#LocalNews
Published_10 June 2022
မလေးရှားနိုင်ငံသို့သွားကြမည့် မြန်မာနိုင်ငံသား ၃၉ ဦးကို ထိုင်းနိုင်ငံတောနက်တစ်ခုအတွင်း ဖမ်းမိကြောင်း မြန်မာရွှေ့ပြောင်းအလုပ်သမားများအရေး ဆောင်ရွက်နေသူများထံမှ သိရသည်။
ယင်းတို့အား ထိုင်းနိုင်ငံ ထရိုင်ခရိုင် နခေါင်စီထမ္မရာတ်ပြည်နယ်တွင်း ပုန်းအောင်းနေစဉ် ဒေသခံများကတွေ့ရှိ၍ ရဲစခန်းသို့အကြောင်းကြားခဲ့ရာမှ ဖမ်းဆီးမိခြင်းဖြစ်ကြောင်း၊ မြန်မာနိုင်ငံသား အမျိုးသား ၃၇ ဦး၊ အမျိုးသမီး ၂ ဦးဖြစ်ပြီး မွန်ပြည်နယ်မော်လမြိုင်မြို့မှ လာရောက်ကြသည့် မွန်တိုင်းရင်းသားများဖြစ်ကြကြောင်း၊ ထားဝယ်ဘက်ခြမ်းမှတစ်ဆင့် တောင်တန်းဖြတ်ကျော်၍ ထိုင်းနိုင်ငံတွင်းသို့ ဇွန်လ ၉ ရက် ည ၁၁ နာရီအချိန်ခန့်က ဝင်ရောက်ပြီး တောလမ်းအတိုင်း ဖြတ်သန်းလာခဲ့ကာ ယနေ့ ဇွန်လ ၁၀ ရက် နံနက်ပိုင်း ၆ နာရီခန့်တွင် ဖမ်းဆီးခံခဲ့ရခြင်း ဖြစ်ကြောင်း သိရသည်။
အဆိုပါ ဖမ်းဆီးရသူများ ပြောဆိုချက်အရ မလေးရှားနိုင်ငံသို့ သွားရောက်ရန် ပွဲစားခ မြန်မာငွေ ကျပ်သိန်း ၄၀ ခန့်နှင့်ညီမျှသော (ဘတ် ၇ သောင်း)ထိ ပေးဆောင်ရကြောင်း၊ လက်ရှိတွင် စရံငွေ အဖြစ် မြန်မာငွေ ကျပ်သိန်း ၂၀ နှင့်ညီမျှသော (ဘတ် ၃၅၀၀၀)ကို ကြိုတင်ပေးသွင်းပြီး ဖြစ်ကြောင်းလည်း သိရသည်။
ymg/mt
#Yangon_Media_Group
