#Local_News
Published _ 28 september 2022
တောင်ကိုရီးယားသမ္မတနိုင်ငံ၊ ဆိုးလ်မြို့ရှိ မြန်မာသံရုံးတွင် နိုင်ငံကူးလက်မှတ် ထုတ်ပေးသည့် စက်ချို့ယွင်းနေသည့်အတွက် သာမန်မြန်မာနိုင်ငံကူးလက်မှတ် သက်တမ်းတိုးလျှောက်ထားခြင်းများအား ယနေ့ စက်တင်ဘာလ ၂၈ရက်ကစတင်၍ ထုတ်ပေးနိုင်ခြင်း မရှိသေးကြောင်း အဆိုပါသံရုံးမှ ထုတ်ပြန်ထားသည်။
နိုင်ငံကူးလက်မှတ်ထုတ် စက်ချို့ယွင်းနေသည်ကို အမြန်ဆုံး ပြင်ဆင်နေလျက်ရှိကြောင်းလည်း သံရုံး၏ ထုတ်ပြန်ချက်တွင် ဖော်ပြထားသည်။
စက်ချို့ယွင်းနေဆဲကာလတွင် လူကိုယ်တိုင်၊ စာတိုက်မှတဆင့် သက်တမ်းတိုးလျှောက်ထားသည့် မြန်မာနိုင်ငံ ကူးလက်မှတ်တွေကို ထုတ်ပေးနိုင်ခြင်းမရှိသေးသောကြောင့် ခေတ္တစောင့်ဆိုင်းပေးရန်လည်း သံရုံးမှ အသိပေးထားရှိသည်။
မြန်မာနိုင်ငံကူးလက်မှတ် သက်တမ်းတိုး ပြန်ထုတ်ပေးနိုင်မည့် အခြေအနေနှင့် နေ့ရက်ကို သံရုံးမှ ထပ်မံကြေညာပေးမည်ဟုလည်း ယင်းထုတ်ပြန်ချက်၌ ထည့်သွင်းရေးသားထားသည်။
#ymg/NN
#Yangon_Media_Group
