#Local_News
Published 28 August 2023
မြွေဆိပ်ဖြေဆေးအေးခဲခြောက်ကို ယခုနှစ်မှစပြီး ယခင်ထက်နှစ်ဆတိုးပြီး ဆေးအလုံးရေ ၂သိန်းကျော်ထိထုတ်လုပ်မည်ဖြစ်ကြောင်း စက်မှုဝန်ကြီးဌာန မြန်မာ့ဆေးဝါးလုပ်ငန်းစက်ရုံ(အင်းစိန်) မှ သိရသည်။
ယခင်နှစ်များတွင် တစ်နှစ်လျှင်မြွေဆိပ်ဖြေဆေးအလုံးရေ တစ်သိန်းမှတစ်သိန်းနှစ်သောင်း အထိ ထုတ်လုပ်ခဲ့ရာ ယခုသြဂုတ်လတွင် မြေဆိပ်ဖြေဆေးထုတ်လုပ်သည့်စက်သစ်တစ်လုံး ထပ်မံတပ်ဆင်လိုက်သောကြောင့် ဖြေဆေးအလုံးရေတိုးမြင့် ထုတ်လုပ်နိုင်တော့မည်ဖြစ်ကြောင်း သိရသည်။
''လက်ရှိ အသုံးပြုနေတဲ့ စက်ကတစ်နှစ်ကို အလုံးရေတစ်သိန်းကနေ တစ်သိန်းနှစ်သောင်းလောက်ပဲ ထုတ်လုပ်နိုင်တယ်။ ကျွန်တော်တို့နိုင်ငံက စိုက်ပျိုးရေးနိုင်ငံဖြစ်တယ်၊ကျေးလက်နေပြည်သူလဲများတဲ့အတွက် မြွေဆိပ်ဖြေဆေး လိုအပ်ချက်များတယ်။ ဒါကြောင့် အခုဘဏ္ဍာနှစ်မှာ မြွေဆိပ်ဖြေဆေးအေးခဲခြောက်ထုတ်လုပ်တဲ့ စက်အသစ်ကိုတပ်ဆင်ပြီး အခုနှစ်မှာမြွေဆိပ်ဖြေဆေး နှစ်သိန်းကနေ နှစ်သိန်းလေးသောင်းအထိနှစ်ဆတိုးထုတ်လုပ်ပေးသွားမှာပါ'ဟု မြန်မာ့ဆေးဝါးလုပ်ငန်းမှ တာဝန်ရှိသူကပြောသည်။
မြေဆိပ်ဖြေဆေး အေးခဲခြောက်ထုတ်လုပ်နိုင်ရန်အတွက် လိုအပ်သည့်ဆေးဝါးကုန်ကြမ်းဖြစ်သော မြွေများကိုလည်း တစ်နိုင်ငံလုံးနေရာအနှံမှ ဝယ်ယူစုဆောင်းလျက်ရှိပြီး၊ မြင်းသွေးရည်ကြည်ရရှိရန်အတွက် မြင်းအကောင် ၅၀၀ ကို မှော်ဘီရှိဆေးဝါးထုတ်လုပ်ရေးဌာနခွဲတွင် မွေးမြူထားကြောင်း သိရသည်။
#YMG/LW #Local_News #မြွေဆိပ်ဖြေဆေး
#Yangon_Times
