#Local_News
Published 28 December 2023
အပြည်ပြည်ဆိုင်ရာကြက်ခြေနီနှင့် လခြမ်းနီအသင်းများဖက်ဒရေးရှင်း၊ ဂျာမနီနိုင်ငံကြက်ခြေနီအသင်းနှင့် ဒိန်းမတ် နိုင်ငံကြက်ခြေနီအသင်းတို့၏ ပံ့ပိုးကူညီမှုဖြင့် မကွေးတိုင်းအတွင်းရှိ ရေဘေးသင့်ပြည်သူများကိုငွေသားထောက်ပံ့ နိုင်ခဲ့ကြောင်း မြန်မာနိုင်ငံကြက်ခြေနီအသင်းမှ သိရသည်။
မကွေးတိုင်း၊ ဆင်ဖြူကျွန်းမြို့အတွင်းရှိ ပြည်တော်သာကျေးရွာမှ အိမ်ထောင်စုပေါင်း (၁၂၆)စု၊ မြောက်ရှားတော ကျေးရွာမှ အိမ်ထောင်စုပေါင်း(၁၂၅)စုနှင့် မြို့ပေါ်ရပ်ကွက်များဖြစ်သည့် အမှတ်(၁)ရပ်ကွက်မှ အိမ်ထောင်စုပေါင်း (၁၀၁)စု၊ အမှတ်(၂)ရပ်ကွက်မှ အိမ်ထောင်စုပေါင်း(၇၇)စု၊ အမှတ်(၃)ရပ်ကွက်မှ အိမ်ထောင်စုပေါင်း(၁၆၈)စုဖြင့် စုစုပေါင်းအိမ်ထောင်စု(၅၉၇)စုအတွက် အိမ်ထောင်စု(၁)စုလျှင် ငွေသားကျပ် (၂)သိန်းစီဖြင့် စုစုပေါင်းငွေသား (၆၉,၂၀၀,၀၀၀)ကျပ် ကို ထောက်ပံ့ကူညီခဲ့ခြင်းဖြစ်သည်။
မကွေးတိုင်းဒေသကြီး ကြက်ခြေနီကြီးကြပ်မှုကော်မတီ ဥက္ကဌပါမောက္ခဒေါက်တာဒေါ်ချောခင်နှင့်စီမံချက်လုပ်ငန်းများ စီမံခန့်ခွဲမှု ယူနစ်ညွှန်ကြားရေးမှူး ဒေါ်အေးအေးငြိမ်းတို့ ဦးဆောင်မှုဖြင့် ဒေသခံကြက်ခြေနီစေတနာ လုပ်အားရှင်များနှင့် စီမံချက်လုပ်ငန်းများ စီမံခန့်ခွဲမှုယူနစ်မှ ဝန်ထမ်းများက သွားရောက်ကူညီဆောင်ရွက်ခဲ့သည် ဟုဆိုသည်။
အသင်းအနေဖြင့် ဆင်ဖြူကျွန်းမြို့နှင့်ကျေးရွာများအတွင်း ရေကြီးရေလျှံမှုများကြောင့် ထိခိုက်ခံစားခဲ့ရသည့် အိမ်ထောင်စုများ ‘ကန်သတ်ချက်မဲ့ငွေသားထောက်ပံ့ခြင်းအစီအစဉ်’ကိုဆောင်ရွက်ခဲ့ရာ နိုဝင်ဘာလ (၂၂)ရက်မှ ဒီဇင်ဘာလ (၂၃)ရက်နေ့အတွင်း အိမ်ထောင်စုပေါင်း(၁,၉၇၀)စုအတွက် စုစုပေါင်း ငွေသား (၃၉၄,၀၀၀,၀၀၀)ကျပ် ကို ထောက်ပံ့ပေးအပ်ခဲ့ပြီးဖြစ်ကြောင်း သိရသည်။
#Local_News #နိုင်ငံတကာကြက်ခြေနီအသင်း #ကျပ်သိန်း(၃၉၀၀)ကျော်ထောက်ပံ့ #tthl #Yangon_Times
