#LocalNews
Published - 29 March 2022
အိန္ဒိယနိုင်ငံမှ မြန်မာမတ်ပဲနှင့် ပဲစဉ်းငုံတင်သွင်းခွင့်ကို ၂၀၂၃ခုနှစ် မတ်လအထိ တစ်နှစ်ထပ်တိုးသတ်မှတ်လိုက်တယ်လို့ ATC ဧရာကုန်သွယ်မှုဗဟိုဌာနက ထုတ်ပြန်ထားပါတယ်။
မြန်မာမတ်ပဲနှင့် ပဲစဉ်းငုံ လွတ်လပ်စွာ တင်သွင်းခွင့်ကို ယခုနှစ် မတ်လအထိသာ နောက်ဆုံးလို သတ်မှတ်ထားရာကနေ နောက်နှစ် မတ်လအထိ ထပ်တိုးသတ်မှတ်လိုက်တာ ဖြစ်ပါတယ်။
“ လာမယ့်နှစ် ၂၀၂၃ မတ်လအထိ တစ်နှစ်ထပ်တိုးလိုက်တာပေါ့။ အိန္ဒိယနိုင်ငံဘက်က သူတို့ ငွေကြေးဖေါင်းပွတာနဲ့ ရင်ဆိုင်နေရတာရယ်၊ နောက်တစ်ချက်က ပဲဈေးကွက်ကို ထိန်းချင်တာလည်းပါတယ်။ ပမာဏအကန့်အသတ်မရှိဆိုပြီး သတ်မှတ်လိုက်တာ။ အဲဒါကြောင့် သူတို့ ပြည်တွင်းဈေးကို ထိန်းလိုက်သလို ဖြစ်သွားတယ်။ သူတို့ ပြည်တွင်းမှာ ဈေးအများကြီး သိပ်မတက်တော့ဘူးပေါ့” လို့ ဧရာကုန်သွယ်မှု ဗဟိုဌာန ဦးနေဝင်းစိုးက YMG ကို ပြောပါတယ်။
လက်ရှိ ပြည်တွင်း မတ်ပဲဈေးကွက်မှာ ၂၀ ပိဿာ တစ်အိတ်ကို ၅၀၀၀၀ ဝန်းကျင်းမှာ ဈေးရရှိနေပြီး မြန်မာနိုင်ငံက အဓိကတင်သွင်းနေတဲ့ အိန္ဒိယနိုင်ငံက ပဲတင်သွင်းခွင့် တစ်နှစ်ထက်တိုးလိုက်တဲ့အတွက် ပြည်တွင်း ပဲဈေးကွက်အခြေအနေမှာ အေးသွားနိုင်တယ်လို့ ဦးနေဝင်းစိုးက သုံးသပ်ပါတယ်။
“ ကျွန်တော်တို့ပြည်တွင်းဈေးကွက်မှာလည်း အိန္ဒိယကို အေးဆေးလည်းတင်သွင်းလို့ ရပြီး တစ်နှစ်လောက်အချိန်ရပြီ ဆိုတော့ ပဲက အလုအယက်ဝယ်စရာမလိုတော့ဘူး ဆိုတော့ ပဲဈေးက နည်းနည်းတော့ ပြန်အေးသွားနိုင်တယ်။ ဒါ့ပေမယ့် လက်တလော အခြေအနေပဲ ပြန်အေးသွားနိုင်တာ၊ မြန်မာနိုင်ငံက ကုန်ဈေးနှုန်း အားလုံးဟာ ရွှေဈေး၊ ဒေါ်လာဈေး၊ မြန်မာငွေကြေး ဈေးနှုန်းပေါ်မှာ မူတည်နေတာဆိုတော့ အများကြီးတော့ မကျနိုင်ဘူး ပြန်တော့ ဈေးပြန်တက်နိုင်တယ်” လို့ ဦးနေဝင်းစိုးက ပြောပါတယ်။
မြန်မာနိုင်ငံနဲ့ အိန္ဒိယနိုင်ငံအကြား ၂၀၂၁-၂၀၂၂ ဘဏ္ဍာနှစ်ကနေ ၂၀၂၅-၂၀၂၆ ဘဏ္ဍာနှစ်အထိ အိန္ဒိယနိုင်ငံကို မတ်ပဲ တန်ချိန် ၂ ဒဿမ ၅ သိန်းနဲ့ ပဲစဉ်းငုံ တန်ချိန် ၁ သိန်းကို တင်ပို့ရောင်းချသွားဖို့ လက်မှတ်ရေးထိုးထားပါတယ်။
ymg/ei
