#Local_News
Published 22 November 2025

■ မြန်မာစာပေလောကတွင် ထင်ရှားကျော်ကြားလှသော ကဗျာဆရာကြီး ဦးကိုလေး (ကိုလေး-အင်းဝ ဂုဏ်ရည်) သည် ယနေ့ နိုဝင်ဘာ ၂၂ ရက် နံနက်တွင် မန္တလေးမြို့၌ ကွယ်လွန်သွားရှာပြီဖြစ်သည်။

■ ဆရာကြီး ကိုလေး(အင်းဝဂုဏ်ရည်) ကွယ်လွန်ကြောင်းကို သမီးဖြစ်သူ ကဗျာဆရာမ မနီတာက သူမ၏ ဆိုရှယ်မီဒီယာ ဖေ့စ်ဘုတ်ခ် စာမျက်နှာတွင် ရေးသားသတင်းထုတ်ပြန်ပေးခဲ့သည်။

■ ကွယ်လွန်ချိန်တွင် ဆရာကြီးသည် အသက် ၉၁ နှစ် အရွယ်ရှိပြီဖြစ်ပြီး မန္တလေးမြို့ Grand Mandalay ဆေးရုံ၌ ဆေးကုသမှုခံယူနေစဉ် ကွယ်လွန်ခဲ့ခြင်းဖြစ်သည်။

■ ဆရာကြီးသည် တံတားဦးမြို့ နီးပါးတန်းရပ်နေ ဦးချွန်နှင့် ဒေါ်မမကြီးတို့၏ သားကြီးဖြစ်ပြီး ကွယ်လွန်ချိန်တွင် ဇနီးဖြစ်သူ ဆရာမဒေါ်ညွန့်ညွန့်နှင့် သားသမီး (၇)ဦး၊မြေး(၆)ယောက်နှင့်မြစ်(၃) ယောက်တို့ ကျန်ရစ်ခဲ့သည်။

■ ဆရာကြီးအားအမျိုးသားစာပေဆု၊တစ်သက်တာစာပေဆု၊တော်ဘုရားလေးစာပေဆုများနှင့်အလင်္ကာကျော်စွာဘွဲ့များကို နိုင်ငံတော်ကချီးမြှင့်ခဲ့သည်။

■ ဆရာကြီး၏ ကြွင်းကျန်ရစ်သောရုပ်ကလာပ်ကို၂၃.၁၁.၂၀၂၅(တနင်္ဂနွေ)နေ့ မွန်းလွဲ(၁)နာရီတွင် တံတားဦးသုဿန်၌မီးသင်္ဂြိုဟ်မည်ဖြစ်ကြောင်း မိသားစုက အသိပေးထားသည်။

■ ဆရာကြီးသည် အမ်အေဒေါ်အုန်း၊ မန္တလေး အမျိုးသားကျောင်းဆရာများနှင့် ဖခင် ဦးချွန်တို့ တည် ထောင်သော အင်းဝဂုဏ်ရည်ကျောင်းတွင် ပညာသင်ယူခဲ့ပြီး ဆဋ္ဌမတန်းကစတင်ကာ ကဗျာများရေးသားခဲ့ကြောင်းသိရသည်။

■ ယနေ့အထိ မြန်မာစာပေလောကအတွက တန်ဖိုးရှိလှသည့် ကဗျာစာမွန်များ ထောင်နှင့်ချီ၍ ရေးသားခဲ့သည့် ကဗျာစာဆိုတော်ကြီးတစ်ဦးဖြစ်သည်။

■ ဆရာကြီးသည် "သိင်္ဂါရ" အမည်ဖြင့် ကဗျာတစ်ပုဒ်ကို နိုဝင်ဘာ ၁၆ ရက်က ဆရာကြီး၏ ဖေ့စ်ဘုတ်စာမျက်နှာတွင် နောက်ဆုံးရေးသားသွားခဲ့သည်။

■ ဆရာကြီး ကိုလေး(အင်းဝဂုဏ်ရည်)ကွယ်လွန်ခြင်းသည် မြန်မာစာပေလောကအတွက် အဖိုးမဖြတ် နိုင်သည့်ဆုံးရှုံးမှုကြီးတစ်ခုဖြစ်ပြီး ကျန်ရစ်သူမိသားစုနှင့်အတူ "YMG" က ထပ်တူထပ်မျှကြေကွဲဝမ်းနည်းရပါသည်။

■ ဆရာကြီး ကောင်းရာသုဂတိရောက်ရှိစေကြောင်း လေးစားစွာဆုတောင်းအပ်ပါသည်။

#YMG/KNL #Yangon_Times