#Local_News
Published_ 21 December 2022

အပြစ်ရှိသူကို ထိုက်သင့်သည့် ပြစ်ဒဏ်ချမှတ်ရန်နှင့် အပြစ်မရှိသူကို အပြစ်ပေးမိခြင်းမျိုး မဖြစ်ရန်လိုကြောင်း နစက ဥက္ကဌက ယနေ့ ဒီဇင်ဘာလ ၂၀ ရက်က ပြုလုပ်သည့် မွန်ပြည်နယ်တရားလွှတ်တော် အဆောက်အဦသစ် ဖွင့်ပွဲအခမ်းအနားတွင် ပြောကြားခဲ့သည်။

ယင်းက တရားစီရင်ရေးကိစ္စမှာ အမှားအယွင်းမခံသည့်ကိစ္စဖြစ်သောကြောင့် ကျူးလွန်သည့်ပြစ်မှုနှင့် သင့်တော်သည့်ပြစ်ဒဏ်မျိုးကို မှန်မှန်ကန်ကန် ချမှတ်နိုင်ခြင်းမှာ တရားစီရင်ရေး၏ အဓိကလိုအပ်ချက် ဖြစ်သည့်အတွက် တရားသူကြီးများအနေဖြင့် ဥပဒေရေးရာတွင် နှံ့စပ်ကျွမ်းကျင်ပြီး စီရင်ထုံးများကို သိရှိနားလည်အောင် အစဉ်ကြိုးစားလေ့လာနေရန် လိုအပ်ကာ ပြစ်မှုကျူးလွန် သူကိုလည်း နောင်တွင် နောက်ထပ်ပြစ်မှု မကျူးလွန်စေရေး ဟန့်တားနိုင်သည့် ပြစ်ဒဏ်စီရင်ချမှတ်နိုင်ရေးအတွက် တရားသူကြီးများ၏ အတွေ့အကြုံနှင့် ဆင်ခြင်တုံတရားက တရားရေးမဏ္ဍိုင်အတွက် အလွန်အရေးကြီးကြောင်းလည်း အသိပေးခဲ့သေးသည်။

နစက အနေဖြင့် ခေတ်ကာလနှင့် မလျော်ညီသည့်ဥပဒေ၊ နည်းဥပဒေများကို ပြင်ဆင်ခြင်း၊ ဖျက်သိမ်းခြင်း၊ အစားထိုးဖြည့်စွက်ခြင်း၊ အသစ်ရေးဆွဲပြဋ္ဌာန်းခြင်းတို့ကိုဆောင်ရွက်လျက်ရှိကြောင်း၊ ဥပဒေပြုရေး၊ အုပ်ချုပ်ရေး၊ တရားစီရင်ရေးဟူသည့် နိုင်ငံတော်၏ အာဏာကြီး (၃)ရပ်တွင် တရားစီရင်ရေးအာဏာကို ပြည်ထောင်စုတရားလွှတ်တော်ချုပ်က ကျင့်သုံး ဆောင်ရွက်နေခြင်းဖြစ်ကြောင်း၊ တရားဥပဒေစိုးမိုးရေး အခန်းကဏ္ဍဟူသည် အရေး ကြီးသည့် မဏ္ဍိုင်တစ်ရပ်ဖြစ်ကာ ပည်သူတစ်ရပ်လုံး၏ နေ့စဉ်လူမှုဘဝလုံခြုံရေးအတွက်လည်း မရှိမဖြစ်သည့် ကဏ္ဍတစ်ခုဖြစ်ကြောင်းလည်း ပြောသည်။

လက်ရှိတွင် နိုင်ငံတော်ဖွဲ့စည်းပုံအခြေခံဥပဒေနှင့်အညီ ပြည်ထောင်စုတရားလွှတ်တော်ချုပ် ၏အောက်တွင် တိုင်းဒေသကြီး၊ ပြည်နယ်တရားလွှတ်တော်များ၊ ခရိုင်တရားရုံးများ၊ ကိုယ်ပိုင်အုပ်ချုပ်ခွင့်ရတိုင်းတရားရုံး၊ ကိုယ်ပိုင်အုပ်ချုပ်ခွင့်ရဒေသ တရားရုံးများ၊ မြို့နယ်တရားရုံးများ၊ ဥပဒေအရ တည်ထောင်သည့် အခြားတရားရုံးများဟူ၍ တရားရုံးအဆင့်ဆင့်ဖွဲ့စည်းပြီး မှုခင်းများကို မှန်မှန်ကန်ကန်နှင့် ကြန့်ကြာမှုမရှိစေရန် ဆောင်ရွက်နေကြကြောင်းလည်း ယင်းက ဆိုသည်။

ကမ္ဘာ့နိုင်ငံအများအပြားတွင်ရှိတရားရုံးများတွင် နည်းပညာကို အသုံးပြု၍ ကွန်ပျူတာ၊ အင်တာနက်နှင့် ဆက်စပ်ပစ္စည်းများ၊ဉာဏ်ရည်တု (AI) နည်းပညာကိုပါ အသုံးပြုလာကြပြီဖြစ်ရာ မြန်မာနိုင်ငံရှိ တရားရုံးများ၌ ICT နည်းပညာများ တဖြည်းဖြည်းနှင့် စတင်အသုံးပြုလာပြီ ဖြစ်ပါကြောင်း၊ သက်သေစစ်ဆေးရာတွင် လည်း Video Conferencing စနစ်ကိုသုံးပြီး အဝေးရောက်နေသည့် သက်သေများအား စစ်ဆေးခြင်းများကိုလည်း လုပ်လာကြပြီဖြစ်ကြောင်း နစက ဥက္ကဌက ထည့်သွင်း ပြောကြားခဲ့သည်။

ယခုအခါ လိုအပ်သည့်တရားရုံး အဆောက်အဦအသစ်များ ဆောက်နိုင်ရန်နှင့် နည်းပညာပိုင်းဆိုင်ရာပစ္စည်းများ ဝယ်ယူ နိုင်ရန်အတွက်လည်း စီမံဆောင်ရွက်ပေးလျက်ရှိကြောင်း၊နစက အနေဖြင့် တိုင်းဒေသကြီး၊ ပြည်နယ်အဆင့်ဖြစ်သည့် မန္တလေးတိုင်း ဒေသကြီးတရားလွှတ်တော်၊ ချင်းပြည်နယ်တရားလွှတ်တော်၊ မွန်ပြည်နယ်တရား လွှတ်တော်တို့ကို ဆောက်လုပ်ခဲ့ရာတွင် ပြီးခဲ့သည့် ဇန်နဝါရီ ၂၂ ရက်က မန္တလေးတိုင်းဒေသကြီးတရားလွှတ်တော်ကို လည်းကောင်း၊ ဒီဇင်ဘာလ ၂၀ ရက် ယနေ့တွင် မွန်ပြည်နယ်တရား လွှတ်တော်ကိုလည်းကောင်း ဖွင့်လှစ်ခဲ့ပြီး ဖြစ်ကြောင်း သိရသည်။

#ymg/mt
#Yangon_Media_Group