#DailyNews
Published _ 18 November 2022

၁။ ပြည်တွင်းသကြားလက်ကျန်များနေ၍ ကြံရာသီစတင်ချိန် သကြားဈေးကျဆင်းနိုင်

၂။ မရှိမဖြစ်လိုသူများသာဝယ်ယူနိုင်သဖြင့် မီးစက်ဈေးကွက်အနည်းငယ်သာတက်

၃။ ဒီဇင်ဘာလတွင် မိုင်းများမှ ပစ္စည်းအသစ်များထွက်မည်ဖြစ်သည့်အတွက် ရွှေပြတ်လပ်မှုမရှိဟုဆို

၄။ ကမ္ဘာ့ဖလားပြိုင်ပွဲမှတဆင့် ကာတာတို့၏ ရိုးရာအမဲလိုက်ငှက်အားကစားထွန်းကားစေရန်မျှော်မှန်း ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

https://fb.watch/gS_PjYxzf0/

#Local_News
Published_18 November 2022

ယခုဘဏ္ဍာနှစ်ရဲ့ ဧပြီလ ၁ ရက်ကနေ နိုဝင်ဘာလ ၄ ရက်နေ့အထိ ပြည်ပကို ပဲတန်ချိန် ၉ သိန်း ၃ သောင်းကျော်တင်ပို့ထားပြီး အမေရိကန်ဒေါ်လာ ၇၃၆ ဒသမ ၂၀ သန်းရရှိထားတယ်လို့ စီးပွားရေးနဲ့ ကူးသန်းရောင်းဝယ်ရေး ဝန်ကြီးဌာနရဲ့ စာရင်းတွေအရ သိရပါတယ်။

#Yangon_Media_Group

#LocalNews
Published _ 18 november 2022

ရန်ကုန်တိုင်းဒေသကြီး၊ပုဇွန်တောင်မြို့နယ်၊ ရေကျော် City Mart အနီး ဆေးလိပ် အစားထိုးသုံးစက်ရောင်းချသည့် ဆိုင်တစ်ဆိုင်ကို ယနေ့ နိုဝင်ဘာလ ၁၈ရက် နံနက်ပိုင်းက အုပ်စုဖွဲ့၍ ဖောက်ထွင်းမှုကို ခံခဲ့ရကြောင်း သိရသည်။

ယနေ့ နံနက် ၃ နာရီ ၅၃ မိနစ်ခန့်က House Of Flavors အမည်ရှိ အဆိုပါဆိုင်ကို လူ ၆ ဦးက ဖောက်ထွင်း ဝင်ရောက်ခဲ့ခြင်းဖြစ်ပြီး ဆိုင်အတွင်း တန်ဖိုးကြီးပစ္စည်းများကို ယူဆောင်သွားကြောင်း သိရသည်။

အဆိုပါဆိုင်တွင် ညအိပ်စောင့်သော ဝန်ထမ်းတစ်ဦးအား အိပ်ငွေ့ချကာ ဖောက်ထွင်းဝင်ရောက်ခြင်းဖြစ်ကြောင်း၊ ဆိုင်မှတန်ဖိုးကြီးသည့် ပစ္စည်းများကို သယ်ဆောင်သွားကြကြောင်းနှင့် လူကိုမူ အန္တရာယ်မပေးခဲ့ကြောင်း သိရှိရသည်။

ကျူးလွန်သူများမှာ အမျိုးသား ၄ ဦးနှင့် အမျိုးသမီးနှစ်ယောက်ဖြစ်ပြီး ဆိုင်နောက်ဖေးမှန် တံခါးရှိ သံပန်းကို ဖျက်ဆီးကာ ဆိုင်အတွင်းမှ တန်ဖိုးကြီးပစ္စည်းများ ကာလတန်ဖိုး သိန်း (၇၀) ကျော်ကို ယူဆောင်သွားခဲ့ကြောင်း အဆိုပါ ဖောက်ထွင်းခံရသည့် လုပ်ငန်းလုပ်သူများ၏ ပြောကြားချက်အရ သိရသည်။

လက်ရှိအချိန်တွင် ဖောက်ထွင်းခံရမှုကြောင့်ပုဇွန်တောင်မြို့မရဲစခန်း၌ အမှုဖွင့်တိုင်ကြားထားကြောင်းလည်း သိရသည်။

#ymg/NN
#Yangon_Media_Group

#Local_New
Published_18 November 2022

ပြည်တွင်းသို့ လျှပ်စစ်ကားတင်သွင်းခွင့်အတွက် ကုမ္ပဏီ ၂၆ ခု လာရောက်လျှောက်ထားကြောင်း နစကပြန်ကြားရေးခေါင်းဆောင် ဗိုလ်ချုပ်ဇော်မင်းထွန်းကပြောသည်။

အဆိုပါ လျှောက်ထားသည့်ကုမ္ပဏီများကို ခွင့်ပြုထားခြင်းမရှိသေးဘဲ စိစစ်နေဆဲဖြစ်ကြောင်း ယနေ့ပြုလုပ်သည့်သတင်းစာရှင်းလင်းပွဲတွင် ယင်းက အထင်ပါအတိုင်း ထည့်သွင်းပြောကြားခဲ့ခြင်းဖြစ်သည်။

ယခုအခါ ပြည်ပက Completely Built Up-CBU စနစ်၊ Completely Knocked Down-CKD စနစ်၊ Semi-Knocked Down-SKD စနစ်တို့နှင့် တင်သွင်းသည့် လျှပ်စစ်သုံးယာဉ်များကို အခွန်မကောက်ရန် ဆုံးဖြတ်ခဲ့ပြီး ဖြစ်သည်။

လျှပ်စစ်စွမ်းအားဝန်ကြီးဌာနဘက်မှ ရန်ကုန်-မန္တလေး အမြန်လမ်းမကြီးရဲ့ နေရာ(၅)ခုတွင် လျှပ်စစ်ကားများ အားသွင်းနိုင်မည့် အားသွင်းရုံ (၅) ခုကို ရှေ့ပြေးစီမံကိန်းအဖြစ် ဆောင်ရွက်သွားမည်ဖြစ်ပြီး အားသွင်းရုံ (၁) ခုမှာ EV (၅၀) စီး အားဖြည့်နိုင်မည်ဖြစ်ကြောင်း၊ အဆိုပါ အားသွင်းရုံ (၅)ခုကို ဇီးရိုးမိုင် အမှတ်(၃)လမ်းဆုံ၊ (၁၁၅)မိုင် ဖြူးယာဉ်ရပ်နားစခန်း၊ မိုင်တိုင် (၂၀၁/၂) နေပြည်တော်စီလမ်းဆုံ၊ မိုင်တိုင် (၂၈၄/၄) သီးကုန်းယာဉ်ရပ်နားစခန်းနှင့် မိုင်တိုင် (၃၅၂/၃) စကားအင်းလမ်းဆုံတိုတွင် တည်ဆောက်ရန် လျာထားကြောင်းလည်း သိရသည်။

photo-singtech
#ymg/sth
#Yangon_Media_Group

#Local_News
Published _ 18 November 2022

နေပြည်တော်တွင် လာရောက်ရင်းနှီးမြှုပ်နှံမည့် လုပ်ငန်းရှင်များအား ဝင်ငွေခွန် ၅နှစ် ကင်းလွတ်ခွင့်ပေးသွားမည်ဖြစ်ကြောင်း နစက သတင်းပြန်ကြားရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ယနေ့ နိုဝင်ဘာလ ၁၈ရက်တွင် နေပြည်တော်၌ ကျင်းပပြုလုပ်သည့် သတင်းစာရှင်းလင်းပွဲအတွင်း ပြောသည်။

"ရင်းနှီးမြှုပ်နှံမှုပြုမယ်ဆိုရင် လုပ်ငန်းစတင်ချိန်ကနေ ၅နှစ်အထိ ဝင်ငွေခွန်ကင်းလွတ်ခွင့် လျှောက်ထားခံစားနိုင်မှာဖြစ်ပြီး အခွန်ဆိုင်ရာ သက်သာခွင့်ပေးလျက် ရင်းနှီးမြှုပ်နှံမှုများ တိုးမြှင့်စေရေး ဖိတ်ခေါ်ဆောင်ရွက်လျက်ရှိပါတယ်"ဟု ၎င်းက ပြောသည်။

နေပြည်တော်သည် တရုတ်-မြန်မာ စီးပွားရေးစင်္ကြံလမ်း၊ မဟာမဲခေါင်ဒေသခွဲ စီးပွားရေး စင်္ကြန်လမ်းတွင် တည်ရှိနေသည့်အတွက် မဟာဗျူဟာကျပြီး ရေ၊ မြေ၊ ရာသီဥတုအခြေအနေကောင်းမွန်ကာ လျှပ်စစ်မီး၊ လမ်းတံတားနှင့် အခြေခံအဆောက်အအုံများ ပြည့်စုံသည့် နေရာတစ်ခုဖြစ်ကြောင်းလည်း ယင်းက ပြောသည်။

#ymg/NN
#Yangon_Media_Group

#Local_New
Published_18 November 2022

ဖမ်းဆီးထိန်းသိမ်းထားသည့် ပြည်ပနိုင်ငံသားများအား ပြန်လွှတ်သည့်ကိစ္စတွင် နိုင်ငံရေးအပေးအယူကြောင့် မဟုတ်ကြောင်း ယနေ့ နိုဝင်ဘာလ ၁၈ ရက်တွင် ပြုလုပ်သည့် ၂၁ ကြိမ်မြောက် သတင်းစာရှင်းလင်းပွဲအတွင်း ပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်း က ပြောသည်။

“နိုင်ငံရေးအပေးအယူအတွက် ဖမ်းထားတာမဟုတ်ဘူး။ လုပ်စရာလည်းအကြောင်းမရှိဘူး။ ဘာအပေးအယူမှ မမျှော်လင့်ထားဘူး။ ပြစ်မှုကျူးလွန်လို့ ဖမ်းထားခြင်းဖြစ်ပါတယ်။ ဆန္ဒပြပွဲတွေမှာ ဆိုင်းဘုတ်တွေကိုင်ပြီး ရှေ့ဆုံးကနေ ဆန္ဒပြတာ၊ လိုက်နာရမယ့် လဝက ဥပဒေတွေကို မလိုက်နာတာ ဒါကြောင့် ပြစ်မှုဆိုင်ရာဥပဒေအရ ဆောင်ရွက်ခြင်းဖြစ်ပါတယ်၊ဖမ်းထားသူတွေကို လွှတ်ပေးဖို့သက်ဆိုင်ရာနိုင်ငံတွေက တောင်းဆိုတာရှိတယ်။ ဂျပန်ဆိုရင် လွှတ်တော်အမတ်တစ်ယောက် ရောက်လာတုန်းက တောင်းဆိုခဲ့တယ်။ လဝက ဥပဒေ ကိစ္စဆိုရင် သူတို့လည်း ဒါတွေကို သိပြီးသားပါ ”ဟု ယင်းကပြောသည်။

နိုဝင်ဘာလ ၁၇ ရက်တွင် နစက မှ ဖမ်းဆီးထားသည့် ဂျပန်နိုင်ငံသား ကူဘိုတာ၊ ဩစတေးလျနိုင်ငံသား ရှောင်တာနဲလ် ၊ ဗြိတိန်သံအမတ်ဟောင်း ဗစ်ကီဗိုးမန်း၊ အမေရိကန်နိုင်ငံသား ဦးကျော်ဌေးဦးတို့အား လွတ်ငြိမ်းချမ်းသာခွင့်ပေးပြီး အကျဉ်းထောင်တွေကနေ ပြန်လွှတ်ပေးခဲ့သည်။

အဆိုပါ နိုင်ငံခြားသားတွေကို လွှတ်ပေးခြင်းသည် ဘာနိုင်ငံရေးအပေးအယူအတွက်မှမဟုတ်ဘဲ ပြစ်မှုဆိုင်ရာ ပုဒ်မတွေကြောင့်သာ ဖမ်းဆီးရခြင်းဖြစ်ကြောင်း ဗိုလ်ချုပ်ဇော်မင်းထွန်းက သတင်းစာရှင်းလင်းပွဲတွင် ထည့်သွင်းပြောကြားခဲ့သည်။

#ymg/sth
#Yangon_Media_Group

#Local_New
Published_18 November 2022

၂၀၂၃ တွင်ကျင်းပမည့် ပါတီစုံဒီမိုကရေစီရွေးကောက်ပွဲနှင့်ပတ်သက်ပြီး ကြိုတင်အသိပေးထုတ်ပြန်သွားမည်ဖြစ်ကြောင်း ပြည်ထောင်စုရွေးကောက်ပွဲကော်မရှင်အဖွဲ့ဝင်ဦးခင်မောင်ဦးက ပြောသည်။

ယနေ့ နိုဝင်ဘာလ ၁၈ ရက် နေပြည်တော်တွင် ကျင်းပပြုလုပ်သည့် ၂၁ ကြိမ်မြောက် သတင်းစာရှင်းလင်းပွဲတွင် ၎င်းက အထက်ပါအတိုင်း ပြောကြားခဲ့ခြင်းဖြစ်သည်။

ယင်းအပြင် တိုင်းနှင့် ပြည်နယ် ၃ ခုတွင် ရွေးကောက်ပွဲအတွက် မဲရုံသတ်မှတ်မှုလုပ်ငန်းစဉ်များ ပြီးစီးပြီဖြစ်ကြောင်း ၎င်းက ဆက်လက်ပြောကြားခဲ့သည်။ လာမည့် ရွေးကောက်ပွဲတွင် အချိုးကျကိုယ်စားပြုစနစ် (PR) ကို ပြောင်းလဲကျင့်သုံးမည်ဖြစ်သည့်အတွက် နိုင်ငံရေးပါတီများနှင့် တွေ့ဆုံညှိနှိုင်းပြီးဥပဒေ၊ နည်းဥပဒေများကိုပြင်ဆင်ရေးဆွဲနေပြီဖြစ်ကြောင်း မဲဆန္ဒရှင်တွေအနေဖြင့် လွယ်လွယ်ကူကူမဲပေးလို့ရကြောင်း ထည့်သွင်းပြောကြားခဲ့သည်။

အချိုးကျကိုယ်စားပြုစနစ် (PR) ကို ပြောင်းလဲကျင့်သုံးမှာဖြစ်တဲ့အတွက် ပြည်သူတွေ လွယ်ကူစွာမဲပေးနိုင်ဖို့အတွက် ကော်မရှင်အနေဖြင့်ကျယ်ကျယ်ပြန့်ပြန့် အသိပေးဟောပြောသွားမည်ဖြစ်ကြောင်းလည်း သိရသည်။

#ymg/sth
#Yangon_Media_Group

#Local_New

Published_18 November 2022

နစက အနေဖြင့် ၂၀၂၁ ခုနှစ် ဖေဖော်ဝါရီလကနေ ၂၀၂၂ ခုနှစ် နိုဝင်ဘာလအထိ ပြစ်ဒဏ်ကျခံနေသော လူဦးရေ ၅၉၀၀၀ ကျော်ကို ပြစ်ဒဏ်လွတ်ငြိမ်းချမ်းသာခွင့်ပေးခဲ့ကြောင်း ယနေ့ နိုဝင်ဘာလ ၁၈ ရက်တွင် ပြုလုပ်သည့် ၂၁ ကြိမ်မြောက် သတင်းစာရှင်းလင်းပွဲအတွင်း ပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်း က ပြောသည်။

၂၀၂၁ ခုနှစ် ပြည်ထောင်စုနေ့တွင် နိုင်ငံခြားသား ၅၅ ဦး၊ ပြည်တွင်း ၂၃၃၁၄ ဦး စုစုပေါင်း ၂၃၃၆၉ ဦး၊ နှစ်ဆန်းတစ်ရက်နေ့တွင် နိုင်ငံခြားသား ၁၃၇ ဦး၊ ပြည်တွင်း ၂၃၀၄၇ ဦး စုစုပေါင်း ၂၃၁၈၄ ဦး၊ သီတင်းကျွတ်လပြည့်နေ့တွင် ပြည်တွင်းနိုင်ငံသား ၅၆၇၀ ဦး၊ ၂၀၂၂ ခုနှစ် မတ်လ ၂ ရက်တွင် နိုင်ငံခြားသား တစ်ဦး ပြည်တွင်းနိုင်ငံသား ၆ ဦးစုစုပေါင်း ၇ ဦး၊ နှစ်ဆန်းတစ်ရက်နေ့တွင် နိုင်ငံခြားသား ၄၂ ဦး၊ ပြည်တွင်းနိုင်ငံသား ၁၅၇၇ ဦး စုစုပေါင်း ၁၆၁၉ ဦး၊ အောက်တိုဘာလ ၁၀ ရက်တွင် ပြည်တွင်းနိုင်ငံသား ၆ ဦးနှင့် အမျိုးသားနေ့တွင် နိုင်ငံခြားသား ၄ ဦး ပြည်တွင်းနိုင်ငံသား ၅၇၇၀ ဦး စုစုပေါင်း ၅၇၇၄ ဦး တို့ကို ပြစ်ဒဏ်လွတ်ငြိမ်းချမ်းသာခွင့်ပေးခဲ့ခြင်း ဖြစ်ကြောင်း သိရသည်။

#ymg/sth
#Yangon_Media_Group

#Local_News
Published _ 18 november 2022

နိုဝင်ဘာ ၁၇ ရက်ကကျရောက်ခဲ့သည့် (၁၀၂)နှစ်မြောက် အမျိုးသားနေ့အား ဂုဏ်ပြုသည့်အနေဖြင့် နစက မှတစ်နိုင်ငံလုံးရှိ အကျဉ်းထောင်အသီး သီးမှ အကျဉ်းသား၊အကျဉ်းသူ ၅၇၇၄ ဦးအား ပြစ်ဒဏ်များမှလွတ်ငြိမ်းခွင့်ပြုခဲ့ခြင်းအား မြန်မာနိုင်ငံဆိုင်ရာ ကနေဒါသံရုံး(ရန်ကုန်)မှ ကြိုဆိုသည်ဟု ယနေ့ နိုဝင်ဘာလ ၁၈ ရက်တွင် ထုတ်ပြန်ခဲ့သည်။

ကနေဒါသံရုံး(ရန်ကုန်)၏ ထုတ်ပြန်ချက်တွင် နိုင်ငံရေးအကျဉ်းသား ၇၀၀ ကျော်အပါအဝင် အကျဉ်း သား ၆၀၀၀ ခန့်အား လွတ်ငြိမ်းချမ်းသာခွင့်ပေးခဲ့ခြင်းအား ကနေဒါနိုင်ငံက ကြိုဆိုသည်ဟု ရေးသားထားသည်။

လွတ်မြောက်လာသူများသည် ၎င်းတို့ ချစ်ခင်ရသူများနှင့်လုံခြုံစွာပြန်လည်ဆုံစည်းနိုင်လိမ့် မည်ဟုမျှော်မှန်းကာ နိုင်ငံခြားသားများ လွတ်မြောက်လာခြင်းနှင့်၎င်းတို့၏ မိခင်နိုင်ငံများသို့ လုံခြုံစွာပြန်သွားနိုင်ခြင်းများကိုလည်း ကနေဒါနိုင် ငံကကြိုဆိုသည်ဟု ယင်းထုတ်ပြန်ချက်၌ ရေးသားထားသည်။

နိုင်ငံရေးအကျဉ်းသားအားလုံးနှင့်ဖမ်းဆီးချုပ်နှောင်ခံရသူများအားလုံးလွတ်မြောက် ရေးကိုလည်း ကနေဒါနိုင်ငံမှ ဆက်လက်တောင်းဆိုသည်ဟုလည်း ကနေဒါသံရုံး(ရန်ကုန်)၏ထုတ်ပြန်ချက်၌ ရေးသားဖော်ပြထားရှိသည်။

#ymg/NN
#Yangon_Media_Group

#Local_News
Published_18 November 2022

မြန်မာနိုင်ငံနှင့် တရုတ်နိုင်ငံ (ယူနန်ပြည်နယ်၊ တက်ဟုန်းပြည်နယ်ခွဲ)တို့အကြား နှစ်နိုင်ငံနယ်စပ် ကုန်သွယ်မှုအဆင့်မြှင့်တင်နိုင်ရေးနှင့် နှစ်နိုင်ငံနယ်စပ်ဂိတ်ပေါက်တွင် ကွန်တိန်နာဖြင့်သယ်ယူ ပို့ဆောင်ရေးစနစ်ကျင့်သုံးရန် နှစ်နိုင်ငံဆွေးနွေးမှုပြုလုပ်ခဲ့ကြောင်း စီးပွားရေနှင့်ကူးသန်းရောင်းဝယ်ရေးဝန်ကြီးဌာနမှ သိရသည်။

အဆိုပါတွေ့ဆုံဆွေးနွေးမှုတွင် မူဆယ်-ရွှေလီနယ်စပ်ကုန်သွယ်မှု လွယ်ကူချောမွေ့စေရေးအတွက် ကွန်တိန်နာဖြင့် ကုန်စည်သယ်ယူပို့ဆောင်နိုင်ရေး၊ ကျယ်ဂေါင်ဂိတ်ပြန်လည်ဖွင့်လှစ်နိုင်ရေး၊ မြန်မာ-တရုတ် နှစ်နိုင်ငံအကြား ကျပ်/ယွမ်ဖြင့် ပေးချေမှုစနစ် ပိုမိုအဆင်ပြေချောမွေ့စေရေးတို့ပါဝင်ကြောင်း သိရသည်။

ယင်းအပြင် မြန်မာ့လယ်ယာထွက်ကုန်များဖြစ်သည့် ထောပတ်သီး၊ နာနတ်သီး၊ ကျွဲကောသီး၊ သံပရာသီး၊ ကန်စွန်းဥတို့ကို တရုတ်နိုင်ငံသို့ တရားဝင် တင်ပို့နိုင်ရေးအတွက် တရုတ်နိုင်ငံအကောက်ခွန် အထွေထွေအုပ်ချုပ်မှုအာဏာပိုင်အဖွဲ့ (GACC) မှ အမြန်ဆုံးခွင့်ပြုဆောင်ရွက်ပေးရေးကိုလည်း ထည့်သွင်းဆွေးနွေးခဲ့ပြီး မကြာခင်ကြံများ တရုတ်နိုင်ငံဘက်သို့ တင်ပို့သည့် ရာသီရောက်ရှိမည်ဖြစ်သည့်အတွက် ကြံတင်ဆောင်သော ယာဉ်များအား Green Line ပေးကာ တိုက်ရိုက် ဝင်ထွက်စေရေးတို့ကိုလည်း ဆွေးနွေးခဲ့ကြကြောင်း သိရသည်။

ဆန်၊ ဆန်ကွဲ၊ ပြောင်းစသည့် လုပ်ငန်းများအပါအဝင် မြန်မာကုမ္ပဏီ (၆၀၀) ကျော်မှ တရုတ်နိုင်ငံအကောက်ခွန် အထွေထွေအုပ်ချုပ်မှု အာဏာပိုင်အဖွဲ့ GACC ထံက မှတ်ပုံတင်ရရှိရေး ကြိုးပမ်းဆောင်ရွက်နေကြောင်းသိရသည်။

လက်ရှိတွင် ပြည်တွင်းအခြေစိုက် ဆန်/ဆန်ကွဲတင်ပိုရောင်းချသည့် ကုမ္ပဏီ ၆၂ ခု၊ ပြောင်းတင်ပို့သည့် ကုမ္ပဏီ (၁၁၂)ခုနှင့် တစ်သျှူးငှက်ပျော တင်ပို့ရောင်းချမည့် ကချင်ပြည်နယ်အခြေစိုက် ကုမ္ပဏီ (၃၂) ခုတို့ကို GACC က မှတ်ပုံတင်ခွင့် ပြုထားကြောင်းသိရသည်။

#ymg/sth
#Yangon_Media_Group

#World_Politics
Published 18 November 2022

အမေရိကန်အောက်လွှတ်တော်ရဲ့ ပထမဆုံးအမျိုးသမီးဥက္ကဌဖြစ်သူ၊ အထင်ကရဥပဒေများကို ထိန်းသိမ်းသတ်မှတ်ခဲ့ပြီး ပြစ်တင်စွပ်စွဲချက် ၂ ခုကို ဦးဆောင်ခဲ့သူ၊ ဒီမိုကရက်တစ်ပါတီရဲ့ ရှေ့ဆောင်လမ်းပြလည်းဖြစ်သူ 'နန်စီပယ်လိုစီ'ဟာ သူ့ရဲ့ဥက္ကဌရာထူးကို လွှဲပြောင်းတော့မှာဖြစ်ကြောင်း ကြာသပတေးနေ့က ကြေညာခဲ့ပါတယ်။

ရီပတ်ဘလစ်ကန်များက လွှတ်တော်ကို ထိန်းချုပ်ခွင့်ရရှိပြီး နောက်တစ်ရက်အကြာမှာပဲ အခုလိုကြေညာလိုက်တာဖြစ်ပါတယ်။

'ပယ်လိုစီ'ဘက်တော်သားများက အောက်လွှတ်တော်ဥက္ကဌရာထူးကို ဆက်ခံနိုင်ချေရှိတဲ့ 'ဟာကင်မ်ဂျက်ဖရီစ်'ထံ အလျင်အမြန်စုရုံးနေကြပါတယ်။

ရီပတ်ဘလစ်ကန်တွေကတော့ သမ္မတ'ဘိုင်ဒင်'ရဲ့ ဥပဒေပြုရေးအစီအစဉ်တွေကို ဟန့်တားနိုင်မယ့် သူတို့ပါတီမှလူတစ်ဦးကို ဥက္ကဌတင်မြှောက်ရန် ပြင်ဆင်နေကြပါတယ်။

'ပယ်လိုစီ'နေရာကို ဆက်ဆံမယ့်သူကတော့ ကြားနေဝါဒီများနဲ့ လက်ဝဲခြမ်းတို့ကြား ကွဲပြားနေတဲ့ အောက်လွှတ်တော်ဒီမိုကရက်များကို ပေါင်းစည်းရမယ့်တာဝန်ရှိလာမှာဖြစ်ပါတယ်။

အသက် ၈၂ နှစ်အရွယ်'ပယ်လိုစီ' အောက်လွှတ်တော်မိန့်ခွန်းမှာ ကြေညာချက်ထုတ်ပြန်စဉ် ရီပတ်ဘလစ်ကန်အများစု မတက်ရောက်ခဲ့ပေမယ့် ဒီမိုကရက်တွေကတော့ အများအပြားအားပေးခဲ့ကြပါတယ်။

ဒါပေမဲ့ ၃၅ နှစ်ကြာအောင် တာဝန်ထမ်းဆောင်ခဲ့တဲ့ အောက်လွှတ်တော်ကနေ အပြီးအပိုင်အနားယူတာမဟုတ်ဘဲ ဆန်ဖရန်ဆစ္စကိုကို ဆက်လက်ကိုယ်စားပြုသွားဦးမှာဖြစ်ကြောင်း သိရပါတယ်။

"ကျွန်မအလွန်တန်ဖိုးထားရတဲ့ ဒီမိုကရက်တစ်ပါတီအစည်းအဝေးကို နောက်ထပ်မျိုးဆက်ဆီ လွှဲပေးဖို့အချိန်ကျပါပြီ၊ ဒီရာထူးအတွက် တာဝန်ထမ်းဆောင်ဖို့ ဆန္ဒရှိပြီး အဆင်သင့်ဖြစ်နေကြတဲ့လူတွေ အများကြီးရှိနေတာ ကျေနပ်စရာပါပဲ" လို့ 'ပယ်လိုစီ'က ပြောကြားခဲ့ပါတယ်။

'ပယ်လိုစီ'ဟာ အောက်လွှတ်တော်ဒီမိုကရက်မှာ ဆယ်စုနှစ် ၂ ခုကြာတာဝန်ထမ်းဆောင်ခဲ့ကာ ၂၀၀၇ ကနေ ၂၀၁၁ အထိ ဥက္ကဌအဖြစ်တာဝန်ယူခဲ့ပြီး ၂၀၁၉ ကနေ လက်ရှိအချိန်ထိလည်း ဥက္ကဌအဖြစ် နောက်တစ်ကြိမ်တာဝန်ယူထားပါတယ်။

'ပယ်လိုစီ'က ဒီမိုကရက်တစ်သမ္မတနှစ်ယောက်ရဲ့ ဥပဒေပြုရေးအစီအစဉ်တွေကို ထိန်းသိမ်းရာမှာ အဓိကနေရာမှပါဝင်ခဲ့သလို ၂၀၁၀ ခုနှစ်က သမ္မတ'ဘာရက်အိုဘားမား'ရဲ့ ကျန်းမာရေးစောင့်ရှောက်မှုဥပဒေ၊ အခြေခံအဆောက်အအုံများနဲ့ ရာသီဥတုဆိုင်ရာရင်းနှီးမြှုပ်နှံခြင်းများ၊ 'ဘိုင်ဒင်'လက်ထက် သေနတ်ဥပဒေထိန်းချုပ်ပြုပြင်ခြင်းများ ဆောင်ရွက်ခဲ့ပါတယ်။

သမ္မတ'ဘိုင်ဒင်'က 'ပယ်လိုစီ'နဲ့ပတ်သက်ပြီး အမေရိကန်အောက်လွှတ်တော်အစဉ်အလာထဲမှာ အထင်ရှားဆုံးဥက္ကဌဖြစ်တယ်လို့ မှတ်ချက်ပြုသွားပါတယ်။

အောက်လွှတ်တော်မှာ ဥက္ကဌတင်မြှောက်ရန်အတွက် နိုဝင်ဘာ ၃၀ ရက်နေ့မှာ ဒီမိုကရက်တစ်တွေ မဲခွဲဆုံးဖြတ်ရမှာဖြစ်ပါတယ်။
နယူးယော့ခ်မှ 'ဂျက်ဖရီစ်'က ကွန်ဂရက်လွှတ်တော်မှာ ပင်မပါတီအစည်းအဝေးတစ်ခုကို ဦးဆောင်မယ့် ပထမဆုံးလူမည်းဥပဒေအမတ် ဖြစ်လာဖွယ်ရှိပါတယ်။

အောက်လွှတ်တော်ဒီမိုကရက်တစ်တွေထဲမှာ ငယ်ရွယ်သူများကို အခွင့်အာဏာပေးဖို့ ပြီးခဲ့တဲ့နှစ်များအတွင်း 'ပယ်လိုစီ'ကို ဖိအားပေးခဲ့ကြပါတယ်။

ပါတီရဲ့ဦးဆောင်သူတွေဟာ အသက်အရွယ်ကြီးရင့်သူတွေသာဖြစ်နေတာကို မေးခွန်းထုတ်လာကြပြီး 'ဘိုင်ဒင်'ကိုယ်တိုင်ကလည်း တနင်္ဂနွေနေ့မှာ အသက် ၈၀ ပြည့်မှာဖြစ်ပါတယ်။

Source: Reuters
#Yangon_Media_Group

#World_Health
Published 18 November 2022

ကမ္ဘာပေါ်က လူ ၄ ယောက်မှာ ၁ ယောက်နှုန်းက သွေးတိုးရောဂါရှိနေပြီး ရောဂါရှိမှန်းမသိတတ်တာကြောင့် မကုသဘဲနေတတ်ကြပါတယ်။

အပေါ်သွေး ၁၄၀ ကျော်တာပဲဖြစ်ဖြစ်၊ အောက်သွေး ၉၀ ကျော်တာပဲဖြစ်ဖြစ်၊ နှစ်မျိုးစလုံးအဆိုပါပမာဏထက် ကျော်တာပဲဖြစ်ဖြစ် သွေးဖိအားများနေတယ်လို့ ယူဆပါတယ်။

လူတွေ မှားယွင်းနေတဲ့အရာက သွေးပေါင်ချိန်များနေပေမယ့် နေရထိုင်ရအဆင်ပြေနေတယ်ဆိုရင် ပြဿနာမဖြစ်ဘူးလို့ မှတ်ယူနေကြတာပါပဲ။

လူတွေက သူတို့ကိုယ်သူတို့ သွေးတိုးနေမှန်းမသိဘဲ ရောက်လာတဲ့လူနာတွေ မကြာခဏတွေ့ရတတ်ပါတယ်။

သွေးတိုးခြင်းကို မကုသဘူးဆိုရင် နှလုံးရောဂါ၊ လေဖြတ်ခြင်း၊ နှလုံးခုန်မမှန်ခြင်း၊ ကျောက်ကပ်ပျက်စီးခြင်းတို့ ဖြစ်နိုင်ချေများပါတယ်။

အခြားဆက်စပ်ရောဂါတွေအနေနဲ့ ဆီးချို၊ မှတ်ဉာဏ်ချို့ယွင်းခြင်း၊ အဝလွန်ခြင်းတို့ ဖြစ်ပေါ်နိုင်ပါတယ်။
"သွေးဖိအားက ဆက်တိုက်မြင့်မားနေမယ်ဆိုရင် နှလုံးနဲ့ကျောက်ကပ်တို့မှာ ဝန်ထုပ်ဝန်ပိုးပိလာပြီး အချိန်ကြာလာတာနဲ့အမျှ အင်္ဂါတွေပျက်စီးသွားနိုင်ပါတယ်" လို့ ဟောင်ကောင်မှဆရာဝန်'ကေသီလီ'က ဆိုပါတယ်။

သွေးတိုးရောဂါက ကာကွယ်ကုသနိုင်ပြီးတော့ သွေးတိုးနေလားဆိုတာကို အဆက်မပြတ်စောင့်ကြည့်တိုင်းတာနေသင့်ပါတယ်။

အသက်အရွယ်ကြီးလာတာနဲ့အမျှ နှလုံးကနေညှစ်ထုတ်လိုက်တဲ့ သွေးတွေကိုသယ်ဆောင်တဲ့ သွေးလွှတ်ကြောတွေ ထူထဲလာကာ သွေးဖိအားများလာတာဖြစ်ပါတယ်။

၂၀၁၄ ခုနှစ်မှ ၂၀၁၅ ခုနှစ်အတွင်း ဟောင်ကောင်ကျန်းမာရေးဌာနမှ စစ်တမ်းကောက်ယူခဲ့ရာ အသက် ၁၅ နှစ်မှ ၂၄ နှစ်ကြားလူငယ်တွေထဲက ၄.၅ ရာခိုင်နှုန်းဟာ သွေးတိုးရှိခဲ့ပြီး အသက် ၆၅ နှစ်မှ ၈၄ နှစ်ကြားလူကြီးတွေကတော့ ၆၄.၈ ရာခိုင်နှုန်းရှိခဲ့ပါတယ်။

သွေးတိုးခြင်းကို ကာကွယ်လျှော့ချနိုင်ရန် တစ်ပတ်ကို ၁၅၀ မိနစ်ခန့် သာမန်လှုပ်ရှားလေ့ကျင့်ခန်းပြုလုပ်ခြင်း၊ ဆေးလိပ်ရှောင်ခြင်း၊ ဆားလျှော့စားခြင်း၊ ကိုယ်အလေးချိန်ထိန်းသိမ်းခြင်း၊ လုံလောက်စွာအိပ်စက်ခြင်း၊ စိတ်ဖိစီးမှုလျှော့ချခြင်းတို့ ပြုလုပ်နိုင်ပါတယ်။

အနည်းငယ်မျှ သွေးတိုးခြင်းက အထက်ပါနည်းလမ်းများဖြင့် ထိန်းသိမ်းနိုင်ပေမယ့် သွေးတိုးများတယ်ဆိုရင်တော့ ဆေးကုသမှုပါ လိုအပ်လာပါပြီ။

ဆေးတွေက ချက်ချင်းလက်ငင်းမသက်သာပေမယ့် ရေရှည်ကျန်းမာရေးပြဿနာတွေကိုတော့ လျော့ကျစေနိုင်တယ်ဆိုတာကို လူနာတွေသိထားသင့်ပါတယ်။

သွေးတိုးဝေဒနာကို မကုသဘဲထားလိုက်ရင် ပိုမိုဆိုးရွားလာနိုင်ပြီး ဆရာဝန်တွေ ဆေးသောက်ခိုင်းရတဲ့ အဓိကအကြောင်းအရင်းက လူနာရဲ့ရေရှည်ကျန်းမာရေးကို စိတ်ချရစေရန်ဖြစ်ပါတယ်။

Source: SCMP
#Yangon_Media_Group