ခရီးသည်နဲ့ ကုန်စည်သယ်ယူပို့ဆောင်ရေး လွယ်ကူလျင်မြန်ချောမွေ့စွာသွားလာနိုင်ရန် ပဲခူး - မော်လမြိုင် ရထားလမ်းပိုင်း အဆင့်မြှင့်တင်မွမ်းမံဆောင်ရွက်နေတယ်လို့ မြန်မာ့မီးရထားကနေသိရပါတယ်။

#Local_News
Published 28 March 2026
#ပဲခူး_မော်လမြိုင် #ရထားလမ်း
#YMG/NN #Yangon_Times

YBS ယာဉ်တွေအနေနဲ့ သတ်မှတ်လမ်းကြောင်းအတိုင်း ပြေးဆွဲ ခြင်းမရှိဘဲ ကြို/ပို့ ယာဉ်အဖြစ် လုပ်ကိုင်နေတာကိုစစ်ဆေးတွေ့ရှိပါက CNG ပိတ်သိမ်းသွားမယ်လို့ ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ (YRTC) မှ သိရပါတယ်။

#Local_News
Published 28 March 2026
#YBS #CNG
#YMG/SW #Yangon_Times

နေပြည်တော်-မတ် ၂၈၊၂၀၂၆

အနာဂတ်ကာလတွင် ကျရောက်လာနိုင်သည့် သဘာဝဘေးအန္တရာယ်များကို ရင်ဆိုင်ကျော်လွှားနိုင်ရန်  အတွက် အဆောက်အအုံနှင့် လမ်းတံတားများ တည်ဆောက်ရာတွင် Building Codes အပါအဝင် သတ်မှတ်စံချိန်စံညွှန်းများနှင့်အညီ ကြံ့ကြံ့ခံနိုင်သော အနာဂတ်တည်ဆောက်ရေးကို မဖြစ်မနေ ထည့်  သွင်းစဉ်းစား အကောင်အထည်ဖော်ကြရန် ပြည်ထောင်စုသမ္မတမြန်မာနိုင်ငံတော် ယာယီသမ္မတ၊ နိုင်ငံ  တော်လုံခြုံရေးနှင့် အေးချမ်းသာယာရေးကော်မရှင် ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ယနေ့ တိုက် တွန်းပြောကြားလိုက်သည်။

ယနေ့ မတ်လ ၂၈ ရက်တွင် နေပြည်တော်ရှိ အပြည်ပြည်ဆိုင်ရာ ကွန်ဗင်းရှင်းဗဟိုဌာန (MICC-1) ၌ ကျင်းပပြုလုပ်သော ပမာဏ ၇ ဒသမ ၇ မဂ္ဂနီကျူရှိ မန္တလေးငလျင်ကြီး လှုပ်ခတ်မှု (၁) နှစ်ပြည့် အောက်  မေ့ဖွယ်နှင့် ပြန်လည်ထူထောင်ရေး အထိမ်းအမှတ် အခမ်းအနား မိန့်ခွန်းတွင် နိုင်ငံတော်အကြီးအကဲက အထက်ပါအတိုင်း  ပြောကြားခဲ့ခြင်းဖြစ်သည်။

လွန်ခဲ့သော တစ်နှစ်၊ ၂၀၂၅ ခုနှစ် မတ်လ ၂၈ ရက်က ဖြစ်ပွားခဲ့သည့် အလွန်အင်အားပြင်းထန်သော မန္တလေးငလျင်ကြီးကြောင့် နေပြည်တော်အပါအဝင် တိုင်းဒေသကြီးနှင့် ပြည်နယ် (၁၀) ခုတွင် လူပေါင်း ၃,၈၁၈ ဦး အသက်ဆုံးရှုံး  ခဲ့ရပြီး၊ ထိုသို့ သေဆုံးရမှုအများစုမှာ အင်ဂျင်နီယာပိုင်းဆိုင်ရာ သတ်မှတ်ချက်  များ၊ ဆောက်လုပ်ရေး စည်း မျဉ်းစည်းကမ်းများနှင့် မညီညွတ်ဘဲ ဆောက်လုပ်ထားသော အဆောက်အအုံ   များ ပြိုကျပျက်စီးမှုကြောင့်ဖြစ်ကြောင်း စစ်ဆေးတွေ့ရှိရသည်ဟု ယာယီသမ္မတက ထောက်ပြခဲ့သည်။

ထို့ကြောင့် နိုင်ငံတော်၏ တည်ဆောက်ရေးကဏ္ဍများတွင် ဦးဆောင်နေကြသော ဌာနဆိုင်ရာများ၊ ပုဂ္ဂလိကကဏ္ဍမှ အင်ဂျင်နီယာများ၊ ဗိသုကာပညာရှင်များနှင့် ရင်းနှီးမြှုပ်နှံသူ Developer များအနေဖြင့် မိမိတို့ နိုင်ငံသားများအတွက် ဘေးအန္တရာယ်ကင်းရှင်းပြီး စိတ်ချလုံခြုံသော အခြေခံအဆောက်အအုံများ     ကို စနစ်တကျ ဖန်တီးတည်ဆောက်ပေးကြရန် ဗိုလ်ချုပ်မှူးကြီးက အလေးအနက် မှာကြားခဲ့သည်။

နိုင်ငံတော်အတွက် စုစုပေါင်း ပျက်စီးဆုံးရှုံးမှုတန်ဖိုး ကျပ် ၇,၉၇၉ ဘီလီယံကျော်ရှိခဲ့ပြီး ဘေးသင့်လူဦးရေ ၄ သိန်း ၂ သောင်းကျော် (၄၂၄,၀၆၃ ဦး) ရှိခဲ့သည့် အဆိုပါ ငလျင်ဘေးအရေးပေါ်အခြေအနေတွင် နိုင်ငံ   တကာမှအကူအညီများစွာရရှိခဲ့ကြောင်းလည်း သိရသည်။ တရုတ်၊ ရုရှား၊ အိန္ဒိယ အစရှိသော နိုင်ငံပေါင်း ၂၅ နိုင်ငံမှ ရှာဖွေကယ်ဆယ်ရေးဝန်ထမ်း ၁,၉၃၅ ဦးနှင့် ကျန်းမာရေးစောင့်ရှောက်မှု ပညာရှင် ၈၄၅ ဦးတို့ လာရောက်ကူညီခဲ့ကြပြီး ပြည်တွင်းပြည်ပမှ ကူညီကယ်ဆယ်ရေးအဖွဲ့များ၏ သက်စွန့်စံဖျား ပူးပေါင်း ဆောင်ရွက်မှုကြောင့် လူပေါင်း ၆၅၃ ဦးကို အသက်ရှင်လျက် ကယ်ဆယ်နိုင်ခဲ့ကြောင်း ဗိုလ်ချုပ်မှူးကြီးက က အသိအမှတ်ပြု ကျေးဇူးတင်စကား ပြောသည်။

ပြန်လည်ထူထောင်ရေး လုပ်ငန်းစဉ်များနှင့် ပတ်သက်၍ နိုင်ငံတော်အနေဖြင့် ငလျင်ကြောင့် သေဆုံးသူ  တစ်ဦးလျှင် ကျပ် ၁၀ သိန်းနှုန်းဖြင့် ကျန်ရစ်သူမိသားစုများကို ထောက်ပံ့ပေးခဲ့သည့်အပြင်၊ ထိခိုက်ဒဏ်ရာ  ရသူများနှင့် အိမ်ရာပျက်စီးမှုများအတွက် ငွေကျပ် ဘီလီယံ ၁,၆၀၀ ကျော် ထောက်ပံ့ပေးခဲ့ကြောင်း သိရသည်။ ထို့ပြင် အခြေခံအဆောက်အအုံများ၊ ဘာသာရေးကျောင်းများ၊ သာသနာရေးနှင့် ယဉ်ကျေးမှု အမွေအနှစ်များ ပြန်လည်တည်ဆောက်ရန် အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုရန်ပုံငွေမှ ငွေကျပ် ၃,၄၂၁ ဒသမ ၉၇၅ ဘီလီယံကျော်ကို ထုတ်ပေးခဲ့ပြီး ပြန်လည်ထူထောင်ရေး လုပ်ငန်းများမှာ လက်ရှိတွင် ၈၄ ရာခိုင်နှုန်းခန့် ပြီးစီးနေပြီဖြစ်ကြောင်း ဗိုလ်ချုပ်မှူးကြီးက ဆက်လက် ရှင်းလင်းပြောကြား   သည်။

မကြာမီ နိုင်ငံ့တာဝန်လွှဲပြောင်းရယူမည့် အစိုးရအသစ်အနေဖြင့် လက်ရှိ ဆောင်ရွက်လျက် ရှိသည့် ငလျင်ဘေး ပြန်လည်ထူထောင်ရေး လုပ်ငန်းတွေကို အရှိန်အဟုန်နှင့် ဆက်လက်ဆောင်ရွက်သွားနိုင်မည်ဟု ယုံကြည်ကြောင်းလည်း ဗိုလ်ချုပ်မှူးကြီးကပြောသည်။

မြန်မာနိုင်ငံသည် ကမ္ဘာလုံးဆိုင်ရာ ဘေးဖြစ်နိုင်ခြေနှင့် ထိခိုက်ဆုံးရှုံးနိုင်ခြေ ညွှန်းကိန်း ၂၀၂၅ (World Risk Index) အရ အဆင့် (၆) နေရာတွင် ရှိနေသဖြင့် သဘာဝဘေး စီမံခန့်ခွဲမှုလုပ်ငန်းများကို ကဏ္ဍတိုင်းတွင် မဖြစ်မနေ ထည့်သွင်းရန် အရေးတကြီး လိုအပ်နေပြီဖြစ်ကြောင်း သူက သတိပေးခဲ့သည်။

"We are stronger, We are together" ဟူသော စိတ်ဓာတ်ခွန်အားဖြင့် ကိုဗစ်-၁၉၊ မိုခါနှင့် ရာဂီမုန်တိုင်း  ဘေးများကို စည်းလုံးညီညွတ်စွာ ကျော်ဖြတ်နိုင်ခဲ့သကဲ့သို့ အနာဂတ်ကာလ နိုင်ငံ၏ မျက်နှာစာသစ် ဖွင့်လှစ်မှုခရီးတွင်လည်း နိုင်ငံတော်နှင့် ပြည်သူ ကြည်ဖြူစွာ လက်တွဲ၍ ကြံ့ကြံ့ခံနိုင်သော ရေရှည်ဖွံ့ဖြိုး  တိုးတက်မည့် နိုင်ငံတော်ကြီးကို ပူးပေါင်းတည်ဆောက်သွားကြရန် ဗိုလ်ချုပ်မှူးကြီးက တိုက်တွန်းခဲ့ပြီး ငလျင်ဘေးကြောင့် ကွယ်လွန်ဆုံးပါးသွားသူများအတွက် ဆုတောင်းမေတ္တာပို့သပေးခဲ့သည်။

အဆိုပါအခမ်းအနားသို့ ဗိုလ်ချုပ်မှူးကြီးနှင့်အတူ ကော်မရှင်ဒုတိယဥက္ကဋ္ဌ ဒုတိယဗိုလ်ချုပ်မှူးကြီးစိုးဝင်း နှင့်ကော်မရှင်အဖွဲ့ဝင်များတက်ရောက်ခဲ့ကြပြီး ငလျင်ဘေးကူညီခဲ့ကြသည့် ပြည်ပနိုင်ငံများမှ သံအမတ် ကြီးများနှင့် သံရုံးတာဝန်ခံများ၊ ပြည်တွင်းပြည်ပအဖွဲ့အစည်းများ၊ အလှူရှင်များနှင့်ကူညီခဲ့ကြသူများ စုံညီစွာတက်ရောက်ခဲ့ကြသည်။

#ymg/knl

#Local_News
Published 28 March 2026

▪️ ဧပြီလအတွင်း ဧရာဝတီအပါအဝင် မြစ်ရေများလက်ရှိ ရေမှတ်များထက် အနည်းဆုံးပေဝက် ခန့်မှ အများဆုံး ၇ပေ အထိ မြင့်တက်နိုင်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာန၏ ဧပြီလ လပတ်အတွက် မိုးလေ၀သနှင့် ဇလဗေဒခန့်မှန်းချက်အရ သိရသည်။

▪️ ဧရာဝတီမြစ်ရေသည် မြစ်ကြီးနားမြို့၊ ဗန်းမော်မြို့၊ ရွှေကူမြို့၊ ကသာမြို့၊ သပိတ်ကျင်းမြို့၊ မန္တလေးမြို့တို့တွင် ၃ ပေမှ ၅ ပေခန့် လက်ရှိရေမှတ်များအထက်မြင့်တက်လာနိုင်ကြောင်းသိရသည်။

▪️ ချင်းတွင်းမြစ်ရေသည် ခန္တီးမြို့၊ ဟုမ္မလင်းမြို့၊ ဖောင်းပြင်မြို့၊ မော်လိုက်မြို့၊ ကလေးဝမြို့၊ မင်းကင်းမြို့၊ ကနီမြို့နှင့် မုံရွာမြို့တို့တွင် ၃ ပေမှ ၅ ပေခန့် လက်ရှိရေမှတ်များအထက် မြင့်တက် လာနိုင်ပြီး မြစ်သာမြစ်ရေသည် ကလေးမြို့တွင် ပေဝက်ခန့်၊ ဒုဋ္ဌဝတီမြစ်ရေသည် သီပေါမြို့တွင် ပေဝက်ခန့်၊ ရွှေစာရံနှင့် မြစ်ငယ်မြို့တို့တွင် ၃ ပေခန့်စီ၊ စစ်တောင်းမြစ်ရေသည် တောင်ငူမြို့တွင် ၂ ပေခန့်နှင့် မဒေါက်မြို့တွင် ပေဝက်ခန့်၊ ရွှေကျင်မြစ်ရေသည် ရွှေကျင်မြို့တွင် ပေဝက်ခန့်၊ ပဲခူးမြစ်ရေသည် ဇောင်းတူမြို့နှင့် ပဲခူးမြို့တို့တွင် ပေဝက်မှ ၁ ပေခွဲခန့်၊ သံလွင်မြစ်ရေသည် ဘားအံမြို့တွင် ၂ ပေခန့်၊ သောင်ရင်းမြစ်ရေသည် မြဝတီမြို့တွင် ပေဝက်ခန့်၊ ငဝန်မြစ်ရေသည် ငါးသိုင်းချောင်းမြို့၊ သာပေါင်း မြို့နှင့် ပုသိမ်မြို့တို့တွင် ပေဝက်မှ ၁ ပေခွဲခန့်၊ တိုးမြစ်ရေသည် မအူပင်မြို့တွင် ၃ ပေခန့်နှင့် ဘီးလင်း မြစ်ရေသည် ဘီးလင်းမြို့တွင် ပေဝက်ခန့် လက်ရှိရေမှတ်များအထက် မြင့်တက်လာနိုင်ကြောင်းသိရသည်။

#YMG/NN #Yangon_Times

#Local_News
Published 28 March 2026

■ မန္တလေးတိုင်းဒေသကြီး၊ မြင်းခြံမြို့နယ်၊ အမှတ်(၆)ရပ်ကွက်၌ ယနေ့မနက်အစောပိုင်းတွင် မီးလောင်မှုတစ်ခုဖြစ်ပွားခဲ့ကြောင်းသိရသည်။

■ မတ်လ ၂၈ ရက်နေ့၊ မနက်၂ နာရီ၁၈မိနစ် အချိန်ခန့်က မန္တလေးတိုင်းဒေသကြီး၊ မြင်းခြံမြို့နယ်၊ အမှတ်(၆)ရပ်ကွက်၊ နယ်မြေ(၁၃)တွင် မီးလောင်မှုဖြစ်ပွားခဲ့ကြောင်း သိရသည်။

■ အဆိုပါ သတင်းရရှိသဖြင့် မြင်းခြံခရိုင်မီးသတ်စခန်းမှ မီးငြှိမ်းသတ်ယာဉ်(၃)စီး၊ ရေသယ်ယာဉ်(၃)စီး၊ မြင်းခြံမြို့နယ်မီးသတ်စခန်းမှ မီးငြှိမ်းသတ်ယာဉ်(၂)စီး၊ ရေသယ်ယာဉ်(၂)စီး၊ မြင်းခြံနယ်မြေမီးသတ်စခန်းမှ မီးငြှိမ်းသတ်ယာဉ်(၁)စီး၊ ရေသယ်ယာဉ်(၁)စီး၊စက်မှုဇုန်အရန်မီးသတ်စခန်းမှ မီးငြှိမ်းသတ်ယာဉ်(၁)စီး၊ OK Group မှ ရေသယ်ယဉ်(၁)စီး၊ နတ်ကြီးပင်ပရဟိတအသင်းမှ ရသယ်ယာဉ်(၁)စီး၊ အဖြူရောင်လက်များပရဟိတအသင်းမှ ရေသယ်ယာဉ် (၁)စီး၊ သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များဖြင့် ထွက်ခွာငြှိမ်းသတ်ခဲ့ရာ ၂နာရီ ၃၆မိနစ် အချိန် မီးငြိမ်းခဲ့ကြောင်းသိရသည်။

■ မီးလောင်မှု ဖြစ်စဉ်နှင့်ပျက်စီးဆုံးရှုံးမှု တန်ဖိုးများနှင့်ပတ်သက်၍ ဆက်လက်စုံစမ်းနေကြောင်း သိရသည်။

#YMG/NN #Yangon_Times

#Local_News
Published 28 March 2026

■ ယခင်အစိုးရများလက် ထက် ငြိမ်းချမ်းရေး ညီလာခံရလဒ်များမှ စုစည်းထားသည့် ပြည်ထောင်စုသဘော တူညီချက်များကို ပြည်ထောင်စုလွှတ်တော်၌စုစည်းတင်ပြပြီး ပြင်ဆင်နိုင်ရေး ဆောင်ရွက်သွားမည်ဟု နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး သတိုးမဟာသရေစည်သူ သတိုးသီရိသုဓမ္မ မင်းအောင်လှိုင် က ပြောသည်။

■ (၈၁) နှစ်မြောက် တပ်မတော်နေ့စစ်ရေးပြအခမ်းအနားကို မတ်လ ၂၇ ရက် ညပိုင်းတွင် နေပြည်တော်စစ်ရေးပြကွင်း၌ ကျင်းပပြုလုပ်စဉ်တက်ရောက်ပြောကြားခဲ့သည့် မိန့်ခွန်းအတွင်း အထက်ပါအတိုင်းထည့်သွင်းပြောကြားခဲ့ခြင်း ဖြစ်သည်။

■ “တပ်မတော်အနေနဲ့ ၂၀၁၈ ခုနှစ်၊ ဒီဇင်ဘာလ ၂၁ ရက်မှာ ပစ်ခတ်တိုက်ခိုက်မှုရပ်စဲရေးနှင့် ထာဝရငြိမ်းချမ်းရေးကို စတင်ထုတ်ပြန်ခဲ့ပြီး တစ်ဖက်သတ်အပစ်အခတ်ရပ်စဲမှုတွေကို လိုက်လျောဆောင်ရွက်ပေးခဲ့တယ်။ ၂၀၂၂ ခုနှစ်၊ ဧပြီလ ၂၂ ရက်မှာ“ငြိမ်းချမ်းရေးကို လက်တွေ့ကျကျ ထိထိရောက်ရောက် အကောင်အထည်ဖော်နိုင်ရန်အတွက် တိုင်းရင်းသားလက်နက်ကိုင်အဖွဲ့အားလုံးကို မိမိကိုယ်တိုင်တွေ့ဆုံဆွေးနွေးမှုပြုလုပ်သွားမယ်”ဆိုတဲ့ ငြိမ်းချမ်းရေးမိန့်ခွန်းနှင့်အတူ တိုင်းရင်းသားလက်နက်ကိုင် ခေါင်းဆောင်များနဲ့ကိုယ်တိုင်ကိုယ်ကျ ဆွေးနွေးမှုတွေ ပြုလုပ်နိုင်ခဲ့တယ်။

■ တွေ့ဆုံဆွေးနွေးမှုများမှ တစ်ဆင့်ဖွဲ့စည်းပုံအခြေခံဥပဒေ(၂၀၀၈ ခုနှစ်)ကို ပြင်ဆင်ဖြည့်စွက် ရန်အတွက် သဘောတူညီချက် ၄၃ ချက်ကို လက်မှတ်ရေးထိုးအတည်ပြုနိုင်ခဲ့တဲ့အပြင် ယခင်အစိုးရများလက်ထက်ငြိမ်းချမ်းရေး ညီလာခံရလဒ်များမှ စုစည်းထားတဲ့ ပြည်ထောင်စုသဘောတူညီချက် (Union Accord) များကို ပြည်ထောင်စုလွှတ်တော်မှာ စုစည်းတင်ပြပြီး ပြင်ဆင်နိုင်ရေးဆောင်ရွက်သွားမှာဖြစ်ကြောင်းပြောကြားလိုတယ်”ဟု ယင်းက ပြောသည်။

■ ယင်းအပြင် မြန်မာနိုင်ငံအနေဖြင့် ဖက်ဒရယ်စနစ်ကို ဖော်ဆောင်ကျင့်သုံးရာတွင် ဖြတ်သန်းခဲ့ရသော သမိုင်းအဆက်ဆက်၏ အတွေ့အကြုံများအရ နိုင်ငံနှင့်ကိုက်ညီ၍ ဒေသကိုအခြေခံသော ဖက်ဒရယ်စနစ်ကိုကျင့်သုံးသွားမည်ဖြစ်ကြောင်းလည်း ၎င်းကပြောသည်။

■ ထို့အပြင် အမျိုးသားကာကွယ်ရေးနှင့် လုံခြုံရေးကောင်စီအနေဖြင့် ခိုင်မာသည့် အစိုးရတစ်ရပ် ပေါ်ပေါက်ပြီး နိုင်ငံရေးခရီးလမ်းတွင် ခိုင်ခိုင်မာမာလျှောက်လှမ်းနိုင်သည်ထိ ဆောင်ရွက်ပေးသွားမည်ဖြစ်ပြီး တပ်မတော်အနေဖြင့်လည်း နိုင်ငံ့အရေးအတွက် အမြဲအသင့်ရှိနေမည်ဟုလည်း ပြောကြားခဲ့ကြောင်း သိရသည်။

■ အဆိုပါအခမ်းအနားတွင် တပ်မတော်ကာကွယ်ရေးဦးစီးချုပ်က တပ်တွင်းစည်းလုံး ညီညွတ်ရေးကို ပိုမိုကျစ်လျစ်ခိုင်မာအောင် တည်ဆောက်သွားကြရန်ပြောကြားခဲ့ပြီး ပြည်သူ့လုံခြုံရေးစနစ်ရာနှုန်းပြည့် လွှမ်းခြုံနိုင်ရေး ပြည်သူတစ်ဦးချင်းစီ လုံခြုံရေးအသိ၊ လုံခြုံရေးသတိရှိနေရန်လိုကြောင်းလည်း ပြောကြားခဲ့ကြောင်းသိရသည်။

■ အလားတူ နိုင်ငံတွင်း ဖြစ်ပေါ်နေသည့် အကြမ်းဖက်ဖြစ်စဉ်များကို တားဆီးနှိမ်နင်းနိုင်ရန် မြို့နယ်၊ ရပ်ကွက်၊ ကျေးရွာများအလိုက် ပြည်သူ့ကာကွယ်ရေးအဖွဲ့များကို စနစ်တကျလေ့ကျင့်ဖွဲ့စည်းပြီး ပြည်သူ့လုံခြုံရေး (People Security) လုပ်ငန်းစဉ်တွေကို အရှိန်အဟုန်ဖြင့် ဆောင်ရွက်လျက်ရှိကြောင်းလည်း ပြောကြားခဲ့ကြောင်းသိရသည်။

#YMG/PP #Yangon_Times