၁၉ ဧပြီ ၂၀၂၄
ဘန်ကောက်မြို့ မင်ဘူရီခရိုင်မှာရှိတဲ့ ကွန်ဒိုတစ်ခုရဲ့ ဘုံဘိုင်ရေတွေ အရောင်နှင့်အနံ့ပြောင်းနေတဲ့အတွက် စုံစမ်းမှုတွေ ပြုလုပ် ရာမှ အဲဒီကွန်ဒိုခေါင်မိုးက ရေတိုင်ကီထဲမှာ သေဆုံးနေတဲ့ မြန်မာအမျိုးသားတစ်ဦးရဲ့ အလောင်းကို ယနေ့ ဧပြီ၁၉ ရက်မနက်က တွေ့ရှိခဲ့ကြတယ်လို့ ထိုင်းသတင်းမီဒီယာတစ်ခုကရေးသားပါတယ်။
ဘုံဘိုင်ရေတွေဟာ အလာလည်းနှေးနေတဲ့အပြင် အနံ့တွေဆိုးနေပြီး အရောင်လည်းပြောင်းနေတဲ့အတွက် ကွန်ဒိုနေသူတွေက ကွန်ဒိုပိုင်ရှင်ထံ အကြောင်းကြားခဲ့တာဖြစ်ပါတယ်။
ပိုင်ရှင်က ခေါင်မိုးမှာတင်ထားတဲ့ ရေတိုင်ကီကိုစစ်ဆေးဖို့ ကျွမ်းကျင်သူတစ်ဦးကို လွှတ်ခဲ့ပါတယ်။ အဲဒီအခါ ရေကန်ထဲ ပေါလောပေါ်နေတဲ့ ရုပ်အလောင်းကိုတွေ့ရှိလိုက်ကြရတာဖြစ်ပါတယ်။
သေဆုံးသူဟာ အသက် ၂၇နှစ်အရွယ် မြန်မာအမျိုးသား အောင်စုမြတ်ဆိုသူဖြစ်ပြီး အဆိုပါကွန်ဒိုရဲ့ လေးထပ်မှာနေထိုင်သူလို့ တွေ့ရှိကြရပါတယ်။ သူဟာ ရေတိုင်ကီထဲမှာ ကိုယ်လုံးတီးသေဆုံးနေပြီး သူ့ရဲ့ အနီရောင်ပုဆိုးကို အောက်ခြေမှာ ခွေလျက် ကလေးတွေ့ရပါတယ်။
တီဘီအက်စ်သတင်းဌာနရဲ့သတင်းပေးပို့ချက်အရ အောင်စုမြတ်ဟာ ဧပြီ၁၇ ရက်က ကွန်ဒိုခေါင်မိုးမှာ သူငယ်ချင်းတွေနှင့် အတူအရက်သောက်ခဲ့ကြပြီးနောက် ပျောက်ဆုံးသွားခဲ့ပါတယ်။ သူတို့သူငယ်ချင်းတစ်သိုက်ဟာ ည၁၁နာရီခန့်မှာ ခွဲခဲ့ကြတယ် လို့ သူ့သူငယ်ချင်းတွေကရဲကိုပြောပြပါတယ်။ အဲဒီအချိန်မှာ အောင်စုမြတ်ဟာ သူ့သမီးနှင့်အတူ ခေါင်မိုးမှာ ဆက်ရှိနေခဲ့ တယ်လို့ သူတို့ကပြောပါတယ်။
အောင်စုမြတ်ဟာ သိပ်ပူတယ်လို့ပြောပြီး ရေတိုင်ကီထဲ ခုန်ချသွားတယ်၊အဲဒီနောက်ပြန်ပေါ်လာပြီး သူသိပ်နေမကောင်းချင်ဘူး လို့ပြောတယ်လို့ သူ့ရဲ့ (၆)နှစ်အရွယ်သမီးကပြောပါတယ်။
အဲဒီနောက် သမီးက အဖေဖြစ်သူကို ခေါင်မိုးမှာ တစ်ဦးတည်းထားခဲ့ပြီး ပြန်လာခဲ့ပါတယ်။ သူဟာ ရေကန်ထဲ နောက်တစ်ကြိမ် ခုန်ဆင်းပြီးနောက် မူးနေလို့ ဒါမှမဟုတ်ကြွက်တက်လို့ ရေနစ်သေသွားတာဖြစ်မယ်လို့ သူ့မိသားစုက ထင်ထားကြပါတယ်။
ဧပြီ ၁၇ ရက်ကတည်းက သူ့ယောကျ်ား ပျောက်ဆုံးခဲ့တာလို့ ဇနီးဖြစ်သူကပြောပါတယ်။ အဲဒါကြောင့် သူမဟာ ဆောက်တည် ရာမရဖြစ်ပြီး ဗေဒင်ဆရာတွေကနေတစ်ဆင့် သဘာဝလွန် ဝိဉာဉ်တွေကိုတောင် အကူအညီတောင်းပြီးရှာခိုင်းသေးတယ်လို့ သတင်းမှာရေးသားထားပါတယ်။
ထိုင်းရတ်သတင်းဌာနရဲ့အဆိုအရ အဲဒီကွန်ဒိုမှာ နေထိုင်သူအများစုဟာ အနီးနားက ဆောက်လုပ်ရေးလုပ်ငန်းခွင်တစ်ခုမှာ အလုပ်လုပ်နေတဲ့ မြန်မာဝန်ထမ်းတွေဖြစ်ကြတယ်လို့သိရပါတယ်။ ကွန်ဒိုနေထိုင်သူအချို့က ရေတိုင်ကီထဲဆင်းတဲ့ သေဆုံးသူ ကို အပြစ်တင်နေကြပြီး အချို့ကတော့ အဲဒီရေတွေကို (၃)ရက်လောက် သောက်သုံးခဲ့ရတဲ့အပေါ် မသတီဖြစ်နေကြပါတယ်။
မင်ဘူရီရဲဌာနအရာရှိတွေက ဖြစ်ရပ်နှင့်ပတ်သက်လို စုံစမ်းမှုတွေပြုလုပ်နေပြီး အောင်စုမြတ်ရဲ့ရုပ်အလောင်းကို ခွဲစိတ်စစ်ဆေး ဖို့ ဆေးရုံကိုလွှဲပေးဖို့စီစဉ်နေကြောင်း သတင်းမှာဖော်ပြထားပါတယ်။
#ymg/knl
