#Local_News
Published _ 13 September 2022
စင်ကာပူနိုင်ငံတွင် အလုပ်ရမည်ဟုဆိုကာ ပြည်ပအလုပ်အကိုင်အေဂျင်စီအချို့၏ နာမည်များသုံး၍ ငွေလိမ်လည်မှုတွေရှိနေကြောင်း အလုပ်သမားအရေး လှုပ်ရှားသူတွေထံမှ သိရသည်။
စင်ကာပူတွင် အလုပ်ရမည်ဟုဆိုကာ လူတစ်ဦးလျင် ဝန်ဆောင်ခ ကျပ်သိန်း ၆၀ နီးပါး တောင်းယူလိမ်လည်နေခြင်းဖြစ်ကြောင်း ၎င်းတို့က ဆိုထားသည်။
"မိန်းကလေးတွေရော၊ ယောကျာ်းလေးတွေရော အလိမ်ခံနေရတာ တော်တော်များတယ်။ ပွဲစားကနေ ချိတ်ပြီးဖြစ်နေတာ။ ဝန်ဆောင်ခကို စာချုပ်စာတမ်းနဲ့ပေးတာပဲ။ တကယ်တော့ သူတို့ပေးလိုက်တဲ့ဟာက အေဂျင်စီမဟုတ်ဘဲ အလိမ်အညာဖြစ်နေတာ။ ပိုက်ဆံပေးပြီးမှ မသွားရတာတွေ အများကြီး"ဟု ရွှေ့ပြောင်းအလုပ်သမားအရေး ကူညီနေသူများထံမှ သိရသည်။
စင်ကာပူနိုင်ငံဟာ မြန်မာလုပ်သား အများဆုံးသွားရောက်သည့် နိုင်ငံများအနက် တစ်နိုင်ငံဖြစ်ပြီး ကိုဗစ်ကပ်ရောဂါကာလအလွန်တွင် သွားရောက်လုပ်ကိုင်သူအများဆုံး နိုင်ငံတစ်ခုလည်း ဖြစ်သည်။
သွားရောက်လုပ်ကိုင်လိုသူများသလို လိမ်လည်တာလည်း များနေကြောင်း ပြည်ပအလုပ်အကိုင်အေဂျင်စီတချို့မှ ဆိုထားသည်။
"ခေါ်တာတော့ ခေါ်တယ်။ အရေအတွက် အကန့်အသတ်ရှိတယ်။ ဒါကို အခွင့်ကောင်းယူပြီး လိမ်နေတာတွေက ပိုများနေတယ်"ဟု ပြည်ပအလုပ်အကိုင်အေဂျင်စီ လုပ်ငန်းရှင်တစ်ဦးက ပြောသည်။
စင်ကာပူနိုင်ငံတွင် မြန်မာလုပ်သား တစ်သိန်းနီးပါးရောက်ရှိနေကြောင်းလည်း သိရှိရသည်။
စင်ကာပူ၌ အလုပ်လုပ်လိုသူများ အနေဖြင့် ချိတ်ဆက်ထားသည့် အေဂျင်စီဟာ တရားဝင်ရပ်တည်လုပ်ကိုင်မှု ရှိ၊ မရှိ အရင်လေ့လာရန်လိုအပ်ကြောင်း ပြည်ပအလုပ် အကိုင် အေဂျင်စီများမှ တိုက်တွန်းထားရှိသည်။
#ymg/NN
#Yangon_Media_Group
