#Local_News
Published 06 July 2026

■ နိုင်ငံတော်သမ္မတ ၏ မြန်မာ - လာအို ခရီးစဉ်အတွင်းမှာ နှစ်နိုင်ငံဆက်ဆံရေးကို မဟာဗျူဟာမြောက် ဆက်ဆံရေးအဖြစ်မြှင့်တင်ရန်သဘောတူညီခဲ့ကြောင်း နိုင်ငံတော်သမ္မတရုံးပြောရေးဆိုခွင့်ရှိသူ ဒုတိယဝန်ကြီးဒေါက်တာခိုင်ခိုင်စိုးကပြောသည်။

■ ပြည်ထောင်စုသမ္မတမြန်မာနိုင်ငံတော် နိုင်ငံတော်သမ္မတ ဦးမင်းအောင်လှိုင်နှင့်ဇနီး ဒေါ်ကြူကြူလှဦးဆောင်သည့် မြန်မာအဆင့်မြင့်ချစ်ကြည်ရေးကိုယ်စားလှယ်အဖွဲ့သည် လာအိုပြည်သူ့ဒီမိုကရက်တစ်သမ္မတ နိုင်ငံသမ္မတ မစ္စတာ ထောင်လွန်းဆီဆုလစ်၏ ဖိတ်ကြားချက်အရ လာအိုပြည်သူ့ဒီမိုကရက်တစ်သမ္မတနိုင်ငံသို့ နိုင်ငံတော်အဆင့် ချစ်ကြည်ရေးခရီးစဉ် (State Visit) သွားရောက်ခဲ့သည်။

■ အဆိုပါခရီးစဉ်၌ နေပြည်တော်နှင့် ဗီယင်ကျန်းတို့ကို Sister City အဖြစ် ဆက်သွယ်ဆောင်ရွက်သွားရန် ၊ ကျိုင်းတုံနှင့် လွန်ပရာဘန်မြို့ကို လေကြောင်းလိုင်းပြေးဆွဲရန် ၊ နယ်စပ်ဒေသကုန်သွယ်မှုများ တိုးမြှင့်ဆောင်ရွက်ရန် ၊ မူးယစ်ဆေးဝါးနှင့် အွန်လိုင်းလိမ်လည်မှုတိုက်ဖျက်ရေးလုပ်ငန်းများတွင် သတင်းအချက်အလက် များဖလှယ်ရန် ၊ ပူးပေါင်းဆောင်ရွက်ရန်ဆွေးနွေးခဲ့ကြောင်း နိုင်ငံတော်သမ္မတရုံးပြောရေးဆိုခွင့်ရှိသူ ဒုတိယဝန်ကြီးဒေါက်တာခိုင်ခိုင်စိုးက မီဒီယာများအားရှင်းလင်းဖြေကြားခဲ့ခြင်းဖြစ်သည်။

■ ထိုသို့ပြောကြားရာ၌ သမ္မတကြီးအနေဖြင့် အာဆီယံနိုင်ငံများတွင် လာအိုနိုင်ငံကို ပထမဆုံးခရီးစဉ်အဖြစ်သွားရောက်ခဲ့ခြင်းဖြစ်ကာ ယင်းသို့သွားရောက်သည့်အကြောင်းရင်းမှာ အာဆီယံနိုင်ငံများ၌ လာအိုနိုင်ငံသည် နှစ်ပေါင်း (၇၀) ကျော် သံတမန်ဆက်ဆံရေးရှိခဲ့သည့် နိုင်ငံဖြစ်ပြီး နယ်နိမိတ်ချင်းလည်းထိစပ်နေ၍ အစဉ်အဆက် ရင်းနှီးစွာ ဆက်ဆံခဲ့ကြောင်း ၊ ပြည်သူချင်းဆက်ဆံရေးဆိုပါက နှစ်ပေါင်းရာချီပြီးဆက်ဆံခဲ့သည့်နိုင်ငံဖြစ်ကြောင်းပြောကြားသည်။

■ "ပြီးတော့ မြန်မာနိုင်ငံကို အမြဲတမ်း Supporting ပေးခဲ့တယ်။ နယ်နိမိတ်တစ်လျှောက်မှာ နယ်စပ်ပြဿနာ လုံးဝမရှိခဲ့တဲ့နိုင်ငံတစ်ခုဖြစ်ပါတယ်။ နှစ်နိုင်ငံလုံးက အာဆီယံကို တစ်ရက်တည်း ဝင်ခဲ့ကြပါတယ်။ လာအိုနိုင်ငံက ၂၀၂၄ ခုနှစ်မှာ အာဆီယံ Chair အဖြစ် တာဝန်ယူစဉ်ကလည်း ကျွန်မတို့နိုင်ငံကို အပြည့်အဝထောက်ခံခဲ့ပါတယ်။ ကျွန်မတို့နိုင်ငံဘက်က အပြည့်အဝ ရပ်တည်ခဲ့ပါတယ်။ သံတမန်ဆက်ဆံရေး တစ်လျှောက်မှာလည်း တကယ်ကို မိတ်ဆွေအရင်းအချာပမာဆက်ဆံခဲ့တဲ့ အိမ်နီးချင်းကောင်း နိုင်ငံတစ်ခုဖြစ်ပါတယ်။ ဒါက ကျွန်မတို့နှစ်နိုင်ငံရဲ့ နိုင်ငံရေး၊ သံတမန်ရေးပါ။နောက်တစ်ခုက လာအိုနိုင်ငံက အာဆီယံနိုင်ငံထဲမှာ landlocked country ပါ။ landlocked country ကနေပြီး land-linked country ဖြစ်လာတယ်။ လာအိုနိုင်ငံကနေ လျှပ်စစ်ဓာတ်အားတွေကို ဗီယက်နမ်၊ ထိုင်းနဲ့ ကမ္ဘောဒီးယားနိုင်ငံတွေကို ရောင်းချနိုင်ခဲ့တဲ့ အနေအထားကို ရောက်လာပါတယ်။ အဲဒီတော့ ကျွန်မတို့က ဒါတွေကို လေ့လာချင်တယ်။ လာအိုနိုင်ငံဟာဆိုရင် မဲခေါင်မြစ်ကြီးတစ်ခုပဲရှိတဲ့နိုင်ငံပါ။ ကျွန်မတို့နိုင်ငံမှာဆိုရင် မြစ်ကြီးလေးစင်းရှိပါတယ်။ လျှပ်စစ်ဓာတ်အားထုတ်လုပ်ရေးအတွက် လေ့လာဖို့၊ ဆွေးနွေးဖို့အတွက် လာအိုနိုင်ငံကို ပထမဆုံးအာဆီယံနိုင်ငံထဲက နိုင်ငံအဖြစ်ရွေးချယ်ခဲ့ခြင်းဖြစ်ပါတယ်။ " ဟု၎င်းကဆိုသည်။
 
■ အဆိုပါ မြန်မာ - လာအို ခရီးစဉ်အတွင်းမှာ နှစ်နိုင်ငံဆက်ဆံရေးကို မဟာဗျူဟာမြောက် ဆက်ဆံရေးအဖြစ်မြှင့်တင်ရန် သဘောတူညီခဲ့ကြောင်းသိရသည်။

■ "ပြီးတော့ ရေအားလျှပ်စစ်နဲ့ပတ်သက်လို့ မြန်မာနဲ့လာအိုနဲ့ပူးပေါင်းပြီးတော့ မဲခေါင်မြစ်ဝှမ်းတစ်လျှောက်မှာ ရေအားလျှပ်စစ် ဘယ်လောက် ထုတ်နိုင်မလဲဆိုတဲ့ Feasibility Study လုပ်ဖို့အတွက် သဘောတူညီချက်ကိုလက်မှတ်ရေးထိုးခဲ့ပါတယ်။ ပြီးတော့ အလုပ်သမားရေးရာနဲ့ပတ်သက်လို့ လက်မှတ်ရေးထိုးခဲ့ပါတယ်။ နှစ်နိုင်ငံမြို့တော် နေပြည်တော်နဲ့ ဗီယင်ကျန်းတို့ကို Sister City အဖြစ် ဆက်သွယ်ဆောင်ရွက်သွားဖို့ လက်မှတ်ရေးထိုးခဲ့ပါတယ်။ ကျန်ဆွေးနွေးခဲ့တဲ့အချက်တွေ လည်းရှိပါတယ်။ ဒါကတော့ ကျိုင်းတုံနဲ့ လွန်ပရာဘန်မြို့ကို လေကြောင်းလိုင်းပြေးဆွဲဖို့၊ နယ်စပ်ဒေသကုန်သွယ်မှုတွေ တိုးမြှင့်ဆောင်ရွက်ဖို့၊ မူးယစ်ဆေးဝါးနဲ့အွန်လိုင်းလိမ်လည်မှု တိုက်ဖျက်ရေးလုပ်ငန်းတွေမှာ သတင်းအချက်အလက်တွေဖလှယ်ဖို့၊ ပူးပေါင်းဆောင်ရွက်ဖို့ ဒါတွေကို ဆွေးနွေးခဲ့ပါတယ်။" ဟုဒုတိယဝန်ကြီး ဒေါက်တာခိုင်ခိုင်စိုးက ဆိုသည်။
 
■ ၎င်းခရီးစဉ်၌ အထင်ရှားဆုံးအောင်မြင်မှုမှာ နှစ်နိုင်ငံမိတ်ဖက်ဆက်ဆံရေးတွင် မဟာဗျူဟာမြောက် မိတ်ဖက်ဆက်ဆံရေးအဖြစ် တိုးမြှင့်ဖို့အတွက် အပြန်အလှန်ဆွေးနွေးနိုင်ခဲ့ကာ ယုံကြည်မှုတည်ဆောက်နိုင်ခဲ့ပြီး ချစ်ကြည်ရင်းနှီးမှု မိတ်ဖက်ဆက်ဆံရေးကို တိုးမြှင့်နိုင်ခဲ့ကြောင်းသိရသည်။

■ မြန်မာ-လာအို ရေအားလျှပ်စစ်စီမံကိန်းအတွက် MoU ရေးထိုးခဲ့ပြီး မြန်မာနှင့်လာအို လျှပ်စစ်ဓာတ်အားထုတ်လုပ် ခြင်းထက် ပထမဆုံးအနေဖြင် မဲခေါင်မြစ်ဝှမ်း၌ နှစ်နိုင်ငံပူးပေါင်းပြီး Feasibility Study လုပ်ဆောင် agreement ရယူခဲ့ခြင်း ဖြစ် ကြောင်း သိရသည်။
" မြန်မာနဲ့လာအို လျှပ်စစ်ဓာတ်အားထုတ်လုပ်ဖို့ဆိုတာထက် ပထမဆုံးအနေနဲ့ မဲခေါင်မြစ်ဝှမ်းမှာ နှစ်နိုင်ငံပူးပေါင်းပြီးတော့ Feasibility Study လုပ်ဖို့အတွက် agreement ရယူခဲ့တာပါ။ ဒီ agreement ကနေ လျှပ်စစ်ဓာတ်အား ဘယ်လောက်ထုတ်နိုင်မလဲဆိုတာပါ။ သမ္မတကြီးက အမြဲတမ်းပြောတာရှိပါတယ်။ စွမ်းအင်လုံခြုံမှုရှိတာက နိုင်ငံဖွံ့ဖြိုးတိုးတက်မှုအတွက် အခြေခံအကျဆုံးဖြစ်တယ်ဆိုတာကို အမြဲတမ်းလမ်းညွှန်မှုပေးခဲ့ပါတယ်။ အဲဒီတော့ ကျွန်မတို့နိုင်ငံမှာလိုအပ်နေတဲ့ လျှပ်စစ်စွမ်းအင်ကို ဘယ်ကနေရရှိနိုင်မလဲဆိုတာ အမြန်ဆုံးနဲ့ ဈေးအသက်သာဆုံး နည်းလမ်းကနေ ရရှိဖို့အတွက် နည်းလမ်းတွေရှာဖွေတဲ့နေရာမှာ ဒါ one of the source ဖြစ်လာနိုင်ပါတယ်" ၎င်းကဆက်ပြောသည်။

■ အဆိုပါ လုပ်ငန်းစဉ်အောင်မြင်ပါက လေ့လာချက်များမှ နှစ်နိုင်ငံပူးပေါင်းပြီး ရေစွမ်းအင်မှ လျှပ်စစ်ရင်းမြစ်များ ဖော်ထုတ်နိုင်ပါက နှစ်နိုင်ငံပြည်သူများအတွက် များစွာအကျိုးဖြစ်ထွန်းနိုင်မည်ဖြစ် ကြောင်းသိရသည်။

#YMG/NN #Yangon_Times