်ခန့်အပ်လိုက်တယ်လို့ ဗီယက်နမ်သတင်းအေဂျင်စီက သတင်းထုတ်ပြန်ပါတယ်။

 Source Reuters

#LocalNews
Published_7 June 2022

တေးသံရှင်မနောက သားနှင့်သမီးအား သာသာနာ့ဘောင်သို့ အပြီးအပ်နှင်းလိုက်ကြောင်း သူ၏ လူမှုကွန်ရက်တွင် ရေးသားထားသည်။

"သမီးလေး မေကြေးမုံ နှင့် သားလေးဘုန်းပြည့်စုံ၊ သာသနာ့ဘောင်မှာ အပြီးအပ်နှင်းလိုက်ပြီ၊မိဘတိုင်းသားသမီးများနှင့် ဘယ်ခွဲချင်ပါ့မလဲ၊ သိပ်ကိုပင်ပန်းကြမှာပါ၊ အမှန်တကယ် မေတ္တာအစစ်နဲ့ ပေးဆပ်ချစ်နိုင်ဖို့တော့လိုပါတယ်။ ဒီဘဝအတွက်လောက်ပဲ ချမ်းသာခြင်းကိုပေးတာမဟုတ်ပါ။ သူတို့လေးတွေကို တန်ဖိုးထားသလို လေးစားဦးညွှတ်ပါတယ်၊ ယခင်နှင့် ယခုဘဝတွေက ကျွန်တော်တို့မိဘနှစ်ပါးရဲ့ ဖန်တီးခဲ့သော အကြောင်းများကြောင့် ယခုဘဝမှာ သားလေးသမီးလေးတွေဆိုတဲ့ အကျိုးတရားတွေ သမုဒယတွေရရှိခဲ့ရပြီပေါ့။ နောင်ဘဝဆိုတာကြီးကို ပြန်မရစေဖို့ အကြောင်းတွေ မဖန်တီးဖြစ်အောင် ပြုလုပ်ရခြင်းသာဖြစ်ပါတယ်၊ ခန္ဓာရခြင်းဟာ ဒုက္ခရခြင်း အတိဖြစ်ပါ၍ သမုဒယသစ္စာကို အရှင်းသားကြီးမြင်နိုင်မှာဖြစ်ပါတယ်။ ဤကုသိုလ်များ ကြောင့် အားလုံးသော လူနတ်ဗြဟ္မာသတ္တဝါအပေါင်း ထပ်တူရပါစေခင်ဗျာ"ဟု ယင်းကရေးသားထားသည်။

ယင်းအပြင် တေးသံရှင်မနောက မိမိကိုမိမိ "အများအမြင်၊ ကိုယ်ချင်းမစာသူကြီး"ဟုလည်း ရေးသားထားသည်ကို တွေ့ရသည်။

ymg/mt
#Yangon_Media_Group

#DailyNews
Published - 7 June 2022

၁။ ယခုမိုးရာသီတွင်ကြုံတွေ့နိုင်သည့် သဘာဝဘေးအတွက် ရန်ကုန်တိုင်းရှိလူမှုကူညီရေးအဖွဲ့များ ကြိုတင်ပြင်ဆင်ထားဟုဆို

၂။ YBS စီး ခရီးသွားများအပေါ် အုပ်စုဖွဲ့ခါးပိုက်နှိုက် လုယက်သူများအား ရဲတပ်ဖွဲ့က အသွင်ယူဖမ်းဆီးမှုများစတင်

၃။ နေ့စဉ်မိုးလေဝသသတင်း။

၄။ အိန္ဒိယအရာရှိတစ်ဦး၏ အစ္စလာမ်မုန်းတီးရေးမှတ်ချက်များအပေါ် ပင်လယ်ကွေ့တိုင်းပြည်များကန့်ကွက်... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

Published 7 June 2022

မြန်မာနိုင်ငံဆိုင်ရာ သီရိလင်္ကာသံအမတ်ကြီး အဖြစ် ခန့်အပ်ရန် သဘောတူပြီးဖြစ်တဲ့ သံအမတ်ကြီး မစ္စတာ ဂျေအမ် ဂျန်နကာ ပရီယန်သာ ဘန်ဒါရာဟာ ယနေ့ ဇွန်လ (၇)ရက်နေ့ မနက်ပိုင်းမှာ နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ထံ ယင်းရဲ့ သံအမတ်ခန့်အပ်လွှာကို ပေးအပ်ခဲ့တယ်လို့ သတင်းထုတ်ပြန်ချက်အရ သိရပါတယ်။

ထေရဝါဒဗုဒ္ဓဘာသာ နှစ်နိုင်ငံဖြစ်တဲ့ မြန်မာနှင့် သီရိလင်္ကာအကြား ကာလရှည်ချစ်ကြည်ရင်းနှီးတဲ့ ဆက်ဆံမှုကို တိုးမြှင့်ဆောင်ရွက်သွားမယ်လို့ သံအမတ်ကြီး ဂျေအမ်ဂျာနာကာပရီယန်သာ က ရန်ကုန်မှာရှိတဲ့ သူ့သံရုံးဝန်ထမ်းတွေကို ပြောကြာခဲ့ကြောင်း သီရိလင်္ကာအစိုးရသတင်းဌာန news.lk ကရေးသားခဲ့ပါတယ်။အဲဒီအပြင် နှစ်နိုင်ငံအကြား စီးပွားရေး၊နိုင်ငံရေးနှင့် ယဉ်ကျေးမှုချိတ်ဆက်မှုကို နှစ်ဘက်အကျိုးစီးပွားအတွက် မြှင့်တင်ဆောင်ရွက်သွားမယ်လို့လည်း သူကပြောပါတယ်။

မစ္စတာ ဂျေ၊ အမ်၊ ဂျန်နကာ ပရီယန်သာ ဘန်ဒါရာ ကို ၁၉၆၈ ခုနှစ်၊ ဖေဖော်ဝါရီလ ၁ ရက်တွင် မွေးဖွားခဲ့ပြီး ကိုလံဘိုတက္ကသိုလ်မှ ဝိဇ္ဇာဘွဲ့ကို ၁၉၉၃ ခုနှစ်တွင်ရရှိခဲ့ပါတယ်။ သူဟာ ၁၉၉၅ ခုနှစ်မှ ၂၀၀၈ ခုနှစ်အထိ အလွတ်တန်းရှေ့နေအဖြစ်လည်းကောင်း၊ တွဲဖက် ခရိုင်တရားသူကြီးအဖြစ်လည်းကောင်း၊ ပိုင်ဆိုင်မှုနှင့် မြေယာ စီမံခန့်ခွဲရေးဆိုင်ရာ အစိုးရရှေ့နေအဖြစ်လည်းကောင်း ရာထူးအဆင့်ဆင့်တွင် တာဝန်ထမ်းဆောင်ခဲ့ပါတယ်။ ၂၀၀၈ ခုနှစ်မှစ၍ သမ္မတဟောင်း မစ္စတာမဟင်ဒါရာဂျာပက်ဆာ၏သာသနာရေးဆိုင်ရာ အကြံပေးပုဂ္ဂိုလ်အဖြစ် လည်းကောင်း၊ ၂၀၀၈ ခုနှစ်မှ ၂၀၀၉ခုနှစ်အထိ အာရပ်စော်ဘွားများ ပြည်ထောင်စုဆိုင်ရာ သီရိလင်္ကာသံအမတ်ကြီး အဖြစ်လည်းကောင်း၊ ၂၀၀၉ ခုနှစ်မှ ၂၀၁၀ ပြည့်နှစ်အထိ ဆာဘရာဂမူဝါ ပြည်နယ်အုပ်ချုပ်ရေးမှူးအဖြစ်လည်းကောင်း၊ ၂၀၁၀ ပြည့်နှစ်မှ ၂၀၁၅ ခုနှစ်အထိ လွှတ်တော်ကိုယ်စားလှယ် (အမျိုးသားစာရင်း)အဖြစ်နှင့် လွှတ်တော်ပြည်သူ့အသနားခံစာတင်သွင်းရေး ကော်မတီ ဥက္ကဋ္ဌအဖြစ် လည်းကောင်း၊ ၂၀၁၅ ခုနှစ်ရွေးကောက်ပွဲအလွန်ကာလ တွင်သမ္မတဟောင်း မစ္စတာမဟင်ဒါရာဂျာပက်ဆာ၏ ညှိနှိုင်းရေးမှူး အဖြစ် လည်းကောင်း၊ ၂၀၁၆ ခုနှစ်မှစ၍ အလွတ်တန်းဥပဒေရေးရာ ဝါရင့်အကြံပေးအဖြစ် လည်းကောင်း၊ ၂၀၁၈ ခုနှစ်၊ နိုဝင်ဘာလမှ ဒီဇင်ဘာလအထိ သမ္မတဟောင်း မစ္စတာမဟင်ဒါရာဂျာပက်ဆာမှ ဘဏ္ဍာရေးဝန်ကြီးအဖြစ်ဆောင်ရွက်စဉ် ၎င်း၏ ကိုယ်ရေးအရာရှိအဖြစ် လည်းကောင်း၊ ၂၀၁၉ ခုနှစ်၊ ဒီဇင်ဘာလမှ ၂၀၂၁ ခုနှစ်၊ ဇူလိုင်လအထိ ဝန်ကြီးချုပ် မစ္စတာ မဟင်ဒါရာဂျာပက်ဆာ၏ လွှတ်တော်ကိစ္စရပ်များဆိုင်ရာ အတွင်းရေးမှူးအဖြစ်လည်းကောင်း အဆင့်ဆင့်တာဝန် ထမ်းဆောင်ခဲ့ပါတယ်။

မြန်မာနိုင်ငံသို့မရောက်ခင် နိုင်ဂျီးရီးယားနိုင်ငံဆိုင်ရာ သီရိလင်္ကာရဲ့ သံအမတ်ကြီး အဖြစ် တာဝန်  ထမ်းဆောင်ခဲ့ကြောင်းသိရပါတယ်။အသက် ၅၄နှစ်အရွယ်ရှိပြီဖြစ်တဲ့သူဟာ အိမ်ထောင်ရှင်တစ်ဦးလည်းဖြစ်ပါတယ်။

#LocalNews
Published_7 June 2022

မကွေးတိုင်းဒေသကြီး၊ ပခုက္ကူမြို့နယ်၊ တန့်ကြည့်တောင်ပေါ်ရှိ တန့်ကြည့်တောင်စေတီသို့ ဘုရားဖူးလာသော မော်တော်ယာဉ်တစ်စီး ယနေ့ ဇွန်လ ၇ ရက်နံနက်ပိုင်းက ပစ်ခတ်ခံရသောကြောင့် အသက် ၈၀ ခန့်အရွယ် အဖိုးအိုတစ်ဦး ဒဏ်ရာပြင်းထန်စွာရရှိသွားကြောင်း ဒေသခံများ ပြောကြားချက်အရ သိရသည်။

"ပုဂံညောင်ဦးကနေ တန့်ကြည့်တောင်ဘက်ကို ဟိုက်ဂျက်ကားနဲ့ ဘုရားဖူးသွားတဲ့အဖွဲ့ပါ၊ ဒေသတွင်းလက်နက်ကိုင်အဖွဲ့က သေနတ်နဲ့ ပစ်ခဲ့လို ကားရှေ့ခန်းမှာလိုက်ပါလာတဲ့ အသက် ၈၀ လောက်အဖိုးကို သေနတ်ကျည်ဆံမှန်ခဲ့ပါတယ်။ အဖိုးမှာ ရင်ဘတ်နဲ့တင်ပါးမှာ သေနတ်ထိတဲ့ဒဏ်ရာရတာ။ ဒဏ်ရာက စိုးရိမ်ရတဲ့အခြေအနေရှိပါတယ်။ အခုတော့ ဆိက္ခဝကျေးရွာက တစ်ဆင့် စက်လှေနဲ့ ညောင်ဦးဆေးရုံကိုတော့ ပို့ပြီးပါပြီ" ဟု အဆိုပါ အခင်းဖြစ်စဉ်ကို ကူညီခဲ့သည့်အဖွဲ့၏ တာဝန်ရှိသူက ပြောသည်။

အဆိုပါ အဖြူရောင် ဟိုက်ဂျက်မော်တော်ယာဉ်သည် ဘုရားဖူးခရီးသည် လူကြီး(၇)ဦး၊ ကလေး (၁)ဦး တင်ဆောင်၍ တန့်ကြည့်တောင်ဘုရားကုန်းပေါ်သို့ မောင်းနှင်ပို့ဆောင်စဉ် လမ်းခရီးတစ်ဝက် အန္တရာယ်ကွေ့ အရောက်တွင် လက်နက်ကိုင်အဖွဲ့တစ်ဖွဲ့မှ ချောင်းမြောင်းပစ်ခတ်ခံခဲ့ရခြင်း ဖြစ်ကြောင်း သိရသည်။

ymg/mt
#Yangon_Media_Group

#LocalNews
Published_7 June 2022

ရခိုင်ပြည်နယ်တွင် မူလတန်းကျောင်းသားများအား ကိုဗစ်ကာကွယ်ဆေး စတင်ထိုးနှံပေးနေပြီ ဖြစ်ကြောင်း ပြည်နယ်ပြည်သူ့ကျန်းမာရေးဦးစီးဌာနက သိရသည်။

ပြီးခဲ့သည့်အပတ်မှစ၍ တရုတ်နိုင်ငံထုတ် Sinopharm အမျိုးအစား ကိုဗစ်ကာကွယ်ဆေးကို စတင်ထိုးနှံခြင်းဖြစ်ပြီး လက်ရှိတွင် အသက် ၅ နှစ်မှ ၁၂ နှစ်အထိ အခြေခံပညာ မူလတန်း ကျောင်းသား၊ ကျောင်းသူဦးရေ ၂၀၅၂၁ ဦးကို ထိုးနှံပြီးစီးသွားပြီဖြစ်ကြောင်းလည်း သိရသည်။

ရခိုင်ပြည်နယ်တွင် ကိုဗစ်ကာကွယ်ဆေးထိုးနှံရမည့် မူလတန်းကျောင်းသူ၊ ကျောင်းသားဦးရေမှာ ၃ သိန်း ၆ သောင်းခန့် ရှိကြောင်း၊ ကျောင်းသားကျောင်းသူအများစုမှာ ကာကွယ်ဆေး ထိုးကြသော်လည်း တချို့မိဘများမှာ ယင်းတို့၏ ကလေးများအား စိတ်ပူသဖြင့် မထိုးသူအချို့ရှိနေကြောင်းလည်း သိရသည်။

တရုတ်ထုတ် Sinopharm ကိုဗစ်ကာကွယ်ဆေးကို အသက် ၅ နှစ်နှင့် အထက်ကလေးများ ထိုးနှံနိုင်ကြောင်း အစားအသောက်နှင့် ဆေးဝါးကွပ်ကဲမှုဌာန (FDA)က ခွင့်ပြုထားပြီး ဖြစ်ကြောင်းလည်း သိရသည်။

ရခိုင်ပြည်နယ်တွင် ပြီးခဲ့သည့် ၂ဝ၂၁ ခုနှစ်၊ အောက်တိုဘာလ ၁၇ ရက်မှစတင်၍ အသက် ၁၂ နှစ်အထက် အလယ်တန်းနှင့် အထက်တန်းအဆင့်ကျောင်းသား၊ ကျောင်းသူများအား တရုတ်နိုင်ငံထုတ် Sinovac အမျိုးအစားကိုဗစ်ကာကွယ်ဆေးများ စတင်ထိုးနှံပေးခဲ့ကြောင်း၊ ယင်းအပြင် စက်မှုဝန်ကြီးဌာနနှင့် တရုတ်ပြည်သူ့သမ္မတနိုင်ငံ Sinopharm China National Biotec Group တို့ပူးပေါင်း၍ မြန်မာနိုင်ငံတွင် ပြီးခဲ့သည့်မတ်လက စတင်ထုတ်လုပ်နိုင်ခဲ့သော Myancopharm ကိုဗစ်ကာကွယ်ဆေးကို အသက် ၁၅ နှစ်မှ အသက် ၁၈ နှစ်အထိ ကျောင်းသား၊ ကျောင်းသူ ၇၀ အထိ ထိုးနှံပြီး ဖြစ်ကြောင်းလည်း သိရသည်။

ymg/mt
Photos - We Love Sittwe
#Yangon_Media_Group

#WorldPolitics
Published 7 June 2022

ယခုအပတ်အတွင်း အမေရိကန်ကလက်ခံကျင်းပမယ့် အမေရိကတိုက်ထိပ်သီးအစည်းအဝေးပွဲမှ ကျူးဘား၊ ဗင်နီဇွဲလားနဲ့ နီကာရာဂွာနိုင်ငံတို့ကို ဖယ်ထုတ်လိုက်ကြောင်း အမေရိကန်အိမ်ဖြူတော်က တနင်္လာနေ့က ကြေညာလိုက်ပါတယ်။

အနောက်ဘက်ခြမ်းက နိုင်ငံအားလုံးကို ဖိတ်ကြားခြင်းမရှိတဲ့အတွက် မက္ကဆီကိုသမ္မတအနေနဲ့ အစည်းအဝေးပွဲ မတက်ရောက်ဖို့ အကြောင်းပြချက်ဖန်လာပါတယ်။

လော့စ်အိန်ဂျလိစ်မှာ ပြုလုပ်မယ့်အစည်းအဝေးပွဲမှာ ဒေသတွင်းပြောင်းရွှေ့နေထိုင်မှုများနဲ့ စီးပွားရေးစိန်ခေါ်မှု အခက်အခဲများဖြေရှင်းရန် အမေရိကန်ကရည်ရွယ်ထားတာဖြစ်ပြီး မက္ကဆီကိုသမ္မတ'အန်ဒရီစ်မန်နျူယယ်လိုပက်ဇ်အိုဘရာဒေါ'နဲ့ အခြားခေါင်းဆောင်များ သပိတ်မှောက်လာကြတာဟာ အစည်းအဝေးပွဲရဲ့အရေးပါမှုကို ထိခိုက်စေနိုင်ပါတယ်။

ရီပတ်ဘလစ်ကန်သမ္မတဟောင်း'ဒေါ်နယ်ထရမ့်'လက်ထက်က ပျက်စီးခဲ့တဲ့လက်တင်အမေရိကဆက်ဆံရေးကို ပြန်လည်ပြုပြင်နိုင်ဖို့ ဒီမိုကရက်တစ်သမ္မတ'ဂျိုးဘိုင်ဒန်'ကမျှော်လင့်ထားပြီး အမေရိကန်ရဲ့ဩဇာလွှမ်းမိုးမှု သက်ရောက်ရေးနဲ့ တရုတ်ကျူးကျော်မှုတို့ကို တန်ပြန်နိုင်ရေး ရည်မှန်း ထားပါတယ်။

ရက်သတ္တပတ်အချို့ကြာမြင့်အောင် ဆုံးဖြတ်ချက်များခက်ခက်ခဲခဲချခဲ့ပြီးနောက် ကျူးဘား၊ ဗင်နီဇွဲလား၊ နီကာရာဂွာတို့ကို ဖယ်ထုတ်ဖို့ဆုံးဖြတ်ချက်ချခဲ့ပြီး ဒါဟာ အဆိုပါနိုင်ငံ ၃ နိုင်ငံရဲ့ ဒီမိုကရေစီမဆန်မှုနဲ့ လူအခွင့်အရေးများအပေါ် စိုးရိမ်မှုများကြောင့်ဖြစ်ကြောင်း အမေရိကန်အကြီးတန်းအရာရှိတစ်ဦးက ဆိုပါတယ်။

အမေရိကန် နိုင်ငံခြားရေးဝန်ကြီးဌာနမှ ပြောရေးဆိုခွင့်ရှိသူ'နက်ဒ်ပရိုက်စ်'က "အမေရိကန်အုပ်ချုပ်ရေးအစိုးရအနေနဲ့ မက္ကဆီကိုရဲ့ သဘောထားရပ်တည်ချက်ကို နားလည်ပေမယ့် အခုအစည်းအဝေးပွဲရဲ့အဓိကအနှစ်သာရတစ်ခုက ဒီမိုကရက်တစ်အုပ်ချုပ်ရေးဖြစ်ပြီး ထိုနိုင်ငံတွေက ဒီမိုကရေစီစံပြနိုင်ငံများမဟုတ်ပါဘူး" လို့ ပြောကြားခဲ့ပါတယ်။

'ဘိုင်ဒန်'နဲ့အစိုးရအဖွဲ့ကို ရီပတ်ဘလစ်ကန်များမှ ဖိအားပေးမှုများရှိနေတဲ့အပြင် လက်တင်အမေရိကရှိ လက်ဝဲဆန့်ကျင်ရေးအဓိက ၃ နိုင်ငံအပေါ် သဘောထားပျော့ပျောင်းစွာ ဆက်ဆံမှုကိုလည်း ဒီမိုကရက်တစ်အချို့က သဘောမတွေ့ကြပါဘူး။

'ထရမ့်'လက်ထက်က ကျူးဘားနဲ့ဗင်နီဇွဲလားတို့အပေါ် ပြင်းထန်တဲ့မူဝါဒတွေချမှတ်ခြင်းကိုထောက်ခံတဲ့ မိုင်ယာမီမှကျူးဘား-အမေရိကန်အသိုင်းအဝိုင်းကြီးဟာ နိုဝင်ဘာလရွေးကောက်ပွဲမှာ ဖလော်ရီဒါကအရေးကြီးတဲ့ မဲပေးအဖွဲ့ဖြစ်လာဖို့ရှိပြီး အခုလက်ရှိဒီမိုကရက်တစ်တွေအုပ်စိုးနေတဲ့ အမေရိကန်လွှတ်တော်စိုးမိုးနိုင်ရေးကို အဆုံးအဖြတ်ပေးသွားမှာဖြစ်ပါတယ်။

မက္ကဆီကိုသမ္မတ'လိုပက်ဇ်အိုဘရာဒေါ'က သူ့အစား နိုင်ငံရေးဝန်ကြီး'မာဆယ်လိုအက်ဘရတ်ဒ်'က အစည်းအဝေးတက်ရောက်မှာဖြစ်ကြောင်း သတင်းထောက်များကိုပြောကြားခဲ့ပါတယ်။

ဒါ့အပြင် နောက်လအတွင်း ဝါရှင်တန်မှာ 'ဘိုင်ဒန်'နဲ့တွေ့ဆုံသွားမယ်လို့ ပြောကြားခဲ့ပြီး အိမ်ဖြူတော်ကလည်း အတည်ပြုခဲ့ပါတယ်။

ဗုဒ္ဓဟူးနေ့မှာကျင်းပမယ့်အစည်းအဝေးပွဲက အမေရိကန်တောင်ပိုင်းနယ်စပ်မှာ ပြောင်းရွှေ့မှုတားဆီးထိန်းချုပ်ရေးကို အဓိကထားဆွေးနွေးသွားဖို့ဖြစ်ပြီး မက္ကဆီကိုသမ္မတမတက်ရောက်ခြင်းက အမေရိကန်အတွက် သံတမန်ရေးရာမှာ အရှက်ရဖွယ်ဖြစ်လာနိုင်ပါတယ်။

ဗင်နီဇွဲလားမှ အများစုပါဝင်တဲ့ ထောင်ဂဏန်းချီရှိတဲ့ ရွှေ့ပြောင်းနေထိုင်သူတွေဟာ တနင်္လာနေ့အစောပိုင်းမှာ မက္ကဆီကိုတောင်ပိုင်းကနေထွက်လာပြီး အမေရိကန်သို့ဦးတည်ရောက်ရှိအောင် သွားကြမှာ ဖြစ်ပါတယ်။

ဒါပေမဲ့ မက္ကဆီကိုသမ္မတအစည်းအဝေးမတက်ရောက်ခြင်းက 'ဘိုင်ဒန်'ရဲ့ဒေသတွင်းပြောင်းရွှေ့မှုအစီအစဉ်ကို အဟန့်အတားဖြစ်စေမှာ မဟုတ်ကြောင်း အကြီးတန်းအရာရှိတစ်ဦးကဆိုပါတယ်။

အရင်ကျင်းပခဲ့တဲ့ ထိပ်သီးအစည်းအဝေးပွဲတွေလိုမျိုး နိုင်ငံ့အစိုးရခေါင်းဆောင်အနည်းဆုံး ၂၃ ဦးတက်ရောက်ဖို့ အိမ်ဖြူတော်က မျှော်မှန်းထားပါတယ်။

အထက်လွှတ်တော်နိုင်ငံခြားဆက်ဆံရေးကော်မတီဥက္ကဌ တာဝန်ယူထားပြီး ဒီမိုကရက်တစ်လည်းဖြစ်တဲ့ အမေရိကန်လွှတ်တော်အမတ်'ရောဘတ်မီနန်ဒက်ဇ်'က မက္ကဆီကိုသမ္မတကို ဝေဖန် လိုက်ကာ အာဏာရှင်တွေနဲ့ရပ်တည်ဖို့ ဆုံးဖြတ်လိုက်တာက အမေရိကန်-မက္ကဆီကိုဆက်ဆံရေးကို ထိခိုက်စေလိမ့်မယ်လို့ ပြောကြားလိုက်ပါတယ်။

Source: Reuters
#Yangon_Media_Group