#World_Health
Published 1 Feb 2024

သက်ကြီးရွယ်အိုတစ်ယောက် အရိုးကျိုးနိုင်ခြေ ရှိမရှိကို ခန့်မှန်းနိုင်မယ့် နည်းလမ်းကို ဩစတြေးလျသုတေသီများ တွေ့ရှိခဲ့ကြပါတယ်။

၁ ကီလိုမီတာ အကွာအဝေးကို အခက်အခဲမရှိ လမ်းလျှောက်နိုင်ရင် အရိုးကျန်းမာရေး အဆင်ပြေတယ်လို့ ဆိုနိုင်ပါတယ်။

လူတစ်ယောက်ရဲ့ လမ်းလျှောက်နိုင်စွမ်းကို မေးမြန်းခြင်းဖြင့် အရိုးကျန်းမာရေး လိုအပ်ချက်တွေကို ဆရာဝန်တွေ သိရှိနိုင်မှာ ဖြစ်ကြောင်း JAMA Network Open ဂျာနယ်မှာ ဖော်ပြထားပါတယ်။

အသက် ၆၀ နဲ့အထက် အမျိုးသမီးတွေမှာ အရိုးကျိုးနိုင်ခြေ ၄၀ ရာခိုင်နှုန်း၊ အမျိုးသားတွေမှာ ၂၅ ရာခိုင်နှုန်း ရှိနေပြီး နောက်ဆယ်စုနှစ်တွေမှာ ပိုမိုအဖြစ်များလာပါတယ်။

အရိုးကျိုးနာလာတဲ့အခါ မလှုပ်ရှား မသွားလာနိုင်ခြင်း၊ ကိုယ့်အားကိုယ်မကိုးနိုင်ခြင်း၊ အရိုးထပ်ကျိုးခြင်းနဲ့ သက်တမ်းမစေ့ခင် အသက်ဆုံးပါးခြင်းတို့ ဖြစ်နိုင်ခြေ များလာပါတယ်။

အရိုးကျိုးနိုင်ခြေနဲ့ ပတ်သက်ရာမှာ ကြွက်သားတွေက ခန့်မှန်းလို့အကောင်းဆုံးအရာ ဖြစ်နေပါတယ်။

အသက်ကြီးလာတာနဲ့အမျှ အရိုးဆုံးရှုံးခြင်းနဲ့ ကြွက်သားဆုံးရှုံးခြင်းတို့က တပြိုင်တည်းဖြစ်လာပြီး ရုပ်ပိုင်းဆိုင်ရာ လှုပ်ရှားခြင်းက အရိုးကျိုးနိုင်ခြေ လျော့နည်းတာနဲ့ ပတ်သက်နေတာကို မြင်တွေ့ရပါတယ်။

အကွာအဝေးနီးနီးမှာပါ လမ်းလျှောက်ရ ခက်ခဲနေပြီဆိုရင် နောက်ငါးနှစ်မှာ အရိုးကျိုးနိုင်ခြေ များနေကြောင်း ဂါဗန်လေ့လာရေးမှ ဦးဆောင်စာတမ်းပြုစုသူ ပရော်ဖက်ဆာ ဂျက်ကယ်လင်းက ပြောပြခဲ့ပါတယ်။

သုတေသီတွေက အသက် ၄၅ နှစ်နဲ့အထက် လူပေါင်း ၂၆၇၀၀၀ ခန့်ကို လေ့လာခဲ့ပြီး သူတို့ရဲ့ လမ်းလျှောက်နိုင်စွမ်းနဲ့ ပတ်သက်လို့ အခက်အခဲ လုံးဝမရှိခြင်း၊ အနည်းငယ်ရှိခြင်း၊ အခက်အခဲ အများအပြားရှိခြင်း စတဲ့ရွေးချယ်စရာ ၃ မျိုးကို ရွေးချယ်ခိုင်းခဲ့ပြီး နောက်ထပ် ၅ နှစ်အထိ စောင့်ကြည့်ခဲ့ပါတယ်။

၁ ကီလိုမီတာ အကွာအဝေးကို လျှောက်ရာမှာ အခက်အခဲများစွာ ခံစားရတဲ့ အမျိုးသမီးတွေက အရိုးကျိုးနိုင်ခြေ ၆၀ ရာခိုင်နှုန်းပိုများပြီး အမျိုးသားတွေကတော့ ၁၀၀ ရာခိုင်နှုန်းကျော်နေပါတယ်။

ဒါကြောင့် လမ်းလျှောက်နိုင်စွမ်း လျော့နည်းတာနဲ့ အရိုးအားနည်းခြင်းက တိုက်ရိုက်ဆက်စပ်နေတယ်လို့ ဂါဗန်မှ အကြီးတန်းသုတေသီတစ်ဦးက ဆိုလိုက်ပါတယ်။

ယေဘုယျကျန်းမာရေး ကောင်းတဲ့လူတွေမှာတောင် ၂၀ ရာခိုင်နှုန်းလောက်က တစ်ကီလိုမီတာကို လမ်းလျှောက်ဖို့ ခက်ခဲနေကြပါသေးတယ်။

အရိုးပွခြင်းကို ကုသတဲ့နည်းလမ်းများ၊ နေထိုင်စားသောက်မှုပုံစံ ပြောင်းလဲခြင်းတို့က အရိုးသန်မာမှုကို ထောက်ပံ့ပေးပါတယ်။

လူအများအပြားက အရိုးစစ်ဆေးခြင်း ခံယူဖို့ ပျက်ကွက်နေကြပါတယ်။

အရိုးသိပ်သည်းဆကို စစ်ဆေးခြင်းက အရိုးကျိုးနိုင်ခြေကို သိရှိစေနိုင်သလို လမ်းလျှောက်နိုင်စွမ်းနဲ့ ပတ်သက်ပြီး မေးမြန်းခြင်းကလည်း စက္ကန့်ပိုင်းအတွင်း သိရှိစေမှာ ဖြစ်ပါတယ်။

လမ်းလျှောက်နိုင်စွမ်းမရှိခြင်းက အရိုးကျိုးနိုင်ခြေအပြင် နှလုံးရောဂါများ၊ အဆစ်အမြစ်ရောင်ရောဂါတို့ပါ ခံစားရနိုင်ခြေ ရှိနေပါတယ်။

#World_Health #အရိုးကျန်းမာရေးစစ်ဆေးနိုင် #တစ်ကီလိုမီတာခန့်လမ်းလျှောက် #Source: The Jerusalem Post