#Local_News
Published 29 October 2025

▪️ အိန္ဒိယ-မြန်မာ ကမ်းရိုးတန်းသွားသင်္ဘောများဆိုင်ရာ သဘောတူစာချုပ် ချုပ်ဆိုပြီးပါက ကုန်သွယ်မှုလမ်းကြောင်းသစ်များ ဖွင့်လှစ်နိုင်မည်ဖြစ်ပြီး ဒေသတွင်းဆက်သွယ်မှု ပိုမိုကောင်းမွန်လာမည်ဖြစ်ကြောင်း ပို့ဆောင်ရေးနှင့်ဆက်သွယ်ရေးဝန်ကြီးဌာန ဒုတိယဝန်ကြီး ဦးအောင်ကျော်ထွန်းက အိန္ဒိယနိုင်ငံမွမ်ဘိုင်းမြို့ရှိ NESCO Exhibition Center ၌ အောက်တိုဘာ (၂၇) ရက်မှ (၃၁) ရက်အထိ ကျင်းပသည့် အိန္ဒိယရေကြောင်းဆိုင်ရာ ရက်သတ္တပတ်-၂၀၂၅ (INDIA MARITIME WEEK - 2025) အခမ်းအနားသို့ တက်ရောက်စဉ်ပြောကြားခဲ့ကြောင်း သိရသည်။

▪️ ဒုတိယဝန်ကြီးက BIMSTEC Coastal Shipping Agreement အရ ဘင်္ဂလားပင်လယ်အော်တစ်လျှောက်အဆင်ပြေသော ရေကြောင်းဆက်သွယ်မှုများကို ဖန်တီးပေးနိုင်မည်ဖြစ်သည့်အပြင် ကမ်းရိုးတန်းနိုင်ငံအားလုံးအတွက် ပူးတွဲအပြာရောင်စီးပွားရေးကိုလည်း ထောက်ပံ့ကူညီပေးနိုင်မည်ဖြစ်ကြောင်း၊ မြန်မာနိုင်ငံသည် ပင်လယ်ရေကြောင်းကုန်သွယ်မှုကဏ္ဍ ဖွံ့ဖြိုးတိုးတက်ရေးအတွက် ASEAN၊ BIMSTEC စသည့် ဒေသတွင်းနိုင်ငံများနှင့်အတူ ပူးပေါင်းလုပ်ဆောင်သွားမည်ဖြစ်ကြောင်း ဆွေးနွေးပြောကြားခဲ့ကြောင်း သိရသည်။

▪️ ဆက်လက်ပြီးမြန်မာနိုင်ငံသည် ဘင်္ဂလားပင်လယ်အော်နှင့် ကပ္ပလီပင်လယ်ပြင်တစ်လျှောက် ကမ်းရိုးတန်း ကီလိုမီတာ ၂၃၀၀ ကျော်ရှိသည့် တောင်နှင့်အရှေ့တောင်အာရှကို ဆက်သွယ်ထားသော မဟာဗျူဟာကျသည့်နေရာတွင်တည်ရှိနေပြီး မြန်မာနိုင်ငံ၏ ဆိပ်ကမ်းများဖြစ်သော ရန်ကုန်၊ သီလဝါနှင့် ကျောက်ဖြူတို့သည် မြန်မာနိုင်ငံကို ဒေသတွင်းနှင့် ကမ္ဘာ့ဈေးကွက်များသို့ ချိတ်ဆက်ပေးနေကြောင်း၊ မြန်မာနိုင်ငံသည် IMO ၏ ပြဋ္ဌာန်းချက်များနှင့် ကိုက်ညီမှုရှိစေရေး ရေကြောင်းကျွမ်းကျင်ပညာရှင်များနှင့် သင်္ဘောသားများအတွက် သင်တန်းပေးခြင်းတို့ကိုလည်း ခေတ်နှင့်အညီဆောင်ရွက်လျက်ရှိကြောင်းပြောကြားခဲ့သည်။

▪️ အဆိုပါအခမ်းအနားကို အိန္ဒိယနိုင်ငံဆိပ်ကမ်း၊ သင်္ဘောပို့ဆောင်ရေးနှင့် ရေကြောင်းဝန်ကြီးဌာနက ဦးဆောင်ကျင်းပခြင်းဖြစ်ပြီး ပင်လယ်ဆိပ်ကမ်း အခြေခံအဆောက်အအုံမြှင့်တင်ရန်၊ ဆိပ်ကမ်းစီမံခန့်ခွဲမှုလုပ်ငန်းများခေတ်မီရေး အဆင့်မြှင့်တင်ရန်နှင့် ရေကြောင်းပို့ဆောင်ရေးကဏ္ဍအတွက် ရင်းနှီးမြှုပ်နှံမှုမြှင့်တင်နိုင်ရန်စသည့်အခွင့်အလမ်းများကို ရှာဖွေဖော်ထုတ်သွားနိုင်စေရေးအတွက် ရည်ရွယ်၍ကျင်းပခြင်းဖြစ်ပြီးလိုက်ဘေးရီးယား၊ မော်ရစ်ရှ၊ မြန်မာ၊ နယ်သာလန်၊ နော်ဝေ၊ သီရိလင်္ကာ၊ ဆော်ဒီ အာရေဗျ၊ တောင်ကိုရီးယားနိုင်ငံ၊ အင်တီဂွါနှင့်ဘာဘူဒါနိုင်ငံတို့မှ ဝန်ကြီးများ၊ ဒုတိယဝန်ကြီးများ တက်ရောက်ကြ‌ကြောင်းသိရသည်။

#YMG/SW #Yangon_Times