#Local_News
Published-26 Setember 2022
ပြည်တွင်းဆန်ဈေးကွက်တွင် ဆန်သစ်ပေါ်လာချိန်နီးလာသော်လည်း ဆန်ဟောင်းဈေးနှုန်းမှာ ကျဆင်းလာခြင်းမရှိပဲ အမြင့်ဈေးတွင်ဆက်ရှိနေကြောင်း ဆန်ရောင်းချသူ ဦးဝင်းနိုင်က ပြောသည်။
ဆန်ဈေးကွက်တွင် ပြည်တွင်းစားသုံးသည့် ဆန်ဟောင်းများမှာ အမြင့်ဈေးတန်းတွင်တည်ငြိမ်နေပြီး အရောင်းအဝယ်ထိုင်းနေကြောင်း၊ လာမည့် နိုဝင်ဘာနှင့် ဒီဇင်ဘာလများတွင် ဆန်ဈေးကွက်တွင် ဆန်သစ်များပေါ်လာမည်ဖြစ်၍ ဆန်ဟောင်းများ အရောင်းအဝယ် ပြန်သွက်လာနိုင်ပြီး ဈေးမြင့်တက်လျှင်လည်း အနည်းငယ်သာမြင့်တက်နိုင်ကြောင်း ယင်းက ပြောသည်။
“ဆန်ဈေးက ကျလည်းမကျဘူး။ အမြင့်ဈေးမှာပဲရှိနေတယ်။ အဟောင်းကလည်း ၉ လနဲ့ ၁၀ လပိုင်းဆိုကုန်ပြီ။ ဆန်ဟောင်းရောင်းကောင်းမယ်။ ဈေးတက်ရင်လည်း ပါးပါးပဲဖြစ်နိုင်တယ်” ဟု ယင်းက ပြောသည်။
လာမည့် သီတင်းကျွတ်၊ တန်ဆောင်မုန်းတွင် ပဲခူး၊ ဧရာဝတီတိုင်းတို့မှ ဆန်အသစ် ပေါ်လာမည်ဖြစ်ရာ ယင်းမတိုင်ခင်အထိ လက်ရှိ ဆန်ဈေးနှုန်း အလားအလာသည် ခန့်မှန်းရခက်မည်ဖြစ်ကြောင်း၊ ယင်းအပြင် ပြည်တွင်း စားသုံးမှု အများဆုံးဖြစ်သော ဆန်ချော အမျိုးအစားများမှာ ရွှေဘိုဘေးကြား (ရွှေဘိုပေါ်ဆန်း)၊ ရန်ကုန် ပေါ်ဆန်း၊ ဧရာမင်း၊ မဂျမ်းတော၊ ဧရာပဒေသာ၊ မနောသုခ၊ ရွှေသွယ်၊ နွေဇီယာ စသည်တို့ ဖြစ်ပြီး ယင်းတို့အနက် ရွှေဘိုဘေးကြား ဆန်အမျိုးအစားသည် ဝယ်လိုအား အကောင်းဆုံးနှင့် ဈေးအမြင့်ဆုံး ဖြစ်ကြောင်း သိရသည်။
ပြည်ပတင်ပို့မှုအနေဖြင့် ယခင်ကနယ်စပ်ကနေ တရုတ်နိုင်ငံသို့ အဓိကတင်ပို့ခဲ့ပြီး ကိုဗစ်-၁၉ ကြောင့် တရုတ်ကိုတင်ပို့သည့်ဆန်မှာ လျော့ကျသွားခဲ့ကာ ပင်လယ်ရေကြောင်းကုန်သွယ်မှုမှတစ်ဆင့် ပုံမှန်တင်ပို့လျက်ရှိကြောင်း သိရသည်။
#Ymg/STH
#Yangon_Media_Group
