#Local_News
Published_28 September 2022
ထိုင်းနိုင်ငံရောက် မြန်မာရွှေ့ပြောင်းအလုပ်သမားများအပါအဝင် မြန်မာလုပ်သားများ လာမည့်အောက်တိုဘာ ၁ ရက်မှစတင်ပြီး လုပ်ခလစာတိုးမည်ဖြစ်ကြောင်း အလုပ်သမားအရေးဆောင်ရွက်သူများထံမှ သိရသည်။
ထိုင်းအစိုးရအနေဖြင့် နိုင်ငံအတွင်းရှိ ရွှေ့ပြောင်းအလုပ်သမားတွေ၏ အခြေခံလုပ်ခလစာကို အနည်းဆုံး ၃၂၈ ဘတ်ကနေ အများဆုံး ၃၅၄ ဘတ်အထိ ခရိုင်အလိုက် တိုးမြှင့်ပေးသွားရန် သဘောတူထားပြီးဖြစ်ကြောင်း သိရသည်။
ထိုင်းနိုင်ငံ၏ အခြေခံလုပ်ခလစာတွေ တိုးမြှင့်သတ်မှတ်ခဲ့တာဖြစ်ပြီး ရွှေ့ပြောင်းအလုပ်သမားတွေအပြင် ထိုင်းနိုင်ငံသားတွေ၏ အခြေခံလုပ်ခလစာတွေကိုလည်း ဘတ် ၄၅၀ ကနေ ဘတ် ၆၅၀ ထိ တိုးမြှင့်ပေးသွားမည်ဖြစ်ကြောင်းလည်းသိရသည်။
မြန်မာ-ထိုင်းနှစ်နိုင်ငံအကြား MoU စနစ်ဖြင့် လုပ်သားစေလွှတ်ခြင်းကို ကိုဗစ်ကာလအလွန် ၂၀၂၂ ခုနှစ် မေလတွင်စတင်၍ ပြန်လည်စေလွှတ်ခဲ့ခြင်းဖြစ်သည်။
ယင်းအပြင် ပြည်ပရောက် မြန်မာရွှေ့ပြောင်းအလုပ်သမားများအနေဖြင့် ပြည်တွင်း၌ ဖွင့်လှစ်ထားသော ရွှေ့ပြောင်းလုပ်သားများထောက်ပံ့ကူညီရေးဗဟိုဌာနများမှ နည်းလမ်းနှင့် အကြံဉာဏ်များကိုလည်း အခမဲ့ရယူနိုင်ကြောင်း အလုပ်သမားသံအရာရှိရုံးက အသိပေးထားသည်။
လက်ရှိတွင် ပြည်တွင်း၌အလုပ်အကိုင်ရှာပါးလာခြင်းကြောင့် ထိုင်းနိုင်ငံသို့ မြန်မာရွှေ့ပြောင်းအလုပ်သမား အများအပြားသွားရောက်လုပ်ကိုင်နေပြီး တရားမဝင်သွားရောက်မှုများလည်း ရှိနေကြောင်း သိရသည်။
#ymg/sth
#Yangon_Media_Group
