#Local_News
Published 30 August 2025

▪️ ချင်းမိုင်မြို့၌ ဖွင့်လှစ်ထားရှိသည့် CI စခန်းတွင် တစ်နေ့လျှင် အများဆုံး မြန်မာနိုင်ငံသား (၈၀၀) ဦးကျော်ကို CI သက်တမ်းတိုး ဝန်ဆောင်မှုပေးလျက်ရှိပြီး CI စခန်းစတင်ဖွင့်လှစ်သည့် ၆-၈-၂၀၂၅ ရက်မှ ၂၉-၈-၂၀၂၅ ရက်အထိ ဝန်ဆောင်မှုရယူခဲ့သူ မြန်မာနိုင်ငံသားပေါင်း (၁၂,၀၉၁) ကျော်ရှိပြီဖြစ်ကြောင်း ဘန်ကောက်မြို့ရှိ မြန်မာသံရုံးမှသိရသည်။

▪️ ထိုင်းနိုင်ငံ၊ ချင်းမိုင်မြို့၌ ဖွင့်လှစ်ထားရှိ သော CI စခန်းသို့ ပြည်ထောင်စု သမ္မတ မြန်မာနိုင်ငံတော် ကောင်စစ်ဝန်ချုပ်ရုံး၊ ချင်းမိုင်မြို့မှ ကောင်စစ်ဝန်ချုပ် ဦးမင်းကျော်လင်း သည် ထိုင်းနိုင်ငံရှိ ချင်းမိုင်၊ ချင်းရိုင်၊ မယ်ဟောင်ဆောင်၊ လန်ပန်း၊ လန်ဖွန်း၊ နန်၊ ဖရဲ့၊ ဥဿရာဒစ်၊ ဆူခိုထိုင်း ခရိုင်များနှင့် မဲဆောက်မြို့တို့တွင် ရောက်ရှိ အလုပ်လုပ်ကိုင်လျက်ရှိသည့် မြန်မာနိုင်ငံသား အလုပ်သမားများအား မည်သူမည်ဝါဖြစ်ကြောင်း သက်သေခံလက်မှတ် (Certificate of Identity- CI) ထုတ်ပေးနိုင်ရန်အတွက် ၂၉-၈-၂၀၂၅ ရက်တွင် သွားရောက်ကြည့်ရှုစစ်ဆေးခဲ့ကြောင်း သိရသည်။

▪️ ကောင်စစ်ဝန်ချုပ်အား CI စခန်းတာဝန်ခံနှင့် ဝန်ထမ်းများက ကြိုဆိုနှုတ်ဆက်ခဲ့ကြပြီး CI ထုတ်ပေးရေးလုပ်ငန်းစဉ်များနှင့်ပတ်သက်၍ ရှင်းလင်းတင်ပြခဲ့ရာ ကောင်စစ်ဝန်ချုပ်က CI စာအုပ် ရယူကြသည့် မြန်မာနိုင်ငံသားများ၏ အချက်အလက်များ မှန်ကန်မှုရှိရေးနှင့် CI ထုတ်ပေးရေး လုပ်ငန်းစဉ်များ လွယ်ကူချောမွေ့မြန်ဆန်မှုရှိစေရေးတို့ကို သေချာစွာဆောင်ရွက်ရန် အလေးပေးမှာကြားခဲ့ပြီး CI စခန်းတွင် လုပ်ကိုင်လျက်ရှိသည့်ဝန်ထမ်းများ၏ ဝန်ဆောင်မှုပေးရာတွင် ကြုံတွေ့ရသည့် အခက်အခဲများအပေါ် ပေါင်းစပ်ညှိနှိုင်းပေးခြင်းနှင့် အကြံပြုချက်များ ရှင်းလင်းပြောကြားခြင်းတို့ကို ဆောင်ရွက်ခဲ့ကြောင်းသိရသည်။

#YMG/SW #Yangon_Times