#Local_News
Published_ 14 September 2022
မြန်မာနိုင်ငံရှိ နွမ်းပါးသည့်မိခင်နှင့်ကလေးငယ်များကို ကူညီရန်အတွက် နေ့စဉ်ကျောင်း(အစိုးရကျောင်းများ)၌ အခမဲ့နေ့လယ်စာကျွေးသည့် စီမံကိန်းတစ်ခုကို တရုတ်နိုင်ငံကျေးလက်ဖွံ့ဖြိုးတိုးတက်ရေးဖောင်ဒေးရှင်း (CFRD)(မူလတရုတ်နိုင်ငံ ဆင်းရဲနွမ်းပါးမှုလျှော့ချရေးဖောင်ဒေးရှင်း)မှ ဖော်ဆောင်လျက်ရှိကြောင်း သိရသည်၊၊
ယင်းဖောင်ဒေးရှင်း၏ မြန်မာနိုင်ငံရုံးခန်းဝန်ထမ်းများက ရန်ကုန်တိုင်း လှိုင်သာယာမြို့နယ်မှ အစိုးရမူလတန်းကျောင်း (၂၃)ကျောင်းအား လေ့လာအကဲဖြတ်ရာ ကျောင်းသားကျောင်းသူပေါင်း (၇၀)% ခန့်သည် နေ့လယ်စာမစားနိုင်ဘဲ အချို့သောကလေးများက ယင်းအတွက်ကြောင့် ကျောင်းထွက်ကာ အလုပ်လုပ်ကိုင်နေရသည်ကို တွေ့ရှိရကြောင်း မြန်မာနိုင်ငံဆိုင်ရာ တရုတ်သံရုံး၏ ထုတ်ပြန်ချက်များအရ သိရသည်၊၊
အဆိုပါ ကလေးများငတ်မွတ်သည့် ပြဿနာကို ကူညီဖြေရှင်းပေးရန်အတွက် ၂၀၂၀ ပြည့်နှစ်တွင် CFRD ကမြန်မာနိုင်ငံတွင် Smiling Children စီမံကိန်းကို စတင်ဖော်ဆောင်ခဲ့ခြင်းဖြစ်သည်။ ကပ်ရောဂါကြောင့် Smiling Children စီမံကိန်းသည် စားနပ်ရိက္ခာအိတ်ပေးဝေသည့်နည်းလမ်းဖြင့် ကျောင်းသားကျောင်းသူများအား နေ့လယ်စာထောက်ပံ့ပေးကြောင်း သိရသည်၊၊
၂၀၂၂ ခုနှစ် ဇူလိုင်လ(၄)ရက်တွင် Smiling Children စီမံကိန်းသည် မြန်မာနိုင်ငံအထည်ချုပ် စက်ရုံများ စုစည်းရာ ရန်ကုန်တိုင်းလှိုင်သာယာမြို့နယ်ရှိ ကျောင်းပေါင်း (၁၀)ကျောင်းအား ရွေးချယ်အတည် ပြုပြီး ကျောင်းအနီးတဝိုက်မှ ဆင်းရဲနွမ်းပါးသော အမျိုးသမီးအယောက် (၆၀)ကို စုစည်း၍ ၎င်းတို့အတွက် လေ့ကျင့်ရေးနှင့်လစာများပေးကာ ၎င်းတို့ဖြင့်ဖွဲ့စည်းထားသော 'မေမေအုပ်စု'က ကျောင်းသား ကျောင်းသူများအတွက် နေ့လယ်စာချက်ပြုတ်ပေးခဲ့သည်ဟု ဆိုသည်၊၊
အဆိုပါ စီမံကိန်းသည် ကျောင်းသား ကျောင်းသူပေါင်း (၄၅၀၀)နီးပါး နေ့စဉ်ကျောင်း၌အခမဲ့ နေ့လယ်စာစားသုံးခွင့်ရစေခဲ့ပြီး အနာဂတ်တွင် စီမံကိန်းကအကျိုး အမြတ်ခံစားခွင့်ရသော လူဦးရေကို တစ်ဆင့်ချင်းတိုးချဲ့၍ ငတ်မွတ်မှုကြောင့် ကျောင်းထွက်ရသော ကလေးသူငယ်များကို ကျောင်းပြန်တက်စေပြီး တစ်ချိန်တည်းတွင် ပိုများသည့် မြန်မာနိုင်ငံဆင်းရဲနွမ်းပါးသောမေမေများ တည်ငြိမ်သည့်ဝင်ငွေရရှိကာ အနာဂတ်မျှော်လင့်ချက် လင်းရောင်ခြည်များရရှိစေရန်မျှော်မှန်းထားကြောင်း ထုတ်ပြန်ချက်တွင် ရေးသားဖော်ပြထားသည်၊၊
#ymg/tthl
#Yangon_Media_Group
