Published 22 May 2024
အမေရိကန်အစိုးရက ကွန်ဂရက်လွှတ်တော်နဲ့ ပူးပေါင်းကာ နိုင်ငံတကာ ရာဇဝတ်မှုတရားရုံး(ICC)မှ အရာရှိများကို ဒဏ်ခတ်ပိတ်ဆို့မှုများ ချမှတ်ရန် လုပ်ဆောင်ဖို့ ဆန္ဒရှိနေကြောင်း အမေရိကန် နိုင်ငံခြားရေးဝန်ကြီး အန်တိုနီဘလင်ကန်က အင်္ဂါနေ့မှာ ပြောကြားလိုက်ပါတယ်။
အကြောင်းအရင်းကတော့ ဂါဇာစစ်ပွဲကြောင့် အစ္စရေးလ်ခေါင်းဆောင်များကို ဖမ်းဝရမ်းထုတ်ရန် ICC အစိုးရရှေ့နေမှ လျှောက်ထားလိုက်တဲ့ ဆုံးဖြတ်ချက်ကြောင့် ဖြစ်ပါတယ်။
ICC ရှေ့နေကာရင်ခန်းက ကြေညာလိုက်တဲ့အပေါ် တုန့်ပြန်တဲ့အနေဖြင့် ICC အပေါ် အမေရိကန်မှ ဒဏ်ခတ်ပိတ်ဆို့မှုများ ပြန်လည်ချမှတ်လိုကြောင်း ရီပတ်ဘလစ်ကန် အထက်လွှတ်တော်အမတ် လင်ဆေးဂရေဟမ်က ဘလင်ကန်ကို ပြောကြားလိုက်ပါတယ်။
စကားတွေနဲ့သာ မဟုတ်ဘဲ လက်တွေ့လုပ်ဆောင်လိုကြောင်း၊ အစ္စရေးလ်အပေါ် ဆက်ဆံပုံအတွက်သာမက အနာဂတ်မှာ တိုင်းပြည်အကျိုးစီးပွားကိုပါ ကာကွယ်ဖို့အတွက် ICC ကို ဒဏ်ခတ်ပိတ်ဆို့ဖို့ လွှတ်တော်နှစ်ရပ်ရဲ့ ကြိုးပမ်းမှုကို ထောက်ခံမည်လားလို့ ဂရေဟမ်က မေးမြန်းခဲ့ရာ ဘလင်ကန်က အတူတကွ လုပ်ဆောင်ရန်ကြိုဆိုကြောင်း ဖြေကြားခဲ့ပါတယ်။
ICC ရှေ့နေကာရင်ခန်းက စစ်ပွဲရာဇဝတ်မှုများနဲ့ လူသားများအပေါ် ပြစ်ဒဏ်ကျူးလွန်မှုများအတွက် အစ္စရေးလ်ဝန်ကြီးချုပ်၊ အစ္စရေးလ်ကာကွယ်ရေးဝန်ကြီး၊ ဟားမတ်စ်ခေါင်းဆောင် ၃ ဦးတို့ ရာဇဝတ်မှုတာဝန်ခံသင့်တယ်လို့ ယုံကြည်ကြောင်း ကြေညာခဲ့တာ ဖြစ်ပါတယ်။
သမ္မတဂျိုးဘိုင်ဒင်အပြင် သူ့ရဲ့နိုင်ငံရေးပြိုင်ဘက်များကပါ ကာရင်ခန်းရဲ့ ကြေညာချက်ကို အပြင်းအထန် ဝေဖန်လိုက်ပြီး တရားရုံးအနေဖြင့် ဂါဇာပဋိပက္ခအပေါ် တရားစီရင်ပိုင်ခွင့် မရှိဘူးလို့ ငြင်းဆိုလိုက်ကြပါတယ်။
အမေရိကန်ပြည်ထောင်စုက ICC အဖွဲ့ဝင်မဟုတ်ပေမယ့် ရုရှားသမ္မတပူတင်ကို ယူကရိန်းအရေးနဲ့ ပတ်သက်ပြီး ICC မှ ဖမ်းဝရမ်းထုတ်တဲ့ ဆုံးဖြတ်ချက်လိုမျိုးကိုတော့ ယခင်က ထောက်ခံခဲ့ဖူးပါတယ်။
ယခင်ကလည်း လွှတ်တော်မှ ရီပတ်ဘလစ်ကန်တွေက ICC ကို ဥပဒေရေးရာအတိုင်း ဒဏ်ခတ်ပိတ်ဆို့မှုများ ချမှတ်ရန် ခြိမ်းခြောက်ခဲ့ဖူးပြီး သမ္မတဘိုင်ဒင်နဲ့ အထက်လွှတ်တော် ဒီမိုကရက်များရဲ့ ထောက်ခံမှုမရရှိဘဲ ဥပဒေဖြစ်မလာနိုင်ပါဘူး။
အာဖဂန်နစ္စတန်မှာ စစ်ရာဇဝတ်မှုများ အမေရိကန်ကျူးလွန်ခဲ့တဲ့အပေါ် ၂၀၂၀ ခုနှစ်မှာ ICC မှ စုံစမ်းစစ်ဆေးရန် ခွင့်ပြုခဲ့ချိန်တုန်းက အမေရိကန်ရဲ့ အချုပ်အခြာအာဏာကို ထိပါးတယ်ဆိုပြီး သမ္မတဟောင်း ဒေါ်နယ်ထရမ့်လက်ထက်မှာ ICC ကို စွပ်စွဲခဲ့ကာ ICC ရှေ့နေဟောင်းအပါအဝင် တရားရုံးအဖွဲ့ဝင်များကို ပစ်မှတ်ထားပြီး ပိုင်ဆိုင်မှုများ သွားလာခွင့်များ ပိတ်ပင်ခဲ့ပါတယ်။
ဘိုင်ဒင်သမ္မတဖြစ်လာပြီး သိပ်မကြာခင် ၂၀၂၁ ဧပြီမှာ အဆိုပါပိတ်ဆို့မှုတွေကို ဖယ်ရှားခဲ့ပါတယ်။
Source: Reuters
#World_News
#Published_ 22 May 2024
#Yangon_Times #YMG_News #Yangon_Media_Group
