#LocalNews
Published - 4 Feb 2022
ပြည်ပက ပြန်လည်ဝင်ရောက်သူတွေထံက အိုမီခရွန်ရောဂါပိုးသစ်ကို မြန်မာနိုင်ငံသား ၂၈ ဦးဆီက ထပ်မံတွေ့ရှိတယ်လို့ မနေ့က ကျန်းမာရေးဝန်ကြီးဌာနက ကြေညာချက်အရသိရပါတယ်။
မြန်မာနိုင်ငံမှာ အိုမီခရွန်ရောဂါပိုးကို နိုင်ငံခြားသားရော၊ မြန်မာနိုင်ငံသားအပါအဝင် စုစုပေါင်း ၃၄၈ ဦးထံမှာ တွေ့ရှိထားပါတယ်။
မနေ့ကတွေ့ရှိခဲ့တဲ့ အိုမီခရွန်ရောဂါပိုးကူးစက်ခံရသူ မြန်မာနိုင်ငံသား ၂၈ ဦးမှာ Relief Flight တွေနဲ့ ဝင်ရောက်လာသူတွေဖြစ်ပြီး စင်ကာပူနိုင်ငံမှ ၁၂ ဦး၊ ယူအေအီးနိုင်ငံမှ ၅ ဦး၊ မလေးရှားနိုင်ငံမှ ၅ ဦး၊ တောင်ကိုရီးယားနိုင်ငံမှ ၄ ဦး၊ အိန္ဒိယနိုင်ငံမှ ၁ ဦးနဲ့ အင်ဒိုနီးရှားနိုင်ငံမှ ၁ ဦးတို့ ပါဝင်တယ်လို့ သိရပါတယ်။
ယခင် ပြည်ပက ပြန်လည်သူတွေဆီက တွေ့ရှိခဲ့ပေမယ့် ဖေဖော်ဝါရီ ၂ ရက်နေ့မှာ မင်္ဂလာဒုံမြို့နယ် စက်ရုံတစ်ခုမှာ အိုမီခရွန် ရောဂါပိုးကူးစက်ခံရသူ ၁၀ ဦးကို စတင်တွေ့ရှိနေပါပြီ။ အဲဒီစက်ရုံမှာပဲ ကိုဗစ်ရောဂါပိုးကိုလည်း လူဦးရေ ၇၀၀ ကျော် အစုလိုက်ဖြစ်ပွားခဲ့ပါသေးတယ်။
ကိုဗစ်ရောဂါပိုးကို တိုင်းဒေသကြီး၊ ပြည်နယ်အနေနဲ့ ရန်ကုန်တိုင်းဒေသကြီးကတော့ ပိုးတွေ့မှုအများဆုံး ဖြစ်နေပြီး ယခုလက်ရှိထိ ကိုဗစ်-၁၉ ကူးစက်ခံရသူ ၅၃၆,၉၀၄ ဦးအထိ ရှိပြီးလည်း ဖြစ်ပါတယ်။ တစ်နိုင်ငံလုံးအတိုင်းအတာအရ ရောဂါပိုးတွေ့ရှိမှု ရာခိုင်နှုန်းမှာလည်း မြင့်တတ်လာတာကို တွေ့ရပါတယ်။
ဒါ့ကြောင့် ကိုဗစ်ရောဂါပိုးရော အိုမီခရွန်ရောဂါပိုးပါ ကူးစက်မှု မြင့်တတ်လာတာကို တွေ့ရတဲ့အတွက် ပြည်သူတွေအနေနဲ့ ကျန်းမာရေးလမ်းညွှန်ချက်တွေကို လိုက်နာကြဖို့ ကျန်းမာရေးဝန်ကြီးဌာနက အသိပေးထားပါတယ်။
ymg/ei
#Yangon_Media_Group
