#Local_News
၁၉၊ဩဂုတ် ၂၀၂၆(မော်စကို)

■ မြန်မာအာကာသအေဂျင်စီ (MSA) နှင့် ရုရှားနိုင်ငံပိုင်အာကာသကော်ပိုရေးရှင်း (Roscosmos) တို့အကြား ဂြိုဟ်တုလမ်းညွှန်မှုစနစ်၊ လူလိုက်ပါသောအာကာသခရီးစဉ်များ၊ အပြည်ပြည်ဆိုင်ရာ ဂြိုဟ်တုအခြေပြုရှာဖွေကယ်ဆယ်ရေးစနစ် (COSPAS-SARSAT) နှင့် ကမ္ဘာ့အနီးအာကာသအန္တရာယ် အလိုအလျောက်သတိပေးစနစ် (ASPOS) နယ်ပယ်များတွင် ပူးပေါင်းဆောင်ရွက်ရေးဆိုင်ရာ နားလည်မှု စာချွန်လွှာကို သြဂုတ် ၁၈ ရက်နေ့လယ်ပိုင်းက ရုရှားနိုင်ငံ၊ မော်စကိုမြိုရှိ ကရင်မလင်နန်းတော်၌ ပြည်ထောင်စုသမ္မတမြန်မာနိုင်ငံတော် နိုင်ငံတော်သမ္မတဦးမင်းအောင်လှိုင်နှင့် ရုရှားဖက်ဒရေးရှင်းနိုင်ငံ သမ္မတ မစ္စတာ ဗလာဒီမာ ဗလာဒီမီရိုဗစ်ချ် ပူတင်တို့၏ရှေ့မှောက်တွင် လက်မှတ်ရေးထိုးခဲ့ကြကြောင်း သတင်းရရှိသည်။

■ ဂြိုဟ်တုလမ်းညွှန်မှုစနစ်နယ်ပယ်တွင် ဂြိုဟ်တုလမ်းညွှန် အချက်အလက် တိုင်းတာလေ့လာရေး စခန်းတည်ဆောက်ခြင်း၊ ဂြိုဟ်တုလမ်းညွှန် အချက်အလက်များကို မြန်မာနိုင်ငံ၏ လူမှုစီးပွားဖွံ့ဖြိုး တိုးတက်ရေးကဏ္ဍများတွင် အသုံးပြုခြင်းဆိုင်ရာများ ပူးပေါင်းဆောင်ရွက်သွားကြမည် ဖြစ်ကြောင်း သိရှိရသည်။

■ ထို့အတူ အပြည်ပြည်ဆိုင်ရာဂြိုဟ်တုအခြေပြုရှာဖွေကယ်ဆယ်ရေးစနစ် (COSPAS-SARSAT) အတွက် အရေးပေါ်အချက်ပြမှုများကို ဂြိုဟ်တုများမှတဆင့် လက်ခံရယူ၊ ခွဲခြမ်းစိတ်ဖြာ၊ ဖြန့်ဝေပေးမည့် မြေပြင်အခြေစိုက်စခန်းတစ်ခုအား တည်ဆောက်သွားကြမည်ဖြစ်ပြီး မြန်မာနိုင်ငံအတွင်းနှင့် ပတ်ဝန်းကျင်တွင် လေကြောင်း၊ ရေကြောင်းနှင့်ကုန်းကြောင်း အရေးပေါ်အခြေအနေများ ပေါ်ပေါက်ခဲ့ပါက အချိန်တိုအတွင်းတိကျစွာ ရှာဖွေကယ်ဆယ်ရေးလုပ်ငန်းများ ဆောင်ရွက်သွားနိုင်မည်ဖြစ်ကြောင်း သိရှိရသည်။

■ ကမ္ဘာ့အနီး အာကာသအန္တရာယ်အလိုအလျောက်သတိပေးစနစ် (ASPOS) အတွက် အလင်းနှင့် အီလက်ထရောနစ်တယ်လီစကုပ် စခန်းတစ်ခုတည်ဆောက်၍ အာကာသယာဉ်များ နီးကပ်လာမှု အန္တရာယ်များ၊ အာကာသအမှိုက်များ၏ အခြေအနေများနှင့် ကမ္ဘာမြေပေါ်သို့ အာကာသပစ္စည်းများ ကျရောက်နိုင်မည့် နေရာများကိုခန့်မှန်းခြင်း၊ ခွဲခြမ်းစိတ်ဖြာခြင်းနှင့် သုတေသနပြုလုပ်ခြင်းတို့ကို ဆောင်ရွက်သွားကြမည်ဖြစ်ကြောင်းလည်း သိရှိရသည်။

■ ထို့အပြင် မြန်မာအာကာသယာဉ်မှူးများကို အပြည်ပြည်ဆိုင်ရာ အာကာသစခန်းသိုစေလွှတ်၍ သိပ္ပံသုတေသနစမ်းသပ်မှုများ ပြုလုပ်နိုင်ရန် ရွေးချယ်လေ့ကျင့်ပေးရေးကိုလည်း ဆောင်ရွက်သွားကြမည်ဖြစ်ကြောင်း သတင်းရရှိသည်။