#World_News
Published 24 April 2026

■ ဝါရှင်တန် - အလုပ်သမားများကို ခရစ်ပတို ငွေကြေးရင်းနှီးမြှုပ်နှံမှု လိမ်လည်သည့် လုပ်ငန်းများတွင် အတင်းအကျပ် ပါဝင်စေခဲ့သည်ဟု အာဏာပိုင်များက ဆိုသည့် မြန်မာနိုင်ငံရှိ ကြီးမားကျယ်ပြန့်သော စခန်းတစ်ခုကို စီမံခန့်ခွဲခဲ့မှုဖြင့် တရုတ်နိုင်ငံသား နှစ်ဦးသည် အမေရိကန်တွင် တရားစွဲဆိုခံနေရကြောင်း ရိုက်တာသတင်းအရသိရသည်။

■ ဖက်ဒရယ်တရားရုံးတွင် တင်သွင်းထားသော တိုင်ကြားချက်အရ သံသယရှိသူများဖြစ်သည့် ဟွမ်ရှင်းရှန် (Huang Xing Shan) နှင့် ကျန်ဝမ်ကျဲ (Jiang Wen Jie) တို့ကို အင်တာနက်/ ဆက်သွယ်ရေး ကွန်ရက်မှတစ်ဆင့် လိမ်လည်မှုကျူးလွန်ရန် ပူးပေါင်းကြံစည်မှုဖြင့် တရားစွဲဆိုထားသည်။

■ သူတို့သည် ၂၀၂၅ ခုနှစ် နိုဝင်ဘာလတွင် မြန်မာနိုင်ငံရှိ လက်နက်ကိုင်တပ်ဖွဲ့များက မသိမ်းပိုက်မီ မင်းလက်ပံရွာရှိ စက်မှုလုပ်ငန်းအရွယ်အစားရှိသော Shunda Park (ရွှန်းဒါ စက်မှုဇုန်) စခန်းကို စီမံခန့်ခွဲခဲ့သည်ဟု စွပ်စွဲခံထားရသည်။

■ ဝါရှင်တန်တွင် တရားစွဲဆိုခံထားရသော သံသယရှိသူ နှစ်ဦးစလုံးသည် ထိုင်းနိုင်ငံသို့ တရားမဝင် ဝင်ရောက်မှုဖြင့် ထိုင်းအစိုးရ၏ ထိန်းသိမ်းမှုအောက်တွင် ရှိနေကြောင်း တရားရုံးမှတ်တမ်းများတွင် ဖော်ပြထားသည်။

■ သူတို့သည် ကမ္ဘောဒီးယားရှိ အခြား ငွေလိမ်စခန်းတစ်ခုသို့ ပြောင်းရွှေ့ခဲ့သော်လည်း ယခုနှစ်အစောပိုင်းတွင် လူဝင်မှုကြီးကြပ်ရေးဆိုင်ရာ စွဲချက်များဖြင့် ထိုင်းအာဏာပိုင်များ၏ ဖမ်းဆီးခြင်းကို ခံခဲ့ရသည်ဟု အဆိုပါမှတ်တမ်းက ဖော်ပြထားသည်။ သူတို့ကို အမေရိကန်သို့ မည်သည့်အချိန်တွင် ခေါ်ဆောင်လာကာ တရားစွဲဆိုမည်မှာ မသေချာသေးပေ။

■ FBI အေးဂျင့်များသည် ရွှန်းဒါ (Shunda) စခန်းတွင် တွေ့ရှိခဲ့သည့် အီလက်ထရောနစ် စက်ပစ္စည်း ထောင်ပေါင်းများစွာကို စစ်ဆေးခဲ့ပြီး ယခင် အလုပ်လုပ်ခဲ့သူအချို့ကိုလည်း တွေ့ဆုံမေးမြန်းခဲ့သည်။ လိမ်လည်သူများသည် တရားဥပဒေစိုးမိုးရေး အရာရှိများ သို့မဟုတ် ဘဏ်အရာရှိများအဖြစ် ဟန်ဆောင်ကာ၊ တရားဝင် ရင်းနှီးမြှုပ်နှံမှု ပလက်ဖောင်းများအသွင် ဖန်တီးထားသော လိမ်လည်သည့် ဝက်ဘ်ဆိုက်များကို အသုံးပြု၍ ခရစ်ပတိုငွေကြေးများ ပေးပို့လာစေရန် လှည့်စားခြင်းဖြင့် ကမ္ဘာတစ်ဝန်းရှိ သားကောင်များကို လိမ်လည်ခဲ့ကြကြောင်း FBI အေးဂျင့်တစ်ဦး၏ ကျမ်းကျိန်လွှာအရ သိရသည်။

■ ဝါရှင်တန်တွင် ပြုလုပ်သော သတင်းစာရှင်းလင်းပွဲတစ်ခု၌ စွဲချက်များကို ကြေညာခဲ့သည့် အမေရိကန် ရှေ့နေ ဂျန်နင်းပီရို (Jeanine Pirro) က ရွှန်းဒါစခန်းတွင် ကျူးလွန်ခဲ့သော လိမ်လည်မှုအမျိုးအစားသည် အလျင်မြန်ဆုံး ကြီးထွားလာနေပြီး ဘဏ္ဍာရေးအရ အပျက်အစီး အများဆုံးဖြစ်စေသည့် ဆိုက်ဘာ ရာဇဝတ်မှုပုံစံများထဲတွင် ပါဝင်ကာ အမေရိကန်နိုင်ငံသားများအတွက် ဒေါ်လာဘီလီယံပေါင်းများစွာ ဆုံးရှုံးစေခဲ့ကြောင်း ပြောကြားခဲ့သည်။

■ "ဒါက စိတ်ကူးယဉ်အကြောင်းအရာ မဟုတ်ပါဘူး။ ဒါဟာ ခင်ဗျားတို့ရဲ့အိမ်နီးချင်းတွေ၊သူငယ်ချင်းတွေနဲ့ မိဘတွေရဲ့ အငြိမ်းစားယူဖို့ စုဆောင်းထားတဲ့ ငွေစာရင်းတွေကို ထိခိုက်နေတာပါ" ဟု ပီရိုက ပြောကြားခဲ့သည်။ "ဒီလိုခံရတဲ့ သူအချို့ဟာ အရမ်းကို စိတ်သောကရောက်သွားပြီး သူတို့ကိုယ်သူတို့ အဆုံးစီရင်သွားကြတဲ့အထိပါပဲ။ ဒါဟာ စီးပွားရေးအရ လူသတ်မှုပါပဲ။"

■ စခန်းရှိ အလုပ်သမားများက သူတို့ကို ဆန္ဒမပါဘဲ ဖမ်းဆီးထိန်းသိမ်းထားကြောင်းနှင့် အကြမ်းဖက်မည်ဟု ခြိမ်းခြောက်ကာ လိမ်လည်မှုများတွင် အတင်းအကျပ် ပါဝင်စေခဲ့ကြောင်း FBI သို့ ပြောကြားခဲ့သည်။

■ "ဒီစခန်းတွေရဲ့ နောက်ကွယ်က ရာဇဝတ်ဂိုဏ်းတွေဟာ မသင်္ကာမှုမရှိတဲ့ သူတွေကို လစာကောင်းတဲ့ နည်းပညာအလုပ်တွေ ပေးမယ်ဆိုပြီး အနီးအနားက ထိုင်းနိုင်ငံကို သွားဖို့ မကြာခဏ သွေးဆောင် လေ့ရှိပါတယ်။ ဒါပေမယ့် ဒီလူတွေထဲက အများစုဟာ သူတို့ရဲ့ သက်သေခံစာရွက်စာတမ်းတွေ သိမ်းဆည်းခံရပြီး ဒီငွေလိမ်စခန်းတွေမှာ အလုပ်လုပ်ဖို့ (မြန်မာနိုင်ငံသို့) လူကုန်ကူးခံရတာ ဖြစ်ပါတယ်" ဟု FBI ၏ ကျမ်းကျိန်လွှာတွင် ဖော်ပြထားသည်။