#Local_News
Published_ 29 August 2023
လန်ချန်း-မဲခေါင်ပူးပေါင်းမှုစီမံကိန်းအဖြစ် မန္တလေးနည်းပညာတက္ကသိုလ်နှင့်ကူမင်းသိပ္ပံနှင့်နည်းပညာတက္ကသိုလ်တို့ ပူးပေါင်းဆောင်ရွက်ခြင်းများ စတင်ဆောင်ရွက်သွားမည်ဖြစ်ကြောင်းမြန်မာနိုင်ငံဆိုင်ရာ တရုတ်သံရုံးမှသိရသည်။
အဆိုပါစီမံကိန်းကို လန်ချန်း-မဲခေါင်အဖွဲ့ဝင်နိုင်ငံတက္ကသိုလ်များအကြား သိပ္ပံနည်းပညာကူးလူးဖလှယ်ရေးပူးပေါင်း ဆောင်ရွက်မှုစီမံကိန်းအဖြစ် စတင်ဆောင်ရွက်ခဲ့ခြင်းဖြစ်သည်။
ယင်းစီမံကိန်းစတင်ခြင်း အခမ်းအနားကို ဩဂုတ်(၂၈)ရက်တွင်နေပြည်တော်၌ ကျင်းပခဲ့ပြီး အခမ်းအနားတွင် မြန်မာနိုင်ငံဆိုင်ရာတရုတ်သံရုံး နေပြည်တော်ဆက်သွယ်ရေးရုံးမှ ဌာနမှူး Mr. Zhang Zhonghuaက ‘ကူမင်းသိပ္ပံနှင့်နည်းပညာတက္ကသိုလ်နှင့် မန္တလေးနည်းပညာတက္ကသိုလ်တို့သည် စီမံကိန်းမှတစ်ဆင့် အပြန်အလှန်နားလည်သိရှိမှု တိုးများလာစေပြီး အသေးစိတ်ကဏ္ဍလက်တွေ့ကျပူးပေါင်းဆောင်ရွက်မှုကို တိုးမြှင့်ကာ တရုတ်-မြန်မာ ချစ်ကြည်ရင်းနှီးစွာပူးပေါင်းဆောင်ရွက်ရေးအတွက် အကျိုးထမ်းဆောင်ပေးသည့် အပြင် တရုတ်-မြန်မာအဆင့်မြင့်ပညာရေးကျောင်းများအကြား ပူးပေါင်းဆောင်ရွက်မှုအတွက် စံနမူနာဖြစ်လာရန် မျှော်လင့်ကြောင်း’ထည့်သွင်းပြောခဲ့သည်။
လန်ချန်း-မဲခေါင်ပူးပေါင်းဆောင်ရွက်မှုအထူးရန်ပုံငွေကို တရုတ်နိုင်ငံအစိုးရမှ အရင်းအနှီးစိုက်ထုတ်ထူထောင်ခဲ့ပြီး လက်ရှိတွင် မြန်မာနိုင်ငံက စီမံကိန်းပေါင်း(၁၀၆)ခုအတွက် ပံ့ပိုးမှုရရှိပြီးဖြစ်ကာ ယင်းအခမ်းအနားသို့တရုတ်နိုင်ငံမှ ဌာနမှူး Mr. Zhang Zhonghua နှင့်အတူ မြန်မာနိုင်ငံသိပ္ပံနှင့်နည်းပညာဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိန်းကျော်၊ လန်ချန်း-မဲခေါင်ပူးပေါင်းဆောင်ရွက်မှု ပူးပေါင်းညှိနှိုင်းရေးအဖွဲ့ (မြန်မာ) ဒုတိယဥက္ကဋ္ဌ ဦးဝင်းဇေယျာထွန်းတို့တက်ရောက်ခဲ့ကြောင်းသိရသည်။
#tthl #Local_News #မန္တလေး-ကူမင်းနည်းပညာတက္ကသိုလ်
#တရုတ်-မြန်မာအဆင့်မြင့်ပညာရေး #Yangon_Times
