#Local_News
Published 25 November 2025
▪️ လူကုန်ကူးမှု ဖြစ်စဉ်များကြောင့် နိုင်ငံခြားသားနှင့် ထိမ်းမြားလက်ထပ်မှုများဖြစ်စဉ်များကို စိစစ်တင်းကြပ်ရန်အတွက် ပြည်ထောင်စုတရားလွှတ်တော်ချုပ်က နိုဝင်ဘာ(၁၇)ရက် ရက်စွဲဖြင့် ညွှန်ကြားချက်ထုတ်ပြန်လိုက်ကြောင်း သိရသည်။
▪️ နိုင်ငံခြားသားက မြန်မာနိုင်ငံအတွင်းသို့ လာရောက်ကာ မြန်မာအမျိုးသမီးငယ်များကို အယောင်ဆောင်လက်ထပ်ကာ နိုင်ငံမှခေါ်ဆောင်သွားတဲ့ လူကုန်ကူးမှုဖြစ်စဉ်တွေများပြားလာတဲ့အတွက် နိုင်ငံခြားသားနှင့် မြန်မာအမျိုးသမီးများ ထိမ်းမြားလက်ထပ်ကျမ်းကျိန်လွှာ ပြုလုပ်မှု ကို ပိုမို စိစစ်ဆောင်ရွက်ဖို့ ပြည်ထောင်စုတရားလွှတ်တော်ချုပ်က နိုဝင်ဘာ(၁၇)ရက် ရက်စွဲဖြင့် (၁/၂၀၂၅ )နဲ့ ညွှန်ကြားချက်ထုတ်ပြန်လိုက်ပါတယ်။
▪️ ညွှန်ကြားချက်တွင် တရားရုံးများ၌ နိုင်ငံခြားသားနှင့်လက်ထပ်လိုသူ မြန်မာအမျိုးသမီးတို့၏အခွင့်အရေးများ ဆုံးရှုံးမှုမရှိစေရန် ဆောင်ရွက်ပေးလျက်ရှိရာ ပြောင်းလဲလာသည့် အခြေနေများအရ နိုင်ငံခြားသားများသည်မြန်မာနိုင်ငံအတွင်းသို့လာရောက်ပြီး မြန်မာအမျိုးသမီးငယ် များကို ဖြားယောင်းကာ အယောင်ဆောင်လက်ထပ်ပြီး နိုင်ငံမှခေါ်ဆောင်သွားသည့်လူကုန်ကူးမှုဖြစ်စဉ်များ များပြားလာခြင်းကိုတွေ့ရှိရကြောင်း၊ ထို့ကြောင့် အယောင်ဆောင် လက်ထပ်ထိမ်းမြားခြင်းကို ကာကွယ်ရန်အတွက် လက်ထပ်ထိမ်းမြားကျမ်းကျိန်လွှာ ပြုလုပ်ပေးရန် လျှောက်ထားလာပါက ပိုမိုအလေးထား စီစစ်ဆောင်ရွက်ရမည်ဟုဖော်ပြပါရှိသည်။
▪️ ထို့ကြောင့် ထိမ်းမြားလက်ထပ်မည့် နိုင်ငံခြားသား၏ နိုင်ငံကူးလက်မှတ်၊ မြန်မာနိုင်ငံမှ၌ ရက်ပေါင်း၃ဝ အထက်နေထိုင်ခွင့် Visa အထောက် အထား၊ Visa နှင့်နေထိုင်စဉ်တွင် လက်ထပ် ထိမ်းမြားမည့်အကြောင်း မြန်မာနိုင်ငံလူဝင်မှုကြီးကြပ်ရေးဦးစီးဌာန သို့တင်ပြရန်၊ယခုထိမ်းမြားလက်ထပ်မှုကို သက်ဆိုင်ရာနိုင်ငံ၏ ဥပဒေအရ တားမြစ်မှုမရှိကြောင်းအထောက်အထားများကို တင်ပြရမည်ဖြစ်ကြောင်း ၊ ထို့အပြင် လူပျို/လက်ရှိအိမ်ထောင်မရှိသူ(ကွာရှင်း/အိမ်ထောင်ဖက် သေဆုံးအ ထောက်အထား)၊ သက်ဆိုင်ရာနိုင်ငံ၏ အ မြဲတမ်းနေရပ်လိပ်စာနှင့် အလုပ်အကိုင်၊ ဝင်ငွေ၊ ရာဇဝတ်မှုကင်းရှင်းကြောင်း အကျင့်စာရိတ္တကောင်းမွန်ကြောင်းထောက်ခံချက်များကိုလည်းတင်ပြရမည်ဖြစ်ကြောင်း ကိုယ်ပိုင်လုပ်ငန်းလုပ်ကိုင်သူဖြစ်ပါက သက်ဆိုင်ရာက ထုတ်ပေးထားသည့် လုပ်ငန်းလုပ်ကိုင်ခွင့်လက်မှတ်၊ နိုင်ငံခြားသားများနှင့် ထိမ်းမြားပါက နိုင်ငံသားဖြစ်ခွင့်ရှိမရှိ သက်ဆိုင်ရာနိုင်ငံ၏ထောက်ခံချက်၊ မွေးဖွားလာသည့် သားသမီးများ နိုင်ငံသားဖြစ်တည်ခွင့်စသည့်အချက်များကို ဆောင်ရွက်ရန်ညွှန်ကြားထားကြောင်း သိရသည်။
#YMG/SW #Yangon_Times
