#LocalNews
Published_ 19 November 2022

ရန်ကုန်မြို့တွင်း ၂၆ လမ်းရှိ ကုန်မာဆိုင်ပိုင်ရှင်ကိုရန်ပြု၍ လုယက်သွားသူများကို ဖမ်းဆီးမိပြီ ဖြစ်ကြောင်း မြန်မာနိုင်ငံ ရဲတပ်ဖွဲ့က ထုတ်ပြန်သည်။

ပြီးခဲ့သည့် နိုဝင်ဘာလ ၂ ရက် ညနေ ၆ နာရီ ၃၈ မိနစ်အချိန်ခန့်တွင် ပန်းဘဲတန်းမြို့နယ်၊ အမှတ်(၁)ရပ်ကွက်၊ ကုန်သည်လမ်းနှင့် ၂၆ လမ်းထိပ်ရှိ “သစ္စာ”ကုန်မာနှင့် အိမ်အလှဆင်ပစ္စည်းအရောင်းဆိုင်တွင် ဆိုင်ရှင်ဖြစ်သူ ဦးမောင်မောင်ထွန်း(ခ) အင်မရမ်းနှင့် မိတ်ဆွေဖြစ်သူ ဦးမြင့်ကြည်တို့ရှိနေစဉ် Mask အနက်ရောင်များ ဝတ်ဆင်ထားသော အသက်(၃၀)နှစ်ခန့်ရှိ အမျိုးသား ၃ ဦး ဓားမြှောင်များကိုင်ဆောင်ဝင်ရောက်လာကာ ၎င်းတို့နှစ်ဦးအား ရန်ပြုတိုက်ခိုက်ခြိမ်းခြောက်၍ ဦးမောင်မောင်ထွန်းပိုင် မီးခံသေတ္တာအတွင်းရှိ ငွေကျပ်သိန်း ၂၈၀ ၊ ဦးမြင့်ကြည်ပိုင် YGN 4H 6543 Toyota Allion ခဲရောင်မော်တော်ယာဉ်နှင့် I phone ၂ လုံးတို့ကို လုယက်ယူဆောင်သွားခဲ့သည့် ဖြစ်စဉ် ဖြစ်ပွားခဲ့ခြင်းဖြစ်သည်။

လုယက်မှုကျူးလွန်သူ တရားခံများကို ပန်းဘဲတန်း မြို့မရဲစခန်းတွင် (ပ)၆၈/၂၀၂၂၊ ရာဇသတ်ကြီးပုဒ်မ ၃၉၄ ဖြင့် အမှုဖွင့်လှစ်ထားခဲ့ခြင်း ဖြစ်ပြီး ယခုအခါ လုယက်မှုကျူးလွန်သူ တရားခံ သီဟအောင်(ခ)ဝက်ပိန်ပါ ၃ ဦးအား ငွေစက္ကူ ရောရာ ၆၄၀၀၀၀ ကျပ်၊ ဖုန်းမျိုးစုံ ၄ လုံး၊ ရွှေလက်စွပ် ၂ ကွင်း၊ ရွှေနားကပ်တစ်ရံ၊ နာရီတစ်လုံး၊ ပိုက်ဆံအိတ်တစ်လုံး၊ လုယက်မှုကျူးလွန်စဉ် ဘိုဘို(ခ)မြင့်ထွေး ဝတ်ဆင်ခဲ့သည့် ပလေကပ်ပုဆိုးတစ်ထည်နှင့် နက်ပြာရောင်တီရှပ်လက်တိုတစ်ထည်တို့နှင့်အတူ ဖမ်းမိကြောင်း သိရသည်။

ယင်း'သစ္စာ'ကုန်မာဆိုင်တွင် ယခင်က ယာဉ်မောင်းအဖြစ်လုပ်ကိုင်ခဲ့ဖူးသော အသက် ၂၉ နှစ်အရွယ် သီဟအောင် ဝက်ပိန်ဆိုသူဖြစ်ကြောင်း စတင်ဖော်ထုတ်သိရှိခဲ့ရပြီးနောက် လုယက်ယူဆောင်သွားခံခဲ့ရသည့် YGN 4H/6543 Toyota Allion ခဲရောင်မော်တော်ယာဉ်ကို ရန်ကင်းမြို့နယ်တွင် ပြန်လည်တွေ့ရှိသိမ်းဆည်းရမိခဲ့ပြီးနောက် ယင်းကို လုယက်မှုကျူးလွန်ရာမှရရှိသည့် ငွေများဖြင့် ဝယ်ယူထားသည့် ရွှေလက်စွပ် ၂ ကွင်း၊ VIVO Y16 အမျိုးအစား အနက်ရောင်လက်ကိုင်ဖုန်းတစ်လုံး၊ Digitech အမျိုးအစား နာရီတစ်လုံး၊ အနက်ရောင်ပိုက်ဆံအိတ်တစ်လုံးနှင့် ငွေကျပ် ၆၄၀၀၀၀ ကျပ်တို့နှင့်အတူ စတင်ဖမ်းဆီးရမိခဲ့ခြင်းဖြစ်ကြောင်း ရဲတပ်ဖွဲ့၏ ထုတ်ပြန်ချက်တွင် ဖော်ပြထားသည်။

သီဟအောင်(ခ)ဝက်ပိန်၏ထွက်ဆိုချက်အရ လုယက်မှုတွင် အတူပါဝင်ကျူးလွန်ခဲ့သူများဖြစ်ကြသည့် မင်္ဂလာဒုံမြို့နယ်၊ ပေါင်းကူးဉာဏရပ်ကွက်၊ မဉ္ဇူ(၂)လမ်းနေ မျိုးဇော်ထွန်း(၃၁)နှစ်အား လုယက်မှုကျူးလွန်ရာမှရရှိသည့် ငွေများဖြင့် ဝယ်ယူထားသည့် Redmi Note 11 Pro Prime အမျိုးအစား အနက်ရောင်ဖုန်းတစ်လုံးနှင့်အတူ ယင်းနေ့ ည ၉ နာရီခွဲအချိန်တွင် ၎င်း၏နေအိမ်၌ ဖမ်းဆီးရမိခဲ့ပြီး မရမ်းကုန်းမြို့နယ်၊ အမှတ်(၈)ရပ်ကွက်၊ မြစံပယ်လမ်း၊ အမှတ်(၉၃)နေ ဘိုဘို (ခ)မြင့်ထွေး(၂၅)နှစ်အား လုယက်မှုကျူးလွန်ရာမှရရှိသည့် ငွေများဖြင့် ဝယ်ယူထားသည့် ရွှေနားကပ်တစ်ရံ၊ VIVO Y17 အမျိုးအစား နက်ပြာရောင်ဖုန်းတစ်လုံး၊ Techno Spark 7 အမျိုးအစား အစိမ်းရောင်ဖုန်းတစ်လုံးနှင့် အခင်းဖြစ်စဉ် ၎င်းဝတ်ဆင်ခဲ့သည့် ပလေကပ်ပုဆိုးတစ်ထည်၊ နက်ပြာရောင်တီရှပ်လက်တိုတစ်ထည်တို့နှင့်အတူ ယင်းနေ့ ည ၁၀ နာရီအချိန်တွင် ၎င်း၏နေအိမ်၌ ထပ်မံဖမ်းဆီးရမိခဲ့ကြောင်း သိရသည်၊၊

အခင်းဖြစ်စဉ်ကရရှိခဲ့သော ငွေကျပ်သိန်း ၂၈၀ ကို မျိုးဇော်ထွန်းနှင့် ဘိုဘို(ခ)မြင့်ထွေးတို့အား တစ်ဦးလျှင် ကျပ်သိန်း ၃၀ စီပေး၍ သီဟအောင်(ခ)ဝက်ပိန်က ကျန်ရှိငွေ ကျပ်သိန်း ၂၂၀ ကို ယူဆောင်ခဲ့ခြင်းဖြစ်ကြောင်း ထွက်ဆိုခဲ့ကြောင်းလည်း ထုတ်ပြန်ချက်တွင်ဖော်ပြထားကြောင်းသိရသည်၊၊

ymg/tthl
#Yangon_Media_Group