Published 14 Nov 2021
အလုပ်ထုတ်ပယ်လိုက်လို့ဟုဆိုကာ အလုပ်သမားဖြစ်သူက မကျေနပ်၍ အလုပ်ရှင်မိသားစု၏ နေအိမ်အတွင်းသို့ဝင်ရောက်ပြီး မြက်ရိပ်ဓါးဖြင့်ရက်ရက်စက်စက် ခုတ်သတ်ခဲ့သည့် ဖြစ်စဥ်တစ်ခု ယမန်နေ့ နိုဝင်ဘာ ၁၃ ရက်၊ ည ၇ နာရီခွဲအချိန်ခန့်က မော်လမြိုင်မြို့၊
မြိုင်သာယာရပ်ကွက်၊(၉)လမ်းမှာ ဖြစ်ပွားခဲ့တယ်လို့ သိရပါတယ်။
အဆိုပါ ဓါးခုတ်ခံရမှုဖြစ်စဥ်ကြောင့် အလုပ်ရှင်မိသားစုမှ ဖခင်ဖြစ်သူနှင့် သားဖြစ်သူ ၂ ဦးသေဆုံးခဲ့ပြီးမိခင်ဖြစ်သူနှင့် သမီးဖြစ်သူတို့ ၂ ဦးကတော့ စိုးရိမ်ရ ပြင်းထန်ဒဏ်ရာများဖြင့် မော်လမြိုင်မြို့ ပြည်သူ့ဆေးရုံကြီးမှာ ဆေးကုသမှုခံယူနေရတယ်လို့ ဒေသခံ လူမှုကူညီရေးအသင်းများထံမှ သိရပါတယ်။
"ကျွန်တော်တို့နားကပါ အလုပ်သမားကိုအလုပ်ထုတ်လိုက်တာမကျေနပ်လို့ဆိုပြီဝင်သတ်သွားတာပါ။"လို့ မော်မြိုင်မြိုင် မြို့ခံတစ်ဦးက ဆိုပါတယ်။
မော်လမြိုင် လူသတ်မှုဖြစ်စဥ် နောက်ဆက်တွဲသတင်းများအရ မြိုင်သာယာ၊(၉)လမ်းရှိ ကုန်မာဆိုင်နှင့်ဝါရောင်းတဲ့နေအိမ်တွင် ယမန်နေ့ညက အလုပ်ရှင် မိသားစုထမင်းဝိုင်းကို ဆိုင်မှာ အလုပ်လုပ်နေသောအလုပ်သမား ဖြစ်သူလူသတ်သမားက မိမိဈေးဆိုင်မှာရောင်းနေသော မြက်ရိပ်ဓါးကို ကောက်ယူပြီး ထမင်းဝိုင်းမှာ ထမင်းစားနေသော အလုပ်ရှင်မိသားစုကို ရက်ရက်စက်စက်ဝင်ရောက်ခုတ်ခဲ့တာဖြစ်ကြောင်း၊ ယင်းဖြစ်စဥ်ကြောင့် ဖခင်ဖြစ်သူ မောင်အောင် အသက် (၄၇)နှစ်၊ သားဖြစ်သူဂျိုနိက် (ခေါ်)အောင်ပြည့်စုံ (၉)နှစ်တို့မှာ အခင်းဖြစ်ပွားရာ နေရာတွင်ပွဲချင်းပြီး သေဆုံးခဲ့ရပြီး မိခင်ဖြစ်သူမှာ ဘယ်ဘက်လက်ကောက်၀တ် ပြတ်ရှဒဏ်ရာ ဦးခေါင်း၊လည်ပင်းတို့တွင် ဒဏ်ရာပြင်းထန်စွာရရှိပြီး ဆေးရုံကြီးကိုရောက်ရှိတဲ့အချိန်တွင် သတိရှိပြီး စကားပြောနိုင်ကြောင်း၊ သမီးလတ်မှာ ဘယ်ဘက်ဦးခေါင်းဒဏ်ရာလည်ပင်းတို့တွင် ဒဏ်ရာပြင်းထန်စွာရရှိပြီးမော်လမြိုင်ဆေးရုံကြီး အရေးပေါ်ကုသဆောင်မှတဆင့်အရိုးအကြောကုသဆောင်တွင် ယခုသတင်းရေးသားနေသည့်အချိန်အထိ ဆေးကုသမှုခံယူလျှက်ရှိကြောင်း သိရပါတယ်။
ပြစ်မှုကျုးလွန်ခဲ့သူ လူသတ်သမားသည် အဆိုပါကုန်မာဆိုင်တွင် အလုပ်လုပ်ခဲ့သည်မှာ(၁၀)နှစ်ခန့်ရှိပြီးဖြစ်ကြောင်း၊ အလုပ်သမားသည် အလုပ်ရှင်ထံတွင်လုပ်ခလစာ ကြိုထုတ်ထားတာရှိကြောင်းနှင့် လူသတ်သမားသည် အခင်းမဖြစ်ပွားမီ လွန်ခဲ့သောရက်များက ဆိုင်မှထွက်သွားပြီး နောက်အိမ်ထောင်ပြုထားကြောင်း၊ယင်းကို ၄င်း၏ မယားကြီးဖြစ်သူက သိရှိပြီးအလုပ်ရှင်ထံတွင် အကူအညီတောင်းတိုင်းကြားထားတာရှိကြောင်း၊ အလုပ်ရှင်က ယင်းအလုပ်သမား ပြန်ရောက်လာတဲ့အချိန် ယင်းကိစ္စကို ပြောဆိုဆုံးမတာရှိကြောင်း ရပ်ကွက်သားတစ်ဦးက ပြောပြပါတယ်။
ဓါးခုတ်ခံရမှုကြောင့် သေဆုံးခဲ့ရသည့် အလုပ်ရှင်ဖြစ်သူ ကိုအောင်သည်အနေးအေးသူဖြစ်တယ်လို့လည်း ဒေသခံများက ဆိုပါတယ်။
သေဆုံးသူများကို မနက်ဖြန်(တနင်္လာနေ့)တွင် မြေမြှပ်သဂြိုလ်သွားမည်ဖြစ်ပြီး လူသတ်သမားသည် အခုအချိန်ထိ ထွက်ပြေးလွတ်မြှောက်နေဆဲဖြစ်ကြောင်း သိရှိရပါတယ်။
