နေပြည်တော်၊ စက်တင်ဘာ ၂၁

လယ်ယာနှင့် မွေးမြူရေးကဏ္ဍကို ရိုးရာထုတ်လုပ်မှုစနစ်မှ ခေတ်မီ၊ ထိရောက်ပြီး ရေရှည်တည်တံ့သည့် ထုတ်လုပ်မှုစနစ်သို့ ပြောင်းလဲကာ ကုန်ကြမ်းအဆင့်မှ တန်ဖိုးမြှင့်ထုတ်ကုန်၊ စက်မှုလုပ်ငန်းနှင့် ပြည်တွင်း၊ ပြည်ပဈေးကွက်အထိ တန်ဖိုးကွင်းဆက်တစ်လျှောက် ချိတ်ဆက်ဖော်ဆောင်၍ နိုင်ငံ့ထုတ်ကုန်နှင့် ပြည်သူ့ဝင်ငွေ တိုးတက်စေရန် ဆောင်ရွက်သွားကြရမည်ဟု နိုင်ငံတော်သမ္မတ ဦးမင်းအောင်လှိုင်က ပြောကြားသည်။

နိုင်ငံတော်သမ္မတက စက်တင်ဘာ ၂၁ ရက် နံနက်ပိုင်းတွင် နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန-၁ (MICC-1) ၌ ကျင်းပသည့် “လယ်ယာကဏ္ဍ ဖွံ့ဖြိုးတိုးတက်မှုမှသည် နိုင်ငံ့ထုတ်ကုန် တိုးတက်မှုသို့” အမျိုးသားအဆင့် အလုပ်ရုံဆွေးနွေးပွဲတွင် အဖွင့်အမှာစကား ပြောကြားရာ၌ ယင်းသို့ ထည့်သွင်းပြောကြားခဲ့ခြင်းဖြစ်သည်။

နိုင်ငံတော်သမ္မတက မြန်မာနိုင်ငံ လူဦးရေ၏ ၇၀ ရာခိုင်နှုန်းခန့်သည် ကျေးလက်ဒေသများတွင် နေထိုင်ကြပြီး အလုပ်လုပ်ကိုင်သူများအနက် ၅၀ ရာခိုင်နှုန်းကျော်သည် လယ်ယာ၊ သားငါးနှင့် သစ်တောကဏ္ဍတို့တွင် လုပ်ကိုင်နေကြသဖြင့် ကျေးလက်နေပြည်သူများ၏ ဝင်ငွေတိုးတက်ရေးသည် အရေးကြီးကြောင်း ပြောသည်။

လယ်ယာကဏ္ဍ ဖွံ့ဖြိုးတိုးတက်ရေးကို စိုက်ပျိုးထုတ်လုပ်မှုပမာဏ တိုးမြှင့်ရေးအဖြစ်သာ မမြင်သင့်ဘဲ ထုတ်လုပ်မှု၊ ကုန်ကြမ်း၊ ပြုပြင်ထုတ်လုပ်မှု၊ တန်ဖိုးမြှင့်ထုတ်ကုန်၊ စက်မှုလုပ်ငန်း၊ ပြည်တွင်းစားသုံးမှုနှင့် ပြည်ပပို့ကုန်အထိ တန်ဖိုးကွင်းဆက်တစ်ခုလုံးကို ချိတ်ဆက်စဉ်းစားရန် လိုအပ်ကြောင်း နိုင်ငံတော်သမ္မတက ဆိုသည်။

ယင်းသို့ ဆောင်ရွက်နိုင်ပါက တောင်သူများ၏ ဝင်ငွေတိုးတက်လာခြင်း၊ အလုပ်အကိုင်အခွင့်အလမ်းများ တိုးပွားလာခြင်း၊ ပြည်တွင်းကုန်ထုတ်လုပ်မှုနှင့် ပို့ကုန်တိုးတက်လာခြင်းတို့မှတစ်ဆင့် နိုင်ငံ့ထုတ်ကုန်နှင့် စီးပွားရေးတိုးတက်လာနိုင်မည်ဟု ပြောကြားသည်။

လက်ရှိကာလတွင် အခြေခံစားသောက်ကုန်ဈေးနှုန်းများ မြင့်တက်နေခြင်းသည် ပြည်သူများ၏ နေ့စဉ်ဘဝအတွက် စိန်ခေါ်မှုဖြစ်နေပြီး ယင်းမှာ ထုတ်လုပ်မှုနှင့် စားသုံးမှု မမျှတခြင်း၊ ထုတ်လုပ်မှုကုန်ကျစရိတ်နှင့် သယ်ယူပို့ဆောင်ရေးစရိတ် မြင့်မားခြင်းတို့နှင့် သက်ဆိုင်နေကြောင်း နိုင်ငံတော်သမ္မတက ပြောသည်။ ထို့ကြောင့် စားနပ်ရိက္ခာထုတ်လုပ်မှု ပမာဏတိုးမြှင့်ကာ ပြည်တွင်းလိုအပ်ချက်ကို လုံလောက်စွာ ဖြည့်ဆည်းနိုင်ရေး လိုအပ်ကြောင်း ထည့်သွင်းပြောကြားသည်။

နိုင်ငံတော်သမ္မတက ၂၀၂၅-၂၀၂၆ ဘဏ္ဍာနှစ်တွင် စပါးစိုက်ဧက စုစုပေါင်း ၁၇ ဒသမ ၄ သန်းခန့်ရှိပြီး ပျမ်းမျှအထွက်နှုန်း ၈၅ တင်းခန့်သာရှိကြောင်း၊ ပန်းတိုင်အထွက်နှုန်းအတိုင်း ထုတ်လုပ်နိုင်ပါက လက်ရှိထက် အမေရိကန်ဒေါ်လာ ၃ ဘီလီယံခန့် ပိုမိုရရှိနိုင်မည်ဖြစ်ကြောင်း ပြောသည်။

ထို့ပြင် နိုင်ငံတော်က အားပေးစိုက်ပျိုးနေသည့် သီးနှံကိုးမျိုးကို ဒေသအလိုက် ရာသီဥတုနှင့် မြေအမျိုးအစားအရ သင့်လျော်သည့်နေရာများတွင် တိုးချဲ့စိုက်ပျိုးကာ ပန်းတိုင်အထွက်နှုန်းရရှိအောင် ဆောင်ရွက်နိုင်ပါက ပို့ကုန်ဝင်ငွေ အမေရိကန်ဒေါ်လာ ၆ ဒသမ ၅ ဘီလီယံခန့် ပိုမိုရရှိနိုင်မည်ဟု ဆိုသည်။

စားသုံးဆီကဏ္ဍတွင် မြေပဲ၊ နှမ်း၊ နေကြာ၊ ပဲပုပ်နှင့် ဆီအုန်းကဲ့သို့ ဆီထွက်သီးနှံများကို ဒေသအလိုက် တိုးချဲ့စိုက်ပျိုးရန်၊ ထုတ်လုပ်မှုကုန်ကျစရိတ် လျှော့ချရန်နှင့် စားအုန်းဆီတင်သွင်းမှုကို အဆင့်လိုက်လျှော့ချနိုင်ရေး ဆောင်ရွက်ရန် လိုအပ်ကြောင်း နိုင်ငံတော်သမ္မတက ပြောသည်။

ထို့အပြင် ဆန်စပါးမှ ထွက်ရှိသည့် ဖွဲနု၊ ဖွဲကြမ်း၊ ဆန်ကွဲနှင့် စပါးခွံကဲ့သို့ ဘေးထွက်ပစ္စည်းများကို စားသုံးဆီ၊ တိရစ္ဆာန်အစာနှင့် လောင်စာအဖြစ် ပြန်လည်အသုံးချနိုင်ပြီး ထုတ်ကုန်တစ်မျိုးတည်းအပေါ် မူတည်ခြင်းမဟုတ်ဘဲ ဘေးထွက်ပစ္စည်းများကိုပါ တန်ဖိုးဖန်တီးအသုံးချရန် လိုအပ်ကြောင်း ဆိုသည်။

မွေးမြူရေးကဏ္ဍနှင့်ပတ်သက်၍လည်း ကြက်၊ ဝက်၊ ဆိတ်၊ နွားနှင့် ငါးမွေးမြူရေးတို့တွင် မျိုးကောင်းမျိုးသန့်၊ အစာစရိတ်၊ နည်းပညာနှင့် ဈေးကွက်ချိတ်ဆက်မှုတို့ကို မြှင့်တင်ကာ ပြည်တွင်းစားသုံးမှုလိုအပ်ချက် ဖြည့်ဆည်းနိုင်ရေးနှင့် ပိုလျှံထုတ်ကုန်များကို ပြည်ပဈေးကွက်သို့ တင်ပို့နိုင်ရေး ရည်မှန်းဆောင်ရွက်ရန် လိုအပ်ကြောင်း ပြောသည်။

လယ်ယာထွက်ကုန်များကို ကုန်ကြမ်းအတိုင်း ရောင်းချခြင်းထက် Agro-based Industries များ ဖွံ့ဖြိုးတိုးတက်အောင် ဆောင်ရွက်ရန်လိုပြီး ဆန်၊ ပဲ၊ ဆီထွက်သီးနှံ၊ ဝါ၊ ဝါး၊ ကော်ဖီနှင့် သစ်သီးဝလံများကို ပြုပြင်ထုတ်လုပ်ခြင်း၊ ထုပ်ပိုးခြင်း၊ အရည်အသွေးမြှင့်တင်ခြင်းနှင့် အမှတ်တံဆိပ် ဖော်ဆောင်ခြင်းတို့မှတစ်ဆင့် တန်ဖိုးမြင့်ထုတ်ကုန်များအဖြစ် ပြောင်းလဲထုတ်လုပ်ရန် လိုအပ်ကြောင်း နိုင်ငံတော်သမ္မတက ပြောသည်။

ဒေသတစ်ခုချင်းစီ၏ သဘာဝအရင်းအမြစ်၊ ရာသီဥတုနှင့် မြေဆီလွှာဆိုင်ရာ အားသာချက်များကို အခြေခံ၍ One Region One Product (OROP) ပုံစံဖြင့် ဒေသထွက်ကုန်များကို ရွေးချယ်ကာ အရည်အသွေးမြှင့်တင်ခြင်း၊ တန်ဖိုးမြှင့်ထုတ်လုပ်ခြင်း၊ အမှတ်တံဆိပ်ဖော်ဆောင်ခြင်းနှင့် ပြည်တွင်း၊ ပြည်ပဈေးကွက်ချိတ်ဆက်ခြင်းတို့ကို စနစ်တကျ ဆောင်ရွက်နိုင်ကြောင်းလည်း ဆိုသည်။

နိုင်ငံတော်သမ္မတက အလုပ်ရုံဆွေးနွေးပွဲမှ အခြေအနေသုံးသပ်ချက်များသာမက ဦးစားပေး ဆောင်ရွက်ရမည့် ကဏ္ဍများ၊ မဟာဗျူဟာလုပ်ငန်းစဉ်များ၊ နှစ်တိုနှင့် နှစ်လတ်လုပ်ငန်းစီမံချက်များ၊ တာဝန်ယူမည့်အဖွဲ့အစည်းများ၊ ဘဏ္ဍာရေးနှင့် ရင်းနှီးမြှုပ်နှံမှု၊ နည်းပညာနှင့် လူ့စွမ်းအားအရင်းအမြစ် လိုအပ်ချက်များ၊ ဈေးကွက်နှင့် ပို့ကုန်ချိတ်ဆက်ရေး နည်းလမ်းများ ပါဝင်သည့် လက်တွေ့အကောင်အထည်ဖော်နိုင်သော Action Plan များ ထွက်ပေါ်လာရန် လိုအပ်ကြောင်း ပြောကြားသည်။

ယင်းလုပ်ငန်းစဉ်များ အောင်မြင်ရေးအတွက် အစိုးရ၊ တောင်သူလယ်သမားများ၊ ပုဂ္ဂလိကကဏ္ဍ၊ စက်မှုလုပ်ငန်းရှင်များ၊ ကုန်သည်များ၊ ဘဏ်နှင့် ငွေရေးကြေးရေးအဖွဲ့အစည်းများ၊ တက္ကသိုလ်များ၊ သုတေသနအဖွဲ့အစည်းများနှင့် နည်းပညာရှင်များ ပူးပေါင်းဆောင်ရွက်ရန် လိုအပ်ကြောင်း နိုင်ငံတော်သမ္မတက တိုက်တွန်းပြောကြားခဲ့သည်။

အခမ်းအနားသို့ သက်ဆိုင်ရာ တာဝန်ရှိသူများ၊ စီးပွားရေးလုပ်ငန်းရှင်များ၊ ပညာရှင်များနှင့် ဖိတ်ကြားထားသူများ တက်ရောက်ခဲ့ကြပြီး အခမ်းအနားအပြီးတွင် အလုပ်ရုံဆွေးနွေးပွဲအထိမ်းအမှတ် ပြခန်းများကို လှည့်လည်ကြည့်ရှုခဲ့ကြောင်း သိရသည်။