#LocalNews
Published - 27 Jan 2022

ဘဏ်အကောင့်အတွင်းရှိ ငွေနှင့် ငွေသားလဲလှယ်ပေးသူများအား လိမ်လည်ချိန်းဆိုကာ အုပ်စုဖွဲ့၍ ရန်ကုန်မြို့မှာ လုယက်မှုကျူးလွန်ခဲ့သူများအား ရဲတပ်ဖွဲ့က ဖော်ထုတ်ဖမ်းဆီးလိုက်ပြီဖြစ်တယ်လို့ သိရပါတယ်။

အဆိုပါ လူယက်မှုဖြစ်စဉ်များတွင် ပါဝင်ခဲ့သူ တရားခံအမျိုးသား ၁၀ ဦးအား ငှက်ကြီးတောင်ဓား ၃ ချောင်း၊ စိတ်ကြွ ရူးသွပ်ဆေးပြား ၆၀ ပြား၊ မော်တော်ဆိုင်ကယ် ၄ စီး၊ မော်တော်ယာဉ် ၄ စီး၊ ငွေစက္ကူ ရောရာ ၁,၆၉၁,၅၀၀ ကျပ်တို့နှင့်အတူ ဖမ်းဆီးရမိခဲ့ခြင်းဖြစ်တယ်လို့ ရဲတပ်ဖွဲ့က ထုတ်ပြန်ထားပါတယ်။

ဖြစ်စဥ်မှာ ယခုဇန်နဝါရီလ ၁၈ ရက်နေ့က “Kaung Wai Yan" အမည်ဖြင့် လူမှုကွန်ယက် စာမျက်နှာ၌ ဘဏ်အကောင့်အတွင်းရှိ ငွေနှင့်ငွေသား လဲလှယ်လိုကြောင်း ဖော်ပြထားသည်ကို တွေ့ရှိရသဖြင့် မရမ်းကုန်းမြို့နယ်၊ တော်ဝင်အိမ်ရာ၊ တိုက်(H)တွင်နေထိုင်သူ ဦးအောင်ခန့်ဖြိုးနှင့် ဒေါ်မျိုးသန္တာညွန့်တို့ ၂ ဦးက ငွေကျပ် ၅၉၅ သိန်းနှင့်အတူ YGN-3Q/9851 Swift အဖြူရောင်ယာဉ်ဖြင့် ရန်ကင်းမြို့နယ်၊ အမှတ်(၁၄)ရပ်ကွက်၊ မင်းရဲကျော်စွာလမ်း၌ ငွေသားလဲလှယ်မည့်သူများအား စောင့်ဆိုင်းနေစဉ် လုယက်မှုကျုးလွန်သူများဖြစ်သည့် အမျိုးသား ၃ ဦးနှင့် အမျိုးသမီး ၂ ဦးတို့က YGN-6D/6839 Mark-II အဖြူရောင်ယာဉ်ဖြင့် ရောက်ရှိလာပြီး စောင့်ဆိုင်းနေသူ ၂ ဦးအား လက်ထိပ်ခတ်ချုပ်နှောင်ကာ ၎င်းတို့၏ မော်တော်ယာဉ်အတွင်း ထည့်သွင်း၍ ငွေကျပ် ၅၉၅ သိန်းနှင့် ဒေါ်မျိုးသန္တာညွန့်၏ ပိုက်ဆံအိတ် အတွင်းမှ ငွေကျပ် ၃ သိန်း စုစုပေါင်း ငွေကျပ် ၅၉၈ သိန်းခန့်အား လုယက်ယူဆောင်ကာ ၎င်းတို့ စီးနင်းလာသည့် ယာဉ်ဖြင့် ထွက်ပြေးတိမ်းရှောင်သွားခဲ့တာဖြစ်တယ်လို့ ဆိုပါတယ်။

ထိုကြောင့် အဆိုပါဖြစ်စဉ်မှ လုယက်မှုကျုးလွန်သူများအား ဖော်ထုတ်ဖမ်းဆီးနိုင်ရေးအတွက် ဆောင်ရွက်ခဲ့ရာတွင် ပြစ်မှုကျူးလွန်ရာတွင် အသုံးပြုခဲ့သောမော်တော်ယာဉ်သည် ယာဉ်အမှတ် YGN-6D/6839 အစား 9F/1553 အား ပြောင်းလဲတပ်ဆင်၍ အင်းလျားရိပ်သာလမ်းမှ ကမ္ဘာအေးဘုရားလမ်းအတိုင်း ထွက်ခွာသွားကြောင်း သိရှိရသဖြင့် ဆက်လက်စုံစမ်းဖော်ထုတ်ခဲ့ရာ ဇန်နဝါရီလ ၂၄ ရက်နေ့တွင် ပြည်လမ်းမကြီး၊ စော်ဘွားကြီးကုန်းမီးပွိင့်အနီးတွင် ပြစ်မှုကျူးလွန်ရာတွင် အသုံးပြုခဲ့သည့် အဆိုပါ (လိုင်စင်မဲ့)မော်တော်ယာဉ်နှင့်အတူ ပြစ်မှုကျုးလွန်ခဲ့သူများဖြစ်သည့် ရွှေပြည်သာမြို့နယ်နေ ဝင်းမင်းသန်း၊ ချစ်စိုးဦး၊ မင်းအောင်(ခ)တင်မင်းအောင်၊ စိုးဝေကျော်(ခ)စိုးစိုး တို့ ၄ ဦးအား ဖမ်းဆီးရမိခဲ့ခြင်းဖြစ်ပြီး တရားခံ မင်းအောင်(ခ)တင်မင်းအောင် ၏ ထွက်ဆိုချက်အရ ၎င်း၏ နေအိမ်မှ VOLTY အမျိုးအစား မော်တော်ဆိုင်ကယ် ၁ စီးအား ထပ်မံသိမ်းဆည်းရမိခဲ့ခြင်းဖြစ်တယ်လို့ သိရပါတယ်။

ဖမ်းဆီးရမိတရားခံများ၏ ထွက်ဆိုချက်အရ ဇန်နဝါရီလ ၂၄ ရက် ညနေပိုင်းတွင် ရွှေပြည်သာမြို့နယ်၊ (၂၄)ရပ်ကွက်၊ ဘုန်းကြီးကျောင်းလမ်းနေ ကိုထက်(ခ)ရဲထက် ၊ (၄)လမ်းနေ ဝင်းမြင့်ထွန်း(ခ)အသေးလေး တို့ ၂ ဦးအား အဆိုပါမြို့နယ် ပုလဲလမ်းရှိ ဆိုင်ကယ်ရောင်းဝယ်ရေးဆိုင်၌Kawasaki နှင့် Honda အမျိုးအစား မော်တော်ဆိုင်ကယ် ၂ စီး၊
ငွေကျပ် ၁,၀၃ ၂,၀၀၀ နှင့်အတူ ဖမ်းဆီးရမိခဲ့ခြင်းဖြစ်တယ်လို့ ဆိုပါတယ်။

ဒါ့အပြင် ဆက်စပ်တရားခံများဖြစ်တဲ့ အောင်ကျော်ဇော(ခ)ကိုအောင်အား စိတ်ကြွရူးသွပ်ဆေးပြား(၆၀)ပြား၊ ငှက်ကြီးတောင်ဓား ၃ ချောင်း၊ ငွေကျပ် ၅၉၅,၀၀၀၊ Honda Odyssey အမျိုးအစား (လိုင်စင်မဲ့)မော်တော်ယာဉ် ၁ စီးတို့နှင့်အတူ (၃၄/၁၀)ရပ်ကွက်ရှိ ၎င်း၏ နေအိမ်၌လည်းကောင်း၊ မြောက်ဥက္ကလာပမြို့နယ်၊ (၄) ရပ်ကွက်၊ မလိခလမ်းနေ ကျော်သန်းနှင့် ရွှေပြည်သာမြို့နယ်၊ (၆)ရပ်ကွက်၊ ချောင်းသာပတ်လမ်းနေ ရဲမင်းကို(ခ)ရဲကြီး(၃၃)နှစ်တို့ ၂ ဦးအား ငွေ ၁၉,၅၀၀ ကျပ်၊ မော်တော်ဆိုင်ကယ် ၁ စီး၊ Pajero အမျိုးအစား (လိုင်စင်မဲ့)မော်တော်ယာဉ် ၁ စီးတို့နှင့် အတူ ရွှေပြည်သာမြို့နယ်၊ အမှတ်(၄)လမ်း၊ Triple Three KTV ဆိုင်၌ လည်းကောင်း၊ အင်းစိန်မြို့နယ်၊ ဖော့ကန်ရပ်ကွက်၊ မြို့တော်ဂေါက်ကွင်းအိမ်ရာ၊ တိုက်(၁)နေ သက်ဦး(၃၄)နှစ်အား ငွေ ၄၅,၀၀၀ ကျပ်၊ JETOUR အမျိုးအစား မော်တော်ယာဉ် ၁ စီးတို့နှင့်အတူ မင်္ဂလာဒုံမြို့နယ်၊ သင်္ဃန်းကျွန်းကြီး ရပ်ကွက်၊ အမှတ်(၃)လမ်း၊ Valentine KTV ဆိုင်၌လည်းကောင်း ထပ်မံဖမ်းဆီးရမိခဲ့ခြင်းဖြစ်ပါတယ်။

ဖမ်းဆီးရမိတရားခံများ၏ ထွက်ဆိုချက်အရ ဇန်နဝါရီလ ၁၈ ရက်တွင် ရန်ကင်းမြို့နယ်၊ မင်းရဲကျော်စွာလမ်း၌ လုယက်မှုကျူးလွန်ရာတွင် ကိုထက်(ခ)ရဲထက်၊ ဝင်းမြင့်ထွန်း(ခ) အသေးလေး၊ ရဲမင်းကို(ခ)ရဲကြီး၊ ဖမ်းဆီးရန်ကျန်ရှိသည့် ရွှန်းလဲ့ တို့သည် တရားခံ သက်ဦး မောင်းနှင်သည့် YGN-6D/6839 Mark-II အဖြူရောင် (လိုင်စင်မဲ့)ယာဉ်ပေါ်တွင် လည်းကောင်း၊ ကျော်သန်း၊ စိုးဝေကျော် နှင့် ချစ်စိုးဦး တို့သည် ဝင်းမင်းသန်း မောင်းနှင်သည့် YGN-7D/6457 Pajero ခဲရောင်(လိုင်စင်မဲ့) ယာဉ်ပေါ် တွင်လည်းကောင်း၊ ဖမ်းဆီးရန်ကျန်ရှိသည့် ကိုဖြိုး နှင့် ဖြိုးလေး တို့သည် မင်းအောင်(ခ) တင်မင်းအောင် မောင်းနှင်သည့် Vitz ခဲရောင်ယာဉ်ပေါ်တွင် လည်းကောင်း အသီးသီးလိုက်ပါ၍ လုယက်မှုကို ကျူးလွန်ခဲ့ခြင်းဖြစ်တယ်လို့ ရဲတပ်ဖွဲ့၏ သတင်းထုတ်ပြန်ချက်မှာ ဖော်ပြခဲ့ပါတယ်။

ဖမ်းဆီးရမိတရားခံများ၏ ထွက်ဆိုချက်အရ ဖမ်းဆီးရန်ကျန်ရှိနေသည့် ကိုဖြိုး၊ ရခိုင်လေး၊ ဖြိုးလေး၊ ရွှန်းလဲ့တို့နှင့်အတူ ရန်ကုန်တိုင်းဒေသကြီးအတွင်းရှိ မြိုနယ်အချို့တွင် ဘဏ်အကောင့်အတွင်းရှိငွေနှင့် ငွေသားလဲလှယ်သူများအား လိမ်လည်ချိန်းဆိုခေါ်ယူကာ အုပ်စုဖွဲလုယက်မှု(၈)ကြိမ် ကျူးလွန်ခဲ့ကြောင်းနှင့် ကျူးလွန်ခဲ့မှုများအနေဖြင့် ၂၀၂၁ ခုနှစ်၊ ဩဂုတ်လတွင် မင်္ဂလာဒုံမြို့နယ်၊ ဇေကမ္ဘာဝင်းအတွင်း၌ ငွေကျပ် ၄၂၀ သိန်းအားလည်းကောင်း၊ ၂၀၂၁ ခုနှစ်၊ စက်တင်ဘာလတွင် အင်းစိန်မြို့နယ်၊ သံမဏိစက်ရုံလမ်း၌ ငွေကျပ် ၁၁၀ သိန်းအား လည်းကောင်း၊ ၂၀၂၁ ခုနှစ်၊ အောက်တိုဘာလ ၉ ရက်တွင် မရမ်းကုန်းမြို့နယ်၊ မင်းဓမ္မလမ်း၊ MCC ခန်းမအနီး၌ ငွေကျပ် ၄၇၀ သိန်းအား လည်းကောင်း၊ ၂၀၂၁ ခုနှစ်၊ အောက်တိုဘာလ ၂၆ ရက်တွင် မရမ်းကုန်းမြို့နယ်၊ သံသုမာလမ်း ၌ ငွေကျပ် ၅၆,၄၆၀,၀၀၀ သိန်းအား လည်းကောင်း၊ ၂၀၂၁ ခုနှစ်၊ နိုဝင်ဘာလ ၁ ရက်တွင် သင်္ဃန်းကျွန်းမြို့နယ်၊ သုဝဏ္ဏ၊ ပေါ်ဆန်းမွှေးလမ်း၌ ငွေကျပ် ၇၀၀ သိန်းအား လည်းကောင်း၊ ၂၀၂၁ ခုနှစ်၊ ဒီဇင်ဘာလတွင် မရမ်းကုန်းမြို့နယ်၊ ဥက္ကလာပ ဂေါက်ကွင်းအနီး ဂန္ဓမာလမ်း၌ ငွေကျပ် ၁၂၀ သိန်းအား လည်းကောင်း၊ ၂၀၂၂ ခုနှစ်၊ ဇန်နဝါရီလ ၁၂ ရက်တွင် မြောက်ဥက္ကလာပမြို့နယ်၊ ဝေဘာဂီ မြို့သစ်၊ အမှတ်(၄)ရပ်ကွက်၊ စိန်စီ(၂)လမ်း၌ ငွေကျပ် ၆၀၀ သိန်းအားလည်းကောင်း၊ ၂၀၂၂ ခုနှစ်၊ ဇန်နဝါရီလ ၁၈ ရက်တွင် ရန်ကင်းမြို့နယ်၊ အမှတ်(၁၄)ရပ်ကွက်၊ မင်းရဲကျော်စွာလမ်း၌ ငွေကျပ် ၅၉၈ သိန်းအားလည်းကောင်း အသီးသီးလုယက်ခဲ့ခြင်းဖြစ်တယ်လို့ သိရပါတယ်။

ဒါ့အပြင် ဖမ်းဆီးရမိတရားခံများ၏ ထွက်ဆိုချက်အရ တရားခံ သက်ဦးနှင့် ကျော်သန်း တို့သည် လူမှုကွန်ယက်စာမျက်နှာမှတစ်ဆင့် ငွေလဲလှယ်မည့်သူများအား လိမ်လည်ချိတ်ဆက်ခေါ်ယူပေးခဲ့ပြီး ကျန်တရားခံများမှ ငွေလုယူသူများအဖြစ်လည်းကောင်း၊ စောင့်ကြည့်ပေးသူများအဖြစ်လည်းကောင်း ပြစ်မှုကျူးလွန်ခဲ့ကြကြောင်း ဖော်ထုတ်သိရှိရပြီး အထက်ပါ ဖမ်းဆီးရမိတရားခံများအား ဥပဒေအရ ထိရောက်စွာအရေးယူနိုင်ရေး ဆက်လက်ဆောင်ရွက်သွားမည်ဖြစ်ကြောင်းနှင့် ဆက်စပ်တရားခံများ အမြန်ဆုံးဖမ်းဆီးရမိရေး ၎င်းတို့ပုန်းခိုရာနေရာများ၊ လှုပ်ရှားသွားလာနေထိုင်မှု သတင်းများရရှိပါက သက်ဆိုင်ရာသို့ လျှို့ဝှက်စွာ သတင်းပေးတိုင်ကြားနိုင်ကြောင်း၊ သတင်းပေးသူနှင့် ဖမ်းဆီးပေးသူများအား ထိုက်တန်စွာ လျှို့ဝှက်၍ ဆုငွေများချီးမြှင့်ပေးမည်ဖြစ်ကြောင်း ရဲတပ်ဖွဲ့၏ သတင်းထုတ်ပြန်ချက်မှာ ဖော်ပြထားပါတယ်။

YMG/kg
#Yangon_Media_Group