#Local_News
Published 05 February 2025

■ နိုင်ငံတော်ယာယီသမ္မတနှင့် နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်အား ရန်ကုန်တက္ကသိုလ်က ဂုဏ်ထူးဆောင် ပြည်သူ့ရေးရာစီမံခန့်ခွဲမှုပါရဂူဘွဲ့ (Honorary Doctor of Public Administration - D.P.A honoris causa) ကို ယနေ့နံနက်ပိုင်းတွင် ကျင်းပသည့် အထူးဘွဲ့နှင်းသဘင်အခမ်းအနား၌ အပ်နှင်းချီးမြှင့်လိုက်သည်။

■ ယနေ့ကျင်းပသော အခမ်းအနားတွင် ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာချောချောစိန်က နိုင်ငံတော်အကြီးအကဲ၏ စွမ်းဆောင်ရည်များကို တင်ပြရာ၌ နိုင်ငံရေးအသွင်ကူးပြောင်းမှုကာလ စိန်ခေါ်မှုများ၊ နိုင်ငံတကာဖိအားနှင့် ပိတ်ဆို့မှုများကို ရင်ဆိုင်ကျော်လွှားနိုင်ခဲ့ခြင်း၊ ငြိမ်းချမ်းရေးလုပ်ငန်းစဉ်များ ဖော်ဆောင်ခြင်းနှင့် မကြာသေးမီက ပါတီစုံဒီမိုကရေစီ အထွေထွေရွေးကောက်ပွဲကို အောင်မြင်စွာ ကျင်းပနိုင်ခဲ့ခြင်းတို့ကြောင့် ယခုကဲ့သို့ ဂုဏ်ထူးဆောင်ဘွဲ့ အပ်နှင်းရခြင်းဖြစ်ကြောင်း ပြောကြားခဲ့သည်။

■ ထို့ပြင် နိုင်ငံတော်အကြီးအကဲ၏ လမ်းညွှန်မှုဖြင့် Naypyitaw State Academy နှင့် Polytechnic University များ ဖွင့်လှစ်ပေးနိုင်ခဲ့ခြင်း၊ ကျန်းမာရေးနှင့် လမ်းပန်းဆက်သွယ်ရေးကဏ္ဍများ မြှင့်တင်ပေးခြင်း၊ မာရဝိဇယ ဗုဒ္ဓရုပ်ပွားတော်မြတ်ကြီး တည်ထားကိုးကွယ်ခဲ့ခြင်းနှင့် သဘာဝဘေးဒဏ်သင့်ဒေသများတွင် ပြန်လည်ထူထောင်ရေးလုပ်ငန်းများကို ထိရောက်စွာ စီမံခန့်ခွဲနိုင်ခဲ့ခြင်းတို့ကိုလည်း ဂုဏ်ပြုထိုက်သည့် အကြောင်းရင်းများအဖြစ် ဖော်ပြခဲ့သည်။

■ အခမ်းအနားသို့ ရုရှား၊ ထိုင်းနှင့် ဗီယက်နမ်နိုင်ငံတို့မှ တက္ကသိုလ်အကြီးအကဲများ တက်ရောက်ခဲ့ကြပြီး ရုရှားဖက်ဒရေးရှင်းနိုင်ငံ Russian Presidential Academy of National Economy and Public Administration မှ ပါမောက္ခ Andrey Dragomirovich KHLUTKOV အပါအဝင် နိုင်ငံတကာပညာရှင်များက နိုင်ငံတော်အကြီးအကဲ၏ ခေါင်းဆောင်မှုနှင့် ရွေးကောက်ပွဲအောင်မြင်စွာ ကျင်းပနိုင်ခဲ့မှုအပေါ် ဂုဏ်ပြုစကားများပြောကြားခဲ့သည်။

■ ရန်ကုန်တက္ကသိုလ်အနေဖြင့် ၁၉၂၁ ခုနှစ်မှ ၂၀၂၀ ပြည့်နှစ်အထိ ရာစုနှစ်တစ်ခုအတွင်း ပြည်တွင်းပြည်ပ ထင်ရှားကျော်ကြားသူ စုစုပေါင်း (၇၂) ဦးအား ဂုဏ်ထူးဆောင်ဘွဲ့များ ချီးမြှင့်ခဲ့ပြီးဖြစ်သည်။

■ ထိုအထဲတွင် ဆရာတော်ကြီးများအပြင် ယူဂိုဆလားဗီးယားသမ္မတ မာရှယ်တီးတိုးနှင့် ဗီယက်နမ်သမ္မတ ဟိုချီမင်းတို့လည်းပါဝင်ခဲ့ကြောင်းသိရသည်။

■ ဘွဲ့နှင်းသဘင်အခမ်းအနားအပြီးတွင် နိုင်ငံတော်ယာယီသမ္မတနှင့် အဖွဲ့သည် တက္ကသိုလ်များ ဗဟိုစာကြည့်တိုက်သို့ သွားရောက်ကာ ရှေးဟောင်းစာအုပ်စာစောင်များ ထိန်းသိမ်းထားရှိမှုကို ကြည့်ရှုစစ်ဆေးခဲ့ပြီး ဧည့်သည်တော်မှတ်တမ်းတွင် လက်မှတ်ရေးထိုးခဲ့ကြောင်း သတင်းရရှိသည်။