#Local_News
Published 28 August 2026

■ ဂျပန်နိုင်ငံတွင် ကျင်းပမည့် နိုင်ငံတကာ လူငယ်ဖိတ်ခေါ် ပြိုင်ပွဲ ဖြစ်သည့် (၂၈) ကြိမ်မြောက် "2026 International Youth Football in Niigata" ပြိုင်ပွဲ၌ ပါဝင်ယှဉ်ပြိုင်ရန် မြန်မာယူ၁၇ အသင်း ဖိတ်ကြားခံရ၍ သွား‌ ရောက်ယှဉ်ပြိုင်မည်ဖြစ်ကြောင်းမြန်မာနိုင်ငံဘောလုံးအဖွဲ့ချုပ်မှသိရသည်။

■ အဆိုပါ ပြိုင်ပွဲကိုဂျပန်ဘောလုံးအဖွဲ့ချုပ် (JFA) က ကြီးမှူး၍ လာမယ့် စက်တင်ဘာ ၁၅ ရက်မှ ၂၂ ရက်အထိ ဂျပန်နိုင်ငံ၊ နီဂါတာမြို့၌ ကျင်းပမည့်ဖြစ်ပြီး မြန်မာလူငယ်အသင်း ပါဝင်ယှဉ်ပြိုင်ရန် JFA မှဖိတ်ကြားခဲ့ရာ မြန်မာ U-17 အမျိုးသား လက်ရွေးစင်ဘောလုံးအသင်းအား MFF မှစေလွှတ်ယှဉ်ပြိုင်မည်ဖြစ်ကြောင်းဆိုထားသည်။

■ ယင်းပြိုင်ပွဲသည် ဂျပန်နိုင်ငံ၊ နီဂါတာမြို့တွင် နှစ်ပေါင်း ၂၀ ကျော်တိုင် အစဉ်အလာမပျက် နှစ်စဉ်ကျင်းပလာခဲ့သည့် နိုင်ငံတကာ U-17 ဖိတ်ခေါ်ဘောလုံးပြိုင်ပွဲဖြစ်ပြီး ဂျပန်ဘောလုံးအဖွဲ့ချုပ် (JFA) နှင့် နီဂါတာဒေသ ဘောလုံးအဖွဲ့ချုပ်တို့ ပူးပေါင်းကျင်းပခြင်းဖြစ်ကာ 2026 FIFA U-17 World Cup အပါအဝင် နိုင်ငံတကာ ပြိုင်ပွဲကြီးများ မတိုင်မီ လူငယ်ကစားသမားများ၏ အရည်အသွေးကို စမ်းသပ်ရန်နှင့်အတွေ့အကြုံရရှိရန်ရည်ရွယ်ကျင်းပခြင်းဖြစ်သည်။

■ ယခုနှစ် ပြိုင်ပွဲတွင် အိမ်ရှင် ဂျပန် U-17 အသင်း၊ နီဂါတာ လက်ရွေးစင်အသင်း (Niigata Selection Team) နှင့် ဖိတ်ခေါ် အမျိုးသား U-17 လက်ရွေးစင် အသင်းများဖြစ်ကြသည့် မြန်မာ U-17 အသင်းနှင့် နယူးဇီလန် U-17 အသင်းတို့သည် ပတ်လည်စနစ် (Round-robin) ဖြင့် တစ်သင်းလျှင် ၃ ပွဲစီ ယှဉ်ပြိုင်ရမည်ဖြစ်ပြီး အမှတ်အများဆုံးရရှိသည့် အသင်းကချန်ပီယံဆုကို ဆွတ်ခူးရရှိမည်ဖြစ်သည်။

■ မြန်မာ U-17 အသင်းသည် စက်တင်ဘာ ၁၅ ရက်တွင် ဂျပန်နိုင်ငံ၊ နီဂါတာမြို့သို့ ရောက်ရှိမည်ဖြစ်ပြီး ပထမပွဲစဉ်ကို စက်တင်ဘာ ၁၇ ရက်၊ ဒုတိယပွဲစဉ်ကို စက်တင်ဘာ ၁၉ ရက်၊ တတိယပွဲစဉ်ကို စက်တင်ဘာ ၂၁ ရက်တို့တွင် အသီးသီးယှဉ်ပြိုင်ကစားသွားမည်ဖြစ်ကြောင်း သိရသည်။

#YMG/NN #Yangon_Times