#World_News
Published 06 November 2026

■ ဒီတစ်ပတ် ကြားဖြတ်ရွေးကောက်ပွဲမှာ ရီပတ်ဘလစ်ကန်ပါတီ အကြီးအကျယ် ရှုံးနိမ့်ခဲ့တာကြောင့် သမ္မတ ဒေါ်နယ်ထရမ့်ဟာ ဝါရှင်တန်နိုင်ငံရေးလောကမှာ အင်အားလျော့ကျသွားခဲ့ပါတယ်။ ဒါ့အပြင် သူ့ရဲ့မူဝါဒတွေနဲ့ လုပ်ဆောင်ချက်တွေကိုလွှတ်တော်က ပိုမိုတင်းကျပ်စွာ စောင့်ကြည့်စစ်ဆေးလာရတော့မှာပါ။

■ ဒါပေမဲ့ နိုင်ငံခြားရေးမူဝါဒနဲ့ ပတ်သက်လာရင်တော့ ထရမ့်ဟာ အရင်လိုပဲ အတားအဆီးမရှိ လုပ်ဆောင်နိုင်ဖို့ အလားအလာရှိနေပါတယ်။

■ ဒီမိုကရက်တွေက ကွန်ဂရက်ကို ပြန်လည်ထိန်းချုပ်နိုင်တော့မှာဖြစ်လို့ ရီပတ်ဘလစ်ကန်သမ္မတ ထရမ့်ရဲ့ လုပ်ဆောင်ချက်တွေကို ထိန်းချုပ်ဖို့ ကြိုးစားလာကြမှာပါ။

■ ဒါပေမဲ့ အီရန်၊ အစ္စရေး၊ ယူကရိန်းနဲ့ တရုတ်နိုင်ငံတို့အပေါ် ထားရှိတဲ့ သူ့ရဲ့ ရည်မှန်းချက်တွေကို အကောင်အထည်ဖော်ရာမှာတော့ ကျန်ရှိနေတဲ့ သမ္မတသက်တမ်း နှစ်နှစ်အတွင်း ထရမ့်ဟာ လုပ်ပိုင်ခွင့်အာဏာအတော်များများကို ဆက်လက်ပိုင်ဆိုင်ထားဦးမှာဖြစ်ပါတယ်။

■ လေ့လာသုံးသပ်သူတွေအဆိုအရ အခုအချိန်မှာ အဓိကမေးခွန်းကတော့ ရွေးကောက်ပွဲမှာ သူ့ပါတီ ရှုံးနိမ့်ခဲ့တဲ့အတွက် ထရမ့်အနေနဲ့ နိုင်ငံရေးအရ သတိထားပြီး လုပ်ဆောင်လာမလား၊ ဒါမှမဟုတ် သမိုင်းမှာ သူ့ရဲ့အမှတ်အသားတစ်ခု ချန်ထားနိုင်ဖို့အတွက် ပိုပြီး ပြင်းထန်တဲ့ လုပ်ဆောင်ချက်တွေကို ရဲရဲတင်းတင်း လုပ်လာမလားဆိုတာပါပဲ။

■ လက်ရှိ အရေးအကြီးဆုံးကတော့ အီရန်နဲ့ ဖြစ်ပွားနေတဲ့ အဆုံးမသတ်နိုင်သေးတဲ့ စစ်ပွဲပါပဲ။
ဒီစစ်ပွဲကြောင့် ရီပတ်ဘလစ်ကန်တွေ ရွေးကောက်ပွဲမှာ ရှုံးနိမ့်ခဲ့ရတာဖြစ်ကြောင်း ထရမ့်ကိုယ်တိုင် နိုဝင်ဘာ ၄ ရက်နေ့က ဝန်ခံခဲ့ပါတယ်။

■ ဒါပေမဲ့ အီရန်ကို တိုက်ခိုက်ခဲ့တဲ့အပေါ် နောင်တမရကြောင်းနဲ့ အီရန်က နျူကလီးယားလက်နက် ပိုင်ဆိုင်လာနိုင်မယ့် အန္တရာယ်ကို တားဆီးဖို့ ဒီလုပ်ရပ်ဟာ မဖြစ်မနေ လိုအပ်ခဲ့တယ်လို့လည်း သူက အခိုင်အမာ ပြောဆိုခဲ့ပါတယ်။

■ အီရန်ဘက်ကတော့ နျူကလီးယားလက်နက် ထုတ်လုပ်ဖို့ ကြိုးပမ်းခဲ့ဖူးခြင်းမရှိကြောင်း ငြင်းဆိုထားပါတယ်။

■ ဒီကြားဖြတ်ရွေးကောက်ပွဲရလဒ်ဟာ အီရန်နဲ့ ရှစ်လကြာ ဖြစ်ပွားနေတဲ့ စစ်ပွဲအပေါ် အမေရိကန်ပြည်သူတွေ မကျေနပ်မှု မြင့်တက်လာတာကို ပြသနေပါတယ်။ စစ်ပွဲကြောင့် ဓာတ်ဆီဈေးတွေ မြင့်တက်လာသလို ထရမ့်ရဲ့ လူကြိုက်များမှုလည်း ကျဆင်းလာခဲ့ပါတယ်။

Source-Reuters