Published_ 1 July 2023

  တရုတ်နိုင်ငံမှ အသေးစား၊အလတ်စား စီးပွားရေးလုပ်ငန်းစုများ ဖွံ့ဖြိုးမှုအမြန်ဆုံး မြို့ဖြစ်တဲ့ ဝင်း(န်)ကျိုးမှ တရုတ်လုပ်ငန်းရှင်များ ကိုယ်စားလှယ်အဖွဲ့သည် မြန်မာ လုပ်ငန်းရှင်များနှင့်တွေ့ဆုံပြီး စီးပွားရေးလုပ်ငန်းများလာရောက်ရင်းနှီးမြှုပ်နှံနိုင်ရန် ဇွန် ၂၉ ရက်တွင် ရန်ကုန်မြို့ရှိ Wyndham Grand Hotel ၌ တရုတ် ဝင်း(န်)ကျိုး -မြန်မာ စီးပွားကုန်သွယ်မှု ပူးပေါင်းဆောင်ရွက်ရေး နှီးနှောဖလှယ်ပွဲကို ကျင်းပပြုလုပ်ခဲ့ပါတယ်။

  နှီးနှောဖလှယ်ပွဲသို့ မြန်မာနိုင်ငံဆိုင်ရာ တရုတ်သံအမတ်ကြီး Mr. Chen Hai ၊ တရုတ်သံရုံးမှ စီးပွားရေးသံမှူး Mr. Ouyang Daobing ၊ Wenzhou Municipal Party Committee ၏ အမြဲတမ်းကော်မတီအဖွဲ့ဝင်နှင့် Wenzhou Overseas Friendship Association ၏ ဥက္ကဌ မစ္စတာ Wang Chi ဦီးဆောင်သော ကိုယ်စားလှယ်အဖွဲ့ဝင်များ၊ တရုတ်နှင့် မြန်မာနိုင်ငံတို့မှ ကုန်သည်လုပ်ငန်းရှင် အသင်းအဖွဲ့များ၊ နှစ်နိုင်ငံ စီးပွားရေးလုပ်ငန်းရှင်များ၊ ကိုယ်စားလှယ်များ တက်ရောက်ခဲ့ကြပါတယ်။

  ဝင်း(န်)ကျိုး(Wenzhou)ဟာ တရုတ်နိုင်ငံ၊ ကျဲ့ကျန်းပြည်နယ်ရှိ စက်မှုဆိပ်ကမ်းမြို့ ဖြစ်ပြီး စီးပွားရေး ဆိပ်ကမ်းပေါင်းများစွာ တည်ရှိနေပါတယ်။ ဒါ့အပြင် ၎င်းဟာ တရုတ် နိုင်ငံရဲ့ အမျိုးသားအဆင့် ဒေသဆိုင်ရာ အချက်အချာမြို့ဖြစ်သလို အရှေ့တောင်ဘက် ကမ်းရိုးတန်းမှာ အရေးကြီးတဲ့ စီးပွားရေးမြို့ကြီးအဖြစ် တည်ရှိနေပြီး အမျိုးသားအဆင့် ဘက်စုံ သယ်ယူပို့ဆောင်ရေးဆိပ်ကမ်း ပလက်ဖောင်းတစ်ခုလည်းဖြစ်ကာ တရုတ်နိုင်ငံရဲ့ ဖွံ့ဖြိုးမှုမြန်ဆန်ပြီး အသေးစားစက်မှုလုပ်ငန်းများ အဖွံ့ဖြိုးဆုံးမြို့ ဖြစ်ကာ ရင်းနှီးမြှုပ်နှံရန် အကောင်းဆုံးမြို့တစ်ခုဖြစ်တဲ့အပြင် ကျွမ်းကျင်ပညာရှင်များစွာ ရှိနေခြင်းကလည်း ရင်းနှီးမြှုပ်နှံသူများကို ပိုမိုဆွဲဆောင်နေပါတယ်။

  "Come to Wenzhou, Create the Future" ခေါင်းစဉ်ဖြင့် Wenzhou ရဲ့ ရင်းနှီးမြှုပ်နှံမှု ပတ်ဝန်းကျင်မြှင့်တင်ရေး၊ တရုတ်-မြန်မာ စီးပွါးရေးပူးပေါင်းဆောင်ရွက်မှု အခွင့်အလမ်းသစ်များ ရှာဖွေရေး တို့ကို ကဏ္ဍများအလိုက် ဆွေးနွေးဖလှယ်ကြပြီး တရုတ်-မြန်မာ နှစ်နိုင်ငံအကြား လူမှုရေး၊ စီးပွါးရေး၊ ယဉ်ကျေးမှု စတဲ့နယ်ပယ်များမှာ အပြန်အလှန်ဖလှယ်မှုများ မြှင့်တင်ပေးရန်၊ ပလက်ဖောင်းအသစ် တည်ဆောက်ရန်နှင့် နှစ်နိုင်ငံအကြား စီးပွားရေး၊ ကုန်သွယ်မှုနှင့် ရင်းနှီးမြှုပ်နှံမှု ဖလှယ်မှုများကို နှစ်ဖက် အပြန်အလှန် အကျိုးကျေးဇူးရရှိနိုင်ရေးအတွက် ထိရောက်စွာ မြှင့်တင်နိုင်ရန် ရည်ရွယ်၍ စီးပွားရေးလုပ်ငန်းများအကြား ပူးပေါင်းဆောင်ရွက်မှု သဘောတူစာချုပ်များ လက်မှတ်ရေးထိုးခြင်း တို့ကို ထည့်သွင်းကျင်းပခဲ့တယ်လို့ သိရပါတယ်။

  ၂၀၂၂ ခုနှစ်တွင် Wenzhou နှင့် မြန်မာနိုင်ငံကြား ပို့ကုန် သွင်းကုန် ကုန်သွယ်မှု လျင်မြန်စွာ တိုးတက်လာခဲ့ပြီး ပို့ကုန် ၁၅၃ ရာခိုင်နှုန်းနှင့် သွင်းကုန် ၈၅ ရာခိုင်နှုန်းအထိ တိုးလာကြောင်း သိရှိရပါတယ်။
ygm_mnn
#local_news
#Yangon_Media_Group