#Local_News
Published 16 October 2025

■ စစ်ရေးအခြေအနေ ယခင်ကထက်ပိုမိုကောင်းမွန်လာပြီးငြိမ်းချမ်းရေးလည်း ယခင်ကထက် မျှော်လင့်ချက်ပိုမိုရှိလာကြောင်း အောက်တိုဘာလ (၁၅) ရက်တွင်ပြုလုပ်သည့် NCA (၁၀)နှစ်ပြည့် အခမ်းအနားတွင် အမျိုးသားကာကွယ်ရေးနှင့်လုံခြုံရေးကောင်စီ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်း က မီဒီယာများ၏ မေးမြန်းချက်များကိုပြန်လည်ဖြေကြားရာတွင် ထည့်သွင်းပြောကြားခဲ့သည်။

■ “ကျွန်တော်တို့အထဲမှာဖြစ်နေတဲ့ လက်နက်ကိုင်ပဋိပက္ခမှာ ဘယ်သူသေသေ မြန်မာသေတာပဲ။ ဘယ်တိုင်းရင်းသားသေသေ မြန်မာသေတာပဲ။ ဘယ်သူမှ ဘယ်သူသေလို့မို့ ဝမ်းမြောက်ဝမ်းသာဖြစ်နေစရာမရှိဘူး။ ဘယ်သူဆုံးရှုံးလို့မလို့ ဝမ်းမြောက်ဝမ်းသာ ဖြစ်နေစရာအကြောင်းမရှိဘူး။ စစ်ရေးအခြေအနေနဲ့ ပတ်သက်ပြီးပြောရရင်တော့ ယခင်ကထက်ပိုမို ကောင်းမွန်လာပါတယ်။ ငြိမ်းချမ်းရေးနဲ့ပတ်သက်လာပြီးလည်း ယခင်ကထက် မျှော်လင့်ချက် ပိုမိုရှိလာပါတယ်လို့ပဲ ပြောချင်ပါတယ်”ဟု ယင်းက ပြောသည်။

■ တိုင်းရင်းသားဒေသများတွင် ဖြစ်ပွားနေသည့် တိုက်ပွဲများနှင့်ပတ်သက်၍ ဆွေးနွေးမှု ပြုလုပ်နေသည်များရှိကြောင်းလည်း ဗိုလ်ချုပ်ဇော်မင်းထွန်းက ပြောသည်။

■ “တိုင်းရင်းသားဒေသတွေနဲ့ပတ်သက်ပြီး ကျွန်တော်တို့ဆွေးနွေးနေတာရှိပါတယ်။ မြန်မာပြည်အရှေ့မြောက်ဘက်ပေါ့နော်၊ မြောက်ဘက်ငြိမ်းချမ်းရေးနဲ့ပတ်သက်ပြီးလည်း ဆွေးနွေးနေတာရှိပါတယ်။ တချို့လည်းကြားဝင်စေ့စပ်နေတာနဲ့ ဆွေးနွေးနေတာရှိပါတယ်။ငြိမ်းချမ်းရေးနဲ့ပတ်သက်ပြီးတော့ ကျွန်တော်တို့အစိုးရအနေနဲ့ စဉ်ဆက်မပြတ် ဆက်လက်ဆွေးနွေးသွားမှာပဲဖြစ်ပါတယ်”ဟု ယင်းကပြောသည်။

■ NCA စာချုပ်သည် နိုင်ငံတကာအသိသက်သေတွေရှေ့တွင် သဘောတူညီမှုဖြင့် ရေးထိုးခဲ့ခြင်းဖြစ်သောကြောင့် NCA ၏ ကတိမှာတည်ရှိမြဲ တည်ရှိနေမည် ဖြစ်ကြောင်းလည်း ယင်းကဆိုသည်။

■ “အားလုံးက EAO တွေရဲ့ သဘောတူညီချက်ပေါ့နော်၊ ဆောင်ရွက်ခဲ့တာဖြစ်ပါတယ်။ ဒီအတွက် သူတို့ပြောသလိုပဲ NCA စာချုပ်က စက္ကူစုတ်တစ်ခုဖြစ်သွားစရာလည်း အကြောင်းမရှိဘူး။ ဒီအဖွဲ့အစည်းတွေရှိနေသမျှ ကာလပတ်လုံး NCA စာချုပ်၊ NCA ရဲ့ ကတိပြုချက်က ရှိနေတာဖြစ်မယ်။ NCA ဆိုတာသည် ပစ်ခတ်တိုက်ခိုက်မှုရပ်စဲရေးဆိုတဲ့၊ ငြိမ်းချမ်းရေးဆိုတဲ့ဟာတစ်ခုတည်းနဲ့တင် မဟုတ်ပါဘူး။ သူသည် နိုင်ငံတည်ဆောက်ရေး၊ တိုင်းပြည် တည်ဆောက်ရေးအထိပါတဲ့အတွက် သူတို့လုပ်ချင်သည်ဖြစ်စေ၊ မလုပ်ချင်သည်ဖြစ်စေ ဒီလုပ်ငန်းစဉ်တွေသည် ဆက်လက်တည်ရှိနေမှာဖြစ်ပါတယ်။ ဒီလုပ်ငန်းစဉ်ကြီးသည် ခုနကကျွန်တော်ပြောသလို မရှိတာထက်၊ ရှိတဲ့ဟာက ပိုကောင်းတယ်။ ရှိပြီးသားဟာ အပေါ်မှာပဲ ကျွန်တော်တို့ဘယ်လိုလုပ်ကြမလဲ၊ ဘယ်လိုပြုပြင်မွမ်းမံကြမလဲဆိုတာကို တွေးခေါ်ကြံဆဖို့အတွက် ကျွန်တော့်အနေနဲ့ တိုက်တွန်းလိုပါတယ်”ဟု ၎င်းကပြောသည်။

#YMG/PP #Yangon_Times