Published_ 14 August 2023

အက်ဆစ်လျှံတက်ခြင်းအတွက် သောက်သုံးလေ့ရှိတဲ့ နာမည်ကြီးဆေးတွေကို ရေရှည်သုံးစွဲခြင်းဟာ မှတ်ဉာဏ်ချို့ယွင်းတဲ့ ဒီမန်ရှာရောဂါ ဖြစ်နိုင်ချေများကြောင်း လေ့လာချက်အသစ်မှာ တွေ့ရှိထားပါတယ်။

အိုမီပရာဇိုးလ်၊ အီစိုမီပရာဇိုးလ်၊ လန်ဆိုပရာဇိုးလ် စတဲ့ ပရိုတွန်ပန့်အင်ဟစ်ဘစ်တာဆေး (PPI)တွေကို သောက်သုံးနေရတဲ့ လူနာတွေကို လေ့လာကာ American Academy of Neurology ဂျာနယ်မှာ ဖော်ပြခဲ့ပါတယ်။

အစာစားပြီး လဲနေတဲ့အခါ အစာအိမ်အက်ဆစ်က အစာပြွန်ထဲသို့ ရောက်လာကာ ပြွန်နံရံတွေကို ထိပါးစေပြီး အက်ဆစ်လျှံတက်ခြင်း ဖြစ်ပေါ်စေပါတယ်။

PPI တွေက အစာအိမ်နံရံရှိ အက်ဆစ်ထုတ်လုပ်တဲ့ အင်ဇိုင်းများကို ပစ်မှတ်ထားကာ အက်ဆစ်လျှံတက်ခြင်း၊ အစာအိမ်အနာဖြစ်ခြင်း၊ အစာချေလမ်းကြောင်းပြဿနာများကို ကုသပေးတာဖြစ်ပါတယ်။

အက်ဆစ်လျှံတက်ခြင်းက အချိန်နဲ့အမျှ ဖြစ်ပေါ်တတ်ပေမယ့် မကြာခဏဖြစ်နေပြီဆိုရင်တော့ အစာအိမ်ရေမျိုအက်ဆစ်လျှံတက်ခြင်းရောဂါ ဖြစ်နိုင်ပြီး အစာပြွန်ကင်ဆာအထိပါ ဖြစ်နိုင်ကြောင်း မိုင်ယိုဆေးခန်းက ပြောပြခဲ့ပါတယ်။

PPI တွေက အက်ဆစ်လျှံတက်ခြင်းကို ကူညီထိန်းချုပ်ပေးပေမယ့် ရေရှည်မှာတော့ လေဖြတ်ခြင်း၊ အရိုးအက်ခြင်း၊ နာတာရှည် ကျောက်ကပ်ရောဂါတို့ ဖြစ်နိုင်ချေများနိုင်ကြောင်း တွေ့ရှိထားတယ်လို့ မင်နီဆိုတာတက္ကသိုလ်မှ သုတေသီတစ်ဦးက စာတမ်းပြုစုသူ 'ကာမက်ရှီလက်ရှ်မီနာရာယန်'က ပြောပြသွားပါတယ်။

ပျမ်းမျှအသက် ၇၅ နှစ်ခန့်ရှိတဲ့ စမ်းသပ်ခံ ၅,၇၁၂ ဦးကို အမျိုးသားကျန်းမာရေးအဖွဲ့အစည်းက လေ့လာခဲ့ရာ ထိုဆေးတွေကို ရေတိုသောက်သုံးတဲ့အခါ ဒီမန်ရှာမဖြစ်နိုင်ပေမယ့် ရေရှည်မှာတော့ အန္တရာယ်ရှိကြောင်း တွေ့ရှိခဲ့ပါတယ်။

ပါဝင်စမ်းသပ်ခံသူတွေကို အဖွဲ့ ၄ ဖွဲ့ခွဲကာ PPI ကို ၂.၈ နှစ်ကြာ သုံးစွဲသူအဖွဲ့၊ ၂.၈ နှစ်မှ ၄.၄ နှစ်အထိ သုံးစွဲသူအဖွဲ့၊ ၄.၄ နှစ်အထက် သုံးစွဲသူအဖွဲ့၊ လုံးဝမသုံးစွဲတဲ့အဖွဲ့ဆိုပြီး ခွဲခြားခဲ့ပါတယ်။

အခြားအချက်အလက်များပါ ထည့်သွင်းတွက်ချက်ပြီးနောက် ၄.၄ နှစ်ကြာသုံးစွဲသူတွေဟာ လုံးဝမသုံးစွဲသူတွေထက် ဒီမန်ရှာဖြစ်နိုင်ချေ ၃၃ ရာခိုင်နှုန်းပိုများကြောင်း တွေ့ရှိခဲ့ကြပါတယ်။

၄.၄ နှစ်အောက် ကြာအောင် သောက်သုံးသူတွေကတော့ ဒီမန်ရှာဖြစ်နိုင်ချေ များလာတဲ့အထောက်အထား မတွေ့ခဲ့ကြပါဘူး။

သုတေသီတွေက သူတို့တွေ့ရှိချက်ကို ဒီထက်ပိုပြီးချဲ့ထွင်နိုင်စေရန် မျှော်လင့်နေကြပါတယ်။

အက်ဆစ်လျှံတက်ခြင်းကို ကုသဖို့အတွက် အန်တဆစ်လိုမျိုး ဆေးတွေပြောင်းလဲခြင်း၊ ကိုယ်အလေးချိန်ထိန်းခြင်း၊ နောက်ကျမှစားသောက်ခြင်းကို ရှောင်ရှားခြင်းတို့ဖြင့် ကျင့်သုံးနိုင်ပေမယ့် တစ်ယောက်နဲ့တစ်ယောက် မတူညီနိုင်ပါဘူး။

ပြောင်းလဲမှုမလုပ်ခင် အရင်ဆုံးဆရာဝန်နဲ့ တိုင်ပင်ဖို့အရေးကြီးကြောင်းလည်း သတိပေးသွားပါတယ်။
Source: NY Post
#World_Health
#အစာအိမ်အက်ဆစ်လျှံတက်ခြင်း #ဆေးဝါးများ #ဒီမန်ရှာ #လေ့လာတွေ့ရှိ
#YMG #Yangon_Times

Published_ 14 August 2023

အသုံးပြုပြီးသား ပလတ်စတစ်တွေကို ဆပ်ပြာအဖြစ်သို့ ပြောင်းလဲမယ့် နည်းလမ်းတစ်ခုကို သုတေသီများ ရှာဖွေတွေ့ရှိခဲ့ပါတယ်။

ကမ္ဘာပေါ်မှာ ပလတ်စတစ်စွန့်ပစ်ပစ္စည်းများ နှစ်စဉ်တန်ချိန်သန်း ၂၀၀ ခန့်ထွက်ရှိနေပြီး ၈၀ ရာခိုင်နှုန်းက ကုန်းမြေတွေမှာ ကျန်ရှိနေကာ ၁၀ ရာခိုင်နှုန်းအောက်သာ ပြန်လည်သုံးစွဲနေကြပါတယ်။

ပလတ်စတစ်တွေဟာ ဓာတုနည်းအရ ဖက်တီးအက်ဆစ်များနဲ့ ဆင်တူပြီး ဆပ်ပြာထုတ်လုပ်ရာမှာ အဓိကအစိတ်အပိုင်း ဖြစ်နေပါတယ်။

ထိုဖြေရှင်းနည်းလမ်းကို ဗာဂျီးနီးယားနည်းပညာမှ ဓာတုဗေဒ လက်ထောက်ပရော်ဖက်ဆာ 'ကောင်းလျန်လူ'က တွေ့ရှိခဲ့တာဖြစ်ပြီး ပိုလီအီသင်းကို ဖက်တီးအက်ဆစ်သို့ ပြောင်းလဲပေးကာ ဆပ်ပြာအဖြစ် ထပ်ဆင့်ပြောင်းလဲတာဖြစ်ပါတယ်။

သစ်သားမီးလောင်စာကို ဆဲလူးလို့စ်လိုမျိုး ပိုလီမာတွေနဲ့ အများစုပြုလုပ်ထားကြောင်း၊ သစ်သားလောင်ကျွမ်းတဲ့အခါ ပိုလီမာတွေက ပိုမိုတိုတောင်းတဲ့ အပိုင်းအစများ ဖြစ်သွားကာ ကာဗွန်ဒိုင်အောက်ဆိုဒ်သို့ အပြည့်အဝဓာတ်မတိုးခင် ဓာတ်ငွေ့မော်လီကျူးများ ဖြစ်သွားကြောင်း၊ ပိုလီအီသိုင်လင်းမော်လီကျူးတွေကို ဖြိုခွဲပြီး ဓာတ်ငွေ့မော်လီကျူးများမဖြစ်ခင် ရပ်တန့်လိုက်မယ်ဆိုရင် ပိုမိုတိုတောင်းတဲ့ အပိုင်းအစ ရရှိနိုင်ကြောင်း ရှင်းပြခဲ့ပါတယ်။

ပလတ်စတစ်များ မီးရှို့ရန်အတွက် သုတေသနအဖွဲ့က ပေါင်းအိုးလိုမျိုး ဓာတ်ပေါင်းဖိုကို အသုံးပြုကြပါတယ်။

အောက်ခြေမှာ ပိုလီမာအတန်းတွေ ဖြိုခွဲနိုင်ဖို့ အပူချိန်မြင့်မားပေးထားရပေမယ့် အပေါ်ပိုင်းကတော့ အလွန်အကျွံဖြိုခွဲခြင်းမဖြစ်ရအောင် အနည်းငယ်အေးမြထားရပါတယ်။

ဒီနောက် အကြွင်းအကျန်များကို ရယူကာ ဖယောင်းကဲ့သို့ ပစ္စည်းရရှိလာပြီး ဆပ်ပြာအဖြစ်သို့ ပြောင်းလဲခဲ့ကြပါတယ်။
Source: WION
#World_Science
#ပလတ်စတစ် #ဆပ်ပြာ #နည်းလမ်းအသစ် #သိပ္ပံပညာရှင်များတွေ့ရှိ
#YMG #Yangon_Times

၁၃ ဩဂုတ် ၂၀၂၃

အင်ဒိုနီးရှားမယ်စကြဝဠာရွေးပွဲတွင်  လိင်ပိုင်းဆိုင်ရာစော်ကာမော်ကားပြုမှုစွပ်စွဲချက်တွေထွက်ပေါ်လာပြီးနောက် မယ်စကြဝဠာအဖွဲ့အစည်းကြီးက အင်ဒိုနီးရှားကုမ္ပဏီနှင့် လုပ်ငန်းဖြတ်တောက်လိုက်ပြီး လာမယ့် ပွဲကိုလည်း ဖျက်သိမ်းလိုက်တယ် လို့ကြေညာလိုက်ပါတယ်။

မယ်စကြဝဠာအင်ဒိုနီးရှားရွေးပွဲတွင်  သရဖူရှင်ရွေးပွဲမတိုင်ခင်နှစ်ရက်အလို၌ နောက်ဆုံးဆန်ကာတင် ၃၀ ဦးအနက် တစ်ဝက်ကျော်ခန့်က သူတို့ကို အမာရွတ်များနှင့် အဆီခဲများစစ်ဆေးရန်ဟုဆိုပြီး တစ်ကိုယ်လုံးချွတ်ခိုင်းခဲ့တယ်လို့ တိုင်တန်းမှုတွေပြုလုပ်ခဲ့ကြတာဖြစ်ပါတယ်။

အမျိုးသမီး (၅)ဦးက သူတို့ ဓါတ်ပုံတွေရိုက်ကူးထားတာရှိကြောင်း ရှေ့နေတွေကပြောပါတယ်။

“မယ်စကြဝဠာအင်ဒိုနီးရှားမှာဖြစ်ခဲ့တာတွေ ကျွန်ုပ်တို့သိရသမျှမှာ ကျွန်တော်တို့ရဲ့ လိုင်စင်ရအင်ဒိုနီးရှားကုမ္ပဏီဟာ ကျွန်ုပ်တို့အမှတ်တံဆိပ်အဆင့်အတန်း။ကျင့်ဝတ်နှင့် မျှော်လင့်ချက်တွေ နှင့် ညီအောင်မဆောင်ရွက်နိုင်ဘူးဆိုတာ ရှင်းနေပါတယ်” လို့ အမေရိကန်အခြေစိုက် မယ်စကြဝဠာအဖွဲ့အစည်းက ပြောပါတယ်။

အဲဒါကြောင့် အင်ဒိုနီးရှားက လက်ရှိလိုင်စင်ရ လုပ်ငန်း PT Capella Swastika Karya နှင့် သူ့ရဲ့ နိုင်ငံဆိုင်ရာညွှန်မှူး ပေါ်ပီ ကက်ပီလာတို့နှင့် ဆက်ဆံရေးကို အဆုံးသတ်ဖို့ဆုံးဖြတ်လိုက်ပါပြီ လို့လည်း သတင်းထုတ်ပြန်ချက်မှာဖော်ပြထားပါတယ်။

အဆိုပါအင်ဒိုနီးရှားကုမ္ပဏီဟာ မလေးရှားအတွက်လည်း မယ်စကြဝဠာမလေးရှားအတွက် လိုင်စင်ရထားပါတယ်။ ဒါပေမယ့် မလေးရှားမှာ ဒီနှစ်ပြိုင်ပွဲမရှိပါဘူး။

အင်ဒိုနီးရှားကုမ္ပဏီ ဒါရိုက်တာ ကက်ပီလာကတော့ သူတို့ ခန္ဓာကိုယ်စစ်ဆေးတာတွေမလုပ်ခဲ့ပါဘူးလို့ ကြေညာချက် အရှည်ကြီးထုတ်ပြီးငြင်းထားပါတယ်။

ဂျာကာတာမှာပြိုင်ပွဲကို ဇူလိုင် ၂၉ရက်ကနေ ဩဂုတ် ၃ရက်အထိကျင်းပခဲ့တာဖြစ်ပါတယ်။ အဲဒီပွဲမှာ သရဖူဆောင်းခဲ့သူ ဖက်ဘီယန်နီကိုးလ်ဂရိုနီဗီလ်းကိုတော့ လာမယ့်နိုဝင်ဘာလ အယ်ဆာဗေးဒေါမှာကျင်းပမယ့် ပြိုင်ပွဲကြီးမှာ ယှဉ်ပြိုင်ခွင့် ပေးပါမယ်လို့ မယ်စကြဝဠာအဖွဲ့အစည်းကပြောပါတယ်။

Source: Bangkok Post

၁၃ ဩဂုတ် ၂၀၂၃

ကမ္ဘောဒီးယားနိုင်ငံ ကရက်တိုင်းပြည်နယ်မှာရှိတဲ့ ကျောင်းတစ်ကျောင်းရဲ့ မြေကြီးထဲမြှပ်ထားတဲ့ မပေါက်ကွဲသေးသော ဗုံးများရာနှင့်ချီပြီးတွေ့ရလို့ အဆိုပါကျောင်းကိုပိတ်လိုက်ရတယ်လို့ ခမာတိုင်းမ်သတင်းစာ သတင်းအရသိရပါတယ်။

အဆိုပါပြည်နယ် ကရက်တိုင်းမြို့မှာရှိတဲ့ ကွင်းကိုဆိုမက် အထက်တန်းကျောင်းဝင်းထဲမှာ စနေနေ့က ကြိုတင်စီစဉ်ထားတဲ့ ကျောင်းပြုပြင်မှုတွေပြုလုပ်စဉ်အတွင်း မြေကြီးထဲမှာမြှပ်ထားတဲ့ မပေါက်ကွဲသေးတဲ့ ဗုံးတွေကို ရာနှင့်ချီတွေ့ကြရတာြဖစ်တယ်လို့ ကျောင်းအုပ်ကြီး မစ္စတာ ဘန်းချီက ပြောပါတယ်။

တွေ့ရတဲ့အထဲမှာ အမျိုးအစားလေးမျိုးပါဝင်ပြီး M79s က ၂၅၀၊ DK75s က ၁၆ခု၊ M48 warheads က ၁၇ခု၊ B40s က ၁၇ခု စုစုပေါင်း ၂၈၄ခုဖြစ်ပြီး ထပ်ပြီးရှာတွေ့ဖို့လည်းရှိတယ်လို့ ပညာရေးဌာန၊ လူငယ်နှင့်အားကစား ညွှန်ကြားရေးမှူး မစ္စတာ လေဘိုရာကပြောတယ်လို့ သတင်းမှာဖော်ပြထားပါတယ်။

အဲဒါကြောင့်  အဆိုပါပေါက်ကွဲပစ္ညည်းတွေ အားလုံးဖယ်ရှားပြီးသည်အထိ ကျောင်းတွေပိတ်ဖို့ သူက အမိန့်ထုတ်ပြန်ခဲ့တာ ဖြစ်ပါတယ်။

မိုင်းလုပ်ငန်းအမှတ်(၅)တပ်က အဲဒီဗုံးတွေဟာ ပေါက်ကွဲနိုင်ပြီး အသက်အန္တရာယ်ရှိနေတယ်။ပြီးတော့ တွေ့ရတာကလည်း စစ်သလင်းလိုပဲလို့ ပြောပါတယ်။ အဲဒါတွေအားလုံးဘေးကင်းရာ ဖယ်ထုတ်ဖို့ အချိန်နှစ်ရက်ခန့်ကြာမယ်လို့သိရပါတယ်။

Source: Khmer Times

Published 13 August 2023

လူသားတွေရဲ့ မျက်နှာရုပ်ရည်တွေက ပိုပိုပြီးနိမ့်ကျလာကာ ဒါတွေဟာ ယနေ့ခေတ် စားသောက်ပုံစံတွေ၊ အိပ်စက်ခြင်းပုံစံတွေ၊ အလင်းရောင်ထိတွေ့ခြင်းတွေကြောင့်လို့ ဩစတြေးလျမနုဿပညာရှင်တစ်ဦးက အဆိုပြုလိုက်ပါတယ်။

မျိုးဆက်တစ်ခုပြီးတစ်ခု လူတွေဟာ ပိုပြီးဆွဲဆောင်မှု နည်းလာကာ ရုပ်ဆိုးလာရတဲ့ အကြောင်းအရင်းက အသက်အရွယ် ကြီးရင့်တာနဲ့မဆိုင်ဘူးလို့ ပလတ်စတစ်ခွဲစိတ်ဆရာဝန်နဲ့ မျက်နှာခွဲစိတ်ကျွမ်းကျင်ပညာရှင်တို့က ရှင်းပြခဲ့ပါတယ်။

ဒီလိုဖြစ်ရတဲ့ အကြောင်းအရင်းတွေက ယနေ့ခေတ် အစားအသောက်တွေနဲ့ အိပ်စက်မှုပုံစံများကြောင့် ဖြစ်တယ်လို့ ခွဲစိတ်ဆရာဝန်များက ဆိုပါတယ်။

သီအိုရီအရ အပေါ်မေးရိုးနဲ့ အောက်မေးရိုးတို့အပေါ် သက်ရောက်နေတဲ့ အားကို မူတည်နေပြီး ဒါကပဲ မျက်နှာတစ်ခု ဆွဲဆောင်မှုရှိ/မရှိ ဆုံးဖြတ်သွားတာ ဖြစ်ပါတယ်။

မိန်းကလေးငယ်တစ်ဦးရဲ့ နှာခေါင်းတွင်းပိုင်းမှာ ရောဂါကူးစက်မှုကြောင့် အောက်မေးရိုးဖွံ့ဖြိုးမှုကို ထိခိုက်နေပြီး ပါးစပ်က အသက်ရှူနေရကာ ကောင်းစွာဖွံ့ဖြိုးရန် လုံလောက်စွာ မပိတ်နိုင်ပါဘူး။

အနောက်နိုင်ငံတွေက ၇၀ ရာခိုင်နှုန်းလောက်မှာ သွားပုံစံမညီခြင်းလိုမျိုး ခံစားနေရကာ မျက်နှာတွေ ဆွဲဆောင်မှုမရှိလာရတဲ့ အကြောင်းအရင်း ဖြစ်နေပါတယ်။

တစ်ကမ္ဘာလုံးက လူဦးရေ ၂၂ ရာခိုင်နှုန်းဟာ သွားမညီညာခြင်းအဆင့် ၂ ခံစားနေရကြောင်း ကိုးလ်ဂိတ်ကုမ္ပဏီက ဖော်ပြခဲ့ပါတယ်။

လူတွေ ပါးစပ်ကိုအသုံးပြုပုံ အစာထည့်ပုံတို့က မေးရိုးဖွံ့ဖြိုးမှုကို သက်ရောက်နေတယ်လို့ မှတ်ချက်ပြုခဲ့ပါတယ်။

လူတွေက မိုဘိုင်းဖုန်းကင်မရာနဲ့ ရိုက်တာထက်စာရင် ဖလင်ကင်မရာနဲ့ ရိုက်တဲ့အခါ ပိုပြီးကြည့်ကောင်းပြီး မျက်နှာကို ပိုမိုသေသပ်စေတယ်လို့ လူတစ်ဦးက တုန့်ပြန်ရေးသားထားပါတယ်။

လူတွေက ပိုပြီးရုပ်ဆိုးလာတာမဟုတ်ဘဲ ပုံအဟောင်းတွေကို သေချာလုံလောက်စွာ မမြင်ရတာကြောင့်ပါလို့ ယူကျူ့ဘ်အသုံးပြုသူတစ်ဦးက ဖော်ပြသွားပါတယ်။

နောက်တစ်ဦးကတော့ အရင်ကလေးတွေရဲ့ ပုံတွေက ယနေ့ခေတ်ထက် ပိုပြီး ကြီးရင့်တဲ့ပုံပေါက်နေကြောင်း၊ ကလေးမျက်နှာဆိုပေမယ့် ဆံပင်ပုံစံက ခေတ်နောက်ကျနေတာဖြစ်ကြောင်း ပြောပြခဲ့ပါတယ်။

နောက်ထပ်တစ်ဦးကတော့ အသားတွေ၊ ဟင်းသီးဟင်းရွက်တွေ၊ အသီးလိုက် စားသုံးတာတွေက မေးရိုးကိုသန်မာစေတယ်လို့ ဆိုပါတယ်။
Source: The Jerusalem Post
#World_Science
#YMG #Yangon_Times

Published_ 13 August 2023

လီဗာပူးအသင်းသည်ဘရိုက်တန် ကွင်းလယ်လူ ကိုင်စီဒို အားဗြိတိသျှစံချိန်တင်ပြောင်းရွှေ့ကြေးပေါင်သဖြင့် ခေါ်ယူနိုင်ခဲ့ကြောင်း သိရသည်။

လီဗာပူးသည်ဆောက်သမ်တန်ကွင်းလယ်လူ လာဗီယာအား ခေါ်ယူရန်ကြိုးပမ်းလျက်ရှိရာမှ သြဂုတ် ၁၀ ရက်ကကိုင်စီဒိုအား ကမ်းလှမ်းခဲ့ခြင်းဖြစ်ပြီး ယခုအခါအသင်း ၂သင်း အကြားသဘောတူညီမှုရရှိ သွားပြီဖြစ်သည်။

ကိုင်စီဒိုအား ချယ်လ်ဆီးက နွေရာသီ တလျှောက်လုံး ခေါ်ယူရန်ကြိုးပမ်းခဲ့ပြီး ဘရိုက်တန်က ပေါင်သန်း၁၀၀ သတ်မှတ်ထားပြီး ချယ်လ်ဆီးကကမ်းလှမ်းမှုများအကြိမ်ကြိမ် ပြုလုပ်နေချိန်တွင်လီဗာပူးက ယခုကဲ့သို့ ကမ်းလှမ်းမှုကို ဘရိုက်တန်က လက်ခံခဲ့ခြင်းဖြစ်သည်။

ယခုပြောင်းရွှေ့ကြေးမှာ ချယ်လ်ဆီးသို့ ဇန်နဝါရီလကပြောင်းရွှေ့လာသော ကွင်းလယ်လူ အန်ဇိုဖာနန်ဒက်ကို ခေါ်ယူခဲ့သည့် ပြောင်းရွှေ့ကြေးပေါင် ၁၀၆ သန်းကို ကျော်လွန်၍စံချိန်သစ် ဖြစ်လာခဲ့သည်။

ကိုင်စီဒို သည် မာဆေးဆိုဒ်သို့သွားရောက်၍ ဆေးစစ်မှုခံယူမည်ဖြစ်ပြီး ယခုတစ်ပတ် ယှဉ်ပြိုင်ကစားမည့် ချယ်လ်ဆီးနှင့် လီဗာပူးတို့၏ ပရီးမီးယားလိဂ် အဖွင့်ပွဲဝင် မတိုင်မီ အသင်းနှင့်အပြီးသတ်လက်မှတ်ရေးထိုးဖွယ်ရှိနေသည်။

ယခု စံချိန်မှာ လီဗာပူးအတွက်လည်း ကလပ်စံချိန်ဖြစ်ခဲ့ပြီး
ယခင်စံချိန်ဖြစ်သည့် နောက်ခံလူဗန်ဒိုက်၏ ပြောင်းရွှေ့ကြေး ပေါင်း၇၅သန်းကို ကျော်ဖြတ်နိုင်ခဲ့သည်။

ကိုင်စီဒိုသည် လီဗာပူးကွင်းလယ်တွင်ယခုရာသီတွင်ပြောင်းရွှေ့လာခဲ့သည့်ဆဘို့ ဇာလိုင်၊ ဘရိုက်တန်အသင်းဖော်ဟောင်းမက်အယ်လစ်စတာတို့ နှင့် အတူယှဉ်ပြိုင်ကစားရမည်ဖြစ်သည်။

ထပ်မံရရှိသော သတင်းများအရ ကိုင်စီဒိုကို ချယ်လ်ဆီးအသင်းကပေါင် ၁၁၅သန်းအထိ တိုးမြှင့် ကမ်းလှမ်းနေ၍ ကိုင်စီဒို၏ အပြောင်းအရွှေ့မှာ အပြီးမသတ်နိုင်သေးကြောင်း သိရသည်။
ref;fotmob.
#World_Sport
#YMG #Yangon_Times