#LocalNews
Published _16 October 2022
ထိုင်ဝမ်ရေလက်ကြား၌နစ်မြုပ်သည့် တောင်ကိုရီးယားသင်္ဘောပေါ်ပါ မြန်မာသင်္ဘောသားများအနက် တစ်ဦးသေဆုံးသွားကြောင်း maritimebulletin သတင်းဌာန၏ ရေးသားချက်ကို ကိုးကား၍ မြန်မာနိုင်ငံ ပင်လယ်ကူးသင်္ဘောသားများအသင်း(MOSA)၏ ဥက္ကဌ ဦးစိုးမင်းအောင်က အတည်ပြုပြောပြသည်။
"အဲဒီ သင်္ဘောပေါ်မှာ မြန်မာနိုင်ငံသားသင်္ဘောသား ၁၈ ယောက် နဲ့ နောက် တခြားနိုင်ငံခြားသား နှစ်ယောက်ပါတယ်။သင်္ဘောက နစ်မြုပ်တော့ ကယ်ဆယ်ရေးတွေ လုပ်ကြတယ်။နစ်မြုတ်သူတွေကို ကယ်တင်တာလုပ်ပြီး ပို့ဆောင်နေတာတွေလုပ်နေတုန်း မြန်မာသင်္ဘောသားအရာရှိတစ်ယောက်က လမ်းမှာ ဆုံးသွားတယ်၊အခုကတော့ အသက်ရှင်လျက် ကျန်သူတွေရော ၊ သေဆုံးသွားတဲ့ တစ်ယောက်ကိုပါ နီးစပ်ရာ ဆေးရုံမှာ ပို့ဆောင်ထားတယ်လို့ ကနဦးသိရတယ်။သေဆုံးသူကိုတော့ Mortuary မှာထားမှာပေါ့"ဟု ယင်းကပြောသည်။
သေဆုံးသည့် သင်္ဘောသားမှာ အသက် ၄၀ ကျော် အရွယ်ရှိ Chief Officer ကိုတင်မောင်ဦးဆိုသူဖြစ်ကာ လူပျိုတစ်ဦးဖြစ်ကြောင်း ၊ ယင်းအတွက် မြန်မာနိုင်ငံဘက်က မိသားစုနှင့် ဆက်သွယ်လုပ်ဆောင်နေပြီဖြစ်ကြောင်းလည်း သိရသည်။
နစ်မြုပ်သွားသော အဆိုပါ သင်္ဘောမှာ တောင်ကိုရီးယား WOOSHIN Marine လိုင်းက Kelsey 2 ရေနံတင်သင်္ဘောဖြစ်ပြီး အောက်တိုဘာလ ၁၄ ရက်ကတည်းက သင်္ဘောတွင် ပြဿနာရှိနေသည့်အတွက် အရှိန်လျော့ထားခဲ့ရကြောင်း၊ထိုင်ဝမ်ရေလက်ကြား၊ Wuqui ကျွန်း၏တောင်ဘက် 25nm မီတာအရောက် တဖြည်းဖြည်း အင်ဂျင်ခန်းကို ရေဝင်ကာ အောက်တိုဘာလ ၁၅ ရက် နံနက်က နစ်မြုပ်ခြင်းဖြစ်ကြောင်း သိရသည်။
ရေနံတင်သင်္ဘောသည် ဟောင်ကောင်မှ ဂွန်ဆန်ကိုရီးယား လမ်းကြောင်းပေါ်၌ ရေနံနှင့် ဓာတုပစ္စည်းများ စုစုပေါင်း တန်ချိန် ၇,၅၀၀ တင်ဆောင်ကာ အောက်တိုဘာလ ၁၆ ရက်ထိ ခရီးစဉ်ပြေးဆွဲသည့်သင်္ဘောဖြစ်ကြောင်း သိရသည်။
ymg/mt
#Yangon_Media_Group
