#Local_News
Published 27 August 2026

■ ကရင်ရိုးရာဝါခေါင်လချည်ဖြူဖွဲ့မင်္ဂလာ အခမ်းအနားကို ယမန်နေ့နံနက်ပိုင်းက တွံတေးခရိုင်၊ တွံတေးမြို့နယ်ရှိ သုံးအိမ်ကျေးရွာတွင်ကျင်းပပြုလုပ်ခဲ့ကြောင်း သိရသည်။

■ အဆိုပါအခမ်းအနားသို့ ကရင်တိုင်းရင်းသားလူမျိုးရေးရာဝန်ကြီး ဦးစောဂျက်ကော့ထူး၊ ရခိုင်တိုင်းရင်းသားလူမျိုးရေးရာဝန်ကြီး ဦးနေမင်းထွန်း၊ ရန်ကုန်တိုင်းဒေသကြီး ကရင်စာပေနှင့်ယဉ်ကျေးမှုကော်မတီနာယက၊ ဥက္ကဌနှင့် အဖွဲ့ဝင်များ၊ ခရိုင်/မြို့နယ် ဌာနဆိုင်ရာအကြီးအကဲများ၊ ကရင်တိုင်းရင်းသားများ၊ အခြားတိုင်းရင်းသား ညီအစ်ကိုမောင်နှမများနှင့် ဖိတ်ကြားထားသော ဧည့်သည်တော်များ တက်ရောက်ကြပြီး ဦးစွာအခမ်းအနားကို ကရင်တိုင်းရင်းသားလူမျိုးရေးရာဝန်ကြီး ဦးစောဂျက်ကော့ထူး၊ ရခိုင် တိုင်းရင်းသားလူမျိုးရေးရာဝန်ကြီး ဦးနေမင်းထွန်း၊ ရန်ကုန်တိုင်းဒေသကြီး ကရင်စာပေနှင့်ယဉ်ကျေးမှုကော်မတီနာယက ဦးစောမျိုးချစ်ဦး တို့က ဖားစည် (၉) ချက်တီးကာ ကရင်လူငယ် (၉) ဦး က ကျွဲချိုမှုတ်၍ ဖွင့်လှစ်ပေးသည်။

■ ထို့နောက် ရန်ကုန်တိုင်းဒေသကြီးအစိုးရအဖွဲ့ ကရင်တိုင်းရင်းသားလူမျိုးရေးရာဝန်ကြီး ဦးစောဂျက်ကော့ထူး က နှုတ်ခွန်းဆက်အမှာစကား ပြောကြားခဲ့ပြီး တွံတေးမြို့နယ် ကရင်စာပေနှင့်ယဉ်ကျေးမှုကော်မတီ ဥက္ကဌ စောခင်ဇော် က ကရင်ရိုးရာ ဝါခေါင်လ ချည်ဖြူဖွဲ့မင်္ဂလာ အကြောင်းအရင်းအား ရှင်းလင်းပြောကြားသည်။

■ ယင်းနောက် ကော့မှူးမြို့နယ် ဆုံရှမ်းကျေးရွာမှ ကရင်ရိုးရာ ဒုံးအကဖြင့် ဖျော်ဖြေကြပြီး တွံတေးမြို့နယ် ဘုရားကျောင်းကျေးရွာမှ ကရင်ရိုးရာ ဒုံးအကဖြင့် ဆက်လက်ဖျော်ဖြေတင်ဆက်ကြပြီး ကရင်လူငယ်မောင်မယ်များမှ လက်ချည်ပွဲ အသုံးအဆောင် (၇) မျိုးပါဝင်သည့် စကောများသယ်ဆောင်လာပြီး ကရင်ဘိုးဘွားများက အခမ်းအနားသို့ တက်ရောက်လာကြသည့် ကရင်တိုင်းရင်းသားလူမျိုးရေးရာဝန်ကြီး ဦးစောဂျက်ကော့ထူး၊ ရခိုင်တိုင်းရင်းသားလူမျိုးရေးရာဝန်ကြီး ဦးနေမင်းထွန်း၊ အထူးဖိတ်ကြားထားသော ဧည့်သည်တော်များနှင့် တိုင်းရင်းသားညီအစ်ကို မောင်နှမများအားကရင်ရိုးရာချည်ဖြူဖွဲ့ပေးကြသည်။

■ ယင်းနောက် ကရင်တိုင်းရင်းသားလူမျိုးရေးရာဝန်ကြီး ဦးစောဂျက်ကော့ထူး နှင့် ရခိုင်တိုင်းရင်းသားလူမျိုးရေးရာဝန်ကြီး ဦးနေမင်းထွန်း တို့က တိုင်းရင်းသားရိုးရာယဉ်ကျေးမှု အကအဖွဲ့များအား ဂုဏ်ပြုချီးမြှင့်ငွေများပေးအပ်ကြကြောင်းသိရသည်။

#YMG/NN #Yangon_Times