#Local_News
Published 04 April 2026

■ ရန်ကုန်မြို့ရှိ ဆိပ်ကမ်းများသို့ သင်္ကြန်ပိတ်ရက် မတိုင်မှီ စားသုံးဆီ တန်ချိန် ငါးသောင်းရောက်ရှိမည်ဖြစ်ကြောင်း မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များအသင်းမှသိရသည်။

■ မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များအသင်း၏ လုပ်ငန်းညှိနှိုင်းအစည်းအဝေးကို စနစ်တကျ ကျင်းပပြုလုပ်ခဲ့ရာ စီမံခန့်ခွဲမှုကော်မတီဝင်များ၊ ဗဟိုအလုပ်အမှုဆောင်များ၊ အလုပ်အမှုဆောင်များနှင့် ပြည်နယ်နှင့် တိုင်းဒေသကြီးများမှ စီမံခန့်ခွဲမှုကော်မတီဝင်များ တက်ရောက်ခဲ့ကြသည်။

■ အစည်းအဝေးတွင် ဥက္ကဌမှ ဆီသယ်ယူပို့ဆောင်ရေးနှင့် ရောင်းချဖြန့်ဖြူးရေးလုပ်ငန်းများကို မိမိတို့ဒေသအသီးသီးတွင် ပြည်သူများ၏ ဧပြီလ စားသုံးဆီလိုအပ်ချက်နှင့် စက်မှုလုပ်ငန်းများအတွက် လိုအပ်သော ကုန်ကြမ်းဆီများကို တင်ပြထားသည့် စာရင်းများအတိုင်း စနစ်တကျ ခွဲဝေဖြန့်ဖြူးပေးလျက်ရှိကြောင်း ရှင်းလင်းပြောကြားခဲ့သည်။

■ ထို့အပြင် ရန်ကုန်မြို့ရှိ ဆိပ်ကမ်းအသီးသီးသို့ သင်္ကြန်ပိတ်ရက် မတိုင်မှီ ဆိုက်ကပ်လာမည့် စားသုံးဆီ တန်ချိန် ငါးသောင်း အချိန်မှီ ထုတ်ယူနိုင်ရေး၊လက်ရှိ ဆီသိုလှောင်ကန်များပြည့်နေ၍ နေ့စဉ်ဆီထပ်တိုးထုတ်နိုင်ရန်အတွက် သယ်ယူပို့ဆောင်ရေး လမ်းကြောင်းများ စနစ်တကျစီစဉ်ရန် ဆွေးနွေးလမ်းညွှန်ပါသည်။

■ ၎င်းအပြင် အသင်းဝင်များအနေဖြင့် ဌာနဆိုင်ရာများနှင့် နီးကပ်စွာ ပူးပေါင်းဆောင်ရွက်ပြီး လုပ်ငန်းစဉ်များကို စနစ်တကျ ကြပ်မတ်ထိန်းသိမ်း ဆောင်ရွက်သင့်ကြောင်းကိုလည်း အထူးအလေးထား ဆွေးနွေးခဲ့ကြကြောင်းသိရသည်။

#YMG/NN #Yangon_Times