#Local_News
Published - 16 August 2022
အစိုးရ၏ သွင်းကုန်အပေါ်ကန့်သတ်မှု၊ ဒေါ်လာဈေးမြင့်တက်မှုနှင့် စက်သုံးဆီဈေးမြင့်တက်မှုစသည့် အခက်အခဲများကြောင့် ဆောက်လုပ်ရေးပစ္စည်းအရောင်းဆိုင်တချိုပိတ်သိမ်းနေပြီဖြစ်ကြောင်း သိရသည်။
ဒေါ်လာဈေးသည် ပြင်ပဈေးကွက်အတွင်းမှာ ကြိုက်ရောင်းကြိုက်ဝယ်ဈေးဖြစ်နေပြီး တစ်ဒေါ်လာ ၂၇၀၀ ကနေ ၃၀၀၀ အထိမြင့်တက်နေခြင်းဖြစ်သည်။
ယခုကဲ့သို့ အခြေအနေတွင် ပြည်ပကတင်သွင်းရသည့် ဆောက်လုပ်ရေးပစ္စည်းများ၏ ဈေးနှုန်းသည်လည်းမြင့်တက်လာပြီး စက်သုံးဆီဈေးနှုန်းကြီးမြင့်မှုကလည်း ဝန်ထုပ်ဝန်ပိုးဖြစ်စေကာ ဆက်လက်လုပ်ကိုင်ရန်အခက်တွေ့နေပြီဖြစ်ကြောင်း သိရသည်။
“ကျွန်တော်တို့ လက်ကားရောင်းတဲ့ အရောင်းများအားလုံး အရောင်းပိတ်လိုက်ပါပြီ။ တကယ်စိတ်မကောင်းပါဘူး။ အိပ်မက်တွေ မက်ခဲ့တာ အများကြီးပါ”ဟု UEDC Myanmar အိမ်ဆောက်ပစ္စည်းအမျိုးမျိုးရောင်းဖြန့်ချီရေးဆိုင်က ၎င်းတို့၏ လူမှုကွန်ရက်စာမျက်နှာတွင် ကြေညာထားသည်။
ယင်းအပြင်သွင်းကုန်ကန့်သတ်မှုကြောင့်လည်း မလိုအပ်သည့်ကုန်ကျစရိတ်များကို သွင်းကုန်လုပ်ငန်းရှင်များက ထပ်မံကုန်ကျနေပြီး ဆောက်လုပ်ရေးပစ္စည်းဈေးတွေ မြင့်တက်နေကြောင်း သိရသည်။
ဆက်လက်ဖွင့်လှစ်နေသည့် လုပ်ငန်းများသည်လည်း ယင်းကာလတွင်ရုန်းကန်နေရပြီး လုပ်ငန်းရပ်တည်ရန်အတွက် မနည်းကြိုးစားနေရကြောင်း ဈေးကွက်အတွင်းက သိရသည်။
ymg/sth
#Yangon_Media_Group
