#LocalNews
Published_ 31 July 2022
၂၀၂၂ ခုနှစ် ဇန်နဝါရီလ (၁) ရက်မှ ဇူလိုင်လ(၁၆)ရက် အထိမြန်မာနိုင်ငံတွင် သွေးလွန်တုပ်ကွေးဖြစ်ပွားသူ (၁၀,၇၆၆) ဦးနှင့် သေဆုံးသူ(၄၃)ဦးရှိကြောင်း ကျန်းမာရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသက်ခိုင်ဝင်းကပြောသည်၊၊
ဇူလိုင်လ(၂၉)ရက်ကကျင်းပသည့် ပြည်ထောင်စုနယ်မြေ၊ နေပြည်တော်ရှိ ပြည်ထောင်စုအဆင့်အဖွဲ့အစည်းများနှင့် ဝန်ကြီးဌာနများ၏ ဝန်ထမ်းအိမ်ရာများတွင် ခြင်ကျားနှင့် ပိုးလောက်လမ်းကင်းစင်ရေး လှုပ်ရှားမှုအတွက် ညှိနှိုင်းအစည်းအဝေးတွင် ထည့်သွင်းပြောကြားခဲ့ခြင်းဖြစ်သည်၊၊
ဧရာဝတီတိုင်းဒေသကြီး၊ ရန်ကုန်တိုင်းဒေသကြီးနှင့် မွန်ပြည်နယ်တို့တွင် သွေးလွန်တုပ်ကွေးရောဂါဖြစ်ပွားမှုအများဆုံးဖြစ်ပြီး ပြည်ထောင်စုနယ်မြေ၊ နေပြည်တော်တွင်လည်း ဖြစ်ပွားမှုများနှင့်သေဆုံးမှုရှိကြောင်းသိရသည်၊၊
ပြည်ထောင်စုဝန်ကြီး ဒေါက်တာသက်ခိုင်ဝင်းက"သွေးလွန်တုပ်ကွေးရောဂါသည် မြန်မာနိုင်ငံတွင် အဓိက ကူးစက်မြန်ရောဂါတစ်ခုဖြစ်ပြီး(၂)နှစ်မှ (၃)နှစ်လျှင် တစ်ကြိမ်ဖြစ်ပွားမှုများပြားလေ့ရှိကြောင်း၊ နှစ်အလိုက်ဖြစ်ပွားမှုကိန်းဂဏန်းများအရ (၂၀၂၂) ခုနှစ်သည် ရောဂါဖြစ်ပွားမှုများပြားနိုင်သောကြောင့် ကျန်းမာရေးဝန်ကြီးဌာနအနေဖြင့် နှီးနွယ်ဝန်ကြီးဌာနများကို ဖိတ်ကြားပြီး ဗဟိုအဆင့်လုပ်ငန်းညှိနှိုင်းအစည်းအဝေးတစ်ရပ်ကို ၂၀၂၂ ခုနှစ်၊ မေလ (၂၃)ရက်နေ့တွင် ကျင်းပခဲ့ကြောင်း၊ ဝန်ကြီးဌာနများ၏ ဝန်ထမ်းအိမ်ရာများတွင် ခြင်ကျားနှင့် ပိုးလောက်လမ်းကင်းစင်ရေးလှုပ်ရှားမှု (Campaign) အားအကောင်အထည်ဖော်ဆောင်ရွက်သွားရန်အတွက် ယခု ညှိနှိုင်းအစည်းအဝေးကို ကျင်းပရခြင်းဖြစ်ကြောင်း၊ သွေးလွန်တုပ်ကွေးရောဂါသည် အသက်အရွယ် မရွေး၊ နေရာဒေသမရွေး ကျေးလက်နှင့်မြို့ပြများတွင်ပါ ဖြစ်ပွားနိုင်သဖြင့် သွေးလွန်တုပ်ကွေးရောဂါ ကာကွယ်နှိမ်နင်းရေးအတွက် ခြင်နှင့်ပိုးလောက်လမ်းပေါက်ပွားနိုင်သည့်နေရာများနှင့် ခြင်ခိုအောင်း နိုင်သည့် ခြုံနွယ်ပိတ်ပေါင်းများ ရှင်းလင်းခြင်းတိုကို စီမံချက်အသွင် စနစ်တကျဆောင်ရွက်ရန် လိုအပ်ပါကြောင်း၊ သွေးလွန်တုပ်ကွေးရောဂါကာကွယ်နှိမ်နင်းမှုဆိုင်ရာ အထောက်အပံ့ပစ္စည်းများ၊ ကုသရေးလုပ်ငန်းများနှင့် သုတေသနလုပ်ငန်းများ ဆောင်ရွက်ရန်အတွက် သွေးလွန်တုပ်ကွေး ကာကွယ်နှိမ်နင်းရေးပစ္စည်းများနှင့် ပညာပေးစာစောင်များ၊ လုပ်ငန်းလမ်းညွှန်စာအုပ်များကို ပြည်ထောင်စုနယ်မြေ၊ နေပြည်တော်နှင့် တိုင်းဒေသကြီး/ ပြည်နယ်များသို့ ဖြန့်ဝေထားပြီးဖြစ်ကြောင်း၊ ပြည်ထောင်စုနယ်မြေ၊ နေပြည်တော်ရှိ ပြည်ထောင်စုအဆင့် အဖွဲ့အစည်းများနှင့် ဝန်ကြီးဌာနများ၏ ဝန်ထမ်းအိမ်ရာများတွင် ခြင်ကျားနှင့် ပိုးလောက်လမ်းကင်းစင်ရေး လှုပ်ရှားမှု အတွက် ပြည်သူ့ကျန်းမာရေးဦးစီးဌာနမှ သွေးလွန်တုပ်ကွေးရောဂါနှင့် ခြင်ကြောင့် ကူးစက်တတ်သည့်ရောဂါများ ကာကွယ်နှိမ်နင်းရေးလုပ်ငန်းများ ဆောင်ရွက်ရာတွင် နှီးနွယ်ဝန်ကြီးဌာနများ၏ ပူးပေါင်းပါဝင်မှုသည် အလွန်အရေးကြီးသည့်အတွက် ဝန်ကြီးဌာနများမှ ပါဝင်ဆွေးနွေးပေးကြပါရန် လိုအပ်ပါကြောင်း"ပြောကြားခဲ့သည်။
ymg/tthl
#Yangon_Media_Group
