#Local_News
Published_26 March 2024
မနက်ဖြန်ကျင်းပမည့်တပ်မတော်နေ့ကို ညပိုင်းကျင်းပရခြင်းမှာ ယခင်သမိုင်းအစဉ်အလာရှိသကဲ့သို့ဖြစ် သည့်အပြင် လေယာဉ်၊ ရဟတ်ယာဉ်များ၏ ညဘက်စွမ်းရည်ပြမှု ထူးခြားစွာတွေ့မြင်ရန် ဖြစ်ကြောင်း နစက သတင်းထုတ်ပြန်ရေးအဖွဲ့ခေါင်းဆောင်လည်း ဖြစ်၊ပြန်ကြားရေးဝန်ကြီးဌာန ဒုဝန်ကြီးလည်း ဖြစ်သော ဗိုလ်ချုပ်ဇော်မင်းထွန်း က ယနေ့ မတ်လ ၂၆ ရက်တွင် ပြောကြားလိုက်သည်။
ယင်းက“၇၉ နှစ်မြောက် တပ်မတော်နေ့အခမ်းအနားကို ညနေပိုင်းမှာ စစ်ရေးပြအခမ်းအနား ပြုလုပ်သွားမှာဖြစ်ပါ တယ်။ ဒါနဲ့ ပတ်သက်ပြီး မီဒီယာများ သိလိုသူများက ညနေပိုင်း၊ ညပိုင်းအချိန်မှာလုပ်တာနဲ့ ပတ်သက်ပြီး မေးမြန်း တာရှိပါတယ်။ တပ်မတော်နဲ့ပတ်သက်တဲ့ သမိုင်းကြောင်းလေးကို အရင်ပြောချင်ပါတယ်။ တပ်မတော်နေ့ကို ၁၉၄၆ ခုနှစ်မှာ ပထမအကြိမ် စတင်ကျင်းပခဲ့တာဖြစ်ပါတယ်။ ဒီလိုကျင်းပတဲ့အခါ မနက်ပိုင်းကျင်းပခဲ့တာ မျိုးရှိပါတယ်။ ညနေပိုင်း၊ ညပိုင်းကျင်းပခဲ့တာမျိုး ရှိပါတယ်။ တပ်မတော်နေ့ကို ညနေပိုင်း၊ ညပိုင်းစစ်ရေးပြ အခမ်းအနားပြုလုပ်မှုနဲ့ ပတ်သက်ပြီး ၁၉၅၄ ခုနှစ် ၉ နှစ်မြောက်တပ်မတော်နေ့ကနေ ၁၉၆၇ ခုနှစ် ၂၂ နှစ်မြောက် တပ်မတော်နေ့အထိ ၁၄ ကြိမ်တိုင်တိုင် ညနေပိုင်း၊ ညပိုင်းမှာ ကျင်းပခဲ့တာဖြစ်ပါတယ်။ ဒီနှစ်မှာလည်း ညနေပိုင်း၊ ညပိုင်းကျင်းပရခြင်းဖြစ်ပါတယ်။ နောက်တစ်ခုကတော့ ရာသီဥတုအခြေအနေအရဖြစ်ပါတယ်။ ဒီနှစ်ဟာ အယ်လ်နီညိုကျရောက်နေတဲ့နှစ်ဖြစ်လို့ ရာသီဥတုအခြေအနေအရလည်း ညနေပိုင်း၊ ညပိုင်းမှာကျင်းပရ ခြင်းဖြစ်ပါတယ်။ ထူးခြားမှုအနေနဲ့ကတော့ ညပိုင်းမှာ စစ်ရေးပြအခမ်းအနားကျင်းပချိန်မှာ လေယာဉ်၊ ရဟတ်ယာဉ်များရဲ့ ညဘက်စွမ်းရည်ပြပျံသန်းမှုကို ထူးခြားစွာတွေ့မြင်ရမှာဖြစ်ကြောင်း ပြောလိုပါတယ်” ဟု ပြောကြားလိုက်ခြင်း ဖြစ်သည်။
မနက်ဖြန် မတ်လ ၂၇ ရက်တွင် ပြုလုပ်မည့် ၇၉ နှစ်မြောက် တပ်မတော်နေ့စစ်ရေးပြအခမ်းအနားမှာ ချီတက်ကြမည့် စစ်ရေးပြစစ်ကြောင်းကြီးများ တန်းစီကွင်းကနေ စစ်ရေးပြကွင်းကြီးထိ ချီတက်ရာလမ်း ကြောင်းတစ်လျှောက် ဂုဏ်ပြုပန်းစည်းကမ်းလိုသူများအနေဖြင့်လည်း ကြိုတင်စာရင်းပေးသွင်းနိုင်ကြောင်း နစက အနေဖြင့် ထုတ်ပြန်ထားသေးသည်။
(၇၉)နှစ်မြောက်တပ်မတော်နေ့စစ်ရေးပြအခမ်းအနား၌ ပါဝင်စစ်ရေးပြကြမည့် စစ်ရေးပြ စစ်ကြောင်းကြီးများ ဝတ်စုံပြည့် စစ်ရေးပြလေ့ကျင့်ခြင်းကို ပြီးခဲ့သည့် မတ်လ ၂၂ ရက်က နေပြည်တော်စစ် ရေးပြ ကွင်း၌ ဆောင် ရွက်ခဲ့ကြကြောင်း သိရသည်။
စစ်ရေးပြလေ့ကျင့်မှုတွင် အနော်ရထာစစ်ကြောင်း၊ ကျန်စစ်သားစစ်ကြောင်း၊ ဘုရင့်နောင်စစ်ကြောင်း၊ အောင် ဇေယျစစ်ကြောင်း၊ ဆင်ဖြူရှင် စစ်ကြောင်း၊ ဗန္ဓုလစစ်ကြောင်းနှင့် အောင်ဆန်းစစ်ကြောင်းများပါဝင်ပြီး စုရပ်ဖြစ်သည့် သစ်တပ်ကွင်းမှ စစ်ရေးပြကွင်းသို့ တပ်မတော်စစ်တီးဝိုင်းအဖွဲ့များ၏ တီးခတ်မှု နှင့်အတူစစ်ချီ သီချင်းများသီဆို၍ ညီညာစွာချီတက်ကြပြီးစစ်ရေးပြ အခမ်းအနား အစီအစဉ်အတိုင်း လေ့ကျင့်ဆောင်ရွက်ခဲ့ကြခြင်း ဖြစ်ကြောင်း သိရသည်။
အဆိုပါ စစ်ရေးပြအခမ်းအနားကို တပ်မတော်(ကြည်း၊ရေ၊လေ)နှင့် မြန်မာနိုင်ငံရဲတပ်ဖွဲ့တို့မှ အရာရှိ၊စစ်သည် များ၊ အမျိုးသမီးတပ်ဖွဲ့ဝင်များ၊ အမျိုးသမီးအထူးတပ်ဖွဲ့ဝင်များ၊ တပ်မတော်(လေ)မှ လေယာဉ်၊ ရဟတ်ယာဉ်များဖြင့် ပြုလုပ်ခဲ့ခြင်း ဖြစ်ကြောင်း သိရသည်။
#Local_News #တပ်မတော်နေ့ကိုညပိုင်းကျင်းပ #ဗိုလ်ချုပ်ဇော်မင်းထွန်း #Yangon_Times/PP
