Published 15 June 2024

ယူကရိန်းအနေနဲ့ ငြိမ်းချမ်းရေး ဆွေးနွေးချင်တယ်ဆိုရင် ရုရှားဆီမှာ အညံ့ခံရမယ်လို့ သမ္မတ ဗလာဒီမာပူတင်က ဇွန်လ ၁၄ ရက်နေ့မှာ ပြောကြားလိုက်သဖြင့် ယူကရိန်းနဲ့ အနောက်တိုင်းတို့ အမျက်ဒေါသထွက်စရာ ဖြစ်ခဲ့ကာ ပြင်းပြင်းထန်ထန် အပြစ်တင်လိုက်ပါတယ်။

ဆွစ်ဇာလန်မှာ ပြုလုပ်မယ့် ယူကရိန်း ငြိမ်းချမ်းရေး ထိပ်သီးအစည်းအဝေးကြီး မတိုင်ခင်နေ့မှာ ပူတင်က မိန့်ခွန်းပြောကြားခဲ့တာ ဖြစ်ပြီး ယူကရိန်းအနေနဲ့ အရှေ့ပိုင်းနဲ့ တောင်ပိုင်းတို့ကနေ လုံးဝတပ်ဆုတ်ခွာပြီး နေတိုး(NATO)အဖွဲ့ဝင်အဖြစ် လျှောက်ထားခြင်းမှ ပြန်ရုပ်သိမ်းမှသာ ရုရှားဘက်က စစ်ဆင်ရေး ရပ်တန့်မှာဖြစ်တယ်လို့ ပြောကြားသွားပါတယ်။

နှစ်နိုင်ငံဟာ စစ်ပွဲပဋိပက္ခဖြစ်နေတာ ၂ နှစ်ကျော် ကြာနေပြီဖြစ်ပြီး တိုက်ရိုက်ညှိနှိုင်းဆွေးနွေးမှု မလုပ်ဖူးသေးပါဘူး။
ခရိုင်းမီးယားကျွန်းဆွယ် အပါအဝင် ယူကရိန်းပိုင် နယ်မြေအဖြစ် နိုင်ငံတကာမှာပါ အသိအမှတ်ပြုထားတဲ့ နေရာတွေကနေ ရုရှားလုံးဝ ဆုတ်ခွာဖို့ကို ယူကရိန်းက တောင်းဆိုထားပါတယ်။

ပူတင်ရဲ့ ရာဇသံက အဒေါ့ဖ်ဟစ်တလာကိုတောင် ပြန်လည် အမှတ်ရစေတယ်လို့ ယူကရိန်းသမ္မတ ဗိုလိုဒီမီယာဇယ်လန်စကီက ပြောပါတယ်။

ရုရှားဟာ ယူကရိန်းရဲ့ နယ်မြေ ၄ ခုကို သိမ်းပိုက်ခဲ့ပြီလို့ ၂၀၂၂ တုန်းက ကြေညာခဲ့ပေမယ့် တစ်ခုမှ အပြည့်အဝ ထိန်းချုပ်နိုင်ခြင်း မရှိပါဘူး။

ယူကရိန်းအနေနဲ့ တပ်ဆုတ်ပြီး နေတိုးထဲဝင်မယ့် အစီအစဥ်ကို ပြောင်းလဲဖို့ အသင့်ဖြစ်ပြီဆိုပါက ချက်ချင်းအပစ်အခတ် ရပ်စဲပြီး စတင်ဆွေးနွေးသွားမယ်လို့ ပူတင်က ဆိုပါတယ်။

ရုရှားဟာ ယူကရိန်း ကြားနေရေး၊ ဘက်လိုက်မတည်ရှိရေး၊ နျူကလီးယား မတည်ရှိရေး၊ စစ်တပ် မတည်ရှိရေးနဲ့ နာဇီဝါဒ မရှိရေးတို့ကို အလိုရှိတယ်လို့ ပြောပြသွားပါတယ်။
Source: CNA
#World_News
#Published_ 15 June 2024
#YMG #Yangon_Times #Yangon_Media_Group