ရန်ကုန်၊ မေ ၂

လှိုင်သာယာမြို့နယ်၏ မြို့ပြစနစ်ကို စနစ်တကျဖြစ်စေရန်အတွက် Town Plan အား တိကျစွာ  တွက်ချက်ရေးဆွဲရန်နှင့် မြို့ပြအသစ်များ တည်ဆောက်ရာတွင် လယ်ယာမြေများ ဆုံးရှုံးမှုမရှိစေရေး အထူးဂရုပြုဆောင်ရွက်ရန် နိုင်ငံတော်သမ္မတ ဦးမင်းအောင်လှိုင်က သက်ဆိုင်ရာတာဝန်ရှိသူများသို့ ယနေ့တွင် တိုက်ရိုက်လမ်းညွှန်မှာကြားလိုက်သည်။

အဆိုပါ လမ်းညွှန်မှာကြားချက်ကို ယနေ့ မေလ ၂ ရက် နံနက်ပိုင်းက လှိုင်သာယာမြို့နယ်၊ ဘုရင့်နောင်  ပန်းခြံ ရှင်းလင်းဆောင်၌ ပြုလုပ်သည့် ရန်ကုန်မြို့ပြဖွံ့ဖြိုးတိုးတက်ရေးနှင့် သန့်ရှင်းသာယာလှပရေး   လုပ်ငန်းများ ဆောင်ရွက်ထားရှိမှုအခြေအနေများကို ကွင်းဆင်း ကြည့်ရှုစစ်ဆေးစဉ် ထည့်သွင်းပြောကြား  ခဲ့ခြင်းဖြစ်သည်။ ထိုသို့စစ်ဆေးရာတွင် နိုင်ငံတော်သမ္မတနှင့်အတူ တပ်မတော်ကာကွယ်ရေးဦးစီးချုပ် ဗိုလ်ချုပ်ကြီး ရဲဝင်းဦး၊ ပြည်ထောင်စုဝန်ကြီးများ၊ ရန်ကုန်တိုင်းဒေသကြီးဝန်ကြီးချုပ် ဦးအောင်နိုင်သူနှင့် အဆင့်မြင့်တပ်မတော်အရာရှိကြီးများ လိုက်ပါခဲ့ကြသည်။

ရှင်းလင်းဆောင်ခန်းမတွင် ရန်ကုန်တိုင်းဒေသကြီးဝန်ကြီးချုပ်က လမ်းညွှန်ချက်များအပေါ် ဆောင်ရွက်  ပြီးစီးမှုများ၊ ဆက်သွယ်ရေးကြိုးများ စနစ်တကျဖြစ်စေရေး၊ လမ်းမကြီးများတစ်လျှောက် ဇလားပုံ  ရေမြောင်းများ ဖောက်လုပ်နေမှုနှင့် တံတားများ တိုးချဲ့တည်ဆောက်မှုအခြေအနေများကို တင်ပြခဲ့သည်။ ယင်းတင်ပြချက်များအပေါ် နိုင်ငံတော်သမ္မတက မြို့ပြဖွံ့ဖြိုးရေးအတွက် မြို့ပြအင်္ဂါရပ်နှင့်အညီ လမ်းများ တိုးချဲ့ရာတွင် လူသွားပလက်ဖောင်းများနှင့် ရေနုတ်မြောင်းများကို စနစ်တကျထည့်သွင်းရန်၊ မိုးရာသီ  မတိုင်မီ ရေစီးရေလာကောင်းမွန်စေရေးနှင့် အနံ့အသက်ဆိုးများ ကင်းစင်စေရေးအတွက် အမှိုက်   စွန့်ပစ်  မှုစနစ်များကို အဆက်မပြတ် ကြပ်မတ်ဆောင်ရွက်ရန် ထပ်လောင်းမှာကြားခဲ့သည်။

ထို့ပြင် ရန်ကုန်မြို့အတွင်း ယာဉ်စည်းကမ်း၊ လမ်းစည်းကမ်း လိုက်နာမှုရှိစေရေး အသိပညာပေး  လုပ်ငန်းများနှင့် ကြပ်မတ်မှုအပိုင်းများကို စနစ်တကျလုပ်ဆောင်ရန် လိုအပ်ကြောင်းနှင့် အများပြည်သူ အပန်းဖြေနိုင်မည့် ပန်းခြံများ၊ ဥယျာဉ်များနှင့် အားကစားကွင်းများ တည်ဆောက်ရာတွင် မြို့ပြနေ   လူဦးရေအပေါ် မူတည်တွက်ချက်၍ အကောင်အထည်ဖော်ရန် နိုင်ငံတော်သမ္မတက လမ်းညွှန်ခဲ့သည်။

တွေ့ဆုံပွဲအပြီးတွင် နိုင်ငံတော်သမ္မတနှင့် အဖွဲ့ဝင်များသည် လှိုင်သာယာ၊ ရွှေပြည်သာ၊ မင်္ဂလာဒုံနှင့် မြောက်ဥက္ကလာပမြို့နယ်များအတွင်း လမ်းနယ်နိမိတ် ကျူးကျော်မှုများ ဖယ်ရှားရှင်းလင်းထားမှု၊ လမ်းအင်္ဂါရပ်နှင့်အညီ လမ်းများအဆင့်မြှင့်တင် တိုးချဲ့ထားရှိမှုနှင့် လျှပ်စစ်ဓာတ်အားတိုင်များ ရွှေ့ပြောင်း  ထားရှိမှုများကို မော်တော်ယာဉ်များဖြင့် လှည့်လည်ကြည့်ရှုစစ်ဆေးခဲ့ကြောင်း သတင်းရရှိသည်။