#LocalNews
Published 21 Aug 2022
ရှမ်းပြည်နယ်( အရှေ့ပိုင်း)တာချိလိတ်မြို့ တွင် ဩဂုတ်လအတွင်း မိုးများအဆက်မပြတ်ရွာသွန်းမှုများကြောင့် ရေကြီးရေလျှံမှုဖြစ်ပေါ်ခဲ့ရာမှ တင်ကျန်ရစ်ခဲ့သော ရွှံ့နွံများကို စည်ပင်သာယာရေးဌာနမှ ဆက်လက်ရှင်းလင်းလျက်ရှိကြောင်း သိရှိပါတယ်။
ဩဂုတ်လ ၁၁ ရက်နှင့် ၁၂ ရက်နေ့တို့၌ မိုးများအဆက်မပြတ်ရွာသွန်းမှု၊မြို့၏အထက်ပိုင်းများတွင် မိုးများအဆက်မပြတ်ရွာသွန်းမှုများကြောင့် တောင်ကျရေများနှင့်အတူ တာချီလိတ်မြို့ပေါ်ရပ်ကွက်( ၈) ရပ်ကွက်အပြင်မြို့၏ ဆင်ခြေဖုံးကျေးရွာအုပ်စုများတွင်လည်း ရေကြီးရေလျှံမှုနှင့် နေအိမ်များအတွင်းရေဝင်ရောက်မှု၊ပစ္စည်းဆုံးရှုံးထိခိုက်မှုများနှင့် ရင်ဆိုင်ကြုံတွေ့ခဲ့ရကြောင်းသိရပါတယ်။
ရေကြီးရေလျှံမှုဖြစ်ပေါ်လျင်ဖြစ်ပေါ်ချင်း တာဝန်ရှိသူများက အရေးပေါ်ကယ်ဆယ်ရေးအဖွဲ့များဖွဲ့စည်းကာ လုပ်ငန်းကိုအကောင်အထည်ဖော်ဆောင်ရွက်ခဲ့ကြရာ၌ နယ်မြေခံတပ်မတော်သားများ၊ဌာနဆိုင်ရာများ၊လူမှုကူညီရေးအသင်းအဖွဲ့များ၊ပြည်သူများအပြင် လုပ်ငန်းရှင်များ၏စက်ယန္တရားများအသုံးပြု၍ ကယ်ဆယ်ရေးလုပ်ငန်းများကို ဆောင်ရွက်ပေးခဲ့တာဖြစ်ပါတယ်။
ရေကြီးရေလျှံမှု ပြန်လည်ကျဆင်းပြီးနောက် လမ်းမကြီးများနှင့်ရပ်ကွက်များအတွင်း တင်ကျန်ရစ်ခဲ့သော အမှိုက်များ၊ရွှံ့နွံများကို တာဝန်ရှိသူများက ဆက်လက်ရှင်းလင်းလျက်ရှိရာ ဩဂုတ် ၁၉ ရက်နေ့တွင်လည်း ပုန်းထွန်ရပ်ကွက် ဗိုလ်ချုပ်လမ်းမကြီးတစ်လျောက်နှင့် ဗေဒါလမ်းတစ်လျှောက်တို့တွင် ရှင်းလင်းပေးခဲ့ကြောင်းသိရှိရပါတယ်။
YMG/ys-tcl
#Yangon_Media_Group
