#Local_News
ဒါကာ၊ ဩဂုတ် ၄

■ ဘင်္ဂလားဒေ့ရှ်နိုင်ငံသည် ပြည်တွင်းသဘာဝဓာတ်ငွေ့ ရရှိမှု ကျဆင်းလာနေသည့် အခြေအနေကြောင့် မြန်မာနိုင်ငံနှင့် စွမ်းအင်ကဏ္ဍ ပူးပေါင်းဆောင်ရွက်မှုကို မြှင့်တင်ရန် ကြိုးပမ်းသည့်အနေဖြင့် မြန်မာနိုင်ငံမှ သဘာဝဓာတ်ငွေ့ကို ပိုက်လိုင်းဖြင့်တင်သွင်းနိုင်ရေး အဆိုပြုထားကြောင်း ဘင်္ဂလားဒေ့ရှ် လျှပ်စစ်၊ စွမ်းအင်နှင့် ဓာတ်သတ္တုအရင်းအမြစ်ဝန်ကြီးဌာန၏ သတင်းထုတ်ပြန်ချက်ကိုကိုးကား၍ ဘင်္ဂလားဒေ့ရှ်မီဒီယာများတွင်ဖော်ပြထားသည်။

■ အဆိုပါအဆိုပြုချက်ကို ဘင်္ဂလားဒေ့ရှ် လျှပ်စစ်၊ စွမ်းအင်နှင့် ဓာတ်သတ္တုအရင်းအမြစ်ဝန်ကြီး အစ်က်ဘယ်လ် ဟာဆန် မာမွတ်က ဘင်္ဂလားဒေ့ရှ်နိုင်ငံဆိုင်ရာ မြန်မာသံအမတ်ကြီး ဦးကျော်စိုးမိုးနှင့်ယနေ့ပြုလုပ်သည့်တွေ့ဆုံဆွေးနွေးပွဲတွင်တင်ပြခဲ့ခြင်းဖြစ်သည်။

■ ဝန်ကြီးဌာန၏ သတင်းထုတ်ပြန်ချက်အရ ဘင်္ဂလားဒေ့ရှ်သည် မြန်မာနိုင်ငံမှ စစ်တကောင်းမြို့သို့ သဘာဝဓာတ်ငွေ့ပိုက်လိုင်း ဖောက်လုပ်ရေးနှင့်ပတ်သက်၍ ယခင်ကအဆိုပြုထားသည့် အစီအစဉ်ကိုလည်း ပြန်လည်အသက်သွင်းရန် စိတ်ဝင်စားနေသည်။

■ တွေ့ဆုံစဉ် ဝန်ကြီး မာမွတ်က ဘင်္ဂလားဒေ့ရှ်နိုင်ငံတွင် သဘာဝဓာတ်ငွေ့ လိုအပ်ချက် မြင့်မားနေပြီး မြန်မာနိုင်ငံမှပိုက်လိုင်းဖြင့် သဘာဝဓာတ်ငွေ့တင်သွင်းနိုင်ရေးကို အထူးစိတ်ဝင်စားကြောင်းပြောကြားခဲ့သည်။

■ ယင်းအဆိုပြုချက်အပေါ် မြန်မာသံအမတ်ကြီး ဦးကျော်စိုးမိုးက အပြုသဘောတုံ့ပြန်ခဲ့ပြီး သဘာဝ ဓာတ်ငွေ့ရည် (LNG) ပုံစံဖြင့် ဘင်္ဂလားဒေ့ရှ်သို့ တင်ပို့နိုင်ရေးဖြစ်နိုင်ခြေကိုလည်း နှစ်နိုင်ငံ ဆွေးနွေးနိုင်ကြောင်း ပြောကြားခဲ့သည်။

■ နှစ်ဖက်သည် စွမ်းအင်ပူးပေါင်းဆောင်ရွက်မှု တိုးမြှင့်ရေးအတွက် သက်ဆိုင်ရာ ဝန်ကြီးများအကြား တွေ့ဆုံဆွေးနွေးပွဲ ကျင်းပနိုင်ရေးကိုလည်း ဆွေးနွေးခဲ့ကြသည်။

■ ဘင်္ဂလားဒေ့ရှ် စွမ်းအင်ဝန်ကြီးက မြန်မာနိုင်ငံစွမ်းအင်ဝန်ကြီးအား ဘင်္ဂလားဒေ့ရှ်နိုင်ငံသို့ တရားဝင် ဖိတ်ကြားသွားမည်ဖြစ်ပြီးလိုအပ်ပါက မိမိကိုယ်တိုင်မြန်မာနိုင်ငံသို့ သွားရောက်ရန်လည်း အသင့်ရှိကြောင်းပြောကြားခဲ့သည်။

■ ဘင်္ဂလားဒေ့ရှ်၏ ပြည်တွင်းသဘာဝဓာတ်ငွေ့ ထုတ်လုပ်မှုမှာ ဆက်လက်ကျဆင်းနေပြီး လျှပ်စစ် ဓာတ်အားပေးစက်ရုံများ၊ စက်မှုလုပ်ငန်းများနှင့် အခြားကဏ္ဍများ၏ လိုအပ်ချက်ကို ဖြည့်ဆည်းနိုင်ရန် ပြည်ပမှတင်သွင်းရသည့် သဘာဝဓာတ်ငွေ့ရည် (LNG) အပေါ် ပိုမိုမှီခိုနေရကြောင်း သိရသည်။

■ ဝန်ကြီး မာမွတ်က ဘင်္ဂလားဒေ့ရှ်ဝန်ကြီးချုပ် တာရစ် ရာမန်၏ မကြာသေးမီက တရုတ်နိုင်ငံခရီးစဉ်အတွင်း ဆွေးနွေးခဲ့သည့် တရုတ်–မြန်မာ–ဘင်္ဂလားဒေ့ရှ် စီးပွားရေးစင်္ကြံ အဆိုပြုချက်ကို ရည်ညွှန်း၍ ဘင်္ဂလားဒေ့ရှ်နှင့် မြန်မာနိုင်ငံကို ချိတ်ဆက်မည့် သဘာဝဓာတ်ငွေ့ပိုက်လိုင်းသည် ဒေသတွင်း ချိတ်ဆက်ဆောင်ရွက်မှုကို အထောက်အကူပြုနိုင်ကြောင်းလည်းပြောကြားခဲ့သည်။

■ ထို့ပြင် နှစ်နိုင်ငံသည် ရေရှည်ကုန်သွယ်ရေးနှင့် စွမ်းအင်ပူးပေါင်းဆောင်ရွက်မှု တိုးချဲ့ရေး၊ အပြန်အလှန် အကျိုးစီးပွားဆိုင်ရာ နယ်ပယ်များတွင် ပူးပေါင်းဆောင်ရွက်ရေးတို့ကို ဆက်လက်ဆွေးနွေးခဲ့ကြောင်း ဘင်္ဂလားဒေ့ရှ် လျှပ်စစ်၊ စွမ်းအင်နှင့် ဓာတ်သတ္တုအရင်းအမြစ်ဝန်ကြီးဌာန၏ ထုတ်ပြန်ချက်တွင် ဖော်ပြထားသည်။