Published 21 November 2021
တရုတ်ပြည်သူ့သမ္မတနိုင်ငံမှ လှူဒါန်းသည့် Sinovac အမျိုးအစား ကိုဗစ်ကာကွယ်ဆေးDoses (၃)သန်းအနက် Doses (၁)သန်းဟာ ဒုတိယအသုတ်အဖြစ် နိုဝင်ဘာလ ၂၀ ရက်နေ့မှာရန်ကုန်အပြည်ပြည်ဆိုင်ရာလေဆိပ်သို့ တရုတ်နိုင်ငံပိုင် Air China လေကြောင်းလိုင်းဖြင့် ထပ်မံရောက်ရှိလာခဲ့တယ်လို့ သိရပါတယ်။
တရုတ်ပြည်သူ့သမ္မတနိုင်ငံအနေနဲ့ မြန်မာနိုင်ငံသို့Sinovac အမှတ်တံဆိပ် ကိုဗစ်-၁၉ ရောဂါ ကာကွယ်ဆေး(၃)သန်း Doses များကို နိုဝင်ဘာလ ၁၂ ရက်နေ့က ထပ်မံလှူဒါန်းပေးအပ်ခဲ့ခြင်းဖြစ်ပြီး ၎င်းနေ့တွင်ပင် ပထမအသုတ်အဖြစ် Sinovac အမှတ်တံဆိပ် ကိုဗစ်-၁၉ ရောဂါကာကွယ်ဆေး (၁)သန်း Doses ရောက်ရှိလာခဲ့ပြီးနောက်မှာယမန်နေ့ နိုဝင်ဘာလ ၂၀ ရက်နေ့က ဒုတိယအသုတ်အဖြစ် Doses(၁)သန်းထပ်မံရောက်ရှိလာခဲ့တာဖြစ်ပါတယ်။
ယခုထပ်မံရောက်ရှိ လာသည့် ကာကွယ်ဆေးများကိုအသက်(၁၂)နှစ်အထက် ကျောင်းသား၊ ကျောင်းသူများနှင့်အခြား သတ်မှတ်လူအုပ်စုများကို ထိုးနှံပေးသွားမှာဖြစ်တယ်လို့ သိရပါတယ်။
ကိုဗစ်-၁၉ ရောဂါ ကာကွယ်ထိန်းချုပ်ရေးအတွက်တိုင်းဒေသကြီး/ပြည်နယ်များတွင် ကိုဗစ်-၁၉ ရောဂါကာကွယ်ဆေးကို ဦးတည်အုပ်စုများသတ်မှတ်၍ ထိုးနှံပေးလျက်ရှိရာ ၂၀၂၁ ခုနှစ်၊ နိုဝင်ဘာလ (၁၉)ရက်နေ့အထိ လူဦးရေစုစုပေါင်း(၁၅.၂)သန်းအားထိုးနှံပေးပြီးဖြစ်၍ ကာကွယ်ဆေးနှစ်ကြိမ် အပြည့် ထိုးနှံပြီးစီးသူ (၁၀.၃)သန်းနှင့် ပထမအကြိမ်ထိုးနှံပြီးစီးသူ(၄.၉)သန်း ရှိပြီဖြစ်တယ်လို့ သိရှိရပါတယ်။
