#Local_News
Published_ 4 July 2023
၂၀၂၃ ခုနှစ်အတွင်း မြန်မာနိုင်ငံသို့ စင်ကာပူခရီးသွားဝင်ရောက်မှုဟာ သိသိသာသာ မြင့်တက်လာတာကြောင့် ရန်ကုန်-စင်ကာပူ-ရန်ကုန်ခရီးစဉ်တွေ ထပ်တိုးပျံသန်းပြေးဆွဲဖို့ အပြည်ပြည်ဆိုင်ရာ မြန်မာလေကြောင်းလိုင်း MAI က စီစဉ်နေပါတယ်။
မြန်မာနိုင်ငံသို့ ၂၀၂၃ ခုနှစ် ဇန်နဝါရီလကနေ မေလအထိ နိုင်ငံခြားသားခရီးသွား ဝင်ရောက်မှုက လေးသိန်းကျော်ရှိနေပြီး လာရောက်မှုအများဆုံးနိုင်ငံတွေထဲမှာ စင်ကာပူ နိုင်ငံ ပါဝင်ပါတယ်။
MAI လေကြောင်းလိုင်းက ရန်ကုန်-စင်ကာပူ-ရန်ကုန်ခရီးစဉ်ကို ဇူလိုင် ၁၆ ရက်က စတင်ပြီး တိုးချဲ့ပျံသန်းမှာဖြစ်ပါတယ်။ အဆိုပါခရီးစဉ်ကို ယခင်က အပတ်စဉ် အင်္ဂါ၊ ကြာသပတေး၊ စနေနေ့တွေမှာ ပျံသန်းပြေးဆွဲရာမှ မေ ၂၉ ရက် ကစတင်ပြီး တနင်္လာနဲ့ ဗုဒ္ဓဟူးနေ့တွေမှာ ထပ်မံတိုးချဲ့ပျံသန်းခဲ့ကာ လာမယ့် ဇူလိုင် ၁၆ ရက်ကစပြီး တနင်္ဂနွေနေ့မှာပါ ထပ်မံတိုးမြှင့်ပြီး ပျံသန်းပြေးဆွဲမှာဖြစ်ပါတယ်။
ရန်ကုန်-စင်ကာပူ-ရန်ကုန် ခရီးစဉ်ကို တစ်နေ့နှစ်ကြိမ် ပျံသန်းပြေးဆွဲပေးနေတာ ဖြစ်ပြီး ရန်ကုန်မြို့မှ နံနက် ၈ နာရီ မိနစ် ၂၀ မှာထွက်ခွာပြီး စင်ကာပူသို့ ဒေသစံတော်ချိန် မွန်းလွဲ ၁၂ နာရီ မိနစ် ၅၀ မှာ ဆိုက်ရောက်မှာဖြစ်ပါတယ်။ ထို့နောက် စင်ကာပူကနေ ဒေသစံတော်ချိန် မွန်းလွဲ ၁ နာရီ မိနစ် ၅၀ မှာ ပြန်လည်ထွက်ခွာကာ ရန်ကုန်မြို့ကို ညနေ ၃ နာရီ မိနစ် ၂၀ မှာ ဆိုက်ရောက်မယ်လို့ ဆိုပါတယ်။
ရန်ကုန်မြို့မှ ညနေ ၃ နာရီ ၁၅ မိနစ်ထွက်ခွာတဲ့ ခရီးစဉ်က စင်ကာပူကို ဒေသစံတော်ချိန် ည ၇ နာရီ ၄၅ မိနစ်မှာဆိုက်ရောက်ပြီး စင်ကာပူမှ ဒေသစံတော်ချိန် ည ၈ နာရီ ၄၅ မိနစ်မှာ ပြန်လည်ထွက်ခွာကာ ရန်ကုန်ကို မြန်မာစံတော်ချိန် ည ၁၀ နာရီ ၁၅ မိနစ်မှာ ပြန်လည်ဆိုက်ရောက်မယ်လို့ သိရပါတယ်။
ygm_mnn
#Yangon_Media_Group
